揀食擇飲的个人专页

本身訂咗8:15，我哋8點左右已經準時到齊，原來訂咗枱唔等如有枱俾你。到咗8:10，見到所有人一窩蜂去排隊，我哋完全唔知咩事，但見人排我哋又排，但已經排隊尾。排到去，原來俾張籌我哋，一睇，要等成廿張枱。即刻問個MK肥妹知客，佢淨係重重覆覆話所有訂咗枱都要重新攞籌，咁我哋訂枱嚟做乜？問多兩問條MK索性唔睬我。睇佢gel到啲手指甲成尺長，淨係掛住搞埋啲古靈精怪嘢，返工都返到悔悔氣氣，不如唔好做啦。等咗十幾分鐘終於叫我哋冧巴，但都已經冇乜心情食嘢。呢啲火鍋店新屎坑三日香，個個貪得意見佢新開就試吓，過多3個月就打回原形，見唔少啦，巴乜閉？其實條MK妹絕對可以答得好啲，但公司冇訓練，班MK又冇腦，答得咁衰應該唔止我一個反感。我當然可以教你點樣答好啲，但我做乜要教你？你繼續答到衰衰咁，總之唔使旨意我會再去。…查看更多

之前食過兩三次，佢哋嘅叉燒真係可以話全港最好食，肥瘦適中，入口溶化，食過好多其他餐廳，由幾十數燒臘檔到幾百蚊大酒店，冇間超越到佢，最多平手。最近去竟然見到佢已經執咗，真係非常之遺憾。天下第一叉從此成為絕唱。除咗叉燒，佢哋嘅燒腩仔都係好掂。第啲地方分開燒肉同燒腩仔，後者當然賣貴幾個價位。呢度索性唔賣燒肉，用燒腩仔嚟替代。換句話說，就係貴貨平賣。平還平，咁好唔好食先？肥瘦相間，皮薄鬆脆，肉質嫩滑，雖然唔夠叉燒優秀，但都算係一流貨色。俱往矣，啲人唔識食，冇計。希望嗰位燒臘師傅快快另起爐灶，今次記住開喺中環銅鑼灣跑馬地之類地方，開喺長沙灣絕對係嘥料，嗰啲窮地方係冇人識欣賞好嘢嘅。…查看更多

見咁多人講到逸東軒幾抵幾正，又米芝連又乜又七，一於訂枱嚟試試。睇餐牌啲價錢又唔算貴，大部分都係$50蚊左右，對比其他酒店中菜部郁吓都成嚿水一碟，算好平的了。價錢可以，但好老實，呢個世界真係冇死錯人，食完就知點解佢可以平過人。首先服務方面，啲伙記係冇人哋咁attentive，想點菜搵唔到人，想斟茶十次有八次都係自己郁手，想收碟都要將啲污糟碟移出枱邊先有人見到。見佢都唔係唔夠伙記，人手足夠，但都只可以提供到稻香酒樓嘅服務級數，咁我不如返稻香算。食物方面，講幾樣有代表性就知個大概。我哋叫咗個叉燒，茶市例牌都收300蚊，乖乖不得了。啲人讚到呢度啲叉燒天上有地下無，但食落又唔覺有幾巴閉，啲人明顯吹大咗。我食過一檔燒臘檔嘅叉燒，百零蚊一斤，多過佢又好食過佢，性價比完勝。鮑魚和牛穌，$88一件，兩個人一人一件就已經接近兩嚿水，非常𢲡脷，不過完全唔值。話有和牛但完全食唔出，唔好話和牛，連普通牛肉都唔覺有。得面頭隻鮑魚仔先聲奪人，但其實而家鮑魚平咗好多，唔係咩咁矜貴。食過另一間嘅和牛穌，人哋啲牛味濃郁到成口都係，而且好似都冇佢咁貴。千層糕，$48。而家好多酒樓唔再整，唔知咩原因，有人話多功夫，我又唔覺係。有人話唔健康，更加唔似係。總之就好少見，整得好食就再難多幾倍。見呢度有，即刻叫籠嚟試吓佢。結論：啲蛋黃唔夠鹹香，啲蛋白淋糍糍唔夠質感，連椰香都冇。成件事得個樣，唔鹹唔甜唔香，唔明佢個米芝連點嚟，可能蝦鬼佬唔識食。其他嘢都係普普通通，兩個人唔食得太多，4籠點心兩個甜品加埋碟叉燒，折實埋單齊頭800，但我覺得最多值600。食得唔滿意相都費事post，反正都係嗰啲。…查看更多

