amychan1015的个人专页

之前去台中玩已經飲過十二韻，個陣都覺得茶味夠，又清新，估唔到而家係香港都有得飲！地點就係荃灣廣場附近都好方便，因為食完片皮鴨都有點膩膩既感覺，所以今次就試左係香港比較少見，望落好似好清新既蜂蜜檸檬粉粿。飲第一啖回憶即刻返晒黎，同台灣一樣咁清新，而且蜂蜜既甜唔係死甜，應該都係真蜂蜜，而粉粿口感好特別，原本以為會以愛玉個種質感，但原來一d 都唔同，佢係比較qq 既口感，咬落去仲有淡淡既蜂蜜味！感覺好舒服，重點係佢淨係得一個size，杯杯都咁大杯，飲完即刻飽晒又消暑，下次經過荃灣都會想試埋其他飲品🤩…查看更多

生日打算搵間情調好啲既餐廳，所以揀左呢間係尖沙咀西餐廳。入到去鋪頭細細，但燈光暗暗，環境都ok。侍應服務態度都好好，向我地介紹3 course set dinner 係有兩款，分別係$388同$488，而兩者既差別在於主菜度，兩款餐同樣包頭盤、是日餐湯同茶/咖啡。嗌完野食好快就上左麵包籃同海鹽牛油，有一舊法包同一舊牛油軟包。法包外脆，入面偏硬，需要出啲牙力先食到，軟包就正常發揮。送既煙三文魚忌廉芝士餅，都係正常味道頭盤揀左兩款唔同既，分別係法式牛肉他他同蛋白麵，松葉蟹肉湯。法式牛肉他他，撈均左蛋黃之後，牛肉都算滑，份量比想像中多。蛋白麵，松葉蟹肉湯，蛋白麵其實就係將蛋白蒸熟再切條，湯味道唔錯，似中式酒精既海皇羹。另外加左$98要左三隻是日生蠔，雖然唔知係邊度產地但唔會腥，食落都算新鮮。是日餐湯係蕃茄忌廉湯，蕃茄味濃，質地偏向濃稠。$388同$488既主菜各嗌左一樣，以下係$388既主菜，一上枱仲以為漏左野，因為嗌左油封鴨脾肉意大利飯，但唔見隻鴨脾，膽粗粗試下飯入面既啡色野，原來油封鴨脾唔同坊間般咁原隻上，而係手撕完撈左入飯裏面。但唔知係咪同意大利飯一齊煮得太耐，啲鴨肉又乾又「鞋」，不過神奇地啲飯又好似未煮熟咁，口感好生，鴨油豐富，食得多好油膩，可能係咁飯量都係約十湯匙左右，努力食完見到碟底全部都係油。再黎係$488既海膽醬手打意粉，海葡萄，烏魚子，意粉同其他主打手打意粉鋪頭一樣，意粉都係比較有咬口，意粉上面都有三舊海膽，味道濃郁，但海葡萄好似一抽咸海水，亦都食唔到有烏魚子。而家餐廳做緊優惠，係星期日至四（星期五，六，公眾假除外）人均消費滿$450就會每人送半隻焗龍蝦。雖然細細隻但味道係成餐飯最好。最後係社交平台 share 同 tag 返餐廳名，就可以有一客伯爵茶奶凍送返，味道都唔會太甜，又唔會話好好食，正正常常。總結，最後埋單每人$535，味道一般般，油封鴨脾飯甚至係麻麻地，但勝在服務唔錯，主動幫客人影相之餘，仲會曬返張相比客人，呢點係加分既，但以呢個價錢相信係同區會有更好既選擇。…查看更多

呢間餐廳係龍門居開業多年，一直都係主打日式和食同埋慢煮牛扒，而且口碑唔錯，係區內都小有名氣。所以今次佢地開左新餐廳都要黎試下。呢度有別於龍門居分店，地方闊落坐得好舒服。晚市係冇set 既，全部都係散叫。今次嗌左兩個主菜同兩杯野飲。凍檸檬茶$33（免費添飲）一黎到咁大杯都有d 嚇親，茶底較淡飲落舒服糖漿係自己另加，再添飲就會比返250ml。法式紅酒燴和牛手工貝殼粉$128蕃茄味濃，和牛亦唔會乾到牛肉乾咁。不過味道就不過不失。特級黑安格斯肉眼牛扒30oz $488舊店賣開慢煮牛扒所以都好放心，但估唔到咁有驚喜，原本都覺得塊扒咁厚唔多唔少都會乾或者好韌。但呢塊扒完全唔韌，而且好有牛味仲好有肉汁。薯條都脆身，而且可以免費添加，但稍為較偏油，如果乾返d 就更佳。總結味道同環境都唔錯，欣賞佢唔似坊間d 餐廳為左做多幾轉生意而限時，可以慢慢食唔使急住走，所以都幾肯定呢間餐廳可以成為我既新飯堂。…查看更多

