or#tm67128520的个人专页

呢間店岩岩開嗰時一直想試，過左無耐已經少左好多人排隊。搵左嗰中午時間嚟食，成間店得包括我在內兩枱客，一坐低張枱都係污糟既，碗未執啲紙巾麵都仲黐住喺張枱度。明明嗰陣時無乜客點解唔做好啲衛生？坐低嗌左碗嚟食真係失望，其實預左但係無諗過咁差，我嗌中辣但係淡到似清湯，啲麵又硬，講真返屋企自己煮都好食過佢N倍。智商稅 雖然香港飲食業唔容易，但係收得咁既價錢係唔應該出啲咁既嘢食出嚟。只能講未到好難食，至少呑到入口。…查看更多

之前睇網上推薦睇落好似好吸引好食，所以就特登嚟到長沙灣一探究竟。我同我朋友係7點去食，食到8點幾，一直都仲有位剩既，唔算話好旺場。 首先，我哋嗌左呢度既招牌海南雞飯，好期待以為會有驚喜，不過其實啲雞係好普通水準，啲醬又冇話好特別同入味，唯一讚下係嗰油飯係幾好食既，食落去口感幾綿密。 之後就嗌左嗰海南豬扒叻沙摻摻，食落淨係諗到一個字——淡，就算淨係飲湯都覺得淡，入邊既配料都係好一般。我印象中既叻沙湯應該係好濃郁甜得嚟又帶點咸，呢個食落似公仔麵feel冇乜味。 再嚟，嗌左嗰鮮油咖吔多士，可能我哋擺凍左，我就覺得冇咁好食了，但係我朋友係話好食既，不過就唔係好岩我，我覺得中間嗰兩塊牛油太甜有啲漏。then 加20幾蚊加左個魷魚通菜食落幾爽口，不過都係中規中矩，菜炒得唔夠辣，食落冇話好過癮。 嘢飲方面嗌左一杯奶茶同咖啡，咖啡係冇乜味的，奶茶就ok水準，不過不失。杯奶茶入邊有隻烏蠅，err不過我覺得好小事就冇話換，喺屋企煮公仔麵都有可能會有「不速之客」，唔係曱甴我都費事麻煩人，飲食業都唔容易，所以我當係補充蛋白質，我朋友不停阻止叫我唔好飲😂😂 總體嚟講，呢間就係好普通，我朋友就畀6-7分冇乜驚喜，我就比5-6分，可能因為我本身對佢期望太高，但係食落就係同我樓下茶餐廳差唔多，甚至可能我樓下嗰間仲更勝一籌。冇話難食，但冇網上講到咁好，咁多好評令我匪夷所思，但係我哋嗌左咁多都係200蚊埋單，我覺得算係抵食既，只係你唔可以expect佢會令你覺得有驚喜。…查看更多

突然想同朋友食韓國餐廳，見到呢間幾多好評，同埋啲相好似好吸引咁，於是就踩上去試食了。 我哋7點去食，咁上到去係無乜客，後尾8點幾就開始多人。我哋嗌左嗰部隊鍋，同埋芝士甜辣烤雞，一杯mocha。 首先，我同朋友成日都覺得用幾百蚊去食煲公仔麵好似啲水魚行為，但係人生志在嘗試，所以我哋都係當係第一次體驗。佢一上嚟嗰顔色就有啲不妙，我哋印象中既部隊鍋係紅紅哋既，佢係芝士湯咁，飲左一啖湯發現同我平時食開既芝士公仔麵湯底係無乜差別。差唔多200蚊但係得少少餸，一啲腸、一條金針菇，同埋少少午餐肉，其實唔係好抵，但係我嗰frd話全場Mvp係舊午餐肉。不過都話勇於嘗試係好事，呢個都係試過一次就算，想食都係返屋企煮公仔麵算，真係相差無幾。 之後，嗰芝士甜辣炸雞其實算ok好食，係有啲辣辣地既。但係佢幾搞笑😂😂佢唔係好正宗，勁似大雜燴咁，入邊竟然有魚蛋同獅子狗，令我諗起食神入邊一句台詞：「吵咩吖！撈埋一齊做瀨尿魚蛋吖笨！」佢似係雞煲嗰啲雞多過韓式烤雞咁。 最後嗰杯mocha有啲溝左水既feel唔好飲。 整體嚟講不過不失既，環境算係幾舒適既，燈光明亮，仲會播下啲k-pop歌，但係如果係難得同朋友出嚟想食好西，呢個就唔係一個好選擇了。…查看更多

11點幾我就去左呢間新開既米線店試食，岩岩開無耐就已經差唔多坐爆曬，可見都幾旺場。 我等左差唔多15-20分鐘攞到碗麵，企喺度嗰陣時有兩個客人催外賣，一個就開到口話等左30分鐘可唔可以理下啲外賣，但我見岩岩坐低堂食嗰啲無耐就有得上麵，只能講可能岩岩開張係要等耐啲。 首先就係個霸王雞翼，佢係比譚仔香啲，但係佢真係幾咸，同大家試過可以唔洗嗌，咸到食左幾啖已經唔想食😂😂 就碗麵嚟講，佢嘅酸辣湯係ok既，唔會話死酸嗰種，但又未話到驚喜既程度，中規中矩。我就嗌左雞肉竹笙牛丸，佢啲牛丸同竹笙係ok好食既，但係雞肉就鞋鞋地，之後就唔會嗌雞肉了。三個餸嚟講50幾蚊，我認為係略貴左少少。 （個人口味而言） 湖南酸辣湯米線嚟講就係 譚仔>九頭鳥>三哥 …查看更多