conconyan的个人专页

推介呢間尖東新開嘅西班牙餐廳！裝潢以黑紅為主色調，加上地板、掛飾、燈飾、碗碟等更添西班牙風味。座位之間間距夠闊，坐得舒服，私隱度高。野食方面都冇令我地失望！推介Seafood Paella($398),大大份相當足料，每粒米飯都充滿獨特嘅蕃紅花香味、西班牙辣肉腸嘅油脂香以及濃郁嘅海鮮鮮味👍🏻，略嫌不足係飯粒有少許過濕偏稔，如果乾身少少就perfect了🤤另外澳洲M4霜降和牛板腱($238)都一定要試！塊扒外皮微微焦香，肉心粉嫩juicy, 牛味十足，油香豐富，正！Fd子們大推👍🏻因為人多嘅關係，我哋一次過試埋其他主菜：西班牙黑豚豬鞍（$238）、香草燒雞（$198）、銀鱈魚（$238）同龍蝦意粉（$238），一樣咁好食，不過魚同雞嘅份量細份咗啲，份份主菜嘅配菜都一樣，非常一致😁如果有啲變化會更有驚喜🤤Tapas係西班牙菜必備元素，朋友推介經典嘅巴馬火腿配哈蜜瓜（$78）另外有香口嘅炸加利西亞章魚（$58），配埋酒食就爽啦🤤甜品正常發揮，無論樣同味道都好有homemade嘅感覺，實而不華👍🏻 另外必須讚一讚餐廳服務好好，非常細心同貼心👍🏻…查看更多

雖然已經踏入夏天，但都無阻我地打邊爐嘅決心😂 呢間我地已經食過好多次，因為佢分店夠多夠方便，而且又唔算好貴，最重要係好食！今次都係叫鴛鴦湯底，酸菜白肉加麻辣鍋（$128）。湯底本身已經好濃郁而且好多料，例如酸菜、花腩肉、QQ寬條麵、鴨血、凍豆腐等，香料同藥材味好出，如果你仲嫌唔夠重口味，可以再去自助醬料區溝醬。火鍋配料方面，選擇真係好多！仲有飛機直送嘅配料，例如台灣獨有嘅翠絲水蓮、珍珠荀、A菜同水晶冰菜，朋友第一次食水蓮就愛上，爽脆新鮮！肥牛基本係打邊爐必備，呢隻手切肥牛肉（細份$238），油花分布均勻，口感嫩滑牛味十足。另外值得一提嘅係餃子拼盤（$118，有6款共12粒）。粒粒飽滿，皮薄餡靚。仲有響鈴，炸到金黃色又脆卜卜，浸一浸湯底已經吸滿湯汁，正呀！其他配料唔一一介紹啦，絕對合格有餘，值得一試😆…查看更多

好友話油麻地有幢大廈翻新左，而且進駐左幾間唔錯嘅餐廳，今晚帶我去試試。餐廳位置彌敦道562號4樓，距離油麻地地鐵站約2-3分鐘步程，非常方便！餐廳設計簡潔，一邊有落他玻璃，可以一邊食一邊欣賞彌敦道街景。食物選擇都唔少，有選擇困難嘅我地用左好耐先揀到食咩😂炸魚薯條 $58魚塊有成3大件，外皮炸到金黃酥脆，入面魚肉唔會太乾，雖然肉質唔算嫩滑，不過呢個份量同價錢絕對超值。薯條粗身，都係即炸即上，正！三文魚子墨魚汁扁意粉 $158呢個真係唔好同初約會嘅男女朋友食，因為真係會食到個嘴同牙黑曬😂😂 扁意粉硬度適中，有咬口，每條麵條都掛滿新鮮墨汁，加埋粒粒飽滿嘅三文魚子，鮮味十足！梳乎厘 $48焗得剛剛好，味道不算好驚喜，合格！因為食左下午茶嘅關係，今次試唔到太多野食，下次一定會再黎！…查看更多