呢間韓國炸雞集團係香港已經開左幾年，終於開到黎屯門，所以個晚去食都有好多人排隊，都要等左半個鐘以上先可以入座。蜜糖蒜香烤雞呢款雞因為有蜜糖會偏甜，同埋會濃味d，鍾意濃味既朋友就岩晒，不過食完要食返幾舊酸蘿蔔中和下。(無骨）軟芝士蜜糖咖哩烤雞呢款雖然都係有蜜糖不過就相對淡味d，而且係無骨既關係，可以好方便食。而底下既芝士好「拉絲」，不過就要盡快食，唔係d 芝士會變返做一舊。總結係如果要排半個鐘以上既話，未必會再去食多次。…查看更多

今日就嗌左$269既澳洲產長期穀飼牛放題套餐。但馬屋同坊間其他日式打邊爐最唔同既係，佢可以一人一鍋。我地分別揀左美肌鍋同藥膳麻辣鍋。美肌鍋其實姐係雞湯，清清地但食完會黏口，充滿骨膠原既感覺，最岩就係用黎淥菜。藥膳麻辣湯辣度偏溫和，唔會辣到完全食唔到，淥牛肉一流。醬料都係大路既日式醬料，但最出色既係有青桔仔，加落醬料度即刻消除油膩感。牛肉每碟油瘦都好平均，而且係解晒凍先上枱。最後值得一讚既係店員服務非常周到，一見到枱上有空碟會即刻收走，見你冇咩湯仲會主動幫你加。…查看更多

一路都知荃灣呢間食韓式野既黃店好出名，今日終於可以黎試下。今次我地嗌左幾樣野食，分別係蜂蜜牛油炸雞，芝士熔漿炒飯，牛肉韓式伴飯，紫菜肉鬆蛋卷同埋加左d 特價小食炸芝士條同埋上湯泡菜餃。最快黎到既係唔使點煮既牛肉韓式伴飯，一上枱已經嘩一聲，因為勁大兜，仲要好多牛肉😂，撈埋d 韓式辣醬，少少辣好開胃！然後上枱既就係重頭戲─芝士熔漿炒飯！！一上枱都係嘩一聲，個鐵板熱焫焫，芝士仲要超多，撈完d 芝士仲好拉絲！不過真係要多食先好嗌，因為食少少就會好滯好膩。蜂蜜牛油炸雞🎉d 炸雞係岩岩炸好，拎上手勁熱，個甜甜地好惹味！小食方面都介紹下喇。紫菜肉鬆蛋卷就普普通通。炸芝士條同想像有d 唔同，似芝士獅子狗，但都好食既。上湯泡菜餃都好味。重點係12蚊就有4隻。呢餐非常有驚喜。肯定會再去食過。…查看更多

平時都會嗌開佢地既午市飯餐，因為大大碟，味道又唔錯，仲有熱飲送。男人食都好夠飽，女仔食直頭可以兩個人嗌一份Share 食。而佢地既午市飯餐日日都會轉，想知個日有咩食可以上佢地社交平台 page 度睇限時動態，睇下個日有冇野岩你食先。平時都會嗌開中式飯，因為覺得茶餐廳煮中式飯實穩穩陣陣，但今日中式飯唔係好岩食，所以決定試下食西式飯，今次就嗌左蕃茄燴牛肋條。估唔到味道都唔錯，牛肋條都炆得好淋，而且仲有好多香味，所以下次見到西式飯都會試下…查看更多

今日同家姐行開朗豪坊,見肚餓就去左MOS醫肚喇 我就叫左一個元氣漢堡+脆雞+汽水個包都幾大個下,要擘到個口最大先咬到成個包 D千島醬同塊牛肉好夾,舊番茄又唔會好大陣個D好生個D味(因為我唔係咁鐘意食生番茄 )舊脆雞熱辣辣,加埋佢D沙津醬,一個字正 我家姐就要左個脆雞包,佢話呢個包都幾好食 薯條好食過另一間又係M字頭快餐店 因為佢好粗同埋好有薯仔味,外脆內軟,仲條條都熱辣辣,仲唔小心比佢辣到個咀TIM …查看更多

上個星期六同媽咪去西環睇中藥,三點半去睇見仲有D時間,就去搵間餐廳坐下同食下野喇,行行下見到大作好似裝修得幾靚咁就入左去喇,我地就簡左個卡位呢坐(卡位係梳化黎,坐得幾舒服)由於之前食左D野個肚唔係好餓,所以我淨係嗌左個豬扒包,等左一陣間就黎喇個豬扒包,個包既皮咬落去好脆,好似食緊薯片咁,塊豬扒好入味煎得好香,加埋D洋蔥同埋沙律醬真係好好味,呢個下午茶成為$12,如果跟野飲既話杯野飲就半價,話貴唔貴話平唔平:),下次再去幫襯過…查看更多