HSK2的个人专页

不用說食物質素，只評服務。到酒店用膳，一為食物，二為環境。壞了冷氣，店員冇講俾客人知道，只安排一個大房間一把風扇，有些客人投訴才安排換位置，不投訴的客人就置之不理。如此酒店服務，真的豈有此理。…查看更多

星期六朝早去到澳門，又唔想食太多嘢，剛經過電視介紹過的彪記。在門口望咗一陣，雖然之前有澳門朋友同我講過唔好食，但係我最後都入咗去試下。我只係叫咗個細腸粉拼燒賣。講真，佢D痳醬同甜醬就幾好嘅，但係個腸粉就真係唔掂，OVER哂，又淋又勁熱。另外燒賣唔係香港食開的街邊魚肉燒賣，係類似"健康工房"賣嗰種，非我杯茶! 燒賣d肉散散地，同埋應該都係煮到過熱喇!一碟賣到19蚊，我就覺得唔值喇! …查看更多

上一次去韓國食過燒肉，實在太好食，所以一直念念不忘。聽講呢度有燒五花肉，就同13去試下。呢度食物款式很多，最後我哋叫了個$398套餐。(另外加了一碟菜用來包肉食)烤LA牛肋骨 - 味道偏淡!烤五花肉 - 同韓國的三層肉好唔同，呢種五花肉係一片片薄切的，偏肥! 但OK，都幾好! 烤牛肉 - 整個晚餐最好食的，汁香肉滑! 正! 鐵板辣泡菜餅 - 個底超多油，味道好一般，但夠辣!雞肉石頭什錦飯 - 唔知佢落咗d咩，總之就有d怪味! 不過都OK，雞肉都好滑!跟8款前菜同2碗湯 - 都幾好!! 湯正!!整體OK啦，老板招呼好好，會親自幫手燒嘢食同教我哋點樣食。值得一提嘅係燒肉時的洋蔥伴碟，將五花肉燒好之後放在洋蔥上面，邊燒洋蔥邊等d肉汁流落d洋蔥度一齊燒，好好食!!有機會下一次要試下佢其他d食物!…查看更多

上次去韓點咁啱係星期日唔開門，食唔到!今晚再次同13出動去試下。去到見到舗位好細，根本唔可以堂食，有D人已經排緊隊落order。我地決定買上車食，我即時排隊，邊排邊睇食咩!呢度食物種類唔太多，8點幾已經有d食物沽清(炸醬麵，下次見啦!)韓式炒年糕 - 個汁真係一流(甜味同辣味好balance)，除年糕外，仲有少少蔬菜伴碟。韓式魚蛋串 - 比韓國街頭的薄身，不過味道好好。什錦拌飯 - 個飯唔夠熱，不過配菜同隻蛋撈埋d飯之後好香，好好食! 煎泡菜餅 - 完全唔熱，泡菜味唔夠! 整體來說都幾好食，特別係個韓式炒年糕，下一次一定要再食! 而個什錦拌飯，我都想再食呀~~~…查看更多

十幾年前開始幫襯陳漢記，一直都覺得佢d腸粉好專業!對上一次去食已經係成年之前嘅事，水準仍然好好!星期四晚咁啱得閒，再加上X5都得閒，就帶佢去試下。炸兩腸粉 - X5下午先至去完鰂魚涌金峰食Tea，同樣係食炸兩，佢話同金峰實在冇得比！我試過之後都覺得今次唔係好得，主要原因係油炸鬼唔新鮮！叉燒腸粉 - X5都讚佢d皮夠薄! 保持水準，正! 豉椒排骨煲仔飯 - 排骨好正，飯夠香兼軟硬適中，再加少少飯焦，一流! 鵝腸拼牛栢葉 - X5就話鵝腸好食，牛栢葉太chewy! 我就覺得d鵝腸欠缺一些肥糕，而牛栢葉就幾好食wor....整體食物質素都可以保持水準，難怪咁多年都人流不絕!因為得兩個人，唔可以試多d其他嘢食。留待下一次有機會再試吧!…查看更多

之前聽人講灣仔榮式雞扒好好食，可惜一直未有機會一試。今晚有機會在屯門市中心食飯，又唔想食太多嘢，想起之前在Openrice見過話榮式雞扒在屯門市中心有分店，便走去試試。榮式雞扒湯麵(改麻辣湯底) $27 - 麻辣湯底幾正! 夠哂"麻"! - 雞扒另外用碟上，超多油! 塊雞扒好薄，唔係我喜歡"厚身大啖肉"的那一種。不過調味不錯!! (可惜今日忘記帶相機，影唔到同大家分享那一塊雞扒!)凍咸檸水 $15 - 唔係一整個咸檸上，約1/3喇! 不過都幾夠味!整體一般，真係經過的話，可以一試。…查看更多

