sanidytang的個人專頁

上星期同朋友過嚟食晏，有一張$50優惠券，諗住今日放工自己一個食埋佢。入到去間餐廳完全冇人，經理帶位，連帶咗我去二人枱，我問可唔可以坐吧枱，佢話:「得~sushi bar」我明明諗住係入嚟食鐵板燒，坐咗一陣同返佢講其實我可唔可以坐鐵板燒嗰邊啲bar枱，經理話:「頭先咪問你坐邊邊囉」。嘩真係唔好意思喎，講嘢句子又短又冇尾音，真係唔知你有問過我問題，即使你真係有都可以唔使咁樣講嘢。佢繼續話:「攞返部電話丫，杯茶我換過杯俾你」語氣好似怪責緊我曬咗佢杯茶咁。其實最近黎食lunch嗰個大江戶便當已經大不如前，仲要朋友食食吓食到有條頭髮。而且佢夜晚一個鐵板燒都成$500，接受唔到咁樣嘅價錢有咁樣嘅對待。…查看更多

原本一個月之前約咗某一個星期六嘅2:00，同另外兩個朋友試呢度嘅omakase。我哋全部都係住市區，所以用咗啲時間入嚟，最後差唔多3:00先到齊，不過餐廳都好有耐性，等埋我哋，只係要我一個人幫佢哋落晒order先。我揀咗一個有刺身有壽司嘅lunch set，大約係$650加一，另外仲叫咗sake三個人share。枝sake就好好飲，師傅都好有心機炮製每一道刺身或者壽司。啲魚全部都好啱胃口，調味都做得幾好，只不過係啲飯真係有啲生🥲唔知呢個係咪每間餐廳整醋飯都有獨特秘方，不過我就覺得呢間餐廳啲飯硬嘅程度真係比我覺得佢有啲生，口感唔係咁適合我。新界區嘅omakase選擇唔多，區內居民應該會想再幫襯，但係對於我來講應該會選擇返市區。…查看更多

之前一路都好想試舊舖頭，點知食唔切佢就已經搬咗入去大啲嘅舖面。新舖頭入邊光好多，以前個舖位太細又黑，就算想試都係諗住買外賣，但係新舖頭可以坐多好多人，雖然啲枱都係細，同埋要坐高枱，但係放工時間係冇乜人，而且佢哋8:30就last order。以前冇食過蝦麵，以為會好似喇沙咁重口味，但係間舖頭做得甜甜地，唔會好剌激，夜晚食完都唔會口渴。套餐包一碗麵，雖然碗麵有啲細碗，但係個套餐仲有一個小食加一杯嘢飲，性價比算係咁。面底揀咗老闆娘推介嘅摻摻，全米粉又好寡，全油面又好肥，每樣一半可以一啖食到兩種棉質嘅粗幼同埋軟硬度，啱啱好。…查看更多

上菜時有蠟燭烘住，食法幾新鮮，最鍾意食熱辣辣嘅嘢。整體味道唔錯，好味過一樣開喺北角匯嘅碼頭酸菜魚。不過個餐牌就有啲難明，店員亦都唔熱心介紹，不過裝修新淨整潔。呢個水準係最低標準，如果下次去嘅時候體驗差過今次就唔值得再去。…查看更多

其實佢個Tea set好有誠意，除咗三層架上面嘅嘢食，仲有帆立貝刺身，同埋一球雪糕同一球sorbet，味道都幾好味。埋單每人三百幾蚊再加一，其實單講食物係值得的，服務員態度亦非常好，只係行過去西九實在太遠🥵由圓方行過去半個鐘，又要過馬路上樓梯過天橋，仲要非常曬，行過去嗰陣非常辛苦。食完走嗰陣又要行半個鐘，我諗佢食物同服務質素都要保持呢個水準，然後價錢要起碼平三份一先至吸引到人攀山涉水咁行過去。…查看更多

以前中午來都有個精選餐牌，有啲有誠意嘅便當。今次嚟到得返個平時冇乜興趣嘅中午主餐牌，每個午餐都二百幾蚊至少，完全呃錢。三百幾蚊俾碗都唔知有冇$150質素嘅丼飯。去隔離菖蒲亭食好過🥵…查看更多