kabulist的个人专页

喺港大返工已經有一年幾，一直食開同一間連鎖店食到已經好頹廢，聽同事講開咗間新餐廳，於是忍唔住就即刻試咗。餐廳門口嘅餐牌列晒一個星期有邊款食物，星期五有鰻魚飯同埋另外兩款意粉，我揀咗鰻魚飯再加多$13要杯熱latte。鰻魚飯不過不失，份量適中，不過餐廳環境相當舒服，可能因為疫情期間營業，所以大部份嘅座位都係二人座位，如果之後座位可以有三至四人座位會更加好。…查看更多

因為之前YouTube睇片有介紹呢間餐廳，所以就同朋友嚟幫襯。星期日中午去到，餐廳人流都算多。餐廳餐牌有分兩種，第一種係比較中式，多數係蒸飯之類，第二種就係比較西式例如有All day, 意粉，沙律。我叫咗一個雞扒配沙律再加多$18杯凍latte。雞扒大件夾抵食，加埋沙律菜，滿足我想食肉嘅慾望同時都感覺上比較健康。不過呢間餐廳最大嘅特點係你喺度幫襯一個餐，佢就會免費提供一個餐比有需要嘅人士。所以呢一餐付予左另一層意義。…查看更多

沙田區比較少黃店，呢間黃店個人認為係沙田區來講算係一流。因為疫情嘅關係所以佢採取外賣九折嘅優惠，而我就選擇堂食。叫咗蒜香牛油雞翼同埋法式芝心蝦餅，牛油雞翼外皮炸得卜卜脆，雖然牛油味唔重，但勝在剛炸起，皮有濃郁嘅蒜香味。之後芝心蝦餅真係令人有驚喜，咬落去裏面嘅芝士餡會流出黎，並唔係得芝士味嘅餡餅，一樣都係啱啱炸起新鮮熱辣辣。下次再去沙田區一定會再幫襯！…查看更多

土瓜灣因為地鐵尚未起好，所以租金較平，因此好多有心人士喺度經營高質餐廳，所以放假嘅時候都會去土瓜灣覓食。呢間餐廳嘅侍應都好友善，一入門口就已經主動同我哋傾偈，而餐廳嘅電視永遠都係播放飛鏢比賽嘅片😂。叫咗安格斯牛肉漢堡，牛肉係採用5成熟，一咬落去有入口即溶嘅感覺，配上蘑菇洋蔥，可以減去牛肉本身嘅油膩感同埋自己嘅罪惡感，因為食材比較新鮮所以唔需要太多嘅調味醬汁。而薯條份量相當充足，配上前菜沙律同埋咖啡，呢一餐食得相當滿意。…查看更多

因為經過附近，見到出面有頗多人排隊，於是就決定排埋一份。店舖裝潢以懷舊做主題，所以採用原木暗色為主調。雖然係冰室，但下午茶以西式同日式為主，並唔似一般茶餐廳下午茶。叫咗煙三文魚蜆肉天使麵，三文魚份量正常，白汁煮得濃郁，不過可惜蜆肉分比較少，但係天使麵都算份量充足。40幾蚊一個下午茶來講算相當飽肚，相等於午餐嘅份量。希望下次可以試吓佢嘅晚餐！…查看更多

因為見到呢間台灣鋪好評如潮，所以決定同朋友收工之後黎試試.店舖牆身全部都係以台灣景點作為背景，例如有九分、高美濕地、墾丁同埋阿里山。因為疫情嘅關係，已經差唔多成年冇得去旅行，見到呢啲相真係恨不得即刻飛去台灣。叫咗滷水豆腐、鹽酥雞同埋水果茶。滷水豆腐嫩滑兼相當入味，鹽酥雞炸得香口、皮肉都唔會分離，而且唔乾身，相當出色。之後水果茶裏面有蘋果同埋奇異果， 十分清甜。個人認為呢間鋪係賣台式人情味，因為連店員都係台灣人，服務都相當貼心！…查看更多

因為咁岩經過沙田,見德美一直都係好評如潮,所以就決定黎試下, 因為係7點前已經入左座,所以就好好彩咁唔洗排!叫左一串 串燒雞皮,一串大蔥雞串,同埋一個鍋燒烏冬, 雞皮烤到脆卜卜, 鍋燒鳥冬材料相當多, 有炸蝦天婦羅, 竹輪, 菇, 嗚門卷,蟹柳, 湯底鮮甜。下次都會再幫襯!…查看更多

