yuenyye85的個人專頁

今日午餐嚟到呢一間聽講pancake好好味嘅餐廳，原來晏晝都幾多人嚟排隊，12點左右到我都排咗20分鐘。呢度呢仲用緊人手落單，都係尖沙咀少有嘅餐廳，望下個set lunch有burger有意粉有飯，我就揀咗我最鍾意食嘅明太子意大利粉，呢個係我日式西餐裏面最鍾意嘅餸菜。個白汁好濃好濃，好多魚子喺上面，整體個意大利粉都唔錯，我加咗一杯ice ammericano， 咖啡合格。其實環境都算唔錯，有少海景，食物睇落都係即叫即做，如果排隊可以快少少，lunch都可以多啲嚟呢度食。…查看更多

想試咗好耐，但walk in 一般都排唔到， 今日就book咗枱試吓。叫咗生蠔+酒set, ham,牛扒，重有個lemon tart。入餐廳都感覺到佢細心，有陣好香嘅香薰味，餐廳員工都著得整整齊齊，嚟到都好細心，介紹今晚speical menu, 酒到亦到有介紹吓枝酒，不過。。。係件牛扒真係太單薄，早餐扒咁，有d失望。當晚重有人唱歌，其實環境同氣氛都好唔錯，唔係食物要再努力一啲。…查看更多

一家人去食飯，叫咗個套餐，其他餸好唔好食就唔好講嗱，份量都相對比較細，但呢以下呢個餸我都唔知講咩好。。。真係可以咁求其，屋企上菜都唔會咁，另外隻龍蝦只係成開邊上，咁多個人唔知點分😂大佬，屋村酒樓都可以比返d誠意嘅。…查看更多

真係好鐘意食船麵，所以今日特登叫同事陪我嚟一齊食。呢到個湯好濃，當然唔係真正嘅船麵咁細碗，個份量係足夠一個大人食用嘅，我哋叫咗豬頸肉同埋牛腩牛根面，仲有人叫咗咖哩牛腩飯🤣，雖然好似九唔搭八咁，但味道其實都唔錯，而且作為一個打工仔，呢個午餐價錢非常合理👍👍👍推薦比係附近打工嘅你❤️…查看更多

星期六嚟沙田行街，見肚餓想搵飯食，經過探魚，比香味吸引咗入去，我識今日係星期六所以無午餐選擇，我地2個人要點一條魚🤣其實真係太多，我好強烈建議佢哋做半份魚嘅選擇🤭🤭🤭我哋今日叫咗沙嗲味，其實味道都唔錯嘅，但我真係好想食辣呀，點解我會叫個沙嗲味㗎🤣🤣🤣講返條魚，雖然條魚有煎過又放咗落咁濃嘅汁度，條魚依然好滑，呢個值得一讚。另外我哋叫咗一碟小串燒同埋炸薯仔，串燒就一般喇，但炸薯仔真係好好食，又香又辣，加埋啤酒仲正。另外仲加咗6蚊食任食涼粉，但其實都係一般嘢🤣🤣🤣係食咗濃味嘢之後可以清下個口咁解🤭…查看更多

午飯時間有d趕，所以揀咗super sandwich去食，貪佢唔使等太耐，個意粉其實好一般🤭就係一個汁加意大利粉咁，價錢都唔係特別平，但係服務態度真係好好，呢個係值得讚吓👍…查看更多

落雨濕濕，嚟到海港城都唔想再行出外面搵嘢食喇，平時我都幾鍾意食muji嘅午餐，因為份量啱啱好，今日同平時一樣都係點咗3點午餐，有肉有菜，仲有我鍾意嘅十六穀米，簡單又舒服嘅午餐。今個星期會員重有9折，有折就已經開心咗…查看更多

呢排大家都好忙呀，所以同同事決定要食一餐好d，公司啱啱搬到嚟荔枝角，就睇下有咩好嘢食啦，見到呢間門面唔錯，就入去試下，我哋兩個都叫咗魚生丼，份量啱啱好，魚生其實都係食新鮮，佢地魚生都算係好新鮮，咁嘅價錢嚟講，真係好公道，其實我見佢仲有其他定食都好好味咁，下次一定會嚟再試下🤭…查看更多

