vivienxneiviv的個人專頁

約咗呢間餐廳慶祝生日，見到上網嘅食評都唔錯，打算試一試。一行四人，店方要求每人最少叫一個熱食。因為見餐牌嘢食嘅價錢都唔平，開頭都有擔心過會唔會份量太多，四個女仔會食唔晒。但係佢第一個Pizza嚟到之後，就證明我哋嘅疑慮係太多啦。Pizza 皮薄勁硬，餅底無味，上面有對青瓜明太子嘅餡，+1隻大概2吋長嘅軟殼蟹 ，完全唔知自己食緊乜。$210大啡菇漢堡採用左類似惠康$30蚊3個(冇特價嘅時候) 嘅大啡菇，中間有啲類似芝士嘅餡。基本上成舊嘢都係冇味。沙律配菜幾好食。$195燕麥雞扒意粉。賣相比較出眾嘅一個。可惜嘅係，雞扒嘅皮同肉，切開後完全分離，意粉，極度普通，有色但係唔入味。$260醬油赤背，極度鹹，上面勁多七味粉，呢度一半係赤背，一半係類似蘿蔔嘅物體，完全唔知自己食緊乜。$190牛扒盛惠$468，極多筋，每一啖都係筋。餐廳冇水提供，我哋見到啲嘢食咁伏，所以淨係叫咗一杯嘢飲。類似係蜜桃茶。大概係陽光蜜桃茶，加冰。我哋有直接同餐廳反映杯嘢飲好淡完全冇味，餐廳表示冇辦法調整，因為佢哋係冰茶（＾∇＾）最後係生日嘅甜品。入面有兩球雀巢雪糕，幾粒爆谷，一啲糖。雖然都唔預期可以食好多，或者好好食。但係呢個價錢，呢個質素，都真係幾無奈。$298。最後服務就係冇服務。8:45嘅時候已經叫我哋埋單， 8:50嘅時候同我哋講廁所要消毒叫我哋去廁所。完。…查看更多

係一個風和日麗嘅中午，經過一間裝修感覺唔錯嘅咖啡店。平時其實都鍾意試吓唔同咖啡店，抱住一是無妨嘅心態就叫咗一杯鮮奶咖啡。 咖啡店店面唔係好大，只有兩枱位置，我叫外賣咖啡，等左十幾分鐘，原因係店員話我哋張單之前有四杯咖啡沖緊—— 唔緊要！好嘢係要等嘅！ 首先我哋目睹咗我哋前一張單出爐嘅一杯Dirty。飲過Dirty 都知道，一杯正常嘅Dirty 就係上層深啡色嘅expresso，下層鮮奶。而我哋見到嘅係，一杯淺啡色嘅混合物。嗰個時候我哋已經心知不妙。大家都係等咗一陣，我哋見到其中個店員走咗出嚟。發生咩事？原來coffee shop用晒啲牛奶！但係都唔緊要嘅，起碼我哋個杯咖啡都仲沖到！再過多5分鐘，我哋嘅咖啡終於出嚟喇。一接到杯咖啡，嘩好熱！辣手㗎！果然係熱咖啡。首先打開杯蓋，諗住欣賞下個拉花先。話晒都叫Specialty coffee，應該都有驚喜比到我哋嘅。咦？冇嘅？唔緊要！外表係唔重要，最重要係內涵呀嘛！所以我哋都冇特別在意上面好似岩洞咁粗嘅奶泡，懷着戰戰兢兢嘅心態就飲咗第一啖。嘩，係中藥嘅味道！箇中苦澀，實在難以形容。唔通沖咖啡嘅人，經歷過啲乜嘢事情？飲咗大概三分之一杯，越飲越覺得唔妥，再打開杯過一望望，見到細細粒嘅油脂。呢一啲係我哋飲咗咁多年鮮奶咖啡都未見過嘅物體。我哋不禁喺度猜測，到底佢哋係過期咖啡豆所造成？定係打奶嘅奶嘴長期冇清洗所造成？係猜測嘅過程，我哋經過左一個垃圾桶，就將大半杯冇辦法入口嘅咖啡送咗比佢。經過呢件事口，我好多謝呢間咖啡店俾咗一個歡樂嘅30分鐘我哋。最後我勸告店主，你，不如去學下沖咖啡先。…查看更多

