LYHJESSICA LUI的个人专页

因為太忙，好耐無寫食評了！今晚約了朋友去睇頒獎典禮，所以安排吓食咩先！原本諗住去飲茶食點心的，但訂唔到位就改食泰國菜，於是上 openrice 訂位。訂左4:15pm，餐廳座落於THE ONE，坐位設於店外和店內，商場人來人往，我哋都唔想坐在餐廳外的坐位，所以取位時問侍應有冇窗口位，她說暫時未有要等，等候期間我見窗口位有張4人枱未有客的，可能我哋得2人所以唔比得我哋，大約15分鐘後還未有動静，我又問吓侍應係咪還未有枱，過了片刻就帶我哋入坐剛才那張4人枱，但要6:00結帳，因有客人訂了位，現在才4㸃幾，時間尚早當然無問題啦。:)兩個人叫些小食再炒碟粉都應該夠吧！先來個串燒沙嗲牛肉和鷄肉，朋友話近期豬瘟問題，唔想食豬，所以就無叫豬肉。兩款肉質都稔唔鞋口，但沙嗲醬就稍為失色，香味和辣味都唔夠，所以令到串燒唔夠惹味和香口。串燒墨魚丸都算爽口的，由於醬汁是串燒的靈魂，卻因沙嗲醬味道稍遜色，墨魚丸只能是平平無奇的味道。泰式炒粉，朋友說是此店的名菜，於是就㸃來試吓，賣相普通，份量覺得有D少，蝦同粉似是各自分開炒再併在一起，唔夠熱辣辣，感覺有D唔夠鑊氣，味道一般，並非想像中咁出色。:(海南雞飯，因個炒粉份量少唔夠飽，於是叫多個飯，個飯聞到有淡淡的椰香味，雞件幾滑，都尚算好味。:)這個是套餐連餐湯的，但上菜時無比我哋，我哋就問係咪有個湯，侍應說是就行開了，我哋再問另一位侍應，她說:送完就無，我好忙唔得閒睇仲有無湯！我哋再問另一位侍應，終於肯跟進有湯了，是碗蘿蔔湯，匆匆飲埋結帳。今晚餐飯在尖沙咀區來說收費唔算太貴，可接受，但食物質素平平，服務質素需有待改善，不知是否舖租昂貴，餐廳將價就貨而影響質量。其實我哋都幾鐘意食泰國菜，喜歡它的特色和風味，希望此店能提升食物質素，否則好難吸引我哋再來光顧㗎！…查看更多

以前老人家常言道 : 年初三赤口，唔好約人拜年，避免大家吵架傷和氣，過年要和氣生財，所以大家就會去拜神；隨著時代變遷，加上香港人的生活十分忙碌，唔用埋年初三又㸃夠時間用呢？到我哋這代，都百無禁忌了，最緊要大家啱時間出來聚一聚。:)朋友建議去富豪東方酒店食下午茶自助餐，咁我就負責安排訂位。可能還是年初三的緣故，大家都外出旅遊，周圍都顯得比較冷清清，平時出來九龍城多數都是去食泰國菜，今次為了遷就大家選較方便的地區就來到九龍城。酒店地方幾大，很多座位，環境也很清雅，簡簡單單的，不用金碧輝煌的門面，以白色為主色，給人一種簡樸雅緻的舒適感，白色餐桌分別配以綠色椅子，感覺自然；及配以銀色椅子，感覺時尚；另一邊間了房，這兒配以純白色系列，好有婚宴 feel。可能仍是新年期間，相對留港消費的人少咗，所以比較少客人，咁攞野食就唔逼啦。:)行了一個圈睇下有咩食先。沙律和壽司款式好少啊！熱盤款式就普普通通，不太吸引！:(反而甜品區算是多少少款式，感覺上酒店的甜品一般都不會太失禮的。由於是下午茶，我也不會食太多野，旨在傾偈，加上食物款式也不太多，所以隨意攞D小食。關東煮 : 材料都算多，不過我最喜愛的蘿蔔㸃解無既？由於食物盤只用熱水助暖，所以唔夠熱只是暖暖地，有㸃失望。喇沙湯粉 : 麵底有銀針粉和油麵，湯底則有清湯和喇沙湯，我選了銀針粉和喇沙湯，挾好材料交給廚師烹調。煮好啦！熱辣辣，湯底香就幾香，不過就唔夠濃，辣味也不算太辣，我都食到，如果有食開喇沙的朋友們就會覺得辣味唔夠了。大什會 :壽司、菠蘿粒、蒸蛋、薯蓉和豬排，因為無咩特式食品，所以取少少野食就算了。既然頭場無咩吸引之處，唯有留肚進軍尾場"甜品"，每款試D，味道不過不失，總算填飽肚子。結帳前有些小驚喜，侍應為每位客人送上一份護膚品，哈哈哈！食飽又有得靚靚，不知是否過年這幾天才有呢？整體來說，我個人對今餐的評價雖不至於比劣評，但仍評為欠佳！因自助餐食物指數不高，既不豐富，也不吸引，特別是熱盤方面，我見有部分食物比較遲開爐火煮，所以客人食時就唔夠熱，希望酒店方面注意！:(酒店環境雖寬敞不錯，但食物種類較少，味道也麻麻地，由於坐位較多，如全場滿坐的話，有感各個食物區可能會無法滿足客人的需求，這樣會較容易令客人過份擠擁，我最怕食自助餐時要排長龍啦！因此希望酒店需要改善的是 : 提升食物質量、增加款式及加設食物區。:)…查看更多