今個星期實在太chur, 終於挨到weekend, 訓到自然醒，然後男友帶我去呢間餐廳歎個semi buffet lunch🥰餐廳位於天后嘅一幢商廈入面，離天后地鐵站只係5分鐘步程。餐廳裝潢簡單雅致，地方不大但枱櫈擺位唔會迫，最吸引嘅係呢度有特大玻璃窗，景觀開揚，仲有維港景添！主菜有5款選擇，前菜、餐包、小食、湯同甜品任食，款式唔算多，但咩都有。主菜方面我地揀左意式肉丸意大利麵（$148）同美國安格斯肉眼伴扇貝配磨菇紅酒汁（$238）。意粉整體不錯，份量、硬度、調味都岩岩好，肉丸有三大舊，但肉質結實同乾左少少🤪。肉眼7成熟但仍然夠juicy粉嫩，扇貝大大粒，夠彈牙新鮮，其他配菜都夠新鮮，好睇又好食。食完主菜再食返幾件甜品就為呢餐咁chill嘅brunch劃上完美句號。…查看更多

我身邊有幾位為食朋友都向我推薦過呢間位於中環荷里活道嘅台灣餐廳，因為次次經過都有人排隊所以就放棄冇食，今晚難得我同朋友都早放工決意去試試！我地大約6點半左右到達，餐廳已經坐左8成客，到7點已經爆場，門口慢慢出現排隊嘅人龍🙈餐廳舖面細細但五臟俱全，有吧台位同普通位，裝潢簡潔但夠潮，不過枱比較細同排得密，soho區租金貴，坐得密啲係情有可原嘅。食物選擇非常多，Menu啲圖片好吸引，睇得出餐廳主打傳統mix新派嘅台灣菜，令人好期待！鮮木瓜牛乳 $52去台灣旅行必飲嘅飲品！木瓜好新鮮，已經熟透所以夠甜，牛乳味唔算濃厚，但整體好飲！不過冰打得唔夠碎，咬到有較大粒嘅冰粒。厚條慢煮牛肋骨湯麵（半份）$128呢個麵非常推介！牛肋骨非常軟淋入味，有部分帶有筋位，口感更好，麵直身偏粗，質感較Q彈，雖然掛湯度唔算強但呢個質感我鍾意，湯頭本身已經夠濃郁，加上店家自制麻辣醬就更惹味！窩夫鹽酥雞 $68Presentation好用心，鹽酥雞炸得外脆內嫩，配以鳯梨汁可以解膩，窩夫綠綠地色，應該係綠茶味？但唔太食到咩味🙈岩岩上枱時都係脆脆地，但有一舊我地冇即刻食放左一陣就變淋曬，所以建議要即上枱即食！伯爵茶凍QQ芋圓 $65集多款食材於一身，望落都覺得好豐盛！我最愛嘅芋圓都冇令我失望，夠糯夠Q夠咬口唔會過硬，好満足！…查看更多

將軍澳人真係愈來愈幸福，因為呢區已經唔再係美食沙漠，而愈開愈多唔同類型嘅高汁餐廳，依家連台式火鍋都有！天氣咁凍，今日帶兩老黎試下呢間位於酒店入面嘅台式火鍋。呢度啲裝修好有中式古曲味道，座位好寬敞，枱與枱之間有足夠距離，尢其係卡位，有屏風間開，私隱度高，兩老好鍾意。服務方面，店員見我地望住menu有啲迷茫，會自動過黎作簡單介紹同推介，會特別教我地處理啲特別食材，殷勤地加湯加茶，值得一讚！湯底我地揀左經典養生鍋同酸菜白肉鍋雙拼嘅鴛鴦鍋（$188）。兩隻鍋底都有好多料！媽媽最愛養生鍋，因為藥材味幾濃郁，仲有淡淡人參味；酸菜白肉可免費追加一份酸菜白肉，但略嫌未夠酸同重口味🤪。呢度有自助醬料吧，自己去任溝。手切牛肉（大）$338新鮮、有牛味已經無得輸！霜降肉眼肥牛$178呢款係急凍牛，勁大塊，冇咁嫩滑但有咬口，脂肪比例唔算多，都唔錯！炸午餐肉$58厚切👍🏻 炸得香脆，即食又得，浸一浸湯汁食都得，正！甜不辣$48台灣其中一款特色小食，意餅之類，炸到金黃，外皮微脆入面煙韌，唔錯。鴨血$48台式打邊爐必食！雖然本身個養生鍋已經有，但我地實在太鍾意食，所以再追加多1份。翠絲水蓮$88呢隻菜真係第一次食！由台灣空運到港架！浸幾秒就食得！清新爽脆，正！其他配料都唔錯，唔一一介紹啦，大家可以去試下！人均消費約$300-400，呢個價錢絕對對得住個環境、食材同服務👌🏻…查看更多

