carlhappy的个人专页

坐落於上環熟食中心嘅瑞記咖啡相信對識飲識食嘅人唔陌生，今次經過就試一試。瑞記主餐牌選擇較少，都係有多士，麵包或者兩款麵食(鮮牛麵同餐蛋麵)，作為一個lunch,都要叫碗麵黎醫下肚，最後就揀咗鮮牛麵。鮮牛都上枱就見到熟悉嘅顏色，試一試湯底，如果冇估錯應該係出前一丁麻油麵。牛肉係粉嫩色，應該係用熱水燙燙放上煮好嘅麵，但麵未煮夠熟就上菜，咬落去硬身而且應該冇fing一fing個麵，搞到好似食緊一餅野咁，同埋因為牛肉同麵分開煮嘅關係，食落就好似食緊兩種分開嘅東西。另外見網上好多人都推薦蛋牛飽/西多士，因為感覺西多士太邪惡，最後揀咗試一試蛋牛包。呢個蛋牛包都爭取番d分數，個麵底面都烘過，所以咬落去係外面脆，裡面軟熟，而饀係蔥花牛肉粒炒蛋，但略嫌炒蛋炒得過熟，扣咗少少分，不過都值得一試。樽仔奶茶係呢度其中一個特色，價錢係瑞記比一般熱奶茶貴少少，既然黎到就冇理由唔試嘅，見到樽身大大隻藍妹啤酒字樣，應該店主係重用玻璃樽再裝奶茶入內。奶茶最主要嘅都係睇佢嘅茶同埋奶嘅分量，茶味濃郁，而且溝埋奶係會係黏住口腔，同舊式嘅茶餐廳差唔多，不過樽仔上就比其他傳統餐廳特別，價錢唔算太貴，都值得一試。…查看更多

呢間魚湯米線店都已經係上環立足多年，幾年前都已經食過幾次，長期都要排隊。適逢經過上環就拜訪一下，出奇地堂食嘅人數唔太多，大部分都係等緊外賣，好好彩唔使排就可以入座。佢有幾款套餐係for lunch 嘅，會包野飲(e.g. 汽水)，大約50~55一個餐左右，如果叫lunch set以外嘅就要俾8蚊加野飲，因為本身都諗住飲下佢個魚湯，所以就冇揀set lunch。叫咗個招牌雜錦魚湯米線($55)，配料有滷豬腩肉，鯪魚肉，炸魚腐，雞翼等，呢個好適合懶人揀，唔可以一次過試曬佢d招牌野。雞翼好大隻，同腩肉一樣滷得好入味，而鯪魚球同魚腐都大大舊而且彈牙爽口。不過扣分位就係個魚湯，以前魚湯好濃，但呢次感覺就好似淡咗一倍咁，有d失望，所以可能因為咁而少咗人排隊。總括黎講呢個價食魚湯米線都算抵嘅，經過可以一試。…查看更多

收工去囍帖街附近食野，點知度度都要排隊，見到呢間餐廳啱啱有人走，有位就衝咗入去。不過店面有d細，而且座位都唔算多，相對黎講比較逼。餐廳供應嘅食物款式唔太多，見大部分人都主要叫呢兩樣野食就跟住試下。Sarawak Laska ($69)係馬來西亞款式嘅喇沙，有別於平常食慣嘅新加坡喇沙，而配料主要有鮮蝦，雞絲等。湯底十分濃，但唔知係唔係食唔慣呢種味嘅喇沙，感覺怪怪的，而且感覺上唔太香，味道一般般。Kolo Mee ($69)係一個撈麵，配料有菜芯，叉燒，魚蛋同炸咗嘅碎豬皮等，而店家都提供咗一碗炸蒜湯，可以醮麵食。但同樣地唔知係唔係食唔慣，感覺麻麻。而總括而言呢杯Calamansi soda($22)係今餐最好嘅，佢係話梅青檸梳打，酸酸甜甜梳打最適合解喝。…查看更多