年三十晚啦！辛勞的一年，對自己和家人好D，就來一餐放題以滿足大家的肚子。''大井町"，之前我哋已經食過2次，覺得食物質素和服務都不錯，所以今晚揀了此店來慶祝年三十晚。食物未到前梗係攞少少冷盤食住先，青口、螺和螺肉都0K。刺身好快到。有三文魚、中拖羅、北寄貝、甜蝦、馬刀貝、油甘魚、赤蝦、赤貝、鮑片、榮螺片，刺身都幾厚切，幾鮮味，蝦亦幾鮮甜。 火炙壽司:火炙味噌醬蟹棒、汁燒和牛壽司、火炙三文魚腩、火炙芝士玻璃蝦、火炙左口魚邊，好味。壽司:辣汁針魚壽司、松葉蟹腳壽司拌蟹面豉、花之戀、三文魚壽司、帶子壽司、虎蝦壽司、胡椒柚子醬拌中拖羅，壽司也不錯，我就比較喜歡食火炙壽司多D。手卷:海膽和辣味鳗魚手卷，不錯。:)卷物:牛油果軟殼蟹卷和辣汁炸蝦卷，不錯。:) 鐵板料理:鐵板牛柳粒過熟有D靭及鞋、泡菜炒豚肉微辣中帶甜味，味道就一般啦！:)創作料理:吞拿魚他他一般、章紅魚薄切拌柚子酢不錯，味帶鹹鹹地酸酸地挺開胃、水晶香芒大蝦卷都0K，我覺得款式似泰、越式食品。 創作壽司:以"大"(右一)、"井"(右二)、''町''(右三)命名的三款壽司，都算略有心思的，但“大”和“町”都以蝦作食材，有重複感，其中一款應以其他食材就較好啦，味道以“町”這款較惹味及有層次，蝦上面舖上生蒜粒、介茉及辣椒醬，食落有三種唔同的辣味，口感不錯。:)天婦羅:虎蝦天婦羅、一口番薯天婦羅、南瓜天婦羅、秋葵天婦羅、冬菇天婦羅，熱辣辣，好味。鐵板料理:鐵板牛油帶子，肉質彈牙唔韌，肉汁豐富，好味。燒物:千島蝦多士0K:)炸物:榴槤炸彈、紫心香芋丸、炸紫薯餅、墨魚槳餅、塩酥杏包菇，日式炸餃子，炸物。一品料理:地獄辣蜆，好味。燒物:塩燒雞翼，都0K。:)燒物:燒菠蘿、牛舌，燒物。焗物:焗蠔北海燒、焗迷你蟹蓋，味道一般。:)燒物:台灣一口腸味道一般、醬汁雞肉串都0K、塩燒鯖魚好味、塩燒雞翼都0K、塩燒海蝦有D乾。:)一品料理:地獄辣蜆好味(encore)、日式雞絲翅煲0K、海螺片炒蒜芯比較鹹。:)一品料理:壽喜牛肉鍋，好味。焗物:木瓜蒸蛋白、日式蒸蛋，兩款味道一般，略嫌唔夠滑。甜品:款式都幾多，味道不錯，食左好多。甜品最正當然係 movenpick 雪糕，每人只可要一杯，家人唔食比埋我，所以我食左兩杯。總結:=====今晚很滿足啊！十分滿分，我比八分。今天再來"大井町''，無論食物和服務質素仍然保持水準，特別是這些大時大節！店內環境寬敞，光亮舒服，侍應勤快有禮，食物冇漏單及也上得快，以今時今日的食肆服務要求算是唔錯了，值得一試，我哋會再來的。…查看更多