夏天都要打邊爐，仲要食火辣辣又刺激嘅重慶火鍋！呢間火鍋店大有來頭，係2014年《舌尖上的中國2》推介的重慶火鍋店，在中國有超200間分店，我地好期待！湯底我地揀左鴛鴦鍋（任選湯底$38/位），大骨滋補鍋同重慶辣湯。大骨湯程奶白色，有舊大骨架🤪，就咁飲幾啖都覺得好濃郁。重慶辣湯見到顏色、辣椒數目同辣油已經知道係勁野，落肥牛一試，媽呀！真係好香辣刺激！又夠麻，辣到我都頂唔順，將部分辣椒撈上黎先🙈。小食同火鍋配料方面都十分地道，孝禹十味係重點推介。首先係現炸豆皮$59/份，豆皮炸得香脆挺身，放於鍋內3-5分鐘即可食用，豆皮較港式的響鈴厚身，亦都較有豆香味。冰鎮稻田毛肚$112/份，牛肚洗得好乾淨，切得大大塊，指示話落湯浸15秒即可食用，但我淆底浸左1分鐘先食，但牛肚依然爽脆，凹凸表面仲可以有效吸收到湯汁，正！其他小食都好有特色，不過唔逐一介紹啦。肥牛都係金鍋必備配料，美國安格斯優質肥牛$208/份，雪花分佈得好均勻，油脂足充滿肉香，正！另外即食小食有紅糖糍粑$69/份，外皮少許酥脆，入面煙韌香甜，好食！整體而言呢餐火鍋冇令我地失望，湯底同配料都出色，會有下次。…查看更多

約朋友食飯最方便就喺旺角，呢間餐廳地點夠曬方便，位於西洋菜街，殺完街之後仲冇咁嘈吵添😂 除左地點方便之外，餐廳用上美式裝潢，座位寬敞舒適，傾計都舒服啲。餐廳食物選擇多，可散叫亦有Set Dinner, 我地order左2個set。乳酪鮮果沙律沙律非常大份，沙律菜同生果都幾新鮮，用上乳酪汁酸酸地夠清新，比普通沙律醬更開胃。是日餐湯係南瓜湯，又係大大碗，入口順滑，又淡淡嘅南瓜甜味。意大利薄餅12” $159薄餅的配料可以任選4種，一定岩自己口味，我地揀左磨菇、蕃茄、雞肉同火腿，餅皮薄脆，料夠多，好味！炭烤1855美國牛肉眼扒拼黑毛豬肋條 $249肉眼扒外層淸晰見到炭烤網紋，食落有微微焦香味，內裏肉質粉嫩，豬肋條肥美有咬勁，充滿肉香，正！甜品係充滿層次嘅朱古力mousse蛋糕，朱古力香濃不甜膩，不錯👍🏻 …查看更多

多年前入西貢食過呢間餐廳，對佢嘅果醬念念不忘，依家佢喺尖沙咀開左分店，唔使再山長水遠入西貢！餐廳位於松山道，由佐敦地鐵站行過去較近，只需約5分鐘。餐廳門面係一片吸睛嘅淺藍色（湖水藍？），喺平常嘅街道中非常突出，路人經過都忍唔住望多幾眼。店內裝潢都一貫清新簡約，俾人一種好舒服放鬆嘅感覺。望望menu, 果醬幾乎無處不在，無論是甜品、飲品、小食同主菜等都用到果醬，令人期待！果醬九宮格多士 $49呢個係必食架！多士厚身烤得香脆，配以9種自家製果醬，我偏好士多啤梨同雜莓，甜而不膩！慢煮厚切安格斯西冷扒配玫瑰蘋果汁 $179（Set $239)西冷扒的確好厚切，先以慢煮再煎至約五成熟，外面帶焦香肉心粉嫩多汁，配上甜香玫瑰蘋果汁可解少許邪惡感。慢煮法式羊架配芒果芥末汁 $179（Set $239)羊架非常大件，同上面嘅西冷扒一樣都係先以慢煮再煎，外微脆內軟腍，羊架帶有少許羊羶味，怕羶可配以芒果芥末汁食，可消減一點羶味。野飲方面我試左玫瑰蘋果茶（跟餐$18）賣相好得，蘋果果香味好出，帶有淡淡玫瑰香味，唔錯！食完仲可以買幾樽自家製果醬返屋企慢慢嘆，正！…查看更多

