為食嬌的个人专页

門面見到個招牌攞晒獎咁，又有大大隻燒鵝，應該都唔差啦。一上菜係大大碟，點知叉燒係乾到成張紙咁，燒鵝都勁乾，亦都冇乜肉，真係好失望。勉強食到係因為燒鵝有塊皮同埋醬汁，飯有豉油。$70食呢啲質素真係成肚氣。😫最後同個收銀表達真係好難食，佢淨係輕輕話會同師傅講。真係冇下次。😤 …查看更多

平時同屋企人食開街坊酒樓，今日屋企人話想試下”高級”啲嘅酒樓。十一點去左攞位，前台話得最近叫飛嗰張枱，如果要坐入去就要等。咁我地就坐左先算，確實係勁嘈，上面啲射燈係射到好熱。😰 我地叫左燒賣，牛肉，芥蘭同臘腸卷。等左大約45分鐘，我地吹單先同我地講話無臘腸卷，當堂O左咀，你唔好埋單先同我講？喺張點心紙到又無畫左去，又無人同我地講。😨咁我再點其他點心係唔係又要等45分鐘？再等多5-10分鐘終於有燒賣同牛肉。😤 食物質素唔係特別好食，又貴。😟我地其實都有當面同經理講，但經理個款都似俾人鬧慣，話係呀，我地上菜係耐呀，唔好意思呀，對唔住呀。但好明顯係覺得好正常，只不過係揾個人俾你發洩下咁。🙁我地食到勁激氣，一上open rice 先知咁多差評，但間酒樓應該都係意見接受，態度照舊，因為就算有幾差評出都係勁多人係到排隊，對我地黎講真係無下次。🙃🙃🙃…查看更多

我好少寫食評，但今次真係忍唔住要寫，同我平時一定會相機食先，但呢次相機都唔想食先。而賣相真係同其他食評post 的差唔多。話說男友媽媽話想幫襯黃店，就揀左呢間餐廳。叫左四個餐，餐湯麵包都麻麻地，不過呢啲唔多講，反而想知點解叫漢堡包餐有湯無餐包，雖然個包都唔太好食，但都覺得好奇怪叫包餐無餐包。🙃叫左兩個意粉，一個黑松露意大利飯，一個牛肉漢堡包。一個意粉係蒜香蜆肉意粉，都算係簡單易煮的。讚係份量係大份的，但係...第一啖食個蒜蓉味，係似用李x記嗰啲蒜頭，二係啲蜆肉有雪味，三係啲意粉”淋”左啲同意粉本身質素都一般。如果收費係40-50 蚊，以上三點係無問題，但如果我俾108蚊(唔知有無加一，點解唔知？係後面有講) 我就覺得好唔值。😌我食左兩啖無食。另一個意粉係青口意粉(HK$128) 我食左一啖就無食，都係咁啦，好咸，完。鮮唔鮮味唔多講啦。🙃到我叫嗰個芝士牛肉漢堡(hk$98), 個包一般，無咩特別評價，但我記得包唔係熱的。🙄 但我唔想同麵包好食嗰啲比較，所以跳去個肉到講，個肉係無牛肉味，同又係好咸。🤭 唉...而我食得最多係幼薯條，唔係因為好食，係我鐘意食香口食物。做得唔好個位係炸到好乾厚粉咁。係好脆丫，但食唔到薯仔囉，可能你會話，幼薯條當然會少啲薯仔啦，但真係好食嗰啲幼薯條係炸到皮薄餡靚，就算幼都食到係薯仔黎。😌希望大家明白我的意思。最後係黑松露意大利飯，讚係好大碟，一定夠飽，但係，完全唔係意大利飯黎，似係黑松露忌廉燴飯。🙈 由於我鍾意食忌廉，所以我係食左三啖。😉 飲品叫左樽裝酒，所以無特別comment。聽男友講返原來埋單係無俾單我地，行埋黎講個銀碼，因為我地都覺得係500蚊到都啱數，所以無理到，同唔係我俾錢，所以我唔知係有無加到一。其實食物唔係真係咁差，但收120 up一個人希望有返少少質素。返到屋企睇返lunch menu 大約60蚊一個餐，呢個價就接近今晚晚餐的食物質素。Btw 我返到屋企到瞓前飲左勁多水，唉.... 我諗呢啲身體反應無得呃啦吧？我係真心想餐廳改善下先寫咁大篇文，完全無惡意。😌 希望可以認真有原則地製作食物。…查看更多

朋友推介的餐廳，星期五晚，輕鬆的一晚。這餐廳有三層，主層是飲酒傾偈，下一層是用餐，而上一層則是露天飲野！環境都很好。每個服務員都掛住笑容，親切的。可能星期五，地店又在中環，7:15 pm 食，9:00pm 就要交枱，這個有點不盡慶。一般跟朋友都係食頭盤，主菜，甜品，飲料。頭盤是䳘肝麵包，不是乾身，有汁的，幾好。之後就主菜，spicy tuna roll 同炸雞。Spicy tuna roll 食到係新鮮做的，有八粒，但其實係唔spicy 😅個炸雞係外脆內滑，但就沒什麼特別。到甜品就試試這個green tea tart ! 好重綠茶味，還好。這杯cocktail 聽閒很有名的，名字忘記了，可以問一問服務員，我相信他們會好樂意介紹。😊總括黎講都滿意的，價錢是中環價，如果可以坐耐少少，500一個人頭價會開心d。…查看更多