普天同慶的聖誕節晚上，聖誕快樂！因今天食午餐的餐廳食物質素有D失準，有少少影響心情，所以對今晚的用餐有所期待！見食評不錯，於是就訂了這間去試下，希望今次的選擇冇中伏。:)餐廳環境雖然不大，也不是高級裝潢，但都算整潔，唔知食物質素又怎樣呢？會不會是禾稈冚珍珠呢？:)噢！原來今晚只得聖誕除夕大餐，冇其他食物可以叫。扒餐餐湯是配牛肝菌野菌忌廉湯(唔記得影相)，這個菜湯是因為冇千層麵轉叫意大利粉，所以侍應送2個菜湯給我們，兩款餐湯味道普普通通。:)個沙律就有㸃馬虎啦！鮮果在哪裡？只見罐頭什果囉！:(香辣雞亦，一D都唔辣，肉也有D乾，冇咩肉汁。肉醬意粉，因千層麵賣晒，所以轉意粉，熱辣辣，芝士都好多，稍嫌意粉淋左少少，但整體這度菜好味。***注意，食這度菜千祈唔好用手摸隻鑊，因為好熱，家人唔知道就燙身手指。未食過斧頭扒，所以今晚要試下。見到個扒大大份就流晒口水，因為唔食太生的肉，所以都係叫七成熟，但可惜個扒熟個頭變左有D韌及鞋，嘥晒個扒，醬汁配黑椒汁，略嫌個汁唔夠辣味，半隻大頭蝦D肉尚算過得去，幸好冇鞋，配菜D菇鹹左少少，這個扒真係大打折扣了。芝士蛋糕好好味啊！晚飯完畢，心想今天食D野㸃解咁嘅？午餐係咁！晚餐又係咁！平民餐廳！格調就平民，收費就唔算平民，以個扒餐咁，成四百幾蚊，湯一般，沙律馬虎，個扒過熟，甜品好味，成個餐竟然是甜品才好味！！！今晚已經是食指定套餐，款式也不多，廚師理應更容易掌握食物質素，但只得意粉同甜品較為好食，其他的就真係麻麻地啦，我個人認為今餐飯就真係唔抵食啦！除夕夜快到，希望餐廳盡快改善，提供有水準的服務。:)…查看更多

又到聖誕！又到聖誕！===========================瞓醒已是中午了，趕快起身去食午餐。葵芳新都會廣場最近擴展工程完畢，順道去行下，於是訂定位去 Beerliner 食午餐。:)餐廳環境光潔簡約，部份座位設於餐廳外，空間感較大，可減少侷促感。德式香腸拼盤配酸椰菜及燒薯因我唔食香腸，所以冇評價，只食了配菜，燒薯夠熱好味，家人就話香腸都好味。燒肉眼扒配炒鮮菜及紅酒牛仔汁我怕肉太生，所以肉眼扒叫左七成熟，肉質唔韌及味道都過得去，略嫌個汁淡左D。秘製德國鹹豬手配香滑薯蓉及酸椰菜侍應上菜時細心問我哋要不要幫忙切開。豬手肉質略嫌有少少乾，豬手的皮只得中間少少脆，兩邊的皮唔脆及好韌，我切極都切唔開，最後放棄唔食個皮。這度菜是我的至愛，卻令我很失望啊！兩杯雪糕都給我食晒，家人話彌補剛才豬手的失落感。帳單內其中$1是用作慈善用途，但家人冇留心聽侍應介紹，所以唔知捐給哪一個機構。==============================唉！不知廚師是否昨晚平安夜玩得太夜，攪到隻豬手失水準，期望下次再來時，食物質素有所提升啦！…查看更多

