放工忽然好想食水冷麵，諗起寶勒巷呢間就上去試試啦。個餐牌咩小食都無，一係叫啲例牌湯配飯，一係燒肉，結果神推鬼㧬叫左個韓式生牛肉配水冷麵啦...跟住開始食佢啲前菜，個辣豆芽調味唔湯唔水好唔吸引，個魚糕好似食粉團咁，連個泡菜都係唔好味，又唔酸又唔香。黎到呢刻我都開始擔心個牛肉喇...果然，佢喺令人失望方面完全無令我失望。我呢世都未食過咁難食嘅生牛肉，又瘦又多筋，仲要加辣椒粉調味。一入口只係得辣椒粉味，完全食唔到牛肉味，嘅唔香甜又唔夠鹹，真係食了個空虛。到個水冷麵上場喇, 我一個人坐，店員將碗麵放喺我對面位嘅枱角，放低左把鉸剪。因為佢上菜嘅時候我問佢攞鹽糖諗住將啲牛肉調吓味，我就諗佢碗麵係咪放住喺度先啦，到佢攞鹽糖過黎我問佢碗嘢係...?佢答我係我叫嘅水冷麵...咁唔該你唔放喺我前面都放我旁邊啦好嘛？請問收加一黎係要我自己serve自己？你唔好叫我自己去出菜位攞？定心定意食麵喇終於。嘩！一入口個湯底嘅史雲生雞汁味湧上黎，個味配埋個麵怪到不得了。然後個麵仲要韌過我塊面皮，咬到牙軟都味吞到。本人極度唔鍾意浪費，內心掙扎左好耐結果都係頂唔順叫佢換過碗。咁店員嘅態度係ok嘅，第二碗上枱嘅時候都叫我試吓需唔需要再換。第二次嗰碗好少少，咬得郁，都算啦…但個湯底真係勁怪，結果兩碟嘢都食剩左就草草埋單走人，反正錢都係掉左落鹹水海，浪費佢啲嘢食好過浪費我個胃...咁就300蚊落樓，再去食我就跟廚師姓。…查看更多