呢日落咗成日雨，同老友4點零鐘經過呢間嘢入去歇歇。一入門口阿姐就叫我老友放低把長遮喺門口個桶，我把縮骨遮就費事放，摺埋佢塞番落背囊個外袋算。間舖都算靜，成場三四枱客。我哋揀張枱坐低然後每人叫咗個下午茶餐燒鵝瀨。一咬之下，竟然完全食唔出燒鵝味，都唔知係咪燒鴨扮燒鵝，皮又唔脆，啲肉又乾又鞋，同街市燒臘檔啲燒鴨咁上下質素。雖然我哋都唔係志在食嘢，不過佢吹到咁大，有期望好正常，佢又交唔到貨，我哋肯定非常失望。到埋完單準備走人，我老友發現佢把佐丹奴遮俾人攞咗，當然問阿姐點算。幾個阿姐除咗吹水打牙骹之外，最叻就卸膊，個個好似唔關事咁，哦完扮冇嘢。喂，大佬，我哋聽你話放把遮喺你指定地方，而家唔見咗，你覺得完全冇責任咩？好老實呀，個桶得三四把遮，認真少少都應該記得邊把打邊把啦，你叫得人放喺度就有責任看管。我都明，真係看管係好難做到，但到真係俾人偷咗，係咪都應該盡力去尋求解決方法？出面仲落緊大雨，係咪諗住叫我老友監生淋雨？結果要我哋連番質問，佢哋先逐把遮問在坐客人係咪屬於佢，問完終於搵到一把無人認頭，就話俾我老友。佢係好唔情願，但冇計，佢把遮想追都追唔返，唯有拎呢把頂住檔先囉，唔係可以點？其實呢啲舖頭打開門口做生意，大把客留低把遮唔記得攞啦，後面倉十把八把無人認領閒閒地。等我教埋你點做吖，首先你應該承擔番責任，唔好側側膊當冇嘢，你喺度打工無論點卸膊都唔會變路人甲嘅。然後問清楚把失遮嘅資料，大概咩價值，究竟係走鬼檔廿蚊把定梁蘇記幾百蚊把，知道個大概都好重要。最後喺倉攞三把差唔多價值嘅遮出嚟俾個客揀一把，做齊呢幾個步驟個客都會順氣啲啦。呢班阿姐絕對需要再培訓，唔培訓就只係趕客，唔怪得拍晒烏蠅。所以我喺度奉勸各位，入呢間舖頭唔想失遮就唔好聽佢老點放門口，滴濕就滴濕，你又唔負責看住啲遮，就梗係有代價㗎啦，唔使你做好唔好？…查看更多

