五路食神的个人专页

昨晚(16日)經過D2見餐牌内容唔錯，入咗去食！坐低後，侍應提醒當晚咭機失靈要付現金，覆咗可以，之後睇咗Menu準備點餐，成班人就在吧木台前師傅傾計(可能因為係第一枱，未在狀態)最後點好後，侍應話過咗400可以送三文魚生及枝豆(一至四優惠)，點埋加28柚子雪巴。食品質素可以，不過飲完茶叫添就三催四請！食完叫上雪巴，點知等咗好耐至覆無貨！以後都係坐近吧枱可能服務會好啲！昨日明顯人手不足，咭機又壞咗，真係唔多順利！…查看更多

當晚在千色附近揾食，記得有間老字號【莎樂美餐廳】，抱住一試心態，點知就中伏！是夜點咗雜扒同晚餐牛柳意粉：先講雜扒─腸腥﹝可能未熟﹞，薄牛扒同豬扒明顯雪到無味，祇有雞扒可以！伴菜有喲焦，真係我估唔知係咪大厨休息？晚餐牛柳意粉啲意粉未熟透，五件牛柳中有一件係霉嘅！記得當晚無滿座，點解食物未煮好就上檯？呢個問題我唔會花時間去了解的！順帶一提，佢唔收信用卡─ 一係佢當自己係茶記，咁嘅質素，算啦！…查看更多

小平津俾我一向嘅印象都係好家庭式，入到舖裡面貼滿一幅幅充滿顧客笑容的相片，亦有在舖內塗鴉的字句及漫畫─ 一切都好隨意及溫馨！是夜由於太太想去，所以去食，叫咗多數係小食：蟹子沙律、燒牛舌、燒雞翼、土佐豆腐、魚湯鍋加烏冬。1.蟹子沙律：用料新鮮、沙律醬剛好唔太多，而蟹子一咬就穿，唔同某啲食肆以魚子充蟹子，非常滿意的一個沙律。2.燒牛舌：牛舌燒得剛熟，不過就唔多夠味，即使有芥末都係同九龍佐敦某店略遜，因為我偏向濃味多啲！3.燒雞翼：雞翼皮脆肉嫩，相當唔錯！不過師傅唔多落鹽，口味偏淡，但係在鼓吹少鹽少油嘅日子中有件燒得咁香口嘅雞翼我都覺得幾滿足啦！4.土佐豆腐：木魚花及表皮脆而裡面豆腐軟滑，醬油唔太咸，不過我都係鍾意燒物多啲！5.魚湯鍋加烏冬：魚湯鮮，不過有少少魚腥，汁液濃稠，但係唔多覺有魚在裡面。將烏冬放在湯內滾一下再食，個肚就有七分飽啦！聽到隔離檯叫清酒，侍應好細心咁問要唔要暖上，足見小店待客之道！順帶一提係佢嘅餐前小食幾好味同餐後送甜品，我要咗豆腐雪糕而太太就要咗綠茶雪糕。中日兩國常在領土及歷史問題上糾纏，假如大家以禮相待，世界係咪會和平啲，大家開心啲？…查看更多