之前見fb 有推介,所以專程同fd 黎食。晚市時間味見滿座,但我地都照入,叫左個牛肩肉扒 同 肉眼扒，加10蚊配湯, 蒜茸包同飲品。兩塊扒上個陣配熱石板,可以自己根據喜好而調節熟度,都可以叫幾有特色。但好可惜兩塊扒可能我地烤得耐,幾乎全熟咁,而且好多筋,好似食緊橡筋咁,我地要咬得相當用力,最後都求其吞左落去算。總結唔需要專程幫襯, 係一個正常做街坊生意既餐廳。…查看更多

同fd 行到三點幾見餓餓地,咁岩見到呢間餐廳既menu 就決定上黎幫襯。餐廳裝修以藍白為主題,好有渡假同海洋風情。門口貼滿哂文宣同提供memo 紙,餐廳正中既臺面都放滿連豬,佈置得相當有心思!我叫左杯凍奶茶同炸薯格,薯格份量真係超多,岩岩炸起又熱又脆,好好食! 而且位置闊落,坐得舒服，岩同fd 一齊吹水同放鬆下!…查看更多

因為見雜誌推介,加上係黃店,所以決定同fd 去牛頭角試一試。因為餐廳主打蛋餅,所以我地就叫左一個煙三文蛋餅,同burger,飲品方面就叫左佢地既特色飲品T black. T black 係以咖啡溝可樂,所以一入口係會有可樂既爽口配上咖啡既澀味,都相當特別。而煙三文魚蛋餅餡主要有薯仔,洋蔥,芝士,蛋。 相信薯仔控會對佢十分迷戀,因為薯味十足,配上拉絲效果,帶卑食客視覺同味覺既雙重享受。burger 用黑色面包皮,外形相當特別,餡有一塊蕃茄,牛肉,沙律菜,配上適量芝士,餡唔算多,但勝在夠清新,食完唔會有油膩感。餐廳牆身全部都係書頁,所以好有文青風,天花板都吊左好多本書,睇到出店主真係花左好多心思。建議如果想黎食可以早少少,因為一點後就開始要排隊!…查看更多

因為襯依家lunch buffet 特價關係,所以今次team lunch 我地揀左食香格里拉。cafe too lunch buffet 主打面包蟹,所以我地一開波就食蟹同蟹腳。 蟹腳有鮮味,食落唔會似一般餐廳 咁咁大陣鹽水味, 可能我本身都唔太好海鮮,所以都係食左一件面包蟹,但都啖啖肉。之後就食好多人推介既小籠包,當然冇得同鼎泰豐比,但都皮薄,肉汁鮮美。cafe too最出色係甜品,款式多,但甜品匙係要額外問待應拎,呢件事令我同同事都嚇左一跳。但總體以人均三百幾蚊既價錢可以食到咁靚既環境同服務係一流!…查看更多

今日收工見冇野做就黎左深水埗搵野食。途經福榮街見呢間鋪裝修新淨,價錢合理,於是就試下新野。菜式選擇都相當多,我就叫左個餐廳推介既燒芝士咖喱吉列豬排飯。當咖喱飯上擡個陣仲係熱騰騰,而芝士係主要集中係中間,咖喱汁就舖係周圍,汁同芝士份量唔算多,所以食落去有些少淡。豬排份量十足,炸得都相當厚實,飯量都相當足,食完會有種好飽好滿足既感覺! …查看更多

今日係限聚令放寬既第一日,於是同fd 一齊去左尖沙咀the one 搵野食。 可能係星期五同疫情冇咁嚴重關係,多左好多人食飯,我地於是搵左間相對冇咁多人排隊既餐廳食。我叫左一個炸豬排餐,包豬排飯同海藻烏冬,一杯紅茶同一個迷你蛋卷, 豬排炸得好鬆軟同厚身,紅茶採用斯里蘭卡紅茶,所以相當回甘。之後最出色係抹茶蛋卷,茶味清香,同好濃郁,但可惜有d細。…查看更多

諗起好耐冇食潮州野,所以就決定過九龍城試呢間新野.由於疫情關係,鋪頭晚市都冇咩人,我地被安排上二樓食飯.因為得我同男朋友兩個人食,所以叫左一個潮式蠔餅同椒鹽鮮魷,蠔餅真心足料飽滿,,每夾一下都包住好幾粒蠔仔,粒粒都充滿鮮味, 因為即炸關係,所以都好脆口.椒鹽鮮魷表面灑上淑鹽同炸蒜調味, 外脆內嫩,一咬落口鮮魷唔會咬唔開,點埋喼汁更加惹味!…查看更多

每次黎親都一定會叫麵鼓照燒雞排蕃茄手打烏冬,次次食親都係蕃茄味濃郁,烏冬質地煙韌,不過雞扒燒得有d 乾身,但整體都好好食!如果跟set 會包埋野飲, 一個餐大概60左右,所以真係好抵食!…查看更多