平安夜啦！大家又要四出找好野食去歡度這日子。因為太忙，我哋就冇特別預早安排，都是即日決定去哪兒的。荃灣愉景新城翻新後都未去行過，在openrice 搜尋到“熊小館”此店以熊為主題的餐廳，就去試下睇下有咩搞作。門口擺放著很多大大小小的熊仔，挺吸睛！等位時也冇咁悶。餐廳內地方寬敞，感覺舒適，牆上掛上一幅幅熊的畫作，充滿童真，相信大人或小朋友見到都會喜歡的。:)牆上亦擺放著一些熊仔小擺設在座位及枱上有熊仔陪坐，有大有小，如卡位的枱上就擺放小熊，如近門口的枱就有大熊陪坐，我哋被安排的坐位是間房形式(只得一間，上面三合一張相就是我哋的坐位環境)，有兩隻熊陪坐，自成一角。(可惜唔記得整間房影相)。開餐啦！餐湯：香檳青口薯蓉湯。湯味道較清淡，青口肉肉碎帶有少少咬口感，牛油法包則較鹹，所以要將法包蘸上薯蓉湯來食就覺得冇咁鹹啦，兩者互相溶和，如果薯蓉可以濃稠一㸃就正D啦。:)聖誕餐： 黄金芝士燒焗B B Q原條豬仔骨。賣相普通，這個次要，最緊要主角好食，快快切開豬仔骨放進口，豬仔骨只是暖的，並不是熱辣辣的，感覺上是預早整好一段時間，只是加上芝士稍局片刻就上菜，幸好肉質都稔及有肉汁，味道就一般啦，但作為聖誕餐則稍欠心思及失色了。晚餐(上圖)：鮮茄蜜燒鳳梨焗豚肉飯。這個飯呢！無論賣相及味道也遜色於連鎖快餐店的焗豬扒飯，唔講還以為是茶餐廳的A B C 午餐。晚餐(下圖)： 芝士千島忌廉汁鮑魚海龍皇飯。這個飯味道普普通通，有青口、蝦、魷魚、魚及鮑片(韌)，千島醬只是淋在飯面上，我諗如撈埋飯一齊焗會入味D，這樣會好食D。結帳了，侍應說聖誕餐的 openrice 優惠因系統無法一齊開單，要分開單。==============================總結今晚餐飯：整體是半好半壞，此店環境的確唔錯，地方寬敞又清靜，入到店內心情也自自然會感到開心的，但無奈食物質素欠心思，平平無奇，味道一般，冇咩特式，與餐廳格局有㸃不協調，有點浪費左，應該在食物方面改善一下，廚師嘗試設計些特式菜去配合餐廳主題，或花㸃心思將平凡的菜變成不平凡的菜亦可。最後要改善的是結帳安排，侍應應該問下客人還有沒有食物要㸃或告知因收銀要埋數才安排結帳，不要在客人還在進餐時及未有通知的情況下直接遞帳單給客人，這樣令到我有㸃不高興的。此店還有很大的改善空間，否則就會變成一次過冇下次了！請努力！:)…查看更多

上次我講過會再來的，為左試清楚味道，再到此店，有㸃三顧草籚的感覺。:)其實今次係抱著唔服氣的心情來的。因上次家人邊食邊投訴話不會再來，所以今次就同另一位家人來試，希望今次冇中伏，亦希望我冇跌眼鏡。第一次是驚喜！第二次是驚嚇！第三次又是咩程度的驚呢？第一次來食，味道好味，向家人推薦。第二次來食，味道好差，比家人投訴。第三次來食，心情忐忑，不知今次又如何！是讚還是彈呢？家人叫左胡椒豬骨湯麵套餐，配料有粟米粒、豬頸肉、生菜、花生、葱花、芫茜，追加肥牛。胡椒味我就覺得夠味，豬骨味就唔夠濃；家人就覺得兩樣都唔夠，可以再濃D。套餐小食叫左口水雞，麻辣味唔夠，無法刺激我哋的舌頭和口水分泌。我就叫番沙爹濃湯底，要比較番之前2次的味道，今次味道同上次差不多，唔夠濃。經過三次的試味，始終食唔番第一次的香濃，湯底係退步了。:(套餐小食我叫番豬扒，今次味道就好過上次啦，都外脆肉軟還熱的，不過份量少左。經過三次的試味，無論賣相和味道，始終食唔番第一次的咁，都係退步了。:(p.s.出菜時我見跌左一件豬扒落地的，侍應隨即執起返入廚房，相信這個是重組後的豬扒。這張相是上次食的豬扒，比較之下單看賣相，明顯冇左外層的香脆炸粉，還凍左的，有點像炸耐左，脆粉稔左被挖走的感覺。請注意，帳單是冇銀碼顯示的，最好結帳前計算一下幾錢，因我第一次來食時是計多左錢的。經過三次的試食，感覺水準快速下降了，第一次用餐和這兩次用餐只相距大約一星期左右，不知為何食物質素可以咁快變差？由俘虜我個胃到迫我個胃放棄，只是短短的兩星期內結束！問我還會不會再來光顧？其實在區內有更多食酸辣粉的選擇，我諗没有更吸引我的理由再來了，何況我實在無法說服家人肯再來了。第三次又是咩程度的驚呢？係驚醒！…查看更多