上網搵食見到呢間舖頭都有午市火鍋，又唔貴，就踩上嚟試試佢。按地址嚟到樓下亞皆老街，搵嚟搵去都唔知邊度係入口，見其中一個𨋢口有看更就去問吓，點知俾佢鬧番轉頭，真倒楣。可能太多人問佢路啦，我明佢嘅躁動，但總之就係我無端端俾人省咗一鑊立立令，呢個味道並不好受。出返門口繼續搵，見隔籬座大廈有條樓梯，行上去睇吓又唔係。落返街再搵，已經冇路，惟有轉入上海街睇睇，行入半條街終於見到有一個完全冇標示、烏燈黑火、好窄嘅電梯大堂（小堂？）。入𨋢見2/3樓個掣都係寫住見見面，咁上2樓睇吓先。原來2樓只做套餐同小菜，火鍋要上3樓。都話佢指示唔清晰，好多人以為服務就係笑口噬噬講多謝唔該，其實令人容易搵到呢啲都係服務一部分，好似我咁未食已經俾佢玩到氹氹轉，體驗絕對差勁，唔係講多幾句多謝就可以抵消。上到3樓，差唔多兩點，伙記帶我坐低。望望周圍，前面一個男客，隔籬枱兩個講普通話嘅女仔，最後面一枱四個講普通話嘅後生仔女，除咗最左手邊遠處一枱四個姨姨係講廣東話，似乎呢度係普通話人嘅地盤。我叫咗個椰子雞湯，嚟到嚇一跳，認真大大大煲。煲好大，湯好多，但唔係特別香。佢啲雞分開另上，六、七舊左右。佢分手機落單同自助區。慣常做法，自助區瓜瓜菜菜丸丸腐腐。手機落單分幾個類別：牛肉類：封門柳、牛梅花、肥牛、牛板腱豚肉：白豚肉海鮮類：海蝦、龍脷柳、花蛤放題配料：魚皮餃、雞腎片、雞子埋單$174，佢比創興嗰啲貴少少，不過飲品、甜品選擇好少。反而佢主打牛肉，連封門柳都係任食。結案陳詞：如果你淨係一心諗住食牛肉，呢度抵食。但如果鍾意大堆頭或者平平地是但食啲嘢，咁就去創興啦。…查看更多

創興廣場除咗打邊爐，都仲有其他品種嘅食肆，安平燒肉就係其中之一。呢日落咗成朝雨，好辛苦等到佢停雨先出去，搞到成兩點先出到創興，咁鬼晏唔想打邊爐，貪得意試吓燒肉先。原來佢啲120分鐘放題餐要起碼兩個人先食得，我一枝公就只可以揀90分鐘啲餐，無奈接受。餐廳裝修都算企理醒目，望落都有十幾枱客，創興嚟講算幾旺。揀咗個安格斯牛肉餐，$208加一，埋單$229。呢個係有牛食嘅最平嘅套餐，平平地試吓佢掂唔掂先。佢有分自助區同手機落單。自助區得十零款瓜瓜菜菜，少得可憐。飲品櫃都唔多選擇，佔咗一半係佢自己入樽嘅凍茶。肉類小食係手機落單，好似好多嘢揀，其實立立雜雜小食居多，豬肉牛肉嚟嚟去去兩三款，只不過每種肉分有汁冇汁，撐起個場面搞到好似好多頁咁。啲肉擺盤係幾靚，但食落冇乜味，而且每盤得兩小片，成陣風咁完全唔覺有嘢落肚。啲熟食又係炸定，凍冰冰油淋淋，認真麻麻。90分鐘話咁快就夠鐘，叫得兩三轉嘢食，都唔知食咗啲乜。兩舊幾水，早知打個靚邊爐好鬼過。好睇唔好食，如無意外應該冇下次。…查看更多

本來想去帝京嗰間香田，點知原來已經執咗。於是搵吓仲有冇其他好選擇，搵吓搵吓發現咗呢度，原來都係做埋呢兩個禮拜就執笠，仲話搶企業搶人才，越搶越霉咁款，香港呢兩年搞乜？咁趁佢未執就拿拿淋訂枱試試佢。我同我老友準時到達，喺門口報上名來，阿姐帶我哋去一張隱蔽舒適大卡位，呢張似乎係全餐廳最正嘅一張枱，做乜咁益我？諗住正啦，一陣醒多啲貼士。點知過咗十秒鐘，另一個阿姐話搞錯咗，話呢張留咗俾另一個客，叫我哋起身轉枱，轉返出大廳二人枱。有比較就有傷害，由八尺長大枱縮到得番兩尺細枱仔，心情即刻由天堂跌落地獄，唔失望就假。又會咁都錯得，同姓就帶錯枱，咁係咪有鬚就嗌老豆？算，呢啲嘢嘈都無謂，都係收拾心情睇餐牌。我哋每人叫咗個三色御膳（$178）。繼帶錯枱之後，又再錯多一次。第三道菜我老友叫天婦羅蕎麥麵，我就叫牛肉烏冬。點知出到嚟調轉咗，塊牛肉擺咗喺碗蕎麥麵上面，天婦羅同烏冬分開上，好明顯廚房撈亂咗。呢間嘢啲伙記真係好求其，係咪諗住就嚟執笠就是是但但？我哋每人加$15轉即磨咖啡，埋單$425，每人200多啲，算抵食。其實見佢都多人，啲客似係附近返工嘅人，差唔多坐滿。點解咁好生意都要執笠？個市真係咁差咩？諗唔明。…查看更多