上星期六同友人遠足從屯門小欖到咗元朗大棠。當日風和日麗，唔多猛太陽又有少少風，所以走咗三個半鐘都一啲唔覺辛苦！剛走出自然教育徑就見到有的士，太太即時截停去醫肚。想咗一想就試下New York Café and Bar, 因為睇網友評語話唔錯，不過服務水平一般。到咗New York Café and Bar先至發覺店舖面積唔大, 所以唔預訂就可能無得食！幸好當日已經差唔多下午一點半，等咗約15分鐘就有位坐，不過就相當逼﹝應該係兩人檯，但係就坐咗三個！﹞無法啦，鬼叫你唔Book咩！由於係午膳時間，餐牌上有三個選擇，就試全個餐牌吧！坐低個陣有Bread stick 同有碟乳酪醬，食落都覺得幾好味！每一個餐都有餐湯跟，當日係Shrimp based cream soup, 裡面食唔到蝦肉，不過就有蝦味及個Cream 幾香，唔係出面啲湯水汪汪又無味，水準之作！由於想試廚師手藝，因此就要兩隻碟﹝友人唔食牛肉，所以牛排幾好味都唔關佢事！﹞。主菜如下：1.8oz 牛排配Caesar Salad;2.脆雞塊意粉; 及3.炸魚三明治配雜菜。先講牛排：肉汁豐富，有牛肉味，但覺得外皮有少少Overdone (即係燶咗，對於怕死一族嚟講就即係致癌物質!) 但係切咗個少少就唔錯，厚薄適中，以沙拉泮就無咁油膩，價錢約百二，如果你喜歡牛排，你會鍾意呢度嘅出品！脆雞塊意粉：意粉軟硬適中，而雞堍味道可以，雞皮亦煎得香脆─美中不足係意粉嘅蕃茄醬略少，不過味道上可能我食完味濃嘅牛排至去試雞意有啲唔係太公平，所以希望下一位網友可以俾一啲中肯啲嘅意見！炸魚三明治配雜菜：呢個食落有驚喜！表皮脆醬無過厚及硬，而係鬆脆，魚肉內好似夾咗薯茸，味道唔錯，適合一般女士，不過我呢啲食肉獸就可能唔多夠！食完餐飲叫咗凍啡、凍巧克力及凍摩加咖啡，仲無另外加錢！ 全部埋單二百一有找！咁嘅價錢對我地呢班CBD上班一族簡直係福音！上一篇話服務唔多好, 呢一點我覺得可以更正 - 服務一般, 你唔可以要求一間小店做到酒店水平, 亦對該店唔多公平! 不過你去New York Cafe and Bar 最好訂位!雖然我個人唔鍾意通脹，不過我會建議老板在2 同 3 餐價上有10-15%空間，不妨考慮！努力應該有相應回報，希望老板你繼續努力！…查看更多

放咗工去旺角買嘢，同老婆唔覺行到八點，見到佢就上去睇下有冇運行。上去就聞到好香魚湯味，於是同老婆坐低。地方其實真係幾細，當晚八成幾滿，不過就以旺角區咁嘅時段算做中規中矩。老婆點咗剛才聞到好香魚湯味個窩，然後要碟豆醬炒菜。由於個窩入面有魚腐、蝦、蜆、魷魚、豆卜及半條鯇魚，加上湯底有黑椒，而材料幾新鮮，食得出係真材實料，所以極力推荐！影相個陣已經先試個湯，發覺相當鮮味而唔腥，可能同用炸薑片及極多黑椒有關。個半條魚俾我翻轉幾次都唔散，可見都幾得！用魚湯送飯一陣就食完碗飯，仲好似唔多夠喉！講番碟菜都好甜，唔知同用豆醬炒有冇關？最後有兩碗綠豆湯送，埋單二百幾，以今日通脹嚟講算唔錯！…查看更多

原本想去樓下客家好棧，不過太多人等，又見好似OK，咪衰咗囉！有幾個套餐，試咗其中一個，有魚肉炒豆角，中式豬扒、菜飯同甜品。魚肉食落係霉嘅，所以都唔多食。豬扒屬急凍貨色，又係唔得！祇有個甜品芝麻湯圓尚可以！加上服務質素真係幾差，茶飲完想叫佢添就發覺侍應自己在遠處傾偈！之前叫佢俾辣椒醬結果食完飯都唔見，服務真係唔掂！以後又可以少一個選擇啦！…查看更多