一年前嚟嘅時候，呢度啱啱開張。喺支持黃店嘅心態底下你食咗一次。嗰次之後，我已經差唔多一年冇嚟過啦。因為實在超級無敵勁難食。飯係黐埋一舊舊嘅，肉係硬嘅，杯嘢飲甜到無倫。Anyways, 念着佢啱啱開張。不過日日喺附近，都冇乜勇氣再入嚟食多次。差唔多一年，見佢哋舖頭都有相當多嘅人，諗住應該可以再俾機會多次啦。一開始已經落錯單，混亂嘅程度同一年前一模一樣。點解可以完全冇進步！然後到上菜嘅時間，佢哋安排我坐咗係一個角落嘅位置，我叫咗一個蕃茄湯通粉，然後佢哋竟然要我舉高手（高個頭）去接果一碗通粉。震驚。如果嗰個座位係上唔到菜嘅話，你係咪應該執一執嗰個間隔呢？如果我一個冼手，成碗熱辣辣嘅粉就會倒咗喺我隔離嗰個陌生人個頭上面。完全理解唔到點解佢哋可以咁樣做。之後食物嘅質素，好失望地，係完全冇改善。雞扒勁梅，通粉完全唔入味，蕃茄湯，你唔好睇佢個顏色好深好似好濃郁咁，係冇乜味嘅。真心，做咗成年，啲食物都仲係咁，個Operation都仲係咁亂，係咪應該真係反省下，你哋咁多生意對唔對得住真心支持黃店嘅食客呢？…查看更多

今日中午食飯，行過見到呢間有位，個門面又OK，門口啲圖又唔錯，價錢就偏貴嘅，一個飯到$60-$80 ，心諗呢個價應該安全啦，但人一放鬆就好意中伏。叫咗個咖喱吉列豬扒蛋包飯，我一望到個飯就已經O晒嘴，個蛋包飯，大家睇圖都知佢唔係一個蛋包飯，佢係一隻炒蛋放喺個飯上面。我都唔識得點可以炒到一隻咁難食嘅蛋，又硬，又實，簡單啲黎講就係你食咗第一啖你會開始懷疑人生，所謂身體發膚受諸父母，我會覺得我係咪做錯d乜要食依隻咁既蛋，食咗呢隻蛋真係幾不孝下，今日返去都要同我阿媽講聲對唔住。所謂嘅吉列豬扒，大家睇下圖，顛覆咗大家對吉列嘅認知, 其實係咪應該改名做炸豬扒呢？要貼切d形容，我就覺得佢好似一塊炸完食唔晒嘅豬扒，擺喺雪櫃嗰度雪一日，第日拎返出嚟煎黎食嘅感覺！最後就係個咖喱汁，其實我周不時都會喺超級市場買啲現成嘅咖喱汁包，成包加熱左再倒落啲飯到就可以食。而呢一個咖喱汁，竟然比嗰一啲即食嘅咖喱汁仲要淡、仲要水，仲有少少螢光色添！但to be fair, 佢都算係咖哩黎既，冇「蛋包飯」同「吉列」咁誇囉。最後就係佢今餐嘅茶啦，我想講，果茶係好飲㗎，大家記得嚟飲茶！ …查看更多

第一次幫襯，見OpenRice的食評大部份都是正評，雖然抱有點點懷疑但還是勇於嘗試了！結果竟然比想像中差太遠了！臭的三文魚和帶有裙邊及內臟的帆立貝壽司，真的是第一次吃啊！由於實在是太震驚的關係，沒有及時地把食物拍照便遺棄了。。。現在回想，實在是一次驚心動魄的食物體驗。我衷心希望店家能夠好好反思一下。雖然是抱着支持一下黃店的心態，通常要求都不會太高，但總不能接受如此有創意的菜色。話雖如此，熟食還是可以接受的。可能有興趣的朋友還是點熟的吃吧。…查看更多