餐廳裝潢以和風作主調，淺色既裝修加柔和既燈光，令人感覺好舒服，果晚同朋友傾計傾左好耐，侍應好貼心不斷幫我地加茶，令我地坐到唔捨得走！Menu圖文並茂，選擇頗多，我地揀左好耐先做到決定🙈1. 神戶野菜牛肉鍋 $118由於太肚餓，朋友叫左個鍋物打打底先。牛肉鍋既牛肉肥瘦適中，恰到好處，因為加左好多蔬菜，有豆腐、蛋同牛肉，所以個湯底好鮮甜！原本嗌依個牛肉鍋都冇諗過會飲哂d湯架，但同朋友一人一啖，最後竟然成煲清哂，連一滴湯都冇得剩😆2. 原條蒲燒鰻魚炒飯$148鰻魚表面燒得唔算香但夠大條夠厚身，啖啖肉，正！炒飯用左珍珠米，粒粒分明又飽滿，加左雞蛋炒得夠味乾身又香口，唔錯！3. Belgium Light Chocolate Cake $38外表好有層次感！朱古力味好香濃，唔會過甜岩曬我！加埋上面層綿滑的cream，中和左一啲苦膩，讚👍🏻整體而言餐廳裝潢舒適、服務殷勤、食物唔錯，價錢唔貴，可以encore😆…查看更多

將軍澳開左好多新食肆，再唔係美食沙漠啦，依家有埋呢間高質火鍋店，各位街坊有福啦！餐廳位於帝景灣商場1樓，將軍澳站行過去約5-10分鐘，尚算方便。我地勁早6點幾去到，所以得幾枱食客，我地可以坐到卡位。火鍋店裝潢簡潔明亮，座位寬敞，仲有舒適卡位，無左傳統火鍋店既焗促感，值得一讚。另外抵讚位係餐廳嘅服務，由招呼客人坐低至介紹餐牌都非常細心貼心。餐廳主打即叫即製嘅火鍋湯底，order左之後由店員即場於安置在枱上的鐵鍋炒熟材料再炮製湯底，滿足食客嗅覺、視覺、聽覺同味覺嘅享受。店家推介招牌家鄉鴨煲、黃金雞湯同辣雞湯。而我地揀左黃金雞湯。店家話佢地每日會親自挑選食材，尢其海鮮，確保食材新鮮健康，而每日‘特別推介’都可能有所不同。客人如有要求特別食材，可以預早1日通知店家，店員盡力為客人搵到最好嘅！另外，除左金鍋同串燒嘅食法之外，店家可以按客人要求將食材以小菜形式加工，收費詳情就要問返店家啦。飲品方面，我地叫左薏米柚子冰$28同洛神花茶$28，飲品以燈泡型的容器盛載，別具心思，柚子冰酸酸地帶微微澀味，好淸新，加上薏米增加口感，而且感覺好養生健康，另外洛神花茶酸酸甜甜好開胃，唔太甜，唔錯👍🏻黃金雞湯$188（半隻）落完order約10分鐘，店員將黃金雞湯材料凖備完善後，隨即喺我地面前烹煮。店員有條理咁將薑同雞件落鑊炒，炒到咁上下加入淮山、蟲草花同花膠再炒，最後加入上湯下蓋煮至熟透入味。煮左約10-15分鐘（我地冇計時🙈），店員幫我地揭開鑊蓋，鑊內雞湯隨即香氣四溢！店員建議我地先一啖飲湯再食湯料。湯如其名，真係金黃色架！個湯頭真係勁甜勁濃郁，加左薑片可以辟除腥味同帶出鮮味，雞件嫩滑唔會老，有雞肉鮮美，花膠大大塊，唔算入味但夠厚度同有咬口，淮山爽脆清新，整體非常出色！湯料食得七七八八就可以加湯打邊爐啦！手切本地雪花肥牛$298真係一定一定一定要試！肥牛雪花分佈非常靚仔，新鮮有牛味，絕對高質！韮菜餃$68，8粒大大粒好飽滿，菜肉份量剛好，抵食！另外試左鮮腐竹$38，又係大大碟，似百葉豆腐咁，又滑又有豆香，吸收曬湯汁精華！除左火鍋，我地仲同時試左DIY串燒。店員將燒爐預熱再送上食材俾我地自己燒，如果我地搞唔掂都可要求店員幫手。其實店家已預先處理好食材仲穿好曬，我地只需要放上去然後確保佢地冇燶就可以！燒茄子大成功！充滿蒜香仲好juicy! 海鮮咁新鮮點燒都好食！蟶子都係第一次咁燒黎食，燒到裙邊脆脆地，中間爽口鮮味，正！餐廳設有VIP房（坐到12-14人），毎位$688 （最少10位）就可以俾哂成間VIP房你用，岩曬包場睇波！（18:00-23:00）VIP房海鮮盛宴配一打啤酒！有火鍋及燒烤架！睇返餐廳leaflet原來朝早10:30-下午15:00有茶飲有點心食，點心由餐廳自家製！茶都有得飲，真係夠曬多元化！🤤…查看更多