今天心血來潮想食燒烤，家人提議去金甲韓國料理，因之前佢和同事食過團購話都0K既，又見到 openrice 有餐飲券優惠，打電話問下有冇位先，侍應問我係咪團購的，我說準備買，侍應隨即報價給我，個價是同餐飲券收費一樣，咁我就省卻買餐飲券這個步驟。店舖算大，因我們得兩人，而店內又唔係好多客人，我諗侍應為左方便，費事開咁多張枱， 所以就安排我哋搭枱。:)第一時間快手快腳去攞野食燒豬牛雞魚味道都0K的，都有蝦的，都過得去既，起碼蝦肉質唔係霉，牛肉類比較好味D，特別是金菇肥牛和一口牛。因地方大，所以出面都擺放幾多食物的，有D似食自助餐的感覺。在等待燒烤期間，就食住D現成的，三文魚刺身食左少少，因不是肥美個種，壽司款式普通冇食，攞左少少熟食，白菜、蜆、咖喱魚蛋、雞翼、菠蘿粒。飲品方面就真係少左D款式啦！又係甜品時間啦！燉蛋幾滑喎，涼粉西米露都0K，啫喱4款0K，奶凍2款幾好味，椰汁西米糕、葡撻、桂花糕、藍梅蛋糕、朱古力泡芙普普通通，另一款透明黃色半圓形的不知是甚麼，有D似食啫喱感覺，但又爽爽地口的，味道一般，豆腐花都過得去，雖然不是好滑溜，但也不太鞋，最好味的當然是維記雪糕，朱古力味最好食，內有朱古力碎。總結一下先，整體來說，此店不是好高質量個種，所有食物都是普普通通，樣樣都有D，冇咩驚喜及特別賣點，算是穩穩陣陣大包圍個類。本來收費和食物質素都算合理的，但是在用餐完畢前給我見到一些不應發生的事情而扣分，就是我見到一位侍應在清理緊出面食物枱後行去熟食食物區攞野食，她是用食客取野食的大匙羹將食物直接放入口食，食完然後將大匙羹放回原處走人。我的天！還在營業中，還有其他時段的客人來用餐的，我真的不能接受！希望此店好好管理一下員工的個人衛生，這㸃很重要！P.S. 順便提下買餐飲券的朋友，餐飲券雖註明入座起計三小時，但冇清楚講明必需要於十時用餐完畢，即是最遲要七時入座才可獲得三小時用餐，之後時段入座就要蝕比佢，個人覺得這兒有㸃取巧，我已向收銀員反映這問題，她說會反映給老闆的。:)…查看更多

此店在區內8月份才新開張的，又有新野試啦！不過環顧區內食酸辣粉的店舖都算多選擇的，此店又能否俘虜我哋個胃呢？:)上星期我獨自去食左一次，味道不錯，於是今天帶同家人去食啦！家人叫左沙爹濃湯寬粉套餐，配以肥牛、鹵水蛋半隻、生菜、花生、葱花、芫茜，另外追加左豬耳和雲吞。第一時間試湯先， 家人略嫌沙爹湯味唔夠濃郁及湯底唔夠熱，寬粉都滑的，肥牛一般，豬耳尚可，雲吞唔好食。我第一次來食時也是叫這個湯底，那次湯底熱騰騰和很香濃的，和今次的好大落差啊！:(我就叫左招牌酸辣米線套餐，酸辣度叫左小小辣， 配以炸醬、花生、芽菜、韮菜、酸菜、葱花、芫茜，追加左蘿蔔和金菇。我碗粉的湯底也是唔夠熱，因叫小小辣，所以酸辣程度只是微微地酸辣，湯味不過不失。套餐小食叫左炸雞翼和豬扒，兩款小食都是凍左的，味道一般，我看見都有㸃失望，因我上次是食豬扒的，那次肉質香脆熱辣辣，炸得外脆內軟的，賣相和味道都很好，不知今次為何如此的。油菜也是剩涼左的，菜又唔夠稔。今晚餐飯，原本是帶著高興的心情和家人來食的，因我已試過好食才推介到此店的，但是不知為何今天食物水準如此的差，反被家人埋怨我一番，食到一肚子氣。此店營運才不久，上次和今次用餐只是事隔一星期左右，難道食物質素咁快就無法保持水準？唔係掛？希望此店能盡快改善，不要令我失望，我會再來試的。…查看更多