近排成日又打邊爐又食蒲飛搞到有啲飽飽滯滯，今日食啲輕食當休息吓。呢間舖成日經過都見，但就未幫襯過，趁呢個機會就試試佢啦。佢舖面幾光鮮企理，大若30個位，一邊卡位，一邊圓形枱凳，全部仿酸枝家私，大玩中國風。餐具都睇得出有花過心思，麵碗加隻底碟，咁骨子，好多街坊酒樓都未必會咁做，雲吞麵檔就更加唔使諗，無端端洗多隻碟好得閒？我叫咗水餃麵加油菜，下午茶價$40。湯底係唔錯嘅，夠鮮甜，應該有落大地魚。湯面放韮黃，唔似其他麵檔放蔥蒜。麵就普通，唔香唔彈牙。水餃都普通，硬掘掘咁，係咪淥唔夠時間？呢度外觀就贏晒，但食物就一般，又未至於難食，想食粉麵又唔想去啲up dup 雲吞麵舖，可以一試。不過啲服務真係十級差，有個金毛鄉音大媽好似全世界欠咗佢咁。有一個客問佢攞杯水，鄉音大媽一路攞一路um um 尋尋，真係吹漲，攞杯水慘過同佢乞，乞都唔使俾人咒全家。舖頭細細又唔多人，攞水都係行多幾步路啫，好阻你時間咩？跟住有另一對客坐低，其中一個叫咗嘢，另一個未諗掂，就問鄉音大媽有冇好介紹，個大媽竟然 hang 晒機，答唔出之餘又係一路行開一路語帶責備咁話人食麵都要介紹。其實做得樓面時不時有客要介紹㗎啦，咁都唔識答真係唔適合做呢份工。今次特登俾個負評，老細如果見到就好好鬧吓個大媽。你可能掛住匿喺廚房唔知樓面發生咩事，但檔嘢係你嘅，其他嘢做得幾好都係假，大把餐廳都係俾樓面搞到執笠，呢啲嘢係要睇緊啲㗎。…查看更多

馬辣午市$158 食3個鐘，呢啲叫做識做生意。當樓上樓下都多數限時兩粒鐘，有啲仲衰到俾得70分鐘，多一個鐘頭絕對可以左右到你嘅決定。我都好怕趕喉趕命，兩粒鐘勉強夠，如果有朋友一齊又傾又食就好mun水。1:15 行入餐廳，目測大概十枱客。睇個 setting 就有啲似樓上15樓嘅牛牛，兩間同樣都係標榜台式火鍋，同樣有兩排大雪櫃，唔難想像雙方都以對方為假想敵。我揀咗個蕃茄洋蔥湯底，雖然餐牌上寫西紅柿，但我由細到大都只會叫佢做蕃茄。佢部分食物要網上落單：牛梅花、安格斯、牛五花、五花腩、黑毛豬、羊肉、蝦、脆鯇魚腩、脆鯇片、蜆、雞子。同牛牛比較，同樣三牛二豬一羊，牛牛就少咗魚腩但多咗魚頭同青口。所有嘢都新鮮，都唔係求其俾啲渣嘢。啲肉每人每次出三四片，其他嘢多數兩片，都係控制損耗嘅做法，唔夠再叫，好過嘥嘢。罐裝包裝飲品之外佢有豆漿同椰青水，甜品櫃就就只係得啲啫喱椰汁糕之類簡單嘢，冇牛牛咁多蛋糕仔又有雪糕櫃。既然佢同牛牛兩間好似孖生姊妹咁，不如就兩間比較吓：馬辣貴$10但多一粒鐘，嘢食大致上一樣，不過牛牛就有咖啡機沙冰機，多啲嘢飲，租品又多啲花款。總結：如果想平十蚊或者重視甜品就牛牛，如果想慢慢嘆就馬辣，兩間各有千秋，好難講邊間好啲，不如就打和啦 super！…查看更多