最近工作太忙太chur, 男友話要食餐好西慰勞下自己！於是佢book左幾間餐廳試試！餐廳由尖東個邊搬左去廣東道，對於我黎講更加方便就腳，由地鐵站行過去7、8分鐘就到。餐廳裝潢高貴精緻、配合幽暗燈光，非常有情調，好適合情侶約會。一坐低侍應便遞上Menu, 隨之簡單介紹下menu同細心問問我地有咩忌口的，再為我地調改一下menu。與其他高級餐廳一樣，男士同女士menu有少許唔一樣，男士嘅有價錢，女士嘅係冇架，咁女士order嘅時候就感覺少啲負擔啦🙈最後我地都揀左8 Course Tasting Menu $980/1 +10%。首先上個Parma ham加蜜瓜汁醒醒胃，兩者係經典的配搭，令人胃口大開。麵包有4款，勝在係自家製同夠新鮮，配以廚師精心調製的蕃茄同洋蔥醬，食得出廚師的誠意同用心。輕灸北海道元貝輕灸的元貝保持了刺身的質感和鮮甜，三文魚子更帶出元貝的鮮味，而藜麥、椰菜花蓉同泡亦都係清新嘅配料，令道菜口感更豐富同fresh!M9和牛他他生嘅M9和牛口感綿滑，夠新鮮一啲都唔腥，加上黑魚子醬、洋蔥、黑松露醬等，味道豐富，怕食生牛肉嘅朋友都可以大膽試試！配搭嘅薄脆非常精緻，點綴著幾種味道嘅醬汁珠珠，咬落去唔同味道嘅珠珠在口爆汁，非常過癮。龍蝦湯呢個湯係男友飲嘅，有啖啖龍蝦肉，佢話鮮甜無比，蝦味濃郁。椰菜花湯我唔食得龍蝦，餐廳幫我轉左椰菜花湯，湯夠杰但夠滑，好似飲緊啖啖椰菜花茸咁，爽！黑松露溫泉蛋溫泉蛋係以68度慢煮而成，滑之餘蛋味亦濃，刨上黑松露片加上松露泡沫同芝士片，每啖都充滿黑松露同芝士的香味，口感同味道都豐富到爆炸！香煎法國鵝肝鵝肝外肝煎得非常香脆，入面非常creamy幼滑，入口即溶亦冇根。沾著意大利香醋和醋珠可以一解油膩，炸牛蒡絲同開心果仁碎令口感更豐富。但美中不足係份量太少🤪。食返個蕃石榴雪葩清清味蕾就開始食主菜啦！香煎智利鱸魚女士應該好鍾意，鱸魚表皮香脆，魚肉鮮嫩，配以意大利青瓜絲（zoodles), 絕對係清新嘅低卡之選。紅酒燴和牛面肉和牛一切即化開，非常香濃入味，配角的豆蓉、小薯、菇都係用心挑選同烹調，擺盤都好靚。甜品係草莓慕絲，層次分明，我中意佢夠酸，一啲都唔膩！最後以雪影（不同味道的朱古力）再配以咖啡為呢餐飯劃上完美句號。…查看更多

今晚約左住太古城嘅老死食飯，佢話佢屋企樓下開左京林屋分店，仲有定食添！身為抹茶愛好者嘅我地決定食佢！雖然係食飯時間（7點左右）但好彩未滿座，冇book位就可以入座啦。餐廳裝潢一貫以和風作主調，簡㓗明亮。打開Menu, 全是抹茶焙茶甜品，好吸引！仲有幾款日式料理同定食俾你揀，睇相已經流曬口水🤤。京式鰻魚飯（原條）$98 呢個鰻魚飯絕對抵食，原條上、厚身、肥美、唔會太淋而有啲煙韌、唔腥、無骨，雖然唔係世界級好食，但$98有原條鰻魚，平靚正！加$20（$118）可以配自選茶，抵呀🤤 林屋和食料理 $88，配自選茶$108呢份料理嘅presentation好靚。分左4格料理，有玉子、元貝、鯖魚、八爪魚沙律等，味道偏甜，好有和食風味。最後係甜品啦！秘製抹茶蕨餅 $88蕨餅咁店家每日新鮮製作，口感滑嘟嘟凍冰冰，帶有清香抹茶味，味較清淡，配上黑蜜同抹茶黃豆粉更加滋味！焙茶芝士蛋糕 $88焙茶芝士蛋糕芝士味同茶味都好出，配上冰凍焙茶雪糕可減低膩滯感，而附上嘅白玉丸子都夠煙韌彈牙，正！另外，餐廳坐得舒服、服務周到，會再encore!…查看更多