小時光位於觀塘工廈位置，搭lift後都要努力搵一搵先見到門口，指示牌略嫌不夠。幾經辛苦見到一道藍色的門，打開就見到裝潢有d似班房嘅樣子。餐廳係自助形式，自己拎餐具和自行到收錢台買。今次叫咗兩個主食，包括台灣鳳梨牛肉麵，芝士肉鬆蛋餅同滷水拼盤配魯肉飯。價格唔算太價，大約50~60蚊左右，但如果要加飲料就冇特價。台灣鳳梨牛肉麵會比其他店舖較淡，而鳳梨亦可能因為煮後消失了甜味，總括而言味道平平。好多人都大推蛋餅，味道不錯，但與其他店舖相比沒太大驚喜。不過估唔到有驚喜係滷水拼盤配魯肉飯，本以為呢個價格拼盤食物會比較少，但估唔到份量都蠻多而且款式亦有很多，包括豬耳，豆腐，豬頭肉，蛋等，性價比最高，值得推薦。餐廳長期播放台灣歌，裝潢就似回到台灣教室，整個格局十分IGable,個人覺得值得去chill chill。…查看更多

下午茶諗住試下香港仔好出名嘅蛋餅，點知去到果時已經要排隊，好在天氣唔太熱，因為店面細要排一小時先可以入座。因為本身都食咗lunch，唔太肚餓，所以都係叫咗2款野食試試。第1個叫嘅當然係呢度嘅主打菜式，肉鬆芝士蛋餅($35)。佢嘅蛋餅都屬於多肉鬆，即叫即造，所以熱辣辣同埋口感豐富。而因為蛋餅都加咗芝士喺中間，所以有拉絲效果，IGable。而個人覺得最驚喜嘅係鹽酥雞($35)，因為好耐冇食過見到就好想叫，估唔到佢調味同炸得好好食。雞肉汁鎖住喺肉入面，雞肉都好嫩同份量亦都唔細。佢都加咗d炸子蘇蘇落去作為菜式擺設嘅一部分。呢間餐廳採用自助形式，叫餐直接到counter叫，餐具同水都係自助拎，而裝修都好舒服，令人有種chill嘅感覺。只係因為店面細亦都多人等位所以都唔太想佔位太耐。如果平日黎飲杯咖啡食件蛋餅都係不錯選擇~…查看更多

假日到香港仔一日遊，經過見呢間舊式西餐廳幾多人同星期六都有lunch set就試一試。每個set lunch都可以選擇要餐湯加蒜蓉包，或者飲品，今次因為叫咗兩個餐所以就叫咗湯加蒜蓉包同可樂。湯係羅宋湯，好吹料，唔係一般連鎖店咁溝大量嘅水，而蒜蓉包都好鬆脆可口。主菜叫咗最貴嘅燒紐西蘭西冷牛扒，雖然塊扒比較薄，但都算大塊同唔會過韌，味道同性價比一般。而香煎豬柳拼炸蝦薯條就不過不失，薯條係用粗薯條，唔會炸得太乾身。整體感覺呢個lunch體驗就不過不失，見其他食評推介嘅都屬於晚市餐牌上嘅菜式，可能晚市黎試會氣氛同菜式會好d，不過午餐黎講呢個價錢都不過不失。…查看更多

一生懸麵元祖店係旺角，之前已經聽過有好多人排隊一嚐沾麵。而依家佢係荃灣城市廣場開咗分店，趁住消費券熱潮就係夜晚拜訪一下呢間店~今次試咗網上大推嘅海老拉麵($83)同檸檬柚子沾麵($88)，見大部分人都選擇試沾麵，因為佢同出面唔同嘅地方係提供咗爐頭俾大家去加熱個湯，推薦大家選擇凍嘅沾麵，隨大家需要係咩熱度食沾麵。海老拉麵店家提供大量櫻花蝦，基本試cover曬成碗麵，如果鐘意食蝦麵絕對係大推，而且想試招牌沾麵嘅都可以揀海老沾麵，但因為見到佢有期間限定嘅檸檬柚子沾麵，所以就試呢款拉麵。而檸檬柚子沾麵酸酸的，好開胃，不過要小心湯底會隨住煮嘅時候太耐而變得太濃同過鹹。最後都加咗個唐揚炸雞，炸雞有5大塊，大大件，味道就不過不失。店家都提供咗檸檬水，因為拉麵都比較濃味所以最後用杯檸檬水fresh一下。而且最後都有一張蓋章卡，食滿指定數量就會有野送，不妨一試~…查看更多

