Choi Wai Yan的个人专页

已經第2次黎重慶大廈食印度菜，啱啱食完冇幾耐就想enchore。今次就試第2間餐廳，入去冇耐就有人指路同帶你去間餐廳。可能因為差唔多4點去食，成間餐廳得我地呢枱客。如果第一次試印度菜都唔洗擔心唔知揀咩食好，店員都好主動會同你講下有咩多人叫，又睇下你口味例如食唔食得辣推介d菜俾你。我地叫左都好多人會食既芝士波菜，牛油雞，咖哩角，仲有一定唔少得既烤餅，因為選擇困難所以要曬芝士同蒜蓉2隻味。野飲方面就要左杯印度奶茶同芒果奶昔。咖哩角啱啱炸好熱辣辣淨係個皮都好好食，入面會有薯仔同豆，冇肉但比起平時食果d咖喱角係好食好多，上次食過已經覺得係必食既野。😋芝士炒波菜第一次食可能會有d驚訝，你唔會見到一條條菠菜而係一碗綠色既醬咁，中間有d白色一粒粒應該係芝士既野，同烤餅一齊食係勁好味同食極唔厭。個牛油雞既味都幾驚喜，係帶d蕃茄味同小小小辣味, d雞粒都好嫩滑好入味，同烤餅一齊食又係一流。🤤烤餅方面個人就鐘意芝士味多d, 真係有幾濃既芝士味就咁食都好好味又好有口感，趁熱食勁香口。杯印度奶茶如果冇試過係幾值得一試，飲得出係有薑，肉桂等等香料既味，就算本身未必鐘意呢d味既人都好易入口係唔錯既嘗試。成餐飯既份量對兩個女仔真係多左d非常之飽, 下次都係唔好太貪心叫番一種烤餅應該都夠😂全部菜我地都好滿意，店員服務態度同重慶大廈d人都勁nice，真係好值得去試下！記得OpenRice book位仲會有折😍…查看更多

之前已經幫襯左佢幾次，銅鑼灣中環分店都食過，每次食完都好幸福☺️試左之前未食過既抺茶忌廉焦糖味配白玉（$98），本身啱啱食完lunch想3個人share 1個做甜品，但原來有最低消費每人$35，所以加多左個牛乳奶凍係入面～一黎到記住要快d影相，因為佢呢種日式刨冰比平時d刨冰係快溶好多。第一啖入口就有好濃既抺茶味，一d都唔澀，同焦糖既味非常之夾。好鐘意佢入面有埋d焦糖脆餅，又有多d口感，奶凍就一如以往幾重牛奶味，幾分鐘就清曬！同其他Shari Shari既刨冰一樣，呢個刨冰係唔會食到尾得番冰冇曬味，啖啖都有好濃既抺茶焦糖味，食到最後反而淨番小小醬🤤🤤我宣佈呢個刨冰已經變左除草莓味之外我最鐘意食既味！好推介第一次食既人試，2-3個人share就啱曬🥰…查看更多

第一似去bar飲野朋友揀左呢間尖沙咀海邊既bar。知道8點前happy hour買一送一所以食完晚飯就急急腳趕左黎，間bar係酒店上面15樓。可惜窗邊位都full曬唯有坐中間位先。原來買一送一係要同一杯野飲，我地叫左2杯summer cocktails一杯Pina conada, 另外果3杯可以等我地飲完後上都幾好。2杯summer cocktail一杯係桃味一杯士多啤梨味，我個人最鐘意桃味果杯，飲落好清新✨佢有茶係入面所以都幾似桃茶，溝左whisky但酒味唔太多，好啱唔飲開酒既人，同埋佢特別大杯。士多啤梨果杯酒味就濃d喇，朋友會覺得似藥水味可以我地唔太飲得慣。至於Pina conada飲落就似椰子奶味，我自己就唔太鐘意，可能唔太接受到椰子奶同酒夾埋既味。🥴好好彩果日個天氣幾好，睇到個海景好靚同對面d樓都好清☺️後尾有班人走左仲有得掉去窗邊既位，跟住就同朋友瘋狂影相💖成個bar既環境真係幾好，佢入面係星空主題有個星座天花板同畫仲有咁靚既夜景睇，真係好啱朋友坐低飲杯野慢慢傾計，非常舒服。我地留左都成2個幾鐘，飲6杯cocktails每人俾左~$100。下次唔好咁貪心叫咁多杯happy hour一個人$5x都ok😛…查看更多

今日遲左食lunch見下午茶時間呢間野個menu幾抵同吸引就決定試下。差唔多3點去到都仲有d人係度食緊。試左個豬頸肉湯河，豬頸肉切成薄片但非常多塊，香又唔會話覺得好肥油膩，好滿足。🤩仲有唔少菜同白蘿蔔所以餸真係幾豐富。河粉份量都好多，個湯係幾濃味會好想食落去。跟餐仲有杯野飲送龍眼冰椰汁冰呢d都唔洗加錢。要左杯椰汁冰，唔算好濃椰子味但唔會太甜，夏天飲幾舒服同配個湯河係幾正。❄️成餐$48唔洗加一係尖沙咀商場食到呢個價當lunch真係覺得幾抵食。下次會想試埋其他泰國菜。👍🏻👍🏻…查看更多