or#ta67009990的个人专页

本身見到其他人係OpenRice share嘅早茶優惠去到十點，我星期日九點左右就去到，咁啱冇六個人枱，不過姐姐好快手就換張大啲嘅枱俾我地坐。原來宜家早茶優惠改到十點半，十點半前落單就得。不過十點鐘開始已經見到好多人要等枱，所以都要早啲到。比較特別嘅係酒樓出面嘅走廊有啲四人枱，如果有寵物都方便喺度飲茶。有太陽傘可以遮太陽，不過冇見到有風扇，感覺夏天會熱啲。嘢食幾好食，又熱辣辣，蝦餃燒賣叉燒包都好食。仲要好扺食，六個人都係食咗400蚊，平均七十蚊唔使，已經包埋茶錢（每位$12）。之後會再黎食～…查看更多

今次book 咗5:30pm。大家記得一定要先book 枱同準時一齊入座，有限時。七個人叫咗六碟餸。見到其他枱叫嘅餸都幾吸引，可惜已經好飽，唯有下次再嚟試～分別叫咗：老壇酸菜魚/鮮菠蘿咕嚕肉/家鄉小炒皇/豉油皇炒麵/啫啫芥蘭煲/脆皮炸子雞老壇酸菜魚唔錯，唔辣，可以飲埋啲湯。食到有兩款魚，薯粉，同大量芽菜。唔錯唔錯～～鮮菠蘿咕嚕肉有幾舊菠蘿「原個」上，好有誠意，不過我略嫌咕嚕肉唔係好多。家鄉小炒皇幾好味，下次會再叫嘅好味。豉油皇炒麵係普通炒麵，唔洗特登叫，用呢個quota 試其他嘢會好啲。啫啫芥蘭煲好食！記得一上菜要即時撈勻佢，同埋快啲夾晒佢，間唔中都要撈撈佢，如果唔係會燶。食落可能會覺得有啲鹹，不過可能平時實在少食同幾嘢味，所以好快就清曬。脆皮炸子雞，平時都係去飲/酒樓先有得食。我覺得幾好食，但冇乜特別。下！次！會想試吓沙薑川味豬手…查看更多

去咗阿爸阿媽平日朝早跑完步會去嘅餐廳食早餐。星期六11點前左右到，都幾多人食，但唔洗等位。早餐同普通茶餐廳差唔多。公仔麵/通粉/加錢轉烏冬，炒蛋/煎蛋（有得轉全熟蛋），加錢加多士，配咖啡/奶茶/玄米茶/麵豉湯多士皮脆，入面鬆軟，幾好食阿爸阿媽話公仔麵麻麻地，食烏冬比較好，我都覺得烏冬幾好食不過好像food court 咁要自己睇號碼拎嘢食，拎住個托盤都好驚會倒瀉或者撞到人。話就話食完放係托盤回收處會俾返張2蚊卷下次用，但部機用唔到，出唔到張卷，所以大部分人食完都唔會執枱。…查看更多

平時係科學園返工，有時都會去呢間餐廳度食晏晝。之前試過杯熱柚子蜜入邊有一條橡筋，好彩覺得口感唔啱，吐返出嚟，冇吞落去。我諗住可能都係一次半次，今日再同同事一齊去食，結果我碟炒飯入邊有條頭髮。我去過咁多間餐廳食飯都冇試過喺嘢食度見到有異物，而呢一間餐廳就見到兩次，證明衛生有問題，真係接受唔到。仲要我用信用卡俾錢，收銀姐姐收多咗我$10，但佢完全冇出聲，又冇俾返張信用卡嘅單我，存心隱瞞我。我事後係銀行app先見到。如果收多咗錢，應該要同客人講！少少錢我冇乜所謂，但唔同人講，博人哋唔知就唔應該。唔會再去呢間餐廳…查看更多