放工夜咗，唔想煮飯，簡單食一d，其實連所店，無太大要求，味道都只係一向咁穩定。今日食咗一口石鍋黑椒牛，好香黑椒味，熱辣辣！另外叫咗韓式胡麻手撕雞飯，感覺就係白切雞撕咗🤣🤣🤣但味道可以的。…查看更多

基本上每一次嚟到太子呢一邊，我都會揀呢間餐廳食飯，不過平時好多時都係午餐，今次過嚟食晚餐，講認真佢嘅味道唔係真係好特別，但係呢度餐廳比我嘅懷舊感覺，同埋呢度嘅服務態度，係其他地方無辦法比到我。希望佢唔好執，一直做落去，一間屬於香港人嘅餐廳。…查看更多

如果星期六有時間，我都會嚟呢間coffee shop飲咖啡，係屋企附近，大家唔係住呢邊，未必係咁方便去到，但呢度嘅咖啡好啱我口味，重有自制餅食，全部都好好味，真係拍得住大餅店,重點係全部新鮮熱辣，我今日就啱啱試到佢哋新鮮出爐嘅藍莓鬆餅。超好味🤤喺呢度真係有一刻去咗旅行嘅感覺❤️…查看更多

今日同同事去飲茶，呢個係我地嘅首選，赽方乾淨，點心都精緻，價錢合理。係尖沙咀飲茶人均都係150左右,其實真係好實惠，點心姐姐們重好細心，見我地夾唔到炒面，好主動比把較剪我地，服務值得一讚。唔好成日都話香港無好嘅服務業員工嗱❤️…查看更多

今晚家長晚會，細路都出咗去上堂，所以一個人晚飯。無叫到咩，因為得一個人食。叫咗個蟹肉炒飯，同埋一杯青檸柚子蜜。正正常嘅炒飯，見到蟹肉嘅，份量都超大份，一個女仔可以分2餐🤣不過行入嚟，真係有離開香港去咗泰國嘅感覺，播住悠閒嘅泰文歌，可以好好食餐飯休息一下，再回到現實。…查看更多

已經係老顧客，今日媽咪生日，嚟食吓海鮮，一共叫咗10個餸，好飽飽落樓。龍蝦伊麵：龍蝦好肥，無諗到一隻好大份，細路有麵食,大人有蝦食！豉油王大蝦、砵酒焗蝦頭：大蝦2食，呢個係我至愛，豉油味好香，同外面做嘅唔一樣，砵酒蝦頭味道特別，唔係周圍都有得食，成雙蝦都無浪費。薑蔥蠔：叫咗份例牌，但份量好多，無出水，火候夠，薑蔥夠，薑蔥都食埋清蒸大大隻瀨尿蝦：d細路鐘意食，所以先清蒸，又肥又甜，d細路食雞脾咁食🤣蒸深海泥鯭：夠晒大條，蒸得啱啱好，水準貨。油鹽水大蜆：咁煮先夠鮮甜，有粉絲底，正🤭奄仔蒸蟹糯米飯：唔係食蟹季節，但味道都好好， 唯一comment,油可以少返d,啱港人口味油鹽水菜心、生炒骨：小朋友餸，正常水準菜。已經幫襯咗好多年，服務都係好，都係其中一個會變成老顧客嘅原因👍…查看更多

屯門好似已經無咩糖水檔。。。難得重有一間係市中心，即管去試下。十點零鐘嚟，排咗一張枱，人都唔算好多。排隊時已經諗好食咩，所以一嚟即叫，上菜超級快。佢主打食舊派糖水，叫咗芒果紫米小丸子，芒果豆腐花，凍紅綠，但我唔鐘意用紙碗上。芒果汁味道有少少似以前某涼茶店，唔算好甜，但紅綠就一般般。…查看更多