yk505500的个人专页

一路食百份百都覺得唔錯，今次見到新推出嘅雪山西多圖片賣相幾吸引，就即刻點左一份。結果圖片與實物差距實在係相當之遠，令人非常失望。首先，原本都唔期待奶蓋會同圖片一樣多到滿瀉，但估唔到真係少到完全唔夠點個包，好似落多兩滴都驚蝕比你咁。棉花糖更加離譜，圖片上係較大粒嘅棉花糖，可以逐粒食到。但實物細過粒豆，都算，又落得少，上枱已經差唔多溶晒。賣相搞成咁樣，出餐個廚師良心會唔會痛？更唔理解明明叫雪山西多，佢落鮮紅色嘅棉花糖究竟係咩諗法，家明？天與地？除去賣相同用料方面，其實味道上係一份唔錯嘅花生醬西多士。如果本身無對圖片有咁大期望，當佢係普通西多咁，或者都會滿意。問題係佢收得43蚊，但竟然比d咁無誠意嘅貨色出嚟，真係叫份普通西多都無咁嬲。誠心建議大家千祈唔好點雪山西多。…查看更多

【先講重點：小食拼盤、奶茶相當伏】呢間餐廳係屋邨商場黎講算價位偏高，但係難得呢頭開一間西餐廳類型，如果性價比高其實都唔介意。第一次食過晚餐夏威夷pizza感覺不錯，見到佢開業咁耐終於推出下午茶餐，就再黎試一次。首先見到個下午茶menu設計，一球movinpick加杯野飲就當一個餐，感覺有少少離譜。雖然movinpick本身就幾吸引，之不過求其加塊窩夫或者烘塊多士伴雪糕都唔會感覺咁膚衍呀……入正題，我點左小食拼盤（炸雞翼+炸魷魚+薯條），飲品係熱奶茶。聽落幾正路，但係【全個餐只有薯條無伏】。炸雞翼：睇個名完全無估到佢賣相好似咕嚕肉咁，出面包左一層醬汁。個醬有種極刺鼻既酸味（無誇張，氣味真係好強刺激性），同類似Tabasco咁既辣味。我本身唔太食得辣，餐牌上亦都完全無提及有辣。加上佢d醬搞到隻炸雞翼好淋。其實雞翼肉質唔差，比個醬拖累左，寧願佢普普通通咁炸隻雞翼就算。炸魷魚：炸得唔錯，夠香脆，但係完全無調味，十分清淡，通常應該有少少椒鹽吊味？薯條：唯一無問題奶茶：呢個真係再次超越想像，點會諗到用黑白奶作為其中一個賣點既餐廳，出到黎係提供一杯水連lipton茶包+一杯淡奶+一包太古糖比你自己沖。首先一個lipton茶包就絕對沖唔出一杯足夠濃既奶茶。不過佢又真係無講過自己係港式奶茶，當佢係皇室奶茶會比較能理解。總結，之前試過少少意粉、pizza類都無太大問題，咖啡據說都唔錯，但性價比唔高，下午茶整體亦令人失望，第一次食到忍唔住開個account寫低感想。可能佢主力想做晚市，但對於屋邨區餐廳黎講，下午茶餐係非常重要既一環。呢頭大部份好食少少既餐廳，一到下午茶時段，閒日就接近滿座，星期六日就排隊等位。希望佢繼續加油、將來下午茶會有改善。…查看更多