昨夜去銅鑼灣參加新年旅行團，順便上開飯睇有乜介紹，就選咗神屋流博多道場試下，因為話佢串燒唔錯！去到道場差不多八點十分，要等約五分鐘至入座，招呼尚算好。由於有餐牌內食物照，就決定試佢出名嘅牛腸鍋。侍應提點牛腸有啲靭，亦建議叫拉麵或烏冬。由於烏冬單叫$65，老婆就叫五島烏冬﹝都係$65!﹞。先講雞中翼：燒得皮脆，亦唔太鹹，以水準嚟講屬於中上。咁嘅價錢($26蚊兩件!)其實可以用新鮮貨會仲好啲！:)生蠔煙肉卷：中規中矩，煙肉味略嫌蓋過蠔鮮味，會建議用大少少嘅蠔可能效果會好啲！原本應該三件，不過食咗一件至記得影，鎖你！牛腸鍋﹝豬骨湯底﹞：既然係出名，味道當然唔錯，尤其牛腸相當肥美！主要係唔好烚過籠以致過靭！如果用淨拉麵或烏冬可能會更好味！五島烏冬：食個陣至知衰咗！牛腸鍋湯底味濃，雖然五島烏冬味無咁濃，但係食過牛腸鍋湯再食五島烏冬就過鹹，係自己叫錯，唔怪得人！燒三文魚腩：相當肥美，燒得正！如果有柚子汁淋上去會更好啲！燒牛舌：因為想等埋燒三文魚腩一齊影相搞到凍咗，下次都係食咗至講！全晚消費$375，在銅鑼灣區屬合理，下次都會試！…查看更多

尋晚落咗班試下去 W Square 2樓美心集團屬下八喜試菜。由於到埗約7點多，人唔多所以唔使等。紅燒牛肉麵中牛肉同湯都做得唔錯，不過最大敗筆係碗麵─太淋又無咬口，一啲唔似食麵！好多出便麵店都做得好過佢，仲係大集團，所以要俾隻黑豬佢，希望佢改良麵質！:(胡椒餅毫無驚喜，不過不失，至於值唔值就真係見人見智！炸蝦卷做得招牌菜梗係掂啦！炸蝦彈牙，皮脆，鮮味十足，係全晚最滿意菜式！蚵仔蛋中規中矩，蠔仔鮮味不足，加上焗到蛋鞋身，對大集團呢類要工夫處理嘅菜式唔敢寄予厚望！芋頭珍珠圓頗為失望，因為粉糰太淋，無咬口又唔煙靭。薑湯糖水又唔夠薑，真係下次都唔好叫！不過好似呢間係分店，唔知總店會唔會好啲呢？…查看更多

上次試過覺得唔錯，所以再番去。坐低叫咗3樣嘢：海鮮沙律、泰式燒雞、芋頭焗飯及一個椰青。先講海鮮沙律─酸辣程度略為偏辣，所以叫咗個椰青！如果食得辣呢隻會唔錯！泰式燒雞今次就頗為失望，因為明顯係雪藏貨仲無乜味！無泰式辣醬吊味，就好似水滸傳魯智深話齋：淡出鳥來！最後想讚芋頭焗飯：除咗料足、飯香，軟硬適中，值得推薦！臨尾仲有段小插曲：俾咗人地張二百幾嘅單我！調查變咗$162，不過又計錯沙律，結果係$166落樓！如果你唔太要求服務質素同接受水準參差，你都可以試下呢間嘅！如果呢餐碟雞可以有番上次嘅水準，我會俾好高分佢！…查看更多

已經到咗午膳1點多，入去祇6、7檯客。服務員相當勤快，坐低就5分鐘唔使有茶。點咗個午餐，例湯加兩餸有糖水。先講例湯：粉葛鯪魚赤小豆湯。飲落覺得有啲唔妥，食落舊粉葛發覺有燶味！到餸係上湯蒜子津白及梅菜肉蒸豆腐。論味道豆腐好過津白，因為我懷疑上湯係史雲生。反而糖水係木瓜雪耳煮得幾潤，亦係我最滿意出品！綜觀收費為$145，以午餐及水平嚟睇我覺得有更好選擇！…查看更多

