尖咀馬的个人专页

聽聞這家的食物不俗，專程來試試。點了個蜆湯小雲吞，是白菜鮮肉味的，再加一客拍青瓜，整體的味道都很好，個人十分喜歡。櫃檯的小姐姐也很好，服務算是合格。但我在進食時發生了一件事，就是隣桌的一位女士，她把樽裝飲品喝了一口，就走出去跟櫃檯姐姐說味道不對，櫃檯姐姐就是表現得不想處理，結果自己也品嘗了一遍，還在與客人爭辯，客人表示經常飲這飲品，就是今次的味道不對，經一輪爭論之後，結果還是讓客人選擇其他的飲品。我想說的是，客人投訴食物味道不對，根本就沒甚麼好爭辯的，要麼你就是認為客人騙你，要麼就是你不想讓客人換過飲品。你們應該試從客人角度看，她飲到有怪味，當然就已經是不好的感受，最應該就是立刻換掉，不用多說，絶對不是多番質疑。我知道絶大部分餐廳都沒有這份心思。經營餐廳的都應該好好想下。…查看更多

星期六下午來到，餐廳座位比較開揚，等入去都可以見到全場環境，睇落樣樣都好似正正常常。我哋兩個人入去坐低，因為冷氣太大，所以轉左位。跟住落單，食物好物就上，快到你唔信，但係食物都係室温，特別係個唔熱嘅酸辣湯，真係好難飲，叫侍應同佢講個湯唔夠熱，佢木口木面用個湯勺搞下搞下，似乎要驗證下個湯，好似唔想處理咁。其實客人話食物有問題，你拎入厨房慢慢驗啦，喺個客面前搞，算係點！之後好快攞返出嚟，應該係用微波爐叮熱咗，其實佢嘅菜都應該係預製菜，全程微波爐出菜。佢嘅乾煸四季豆，油極多。個草紮牛骨又係室溫。個紅油抄手係實實一嚿肉咁。現場所見，部分侍應正常，部分唔想做。最反感係樓面咁開揚，你居然一路放小食入個口度，完全係目中無客。服務差，食物差。唔會再嚟。…查看更多

在旺角站上的一所潮式飲茶酒家，這是一個不錯的選擇。比較隔離間乜京樓好上幾倍。通常行到門前就會有人同你打招呼，跟住帶你入去坐低，感覺服務都算友善親切，如果食晚飯，就會即刻奉上潮式功夫茶，味道濃陏，雖未算最頂級，但飲落喉嚨同個胃都好舒服。可惜早午飲茶都冇呢個服務。不過醒胃嘅仲有嗰碟好味嘅咸酸菜。點心方面，食過幾款最普通嘅都唔錯，雞腳、叉燒包、牛肉球、咖哩魷魚、粉果等，都有中上水準。我特別鍾意佢嘅蘿蔔春菜及排骨大芥菜，味濃又夠香。仲有不定時供應嘅菠蘿叉燒包，真係忍唔到要食多個。佢哋嘅滷水鵝都唔錯，不過裝修前有嘅九棍魚在裝修後就冇咗，冇啲可惜。其實呢間食店價錢都有啲偏貴，絶對唔係平民大眾化嘅酒樓，你睇吓啲食客都知乜料。一般飲茶消費人均約150至200，食晚飯人均就300至400，當然仲要睇吓你叫乜嘢食啦。…查看更多

以越南嘢嚟講，呢度唔算特別標青。一般嚟講都算係合格，呢度嘅食物都算係新鮮，食得出廚房係認真做嘢，只係調味有少少重手，不過我試過佢嘅海南雞飯就真係食到牙都軟，雞肉煮到比較老，食到人唔係咁開胃。但係整體食物質素都算係可以一試，始終越南嘢酸酸甜甜，感覺比較討好。而且呢度可以話係冇其他越南野嘅選擇，所以我都算係經常嚟食。但係我真係好想講吓，佢哋嘅服務態度，本來喺呢個商場食都算係少少高級，消費係比較一般平民大眾食肆較高，所以服務都算係比較認真，但係我就試過一次，見到佢裏面都幾滿人，一個人嚟食嘅時候店員帶我入去，跟住有個領班咁嘅人就好惡咁大聲叫我喺出邊等吓先，我諗佢當時做緊嘢好忟，亦都盲咗見唔到係個職員帶我入嚟，但我覺得作為一個客人，你點都唔會有理由呼喝我，叫我出去等，起碼你都問吓我先啦，嗰次之後我停咗幾個月都冇再去食，係因為我真係好嬲。…查看更多

中午時分嚟呢度食嘢會見到好多勞工界嘅朋友，因為呢度嘅食物係比到最基本嘅水準，同埋價錢亦都合理。我上次嚟食叫咗個雞飯，啲雞都算滑，碟頭亦都夠大，食飽絕對沒有問題。職員的服務態度只算係一般，得閒都會應吓你，唔得閒你就等吓先。餐廳嘅空間唔算細，唔會令你覺得好迫，環境係比較昏暗，以基本食堂嘅格局計，咁都算算係合格，佢嘅食物選擇非常多，叫做適合大部份人都啱食，由於食物質素只係一般，所以只要你期望唔係太高，當係飯堂，食飽個肚係完全冇問題。…查看更多

