Terry C的个人专页

一路大讚嘅拉麵店 - 座銀早排突然係社交平台宣佈，主打鯛魚湯底拉麵嘅姐妹店 - ○de▽真鯛魚拉麵會喺中上環一帶開店，位置其實就喺歌賦街座銀既附近，明乎其實轉個彎就到。而今日就係○de▽第一日試業嘅日子，聲稱限量100碗，賣完即止。唔知係咪朋友J賜我好運，夜晚8點去到竟然仲有得食🥰🥰🥰 試業期間只有鯛魚清湯拉麵一款可供選擇，咁同朋友J就一人一碗，另加一份炸雞，一碗鯛魚丼飯些牙。鯛魚清湯拉麵：湯底清徹見底，附有炸魚片兩片、慢煮豚肉叉燒、魚肉碎、筍。飲一啖湯，魚鮮味十足，隱約有一陣煎魚後拎去煲湯嘅味出嚟，飲落幾舒服。果兩塊炸魚片真係要特別一提，煎得靚，咬落去「咔嚓」一聲，乾身夠脆唔油膩，滿意。覺得單調？食到咁上下，可以將附送嘅「蠔醬」倒埋落湯到，增加一層厚實感覺。仲未夠？倒埋個鯛魚丼飯落去做湯飯，又另有一番感覺。不過你問我呢，我作為重口味人仕，都係鍾意座銀嘅雞白湯拉麵 x 雞油牛蒡飯呢個組合， Sorry 🤷‍♂️🤷‍♂️🤷‍♂️ Anyway，最後我都有飲哂成碗湯嘅，側面證明好飲程度。暫時列入「可以一戰」級別，未可以睇座銀睇齊。期待之後推出嘅拉麵/沾麵款式，唔好令我失望 🤟🤟🤟…查看更多

唔少朋友都介紹另一間同類型小店：Panda Burger，位於大角咀Burgerman大角咀總店附近，搞到我心思思，想試佢既主打菜：羊肉漢堡。剛過去既星期六，下午要同月巴女未去學茶。見有時間，就拉埋佢去試下啦。點去呢？如果搭地鐵去既話，好簡單，係奧運站B出口出，向匯豐銀行中心方向行，落電梯到地下，綠色門面既Panda Burger就係對面馬路，唔洗五分鐘既腳程；如果你唔係搭地鐵去既話，我相信廿一世紀最偉大既發明：Google Map幫到你，加油。因為今日剩係得枝定焦鏡係身，影唔到呢個小店既環境，各位見諒。經過月巴女未既一翻思考後，決定左食羊肉漢堡配芝士薯條，再加一個凱撒沙津。Er…因為芝士薯條太好食，月巴女未話再追加左個芝士薯條…好飽。羊肉漢堡配芝士薯條 $45(包)+ $15 (跟餐) + $6 (轉芝士薯條)先上枱既係芝士薯條，真係好好食！芝士汁係流質半溶狀，香得黎唔膩，配合埋薯味重，內裡充滿薯蓉既厚切薯條，簡直係一絕。食完忍唔住再安歌多一客。跟著上場既係羊肉漢堡，我既最愛。先睇大細，一口不能咬盡，唔錯唔錯。到材料，上下既芝麻包，經過烘焗處理比一般既更外脆內軟，芝麻味亦更香。主角呢，當然係6安士澳洲羊肉，煎至半熟，肉質仍然粉嫩，有羶香但唔重。煎封功夫亦唔錯，咬落去令鎖著既肉汁微微爆發出黎，簡單黎講，夠「Juicy」。配料加上酸甜小黃瓜、蕃茄、生菜、芥辣（佢寫係薄荷醬。但我點睇點食都係芥辣），令羊味更突出之餘，亦平衡到油膩度。喜愛食羊既我表示：好滿意。凱撒沙津 $35掛著食個羊肉漢堡同芝士薯條，我全程無理個呢個沙律。月巴女未表示唔錯，特別係個烤雞，即叫即煎，誠意十足。因為月巴女未掛著食芝士薯條，食唔哂烤雞，臨走前，一個疑似老板娘既人問我地「係咪烤雞煮得唔好食？」，幾尷尬。當然，亦好反映到小店既誠意，對於每一個客人都好留意，希望可以做得更好。希望各位可以多多幫襯小店。P.S. 據聞呢到有個「脆皮燒腩漢堡」好好食，但每日限售十個，要再搵機會黎食！！！…查看更多