呢晚我請客，為方便我細姪女放工想搵間喺鰂魚涌嘅餐廳，搵勻全區似乎得呢間 La Favorita 算係好少少，咁就一於訂佢。我同我老友準時7:30去到，向門口接待員講訂咗枱X生，佢問番我轉頭邊位X生，乜咁樣問人㗎咩？我都唔知點答佢，好彩佢隔籬個同事幫我哋解圍，但 first impression 就已經打咗個折扣。入到餐廳係幾靚幾有南歐風情嘅，不過有啲熱同焗。我哋坐低叫嘢飲住先，世姪女7:45落到嚟，就開始點菜。點完菜同靚女伙記講，叫佢開大啲個冷氣，叫完之後好似涼咗啲又好似冇分別，佢又冇過嚟問o唔okay，我都懶得再叫佢。我哋三個人叫咗三個頭盤一齊share。呢輪頭盤又幾唔錯，我哋都覺得好滿意。到食到八八九九，靚女伙記嚟問出得主菜未，我望望前面每碟剩番少少未食完，就話俾多十分鐘我哋食埋佢。我哋掃埋之後，靚女就嚟收碟出主菜，不過主菜就令人非常失望，只係個 pasta 算係好食。唔知係咪剛才靚女催我哋嗰陣已經煮好，我叫佢等多10分鐘，廚房就將啲餐熱住嚟等，焗到老晒。咁嘅服務真心唔收貨，你估茶餐廳咩，前菜主菜一齊掟晒出嚟。食完之後傾多一陣叫世姪女走先，佢第朝又要早起返工，費事阻佢咁晏。我同老友就叫杯咖啡飲多陣。10:10左右全個場好似得番我哋一枱，乜呢區啲人咁早散場㗎咩？唔想阻人收工，唯有叫埋單，靚女伙記話已經埋咗。吓？世姪女咁古惑竟然偷偷地埋單？咁唯有搵機會先再請番佢啦。都好，如果我埋單我點都會俾一舊水貼士，而家慳番，咁差嘅服務俾咗實後悔。…查看更多

上星期經過見到有間新火鍋店，睇真啲原來係之前樂天大喜屋個位，今日專登嚟試吓得唔得。新開幾日就已經有7篇食評，而且篇篇都廣告feel，set晒機影晒相，蟮味十足，不如由我嚟寫一篇中肯啲嘅食評罷啦。驟眼睇個佈置大至上同大喜屋差唔多，啲枱嘅位置同記憶中都係咁上下。今日1:30嚟到，成場都係十零張枱。伙記就帶咗我去一張細枱，算係二人枱，中間有個電磁爐，俾人放一個大煲一齊打。兩面枱邊又各自有一個細啲嘅電磁爐，預你每人一個細煲分開打，都幾周到。但枱面實在太細，兩個人應該唔夠位，一個人食定量餐都勉強可以，放題就肯定唔夠位。同埋要小心唔好俾個煲邊焫親，個煲太近好易瀨嘢，我都中過招，好在縮得快冇乜事。我叫咗個一人定量套餐C，包一碟美國牛肩胛、雪糕甜品以外嘅自助區任食、一罐嘢飲，限時75分鐘。標價$108，埋單$119。湯底係椰子雞，入面放咗一件連骨雞胸、多片椰子肉、紅棗、杞子等等，好香椰子味。佢個自助區集中晒所有飲品、醬料、熟食、丸類、蔬菜、雪糕等。熟食就冇乜睇頭，得幾款煎午餐肉、豬手、糖水咁，啲寫手話有小龍蝦，我就唔見有。佢話新張優惠包埋自助區（雪糕甜品除外），即係之後有機會唔包。整體嚟講，佢呢啲定量套餐一般般，只得一款肉類又係限量，趕喉趕命75分鐘，即係叫人極速食丸食飽。百零蚊唔係好貴，但感覺上唔抵，如果同創興其他火鍋比較，佢比泰金鍋嗰啲70分鐘火鍋好，但我不如加多$29去牛牛好過。佢都有啲120分鐘放題，由$158至$308不等，等我搵日試試佢再出一份食評，請密切留意。…查看更多