經常去呢度食嘢，味道都算得上係唔錯，重點係你點啲乜嘢嚟食？如果你係食一般茶餐廳嘅食物，你只可以預期佢水準普普通通，餐蛋麵似餐蛋麵，午餐碟頭飯亦可以食飽你，只係味道普通。不過如果你夜晚嚟食佢嘅小炒套餐，就會發覺廚房的功夫真係唔錯，特別係佢嘅老火湯，食得出冇味精，但係材料豐富味道十足。小炒亦夠鑊氣，睇得出係有功夫底。份量唔算大碟但足以食飽你。最鍾意佢食飽你之後仲有一個糖水送。兩舊水兩個人食小炒仲有老火湯同糖水，算係一個相當經濟實惠嘅好選擇。計我話，日頭去食，佢只係一間好普通好普通嘅茶餐廳，但夜晚去食就係又抵食又好味嘅小炒飯店。至於佢哋嘅服務態度，你要知道香港嘅茶餐廳就係咁嘅服務，人係會睇心情，佢心情靚就對你好啲，佢心情唔靚就粗聲粗氣，因為佢真係當你係街坊。…查看更多

佢係一間正正常常嘅餛飩店，如果中午過後，經常可以見到店內職員同朋友坐低喺度食嘢，佢哋都好隨便，不過服務態度算係殷勤，嘢食嘅味道亦都正正經經。舖頭環境唔算特別乾淨，亦冇乜令人感覺好污糟。奇怪嘅係，佢哋枱面係冇胡椒粉供應，問佢攞就係一個大缸俾你。特別欣賞佢嘅小餛飩，餛飩肉唔多，調味不濃不淡，但都食得出係新鮮嘅材料，最正係個皮好薄好滑，口感相當討好。最好嘢係佢個湯底，淡淡咁但係亦都食得出個味道係唔錯。如果你係鍾意呢種福建口味嘅小餛飩，就一定要嚟試吓，因為咁鄙薄餡靚嘅小雲吞，唔係周圍都有。…查看更多

我說是小食，是因為他們每碟的份量也偏少，可能是日式的原故。餐廳的環境是比較清新，空間與色調都有日式的元素，置身其中，感覺很舒適。只是空間開揚的環境，座位坐偏窄，令食客之間很容易互相影響。食物方面，味道與賣相都很有特色，只是份量偏少。待應的服務都算是很有禮貌，可惜有啲細節做得唔係咁好，例如當個客見到隻匙污糟，同個侍應講話隻匙有啲漬，個侍應離遠望住隻更，似係檢查隻更係唔係污糟，就係咁樣僵持咗幾秒鐘，最終都係拎過另外一隻匙俾個客，咁樣其實就係唔專業，嗰刻話俾你聽污糟你就嗱嗱聲去換啦，仲要望嚟望去，唔通個客呃你隻匙咩？嘢食方面，其實都算係一般，不過啲食物嘅配汁都幾特別，算係有啲特色，亦令到食物本身的味道有所提升。只係佢嘅價錢係有少少偏貴。…查看更多

其實這處已經係經常去食，食物質素是一般，佢嘅蛋牛治係最出名嘅，不過其實都係普普通通。我自己最鍾意嘅係佢嘅啡走，味道相當濃郁很有回甘。不過呢類街坊地踎餐廳有一個最大的問題，就係衛生。我在這裏食見，過很多曱甴，餐具污糟。有一次叫咗碗沙嗲牛通，上到枱以為正正常常，點知食咗幾啖先至發現個碗係燒到個底溶晒，而且起晒漬，衰過乞兒兜。佢個水吧都唔好得去邊，用嚟裝住啲冰嘅冰桶污糟到唔使恨，個師傅攞出攞入去攞冰，都唔發覺個手柄起晒老泥漬，嗰啲泥厚度一塊塊攣起咗，隨時跌落個筒裏面。不過佢係唔會理嘅。可以咁樣講，你呢度食嘢係食過風味，污糟邋遢係一定嘅，所以如果你想食呢種風味就要抵得佢。其實佢點解咁多人幫襯，其中一個好重要嘅原因，就係佢啲食物算係OK，價錢就好平，算係街坊價，符合深水埗嘅人均消費。…查看更多

呢間刀削麵我嚟食過兩次，第一次嚟睇見餐牌上有獅子頭，立刻叫嚟試吓，但好可惜1:00嚟已經話賣晒。咁就叫咗醉雞。佢嘅煮食可以叫拉麵或者刀削麵，我係比較鍾意食刀削麵，所以就叫咗。醉雞食落唔係十分夠味，不過肉質好滑，食落唔會起渣。個刀削麵食落有啲煙靭，越照越過癮，照吓照吓居然成碗麵食晒，但係份醉雞居然係食唔晒，其實係因為佢真係好大份。食刀削麵其實個湯底好重要，佢個湯係有幾濃嘅藥材味，算係幾有水準。第二次再去就早咗去，所以食到獅子頭。食物到嘅時候見到個賣相相當唔錯，獅子頭個表面炸得好靚，亦炆得好入味。我會覺得呢間刀削麵整體都唔錯，只係地方較窄，而且侍應打點唔細心，所以個地方有啲唔係咁整潔。如果真係鍾意食刀削麵都可以嚟試吓。見到有其他食客批評食物質素差，我相信係因為廚房出品狀態有參差。…查看更多