黎到鑽石山廣場，附近冇咩野好食，經過見到有一間好日本feel嘅餐廳就去試一試。呢間原來係各地都有分店，包括荃灣同油塘。93蚊一個套餐，包野食同甜品，算係性價比高嘅餐廳。入座冇耐就見到餐廳開始多人同要排幾耐隊。定食由A+B＋C＋D各選一而組成，款式都算多，主要以一份鍋燒肉類，一份炒飯／鍋燒烏冬，一份甜品同一杯飲品組成。今次就叫咗兩個lunch set，包括牛油蜜糖芥末鍋燒炸雞＋壽喜燒湯鍋烏冬同蜜糖芥末鍋煮豚肉＋櫻花蝦濃蝦湯烏冬。份量非常之充足，個人大推櫻花蝦濃湯烏冬同蜜糖芥末鍋煮豚肉，濃濃嘅櫻花蝦湯底滲透入烏冬入面，每條烏冬都掛有濃濃嘅蝦味。而蜜糖芥末鍋煮豚肉調味調得幾好，甜甜的，幾特別。最後仲有個壓軸出場的甜品，係咁多樣野食中最好味的，甜甜煙韌的donnut，配著慢慢溶化的海鹽雪糕，一甜一鹹，一冷一熱，配合得恰到好處。…查看更多

阿木台灣麵一直係旺角享譽盛名，如果遲咗到達要排多於1小時先能入座。趁假日唔使番工就早d 6點半左右到達，估唔到都要拎飛等位，好彩大約10分鐘就有位。難得可以試試，就要試盡所有美食啦！今日叫咗個炸排骨便當($56)，而套餐就可以另外top up半價野飲，而我就配咗個黑糖珍珠鮮奶($17，原價$34)，出面一杯黑糖珍珠鮮奶都要至少$30蚊，所以都算抵飲。便當類食物都會配有前菜，有鐵蛋半粒，滷花生腐皮同菜圃。炸排骨大大份，鬆軟可口，但感覺上調味不足，所以加咗小小佢地嘅自製麻辣椒醬提升味道。而最重要嘅係呢度可以要求多飯多魯肉，係其他台灣菜店舖都未見有多魯肉嘅選擇，配飯一流，價錢都唔不貴，非常抵食。另外叫咗d小食，包括有芝士肉鬆蛋餅($42)，鹽酥雞($38)同家傳鹽酥肉($39)，芝士肉鬆蛋餅咬落去就feel到啖啖肉鬆，加埋芝士蛋餅軟糯，口感豐富。而個人推介家傳鹽酥肉，用咗脊里肉黎整，所以爽口酥脆，可能下次食就可以叫個鹽酥肉套餐。食完仲可以出去睇下餐廳商品，有台灣品牌蘋果西打賣，令我想起當年係台灣嘅種種回憶，真係想快d去到旅行呀。😭😭😭…查看更多

呢間係筲箕灣係一間出名嘅小食店，主打炸雞軟骨，炸雞塊同洋蔥魚蛋。今次就試咗半份炸雞塊，價格就有少少貴，半份收$30/4塊，全份就$56/8塊。雞塊即叫即炸，大約等10分鐘左右就可以拎。叫得無骨炸雞就知道一咬落去啖啖肉，d肉超級嫩滑，咬落去d雞油就滴緊，所以食果時要好小心。而且上面加d椒鹽，提昇咗雞嘅香味。食4塊真係會唔夠喉，呢個價格物超所值。不過食完會有少少口乾嘅感覺，可能加咗少少“師傅”落去/炸野口乾掛。建議食之前買少少野飲以防食完會好口渴。…查看更多

經過炮台山見有間米芝蓮推介小食嘅上海店，就去試試佢d小食。礙於店面細，老闆係街道旁邊放咗幾張枱櫈，但都full曬。本身諗住要外賣，但啱啱好有人走就轉堂食啦。今次一次過試曬佢主打菜式，包括有上海生煎包，鍋貼同小籠包。小籠包老闆係即蒸嘅，所以會等得耐d。生煎包，鍋貼咬落去有肉汁，要小心燙口。以平民價錢黎講 $10蚊俾3隻你出面真係搵唔到，值得推介。而小籠包即蒸，皮亦都好薄，但可能個人對煎炸野比較有興趣，相比下鍋貼好食d，都不妨試試。…查看更多