我上到去已經接近2:30，原來佢哋4:00 閂門，唔夠時間打120分鐘邊爐，哥哥仔話有70分鐘火鍋，見100蚊左右，就試吓佢啦。揀咗個安格斯餐$108，喇沙湯底，加埋一$119。佢呢個價錢只包兩碟肉同自助區嘢食，如果要無限追加肉類就要額外$38。即係埋單要成百六蚊，仲只係得牛肉任食，都係不了。所謂泰式就係有幾個泰式湯底俾你揀，自助區有啲泰式奶茶之類五顏六色嘅嘢飲，有煲冬陰功湯，同啲泰式咖哩同肉碎炒豆咁。其餘啲丸呀菜呀都係嗰啲，綽頭多於實際。啲牛肉普普通通，幾塊薄到曉飛一啖食晒，都未嗒真啲味道已經食完，早知慳番十蚊叫普通肥牛算。70分鐘眨吓眼就過，都差唔多，反正冇乜嘢食。睇番個餐牌，如果要120分鐘再加任食安格叫斯牛肉，連埋加一就要成兩舊水，啲嘢又唔係特別正，選擇又唔係特別多，當樓上樓下都係做緊舊半水左近，平過佢靚過佢，諗唔明點解要幫襯佢，應該冇下次了。評分一般尾至劣評頭。…查看更多

約咗朋友打邊爐，就梗係搵間要二人入座或二人先有優惠嘅餐廳，唔限人數嗰啲我自己去慢慢歎都得。早排樓下阿姐派傳單，至尊嗰張釘住張優惠卷，每人平$20，但兩人以上先用得，咁就唔使諗，一於去呢度 try try sin。我哋閒日12:30左右去到，餐廳大概十幾二十個客。你知創興樓面都幾大，怕有成四、五千呎，咁大地方先坐十幾人，冷氣費都唔夠俾，生意真係差成咁。我哋揀咗原價$178個餐，包額外甚麼甚麼牛肉、廣島蠔、黑毛豬，減番$20即係實俾$158，咁嘅價錢冇得輸啦。湯底揀花膠雞湯，太少人唔想食雞煲，食完都飽晒唔使淥其他嘢食。佢除咗醬料飲品之外冇自助區，全部網上落單，另外ABC餐啲獨家嘢就剔紙仔。成日同朋友一齊都唔記得影相，證明我唔係港女，所以今次都係純文字討論。嘢食都新鮮唔太差，選擇ok多，都冇漏單拖單，叫咗嘅都有嚟晒。不過佢每次只出固定份量，可能見二人枱就每樣出兩件，就算寫多啲都係出兩件。都唔太大問題嘅，惟有落多幾次單。佢明顯係想控制損耗，俾你任叫實會嘥勁多，呢啲任食生意損耗一大就嘔血。另外啲牛肉豬肉片到好薄，逐塊食好似陣風咁，一次過淥幾塊一齊食個口感會好啲。其他嘢正正常常，冇乜特別出色嘅地方，亦冇乜特別失色嘅地方。可能佢嘅主打係特雞煲，我哋冇食雞煲就顯得平平無奇。但佢比其他餐廳優勝嘅地方係唔限時，我哋由12:30坐到4:15，差不多四粒鐘都冇俾人趕，鍾意慢慢坐慢慢傾嘅人啱晒。收銀姐姐似係老闆娘，都好識做又好口，埋單時俾過張新嘅優惠卷下次用，想留客呢啲功夫係要做㗎。整體嚟講，如果約朋友食飯吹水，呢度平平地靜靜焗焗係一個唔錯嘅選擇。但對於我呢啲單客嚟講，優惠卷又用唔到，咁就未必會揀佢。橫掂都係，不如啲卷唔好限人數仲好啦，吸引多幾個單客條數都喺番度。老闆娘，諗諗佢啦。…查看更多