我自己好鍾意食牛腩麵，所以一知道某網紅推介呢間，我即刻搵機會嚟試吓。據講呢度嘅崩沙腩同坑腩都非常正，所以心諗兩樣都好啱我食。當日12點鬆啲去到，門口已經排咗一條長龍。不過我預咗一定要食，所以都唔介意排隊。派咗七八個字，就輪到我哋。由於係小店，所以都知道一定較為逼夾，需要搭枱亦都好合理。我哋兩個人分別叫咗坑腩河同片頭河，但佢話坑腩同崩沙腩都賣晒，所以只有普通腩。所謂嘅普通腩就係比較瘦嘅部份，雖然我覺得如果牛腩比較瘦就係有啲伏，但係既然嚟到都試吓啦。食物送上嚟覺得賣相仲勉強可以，牛腩黐到少少肥膏，食落口唔算太乾柴，但係亦冇10分精彩嘅味道。而最令我失望嘅係佢嘅河粉，質地比較爽硬，一啲都唔滑，而且個湯冇味，所以食落就係淡淡咁。我反而覺得個片頭河啲片頭仲比較OK。結果就係食晒啲牛腩同片頭之後，就算數。好可惜今次食唔到坑腩或崩沙腩，所以未能作準。。…查看更多

香港的食肆一向都給人不禮貌的印象，最近就食過一間侍應們都很有禮貌的，環境氣氛都很好的食肆。今次是一家人共八位，來到這裏食晚飯。由於大家的食量都不10分大，而且還有兩位是小朋友，所以我們只叫了一個六人套餐，另外再點了一些前菜及一個燉湯。我想說的是點這個燉湯是侍應推介的，但侍應竟然不知道那個六人套餐當中就包括了一鍋湯，他竟然在推介我們叫另外一鍋湯。究竟是他不知道套餐內有湯，還是一心想我們再叫多一個湯。這點都不追究了。用餐當晚，全場只坐了三分一客。所點的食物只可以用一般來形容，給我的印象就是性價比很低。例如半隻燒鵝，色水與賣相都很不錯，就是肉的質地很乾而且欠缺香味，食起來很黐牙。當晚消費大約$4000 ，人頭消費接近500，居然連飯後甜品也只有八件芝麻卷。整體印象，就是性價比很低，但環境與服務都很不錯。…查看更多

我所謂味道取勝，即係話除咗味道好之外，基本上冇乜好。但係作為食肆，味道好就係最緊要。佢規矩多多，而且不定時營業，完全唔理顧客嘅感受，你要嚟就嚟，唔嚟就罷。佢哋嘅叉燒係幾好味，麵質都係硬度適中，湯底夠味之餘，又有回甘。地方只係一般乾淨，待應態度都普普通通，食物選擇亦冇乜得揀，但係食物整體品質上，算係少有。附近亦冇競爭對手，可謂係獨市生意。其實我已經去過4,5次，但係只有一次食得到，即使係佢講明嘅營業時間，都係隨時唔開門，真係冇計。…查看更多

今日第一次食呢間，因為剛見完牙醫，所以上午一直未食任何野。下午3點幾去到，店內食客約九成滿，看似幾好生意。坐下看餐牌，下午茶選擇不多，不過仍然可以揀午餐，但係由於座位吹正冷氣，實在太凍而要求換位，估唔到侍應都能耐心接侍。上餐時，食物熱度充沛，只係賣相相當一般，更想不到的是味度算中上，例如它的意粉有咬口，個汁味道很有特色，牛肉算滑並且沒有筋。另一個係pizza兩片，份量實在太少，但味道還是幾好。另一個問題係店內相當嘈雜，客人多是一個原因，更可能是因為店內陳設反射聲音太多，所以有點吵耳。這店的服務水平算高，是香港少見的，而且侍應多數係年輕人，值得讚賞。…查看更多

我食嘢係比較厭尖，好多地方都覺得唔好食，但來這間通常都會滿意，特別係晚飯。他們的小炒很有鑊氣，份量較少，啱我。如果來食晚飯，通常都會叫個老火湯套餐，貪佢個湯夠味。這類街坊食店當然不可能要求有好的服務，待應通常都能夠做得到基本服務水平，叫佢攞嘢可能就要叫多兩次。其實老闆一直都在看鋪，管理上都算係咁。店舖衛生只係一般，所謂街坊店就係咁樣水準，不過我幾欣賞佢哋會畀一大碗滾水你洗餐具，算係唔錯。整體嚟講，我都會推薦。…查看更多