今天約左舊同事食飯，為左就佢哋，所以係新蒲崗譽港灣食野，同事訂左 Das Bier，佢哋之前在其他分店食過話都幾好的，所以就去這店大家聚下。:)大家都好耐冇見，一見面就大把野講，所以冇影相，不想破壞氣氛，不要相機食先，要我哋食先！因未齊人，叫左飲品邊飲邊等。人齊啦！睇下餐牌食咩先，見到有美式燒排骨，緊係要 order 啦，點知侍應說今天冇燒排骨喎，有㸃失望。咁就㸃左以下食品：================1) 德國鹹豬手配酸菜及薯仔沙律------------------------------我們的至愛上菜啦，豬手已經起左肉的，都算幾細心，大家都急不及待了，一口咬落去後有點失望啊！皮唔脆，肉唔嫩滑，肉質好乾呢！好好的豬手㸃解搞成咁呀！2) 德國香腸併盤---------------------------因我唔食香腸，所以無法評價，朋友就話正正常常，冇咩特別好味或難食，反而配菜薯角好味，熱辣辣，外脆内軟。3) 墨西哥粟米片---------------------------小食既話，我哋都好喜歡食這個的，粟米片用一個小籃子盛載著，點知一看籃子內的粟米片份量比較少、細片及好碎，完整的數得出5，6片左右！4) 西班牙風乾火腿配凱撒沙律------------------------------蔬菜都算新鮮的，火腿片夾上醃青瓜片一齊食都幾好味，不過略嫌火腿片及醃靑瓜片少了一㸃。5) 煙三文魚意粉---------------------------這款麻麻地好食，煙三文魚份量少左D，意粉煙韌度都尚可的，但係唔知㸃解整個意粉有D腥。:(6) 美國頂級黑安格斯肉眼扒10oz------------------------------這款是今晚唯一最好食的一度菜，肉眼扒有10oz份量，夠我哋大飽口福了，我哋怕太生所以叫左"medium"，切開都有些血水的，還可以接受既，肉汁豐富，肉質軟稔好味，配以薯角及翠肉瓜片，熱辣辣好味。飲品方面，㸃左以下飲品：=====================1) Guinness Surger2) Hoegaargen Rosee3) San Pellegrino (peach)4) Coke Ice-cream朋友們叫左兩杯啤酒 share，啤酒我就興趣不大啦，我要懷舊一下，叫左 Coke Ice-cream (黑牛)。==============================總結今晚餐飯，之前同事推薦這店，食過之後就覺得真係麻麻地，可能是各分店差異啦！此店地方不算大，座位也不算太寬敞，感覺都有㸃迫，大約可坐30人左右，侍應服務尚可的，食物質素就麻麻地，如果作為德國餐廳的話，無論環境舒適度及食物質素都不太合格，只能說是普通餐廳質素。至於抵唔抵食呢！雖然有信用卡優惠，但這個質素，我個人認為不太抵啦。:)…查看更多

店舖冇咩㸃特別裝修，門面只是簡簡單單的開放式。睇下食咩先餐前小吃：泡菜，大豆，泡菜比想像中冇咁辣，味道普普通通啦。:)韓式魚丸湯，魚丸咬落口無咩特別口感，感覺平平無奇的，不會像香港的魚蛋有彈牙口感，味道淡淡的，必須要蘸上醬汁才有味道。醬汁是這度菜的精粹，鹹鹹地酸酸地，少少微微辣，辣味不太覺的，唔食辣的人也可以食的，湯也像魚丸一樣淡淡的。鐵板烤雞肉餐，餐配以白飯，賣相也不錯，因冇汁所以鐵板冇“炸炸聲”，感覺上總是差少少的。雞肉配以紅蘿蔔絲、洋蔥絲、椰菜絲，再洒上芝麻，雞肉咬落口也是淡淡的，由於味道太淡了，我將雞肉蘸上魚丸的醬汁才有D味道，真係有㸃那個了。粉絲炒雜菜，賣相一般，配以三色椒絲、洋蔥絲、牛肉絲、雲耳、蔥絲，再洒上芝麻，這度菜味道一般，粉絲煮得比較稔，牛肉熟左D，算是三款菜中略有味道的一款了，起碼不用另外蘸醬汁食 。食飽這餐飯，如問我好唔好食？雖不至於好難食，但我就真係不能說好食，只能說句同心中的落差較大。又話是韓國人開的，真的嗎？為何質量如此的大落差呢？無論環境、食物質素都無法給我有一種食韓國菜的感覺，收費就真係更加不值，如果對此店抱有高期望，恐怕會令大家失望了，勉勉強強的還可以。…查看更多