睇完網友介紹，當晚就去試下菜，唔知會唔會有驚喜？到達九龍城已經差唔多六點半，大部份食肆都無乜客，而泰式燒烤就在某新開點心店旁，相當唔起眼，仲以為去錯咗地方！坐低後，無茶水供應，不過可能係第一枱客，馬上有位泰藉侍應過嚟俾餐牌，招呼算OK啦！叫咗幾樣嘢：清炒芥蘭、白灼司奄、蝦醬炒飯同半隻泰式燒雞。先講第一隻菜﹝清炒芥蘭﹞：唔算太鹹，都幾惹味！所以係最快清嘅！第二道菜﹝白灼司奄﹞：上海人稱為「元寶」，屬於過年時候食嘅意頭菜，煮工在於時間掌握、食品質素及處理。從當晚睇，處理衛生程度屬於可接受，不過食到其中一隻係臭嘅，就令我唔會推薦呢隻菜！畢竟食品質素及處理對健康有重大影響！第三道菜﹝蝦醬炒飯﹞：睇網友介紹話偏淡，不過食落又唔覺得唔係網友講得咁差。太座話應該為佢平反，而飯面有蛋絲，泰式腸及炸蝦米，如果唔係食慣濃味嘅人，呢隻可以一試！第四道菜﹝半隻泰式燒雞﹞：相當有水準，不過唔係新鮮雞，所以唔好咁高要求！整咗支泰啤，埋單二百，從價錢衡量應該算抵食！…查看更多

由於睇到網評話佢唔錯，於是約咗班朋友一齊試！佢無開瓶費，而成班人中祇有兩個酒膽，所以祇開兩支，而服務生態度親切。 佢在服務上唯一敗筆係要你兩個鐘交枱，所以朋友如果諗住要傾好耐就唔多啱！各人都有做功課上Openrice睇下有乜好食，所以點菜唔係太耐，而上菜時間相當準：你食完一道菜後5-10分鐘後上另一道菜。同服務生傾起至知佢地原本係做私房菜，所以功夫有番咁上下！其中有朋友話個別菜色甚至比跑馬地Amigo出色﹝當然各花入各眼，不過我自己覺得水準確係唔錯！﹞其中我自己比較欣賞菜式：肉桂粉蘋果批加雪糕﹝不過似乎烤過咗少少！﹞炭燒龍蝦。本來應該推介埋芒果拿破崙餅，不過由於係甜品，所以最後上令到大家覺得有啲漏！下次應該留前鬥後！我頭盤揀咗法式鵪鶉，因為以前我在怡東酒店TOTT's食過法式鵪鶉配無花果，亦係我嘅favourite dish! 依家轉咗Menu 好耐又食唔番，不過食Bonheur 嘅法式鵪鶉又無乜驚喜。如果以法國菜嚟睇，我會推薦Bonheur─除咗食品出色，價錢適中，服務生態度亦親切！下次各位考慮下啦！…查看更多

今次睇完食評先至叫！到達南記時係下午18:15，即係未到人客高潮，所以待客都比較寬容，無之前咁話要你一粒鐘走人！坐低叫咗蕃茄豆腐大眼雞魚湯、半隻鹹雞、方魚芥蘭，加兩個飯。由於個湯真係唔錯，於是連相都唔記得影，不過其他食評已經有，所以講聲唔好意思！鹹雞就一般水準，應該唔係冰鮮，不過半隻要$118就略嫌貴咗啲！:(方魚芥蘭味道都可以，不過就師傅落勁多油！如果係青春少艾，又或者注重健康人士就希望你地接受勸告：呢類菜危害健康！埋單近$270，每人都要$140，算OK啦！…查看更多

早個輪睇完推介就諗住試下啦！由於已經過咗1:40分，人客走咗好多，所以唔使等位。坐低叫咗菜乾豬骨粥同韮王肉絲炒麵(兩面黃)﹝原本應該叫豉油王炒麵，不過叫錯咗！﹞既來之則安之！首先豬骨粥的確用足料，所以推介！兩面黃炒麵炸得鬆脆，而敗筆在於肉絲係雪藏貨！由於兩碟加茶芥要近$190，仲要係午膳在灣仔區咁嘅時間，應該有更好嘅選擇！順帶一提係上一篇食評話有甜品送，係乎係因為佢係靚女吧？…查看更多