朋友聚會, 之前試過唔同嘅米之蓮餐廳, 好多味道都不似預期, 今次明閣比預期好味, 不負一星美譽。首先上檯嘅明閣八小碟同七味金磚豆腐, 味道唔錯, 其中燒腩仔皮脆肉嫩, 而豆腐就做到外脆內軟, 八小碟嘅份量都幾多, 食完已經飽咗一半。一場嚟到, 梗係要試埋個蟹蓋, 蟹肉都多, 但味道就不過不失, 個人覺得試一次就夠。同行朋友對爵士湯同花膠雞絲羹都感興趣, 於是每樣都叫咗個, 爵士湯夠甜, 雞絲羹好濃味, 果然係濃湯🤤 另外仲有個清淡嘅菜膽竹笙清燉松茸, 有比較之下, 我都係鐘意濃味嘅雞絲羹😬之後仲叫咗炸子雞, 羊腩煲, 豆腐煲 同 鵝肝A5和牛炒飯。炸子雞皮夠脆, 肉入味。羊腩煲唔太羶, 肉炆到好淋, 有入口即溶嘅感覺。和牛炒飯炒得夠乾身, 粒粒分明, 香味撲鼻。反而個豆腐煲無特別, 可以不試。最後叫埋甜品, 為愉快啲聚會劃上完美的句號。…查看更多