海雲天做緊片皮鴨小菜點心放題買二送一，朋友話想食，又即管試試佢。紅磡 Harbour Grand 話自己五星，佢個酒店大堂同中菜廳海雲天睇落都係金碧輝煌，不過好睇唔一定好食。本身對長和系酒店冇乜好感，之前住過幾間佢旗下嘅酒店，無論係住宿定餐飲都硬係覺得佢孤孤寒寒甩甩漏漏咁，喺啲唔明顯嘅地方慳啲減啲博人唔覺，一樣半樣或者俾佢偷到雞，但樣樣都偷加加埋埋就好擇使。因為呢個優惠係要經 KKDay 去買，去到 reception 個疑似 captain 叫我 show 個 QR code 俾佢掃，咁就真係考起我，你知啦，年紀大咗對科技係有啲手足無措。我打開個 inbox 望吓，KKDay sent 咗好幾個 email 過嚟，都唔知邊個先係。逐個開嚟睇吓又唔見，俾部機阿 captain 睇佢好似仲濛查查過我。搞一大輪，好彩個肥妹仔侍應帶完枱返嚟，佢兩吓手勢就搞掂。我當堂鬆一口氣，望望後面，原來已經聚集咗一條人龍。嗱，唔關我事㗎，唔好鬧我。雖然間餐廳有一邊落地大玻璃無敵大海景，但我哋就無緣坐近窗嘅位。唔緊要啦，食嘢啫，都係講番啲嘢飲嘢食。嘢飲方面，佢有罐裝啤酒汽水，亦有利賓納同鮮榨橙汁嘅 dispensers。利賓納呢啲細蚊仔嘢我冇試，我就斟咗半杯橙汁，冇味嘅，應該係少量鮮榨加大量果汁先生再加更大量嘅水溝埋。把鬼。佢有白酒紅酒各一款，都係同一個智利牌子，你可以逐杯斟，我見有人成枝攞，咁我又攞枝白酒返枱試試。又係冇味嘅，好似飲火酒咁。紅酒好少少，但我平時買嚟送紅燒牛肉出前一丁嗰啲廿蚊枝仲好飲過佢。一隻片皮鴨我估佢片咗成三百塊，每一片細細塊薄切切，包住塊餅皮嚟食真係食唔出係乜。燒味都係麻麻，叉燒唔夠鬆化，燒鵝冇鵝味，頂籠美心大家樂級數。點心同小菜都係冇乜特別，咕嚕肉死死實實，乳鴿太乾太鞋，所有嘢話佢難食又未至於，但肯定好一般，是但搵間茶餐廳都做得出呢啲菜式，甚至更好。不過我哋叫嘅嘢都嚟齊冇漏單，都算公道。服務就不過不失啦，睇得出啲伙記都好落力，係酒樓唔捨得請多兩個伙記，又係一個慳皮嘅例子。都唔預佢有咩貼心服務，但求佢識得收碟沖水就好，咁佢哋都做到。一同朋友一齊就經常忘記影相，所以今次係純文字討論。三個人埋單總數$1313，每人$440，酒店價唔算貴，但佢質素只係普通酒樓，咁就唔太值。評分方面，佢又未至於衰到劣評，所以我俾一般，但肯定只係一般尾。…查看更多