探完人，落返去葵芳食飯，但星期日這個時候又好難揾食，咁就行多幾步遠離地鐵站，走到屋邨附近的食肆，在恒景商場內的意大利餐廳。第一次到此店時，還以為是某意大利餐廳連鎖店添，因為餐廳格局及營運模式都很相似。店外店內，地方光線充足，坐位都算多，不過都排得幾密，感覺上有D迫迫地。有一㸃要注意的，此店人手是非常不足的，顧客們要比多一㸃耐性啊！睇下餐牌叫咩醫肚先鐵板炭燒雞扒香腸，賣相就一般，似快餐店的扒餐咁，雞扒及香腸肉質味道都一般般，冇咩炭燒感覺，反而配菜都幾好味。鐵板黑椒牛柳配黄薑飯，賣相就好D，先食牛柳粒先，滿以為好好味，失望，太熟啦，好韌有根，黃薑飯得個顔色，冇咩香味，反而個黑椒汁好好味，辣味好夠，蘸醬汁食好好味，可惜D牛柳粒失敗。:(醬燒嫩豬仔骨，個賣相又係唔得，為何豬仔骨切左件來燒的？這樣豈不是所有肉汁都溜走晒囉，失望。辣味雞翼，雞翼辣味好正，夠辣味，應該是有8隻的，因為好味，我還未來及影相，家人已經好快食左D啦。香辣黑椒焗蜆，這款都好味，略嫌黑椒不夠辣，如果好似鐵板黑椒牛柳配黄薑飯個黑椒汁咁正就好味啦。菠蘿煙肉比薩，pizza 好味，材料舖得滿滿的都算是足料啦。墨魚汁海鮮意粉，黑溜溜的一度菜，賣相就真係不能會怎麼好看啦，最重要是味道，墨魚汁都算足夠的，但可惜未能撈混每一條意粉，海鮮材料得少少墨魚圈，少少蜆係咁多啦，味道都過得去，但材料就少左D，這度菜必需要趁熱食，因一涼左墨魚汁會令意粉變得較硬身，就會無咁好食了。總括來說，此店整體的食物質素及服務就真係一般啦，若要求不太高的話還是可以接受的，十分滿分我比六分，有好大的改善空間，其實我都幾鍾意個環境的，這兒都有值得可取的地方，收費又唔係好貴，坐耐D都問題，同朋友傾偈一流，叫個飲品吧就可以無限添飲，再叫些小食就得啦。希望此店努力改善食物質素及增聘人手！…查看更多

今天想食扒，於是就去“食臺”開餐，別誤會，不是台灣菜。此店是我一直都很喜愛的食肆，它是一間價廉物美的西餐小店，店舖不大，座落於葵涌運動場對面，在區內較靜的位置，不太起眼，唔留意的話，行過都唔覺有間餐廳。由於店舖細小，此店一到晚飯時間就開始要排隊等位，作為顧客的我們早已習慣了，要食好野，等下都值得的，但我們一般都會較夜去食，避開繁忙時間，今天好好彩，去到剛好有位。店舖不大，一眼睇晒，坐滿客人時會比較迫，店內只得一位女侍應來招待所有客人的，她好 nice，經常和我們有講有笑。店內留言板上貼滿顧客的讚好留言。:)店內共有20個坐位，2~4位較易揾位，若6~8位或以上則較難揾位，最好預早打電話問下，以便作出適當安排。店舖雖小，餐牌的款式都算是多種類。家人叫左一個五成熟的美國安格斯西冷。加$10 可配飯或意粉，家人叫左飯配黑椒汁。淨係睇賣相都吸引，廚師用心製作，扒餐配菜豐富，有蔬菜沙律、薯角、焗蒜頭、配以藍莓醬汁，還配上2條炸意粉插在薯角上裝飾，令成個餐賣相更加吸引。家人比較喜歡牛扒生D，五成熟啱佢，牛扒份量都算大份，肉質軟熟唔韌，蘸醬汁來吃，帶㸃酸酸甜甜，減少牛扒的油膩感，令口感更豐富。我怕肉太生，所以叫左七成熟的芝士青蠔牛肩扒。這個扒賣相重靚，青蠔肉肥大好味，牛扒雖然七成熟，但肉質唔韌和唔鞋，肉質軟稔，好味，我最喜歡食它的薯角，熱辣辣，皮外脆肉內軟。大家請留意，我這個扒餐是冇焗蒜頭的。鍾意食蒜頭的朋友，不妨一試這道配菜，蒜頭焗後味香肉稔，原粒就咁食或壓碎連牛扒一齊食又得，有不同口感。注意，不是全部扒餐都配焗蒜頭的。扒餐奉送飲品及甜品木糠布甸和焦糖燉蛋甜滑兩款甜品我都喜歡，我個人比較食得甜，所以我唔覺太甜，但家人怕甜，所以焦糖燉蛋會叫少焦糖的。由我第一次光顧此店後，就經常同家人來鋸扒了，因為無論價格、食物質素、服務態度都無得輸，勝過好多大餐廳，每次用膳都食得好開心，唯一美中不足的是地方所限，比較細和迫，有時想坐耐D都唔好意思，怕阻住人家做生意，但我唔介意。一句講晒，此店必試！請注意，此店是逢星期一休息架，唔好摸門釘！…查看更多