冬天真係日日打邊爐都唔會厭！今晚朋友帶我試呢間火鍋店，佢位於旺角通菜街，油麻地港鐵站出，只需行5-6分鐘，夠曬方便。呢間火鍋店有別於傳統酒樓式火鍋店，裝潢簡潔明亮，望落好乾淨舒服。我地較早食，未夠7點去到，雖然冇訂位，但都可以坐卡位！2個人坐真係好闊落舒適！呢度出名食芝士雞煲，我地決定一試！再另加其他火鍋配料。黃金芝士雞鍋（小）$138雞件已預先調味炒香，加上勁多芝士同洋蔥，極邪惡極香！雞鍋煮到芝士融化再攪伴一陣就可以食得，實際時間唔記得了，不過店員會幫你留意住，提醒我地。雞肉非常嫩滑，加上拉絲芝士勁濃郁，亦非常惹味！2個人食完雞煲已經飽左5成🙈。食到7788，店員會直接加湯落雞煲俾我地打邊爐。頂級安格斯（小）$128打邊爐必食肥牛，呢碟牛偏瘦，因為我地唔想食太肥，所以冇叫雪花肥牛。雖然瘦少少，但油花依然足夠，唔會韌，牛味突出。手打五寶拼盤 $108丸係手打所以特別彈牙！有鮮墨丸、蝦丸、牛丸、黃金墨丸、芝士蝦丸。我最愛黃金墨丸，墨丸鮮味彈牙，入面包住蛋黃，更加滋味！雜菜拼盤 $48呢個拼盤好抵食！份量夠多！菜新鮮爽甜！依家做緊優惠openrice訂座火鍋配料有7折，幾抵。呢間火鍋店乾淨企理，食材新鮮，服務夠貼心，值得一試。…查看更多

又黎覓食尖沙嘴！今晚黎寶勒巷試試呢間可以比客人自己DIY整4樣唔同類型既野食既餐廳。包括1.小丸燒 2.御好燒 3.燒肉 4. 炒麵。聽聞餐廳晚晚都full, 我地預早一個禮拜book定枱👍🏻。餐廳裝潢以灰黑為主調，冇多餘裝飾，簡單乾淨。每張枱上面都置入左DIY用嘅爐具，枱上的醬料、調味品一應俱全。Menu都清晰分左小丸燒、御好燒、炒麵、燒肉幾個區域，而每個種類都有好多款俾你揀，有選擇困難症嘅我地真係諗左好耐先决定到。四重芝士麻糬御好燒$108呢個係最貴嗰款，可能真係好多芝士同好足料。店家預先將底醬調好，加上蛋、麻糬、蔥、櫻花蝦、蘿蔔絲、芝士同extra芝士！做法好簡單，佢有指示逐個step咁教你，一定唔會失敗。御好燒入面加左麻糬同大量芝士，加上煙煙韌韌口感，好食，加上自己燒就更好食。盛合炒麵$98炒麵又可以自己炒。呢個炒麵勁足料，料多過麵。方法同step可以跟住炒真係零失敗。最後仲有燒肉。首先係上級安格斯牛肋肉（香蒜）$98。年肋肉都幾大塊，比煎pan更長，油花分布平均，有牛味，加埋極多極多香蒜，勁重口味，正👏🏻！加多個蜜糖黑胡椒豚肉$68。豚肉醃得入味，甜甜地又有黑胡椒香辣味，脂肪夠多，燒得熟透後依然多肉味，唔錯。呢餐好食又好玩，我地2個都好滿意。不過服務就有待改善，可能我地去嗰晚人手不足，樓面得2個員工，有啲手忙腳亂，有時面色唔係咁好🙈 不過我地都理解嘅。…查看更多