下午茶時間上網見到呢間台灣菜咁多好評，又裝修得幾靚，就入咗去試試下午茶餐。入到去d枱全部放曬大閘蟹餐具，應該係準備晚市用。而枱面就feel到有d黏黏嘅感覺，相信冇用毛巾抹乾淨。不過裝修幾靚同播住台灣歌手嘅歌，好有去咗台灣餐廳嘅感覺。首先黎嘅係2杯野飲，菊花茶同芒果沙冰，正正常常冇咩特別但好大杯，值得加錢飲凍飲。然後黎咗第一個主菜，鹽酥雞麵。 鹽酥雞對於一個下午茶餐黎講比想像多，而且食到係啱啱炸起，湯底味道同麵質都唔錯，同其他台灣餐廳一樣冇咩特別，可以一試。但最後一道菜就大大咁影響咗我對呢間餐廳嘅觀感，第一次覺得咁憤怒，就係呢個餐牌上推介嘅等等手工紫薯窩夫配雞翼跟雪糕。仲諗住佢個餐牌有個Like,應該可以一試，下面幅圖係佢一上枱果時影嘅。首先呢d只能夠講係雞翼乾，用較剪剪到好似一堆骨頭堆係度又完全冇肉汁，炸到乾曬。其次個雪糕竟然係溶過沙冰，接近一個雪糕"湯"。最後最後令我最感到驚嚇嘅係個窩夫，完全係由百佳買嘅即食窩夫就咁放d朱古力醬，好假嘅棉花糖同少少紫薯上去，然後收嘅價仲貴過個鹽酥雞麵。睇個賣相都知佢個味道如何，都唔知點解咁做法都可以出菜!總括黎講個甜品完完全全影響咗我對呢間餐廳嘅觀感，而且枱面嘅潔淨程度都有耐改善，唔會有下次! 提醒大家千祈千祈千祈(重要事情要說三次)唔好叫甜品，除非你都試下伏中伏中伏嘅感覺啦！第一次寫食評寫到咁嬲!…查看更多

星期六有野做經過西環就上網search下附近有咩好食，本身諗住試當區人氣小店金祥排骨麵但冇開，就去咗呢間越南小店試試。去到估唔到2點都要排隊入內，不過等大約10分鐘就有位，我諗如果係lunch hour時間應該都要排耐少少，而且等野食都見好多人買外賣。由落單都出菜時間大約10分鐘左右，第一個嘅係香茅豬扒湯河 ($51)。值得一讚嘅係個湯底，有濃濃嘅蘿蔔清湯味，而河粉軟硬適中，勁正! 唯一美中不足嘅係香茅豬扒有少少凍，可能放咗一陣先切，但豬扒鬆軟好食。而另一個叫咗嘅係招牌火車頭($62)，亦都係越南特式菜之一。湯底相對香茅豬扒湯河當然有多一陣重重嘅牛味，適合好牛人士選擇。而配料都冇因應價錢偷功減料，仲有一大舊白蘿蔔配送，值得回頭再食。見佢地同廚房溝通都用越南話，價格又唔貴而且味道又好，值得再黎食!…查看更多

平日行完山搭車出番元朗就搵下有咩野食，本身諗住去附近另一間西餐廳但因為限坐令而冇位，機緣巧合下就搵到呢間小松鼠試試。入到去叫咗2個set lunch，首先黎嘅係拿破崙海鮮意粉 ($98)。 意粉入面有帶子，硯，同魷魚，配料都多，而味道都好好，值得推介!之後黎到嘅係板燒雞胸及黑豚豬肉腸配薯條 ($51)。一上菜估唔到咁大碟，但只係收$51蚊。而味道就中規中矩，但性價比都高嘅。 而店主都提供咗支裝Del Monte茄醬，可以用黎配薯條。雞胸雖然相對細塊，但唔會粗嚡，可以一試。埋單時唔洗加一，真係幾抵，作為元朗區小店，性價比高，可以下次再黎xd!…查看更多

As recommended by lots of people and websites, this time finally got a time to taste ramen in ICHIRAN.First there was a staff leading you to the sit. Then you would get a menu to choose your preferred ramen.Press the button and there would be someone inside the corridor and take your order.The cooking time is short. It was just around 5 minutes.Water could be freely refilled by yourself.There was only one single product that you could choose. I would say the soup was a bit oily but the spicy one was definitely worth a try.As the tradition of respect to the chef, it was a good choice to drink all the soup and let the bowl empty.The taste was okay. Just an average and not really thought it deserved a lot of praise compared to other Japanese Ramen Restaurants.Finally 10% service fee was charged.…查看更多