mcmon5b15的个人专页

每次經過佢門口都想試，但係突然去食任食火鍋又嫌食太多。今次咁啱天氣凍又肚餓，一於試試佢。內籠裝修保養得宜，一坐底侍應就好好心機介紹套餐，亦冇硬推貴餐，湯底都好好心機由基本湯到增值湯底都介紹，落單都舒服啲。佢任食套餐可以另加雞煲淨食，我哋叫咗最平嘅任食餐同埋雞煲。本身對食物都冇期望，不過上菜就覺得佢哋有心做。芫荽皮蛋湯底料都多嘢食，佢又有鯇魚片任添已經啱晒口味。佢仲有菜同丸任夾，飲品任飲，食物都係好食。最驚喜係啲任點響聆，竟然係即炸、仲要薄身夠味好食。任點嘅牛同羊都唔係殭屍肉，鮮色好味。一路食嗰陣侍應都會望下有冇碟要收，明明剩低我哋一枱客，我哋都加咗兩輪單，佢哋仲有心機不斷問要唔要加湯，唔係hea到我哋走可以快快收工。埋單時又俾啲tips我哋點預訂會最抵食，週圍都生意唔好，員工有心機行多步幾咁難得。寧願幫襯呢啲好過去埋啲網紅茶記被人當豬咁餵啦。…查看更多

經常黎呢度幫襯，就係鍾意呢度悠閒既感覺。環境: 年初完成就裝修，舖面更光猛，座位都足夠闊落。另外新設卡位，人多可以坐得再舒服一d服務: 人手充足，亦唔會講轉頭先就冇左件事，間中有台妹駐場。服務到位，要挑剔就係唔洗收枱收得咁急，雖然佢都唔係意圖想食快快趣食完好走，呢度歡迎食客食完坐底傾下計嘅食物: 餐廳要人翻食，食物質素必定係首要。呢度食物品質由開業到依家都冇退步，間中亦有花心思推出新款。特別推介係蛋餅同魯肉飯，呢度做出黎既水準係優秀。涼水選擇多，亦都間中有新飲料推出，唔洗食來食去都係嗰幾味。鹵味夠大碟，調味唔會過重。純粹幫襯咁耐覺得要寫篇食評讚下，市道唔好，希望有質素既餐廳可以長做長有，我先有得繼續幫襯。…查看更多

突然想食拉麵，就試一試佢。舖面簡約光猛寬敞。環境風味欠奉，但係整到日本拉麵店格局就一定回唔到本，所以不完美可接受。一碗正常拉麵$79 應該係市價甚至偏平，嫌貴去食雲吞麵適合啲。試咗醬油叉燒拉麵加天婦羅雞翼。湯底： 夠晒熱。味道淡麗，飲晒成碗唔覺死鹹拉麵 ： 幼麵，冇驚喜冇失望叉燒： 偏肥但係燒得夠焦香冇油膩感，有肉羶味但可接受溏心蛋： 真溏心嘅，夠味，冇醃過龍配料： 葱花同木耳絲，冇特別雞翼： 全隻去骨，炸得酥脆，充滿誠意整體黎講係中上之選，性價比高。呢度有雞白湯雞叉燒，怕豚叉燒肥可以試下。小食加唔加就豐儉由人，抵就唔算，不過值嘅有人話呢間係麵道復活。畢竟麵道都冇咗半年，味道已經唔記得 比較唔到。…查看更多