上回講到旺角多咗好多午市火鍋，尤其是創興廣場，樓下一班阿姐日日得喺條街度派傳單，幾檔火鍋互片。攞啲單張研究吓，發覺幾間都差唔多價錢，一於逐間試試佢。我就鍾意一條友晏晝去打邊爐，費事約嚟約去，隨時興起就食，而且包有位，唔使排隊唔使同人迫。而且一個人坐晒成張枱，唔怕唔夠位擺食物，非常之爽皮。呢個食評就係針對閒日晏晝嘅體驗，晚市點樣唔係今次嘅重點。我星期五大約2:20上到門口，知客崗位冇人，行入少少等，見有個阿姐想行出嚟又唔想行，隔住半間餐廳距離十幾米向我示意詢問，我又隔住半間餐廳距離十幾米向佢打手勢示意一位。望望樓面得十枱八枱客，廿人唔到，好忙咩？有冇懶成咁？其實睇樣都知我係嚟食嘢啦，兩手空空唔通送貨咩？！就算送貨你都要出嚟簽收㗎啦！真吹漲！練精學懶成咁。呢啲服務質素真心唔掂，而家出街食飯普遍都係差，啲主管唔教，伙記就唔覺有問題，結果越整越衰。佢見我話一位先捨得行埋嗰幾步路出嚟帶位，咁咪係囉，慳埋呢啲功夫多鬼餘，結果咪又係要行，慳唔到又樣衰，啲食肆真係要好好檢討吓。坐低之後睇睇枱面疊點餐紙，揀咗個酸菜豬肉湯底，叫番嗰個鄉音阿姐嚟，佢講咗句我聽唔明嘅說話，搞咗一輪我先明原來可以叫兩個湯底。我就望望仲有咩揀，望咗十秒都冇個阿姐已經唔耐煩，又講一句我聽唔明嘅說話，希望唔係乜我媽媽啦。我唔想佢繼續乜我，就是但揀多個芫茜皮蛋，費事佢再講多幾句我聽唔識嘅鄉下話。我係睇漏咗，但都唔使咁，好聲好氣唔得嘅。不過呢啲都係小意思，佢套固有觀念唔係憑我講幾句就改變到，慳番啖氣埋頭食嘢好過，再講多兩講又話我族內歧視就無謂。總之呢啲阿姐唔好預佢識得serve 客，求其做足送餐執碟就算佢做足本分。講番個火鍋，佢都算多選擇，自助區有兩大排雪櫃，啲肉同海鮮就上網落單。咁講真，佢啲食物質素算幾好，牛肉有牛味，羊肉有羊味，啲蝦爽口彈牙，青口魚頭嗰啲都唔錯，連粟米都甜過人，應該花過唔少心思去採購。最欣賞佢落單嗰啲每款俾兩件，啱晒單身狗，反正可以任叫，真係唔適宜俾太多。自助區又夠陣容強大，想食邊啲夾一舊就得，盡情地試食之餘亦同時減少浪費，win win啦。佢仲有甜品同雪糕。飲品除咗罐裝包裝嘅牌子嘢之外，仲有果汁機沙冰機咖啡機，一啲都唔馬虎。創興呢度大大話話有十幾間食肆，火鍋都五六七八間，睇佢哋啲價錢真係互相誅到實，閒日晏晝都係百五蚊左右嘅價位，簡直係割喉式競爭。喺咁激烈嘅環境之下，啲任食餐廳只有以質量取勝：選擇要多，品質要靚，稍一不慎就俾人砌低。香港人其實冇乜味覺，多數人只係睇價錢，見你平就踩定先，見貴就未食先讚。話食慣300蚊一位食唔慣呢啲150火鍋，好好笑。寫食評係需要多角度思考，淨係單線條比價錢使鬼你寫，鬥貴就得。老老實實，貴唔一定好，平唔一定差。早排我先去完一間尖沙咀火鍋店，埋單每人七舊，食完都唔知食咗啲乜，打邊爐都大半千，仲要自己煮，簡直搵笨。反而呢啲平得嚟有質素食得仲開心，講到底火鍋只係大排檔食物，係而家啲人搞埋啲花臣扮高檔先又300又700，但點扮都始終擺脫唔到嗰種大排檔格局。如果唔係阿姐做得差，我會俾哈哈笑，而家降級得番個 ok。如果有晒心理準備會俾人趷，呢間其實幾食得過。…查看更多