掛著一號風球的日子來慶祝生日，一直擔心晚上天氣變差及改掛較高的風球，幸好天公造美，無風無雨。生日飯就梗係要食放題來個大滿足啦！上 openrice 找下旺角區有咩好食先，見到評價都不錯及有生日優惠，咁就試大瀛喜吧！商厦電梯大堂擺放一個相樸公仔來做座標，唔駛驚找唔到。食物紙的款式都是穩陣大路的食品，冇咩特別特式的口味。開餐啦！梗係第一時間寫刺身及壽司啦！落單5分鐘左右就有得食啦！壽司好味！飯微温軟熟，份量不會太大件，咁就可以食多幾件壽司都冇問題，但略嫌款式少左D。刺身味道及新鮮度不過不失，如果可以厚切就更好。蒲燒鰻魚味道一般，唔夠鲜味，和風帆立貝大大粒，好味，因芝味蒜香焗虎蝦來貨問題轉為焗扇貝，熱辣辣，香噴噴，好味，可惜肉好細粒，黃金炒海蝦，味道不錯。法式忌廉藍青口，淡淡的忌廉味，青口肉大好味，鹽燒牛舌唔韌好味，香草燒紐西蘭羊鞍，肉嫩多汁，不錯，燒勁辣尖椒，真的好勁辣，標晒眼淚，鐵板蒜香一口牛，肉嫩稔滑好味。鹽燒雞軟骨好味，夠咬口，鹽燒海蝦都不錯，略嫌乾左D，辣酒煮花螺好味，微微辣味肉滑唔韌，海鹽虎蝦天婦羅、蟹棒天婦羅、有機蕃薯天婦羅味道不錯，金磚炸鮮奶好味啊！豉椒炒大蜆好味，夠辣味，正！超級榴槤炸彈，咬開榴槤味四溢，流心一口芝士ok，黄金炸生蠔ok， 燒有機菠蘿，表面夠乾身，內裡果汁豐富。花之戀味道過得去，不過個卷物賣相有些走左樣。最開心時刻就係食甜品啦！忌廉泡芙好味啊！意式奶凍一般，嫌唔夠奶味！法式蕉糖燉蛋也一般，唔夠滑！飲品款式都算多選擇，柜内也有熱飲。除雀巢雪糕雪條外，還有韓國雪條。Q版心大軟不錯，另外生日優惠，揀左 Haagen Dazs 曲奇味雪糕，總結：整體食物質數都不錯的，算中上，食品上得快，侍應服務也不錯，但坐位就覺得有D迫啦。今餐滿意度十分為滿分，我比八分，需要改善的是壽司及炸物的款式略為少左DD， 希望可以增加多些款式，此店可值得一試的。…查看更多

今天又再來試多次，目的是來試埋另一款牛肉，看看質量如何的？上次介紹過，所以餐廳內的環境不再多介紹啦，開餐緊要！:)叫左一個鮭魚清湯，這個湯幾清甜，不錯；另一個豬骨濃湯，本想試冬蔭功湯的，但又怕太辣，還是下次叫家人試，所以還是叫番上次的豬骨湯較安全。豚肉同上次一樣薄切，肉質一般，唔好滾咁耐，會好鞋架。今次叫左極上美國牛肉，比美國牛肉貴$20，油脂分佈不太多，肉質食落都稔滑的，好食過美國牛肉好多，唔鞋，因我不太喜歡牛肉太肥，會令到湯底好油，這款都幾符合我的要求，兩款牛肉相比，真係一分錢一分貨。自助站的配菜款式有十多款，不停添加及有轉款式，算唔錯。飲品機有烏龍茶和綠菜左好多配菜選用出前一丁麵及噹噹烏冬，不錯啦。今次消費比上次貴$20，都算經濟抵食的。餐後總結：========同屋邨商場內以食火鍋為賣點的另一些連鎖店來比較，肉類質量的確較遜色，幸好配菜及飲品是任飲任食，彌補番不足之處，亦可得到“擦得”的捧場客支持的。無論收費和食物質素都算唔錯的，是幾抵食的，值得一試。…查看更多