第二次到季季紅，今次係食晚餐。富貴黃金蝦 - 好! 蝦炸得香口，咸蛋份量剛好，唔會太多!乳香豬(1/4隻) - 乳豬皮幾脆，d肉係好香口，不過皮同肉中間實在太肥喇! 有些失望! 海皇什菜煲 - 賣相幾好，有蝦、帶子、魷魚、珊瑚蚌。不過味道一般。有d菜苦苦地...同埋唔應該用蟹柳lor......冰淋醬烤骨 - 雖然食唔出係咩酸味，但係真係好好味!! 我一個人都食咗5大舊。 豬肺頂蝴蝶腩燉菜膽 - 湯好飲，菜膽好好食! (呢個湯係13今餐最滿意的!)今餐整體都OK啦!見到隔離枱食"香煎蓮藕餅"同埋"蒸烏頭"，望見好似好得，下次有機會一定要試下。…查看更多

上星期五，朋友生日，飯局的地點居然在黃竹坑的熟食市場內。其實之前已經聽聞過那裡有一間很好吃的泰國菜，今次終於有機會去品嘗。可能是星期五和這地方主要是做午市，所以整個熟食市場內的人不多。這一間只有我們一枱客人。泰式拼盤 x 2 - 有咖哩角、炸蝦餅、魚餅、春卷和很多伴菜。大蝦柚子沙律 x 2 - 超正！大大舊的柚子肉加大大的蝦，一試難忘！ (還有楊桃伴碟，幾特別！)明爐蒸烏頭 - 放在上面的配料很多，根本看不到條魚。配料中除了有肉碎及一些菇類外，居然還有扎肉，有驚喜！ 烏魚很好味，完全冇腥味！木瓜沙律伴唔知咩魚 x 2 - 又幾好食喎！冬陰公 x 2 - 味道剛好，不太辣，也不太酸。湯內除了必有的大蝦外，還有椰子肉，正！香料味可以再加重些就更好。咖哩蟹(跟薄餅) x 2 - 咖哩味一般，不過蟹肉好正！因為太多嘢食，忘記了吃薄餅。甜品拼盤 x 2 - 唔計楊桃，有成6款。幾好！總括來說，每碟菜的份量很大，味道很好！ 老板娘的服務亦很好！絕對值得再次光顧。…查看更多

尋晚食完飯之後，見到對面有間手作之店，舗面都幾大。第一次見到手作之店有堂食，當然要試下啦......可能時間尚早，只有兩枱客人。我同13睇咗好耐Menu，有D唔明就問下店員，但係佢地都唔係好熟悉佢地賣嘅食物，佢地自己都要問來問去先至有答案。最後我地叫咗:純芒果布甸至尊,$19.9 - 芒果布甸加1球芒果雪糕，芒果布甸有芒果肉，幾好! 芒果雪糕保持此店一向水準，但係好似細球咗少少!甜心草莓雪糕窩夫條,$29.9 - 窩夫條應該係之前整好，所以唔係幾好食! 不過呢度set d價錢就真係有d奇怪，大部份都係$19,9...$29.9....跟住張單仲怪....(見圖)下次有機會都可以再試，不過都係主要食番芒果雪糕會穩陣啲!…查看更多

今晚專程到紅磡試"韓點"，點知去到之後先至發覺原來星期日休息。唯有轉去附近這一間出名的試試......人不算太多，排了約十分鐘就有位了。兩個人叫了以下的食物:吉列豬扒拉麵店(豬骨湯),$48 - 由湯到麵都好一般，無驚喜!! 吉列豬扒唔掂，豬扒很薄粉很厚!!漢堡扒北海道忌廉飯,$58 - 個汁好好味! 漢堡扒肉實，內有些洋蔥，正! 如果嗰兩塊漢堡扒能大些少會更好!日式炸餃子,$28 - 可以接受......油揚年糕煮<福袋>,$38 - 份量都算大，不過味唔夠!燒鯊魚蛋芝士,$48 - 因不夠熱，內裡的芝士也不溶!食物的價錢雖不貴，但絕不是物超所值。待應生的收碟速度很快，有些在"澳洲牛奶"食嘢feel!Overall comment "一試無妨" 唔需要專程去試!…查看更多

那一天下午經過附近，剛巧見到了這一間舊式餐廳。肚子雖不餓，但為了懷舊一番AND影下相，便和13一起光顧。我們坐在二樓近窗最後的座位，可以看見全層的狀況。見到很多客人，也有些是外籍遊客，也有些看得出是專程到這裡影相的。待應很有禮地為我們落單，我們叫了菠蘿冰、什果冰、腿蛋治烘底及干炒牛河。菠蘿冰及什果冰 - 已經很久沒有試了，在這種舊式的地方，特別有FEEL! (可惜太甜!) 腿蛋治烘底 - 沒有驚喜!干炒牛河 - 不過不失! 值得一讚的是不太多油!其實餐牌及牆上都有很多其他食物的選擇，下一次可以一試。如果想懷舊一下及影下相，這裡是不錯的。…查看更多

尋日中午同MC食唔到鵝腸麵，下午4點幾自己一個人走咗去試!叫咗個鵝腸墨丸米.....鵝腸好好食，少肥及爽口! 正!!墨丸好大粒，有墨魚味，唔肥!但係米粉就唔係我鍾意食個種，好幼同好碎。食物幾好，價錢唔貴(+$2有凍飲)，唔怪之得lunch time時排長龍啦~~~下次可以試下佢其他食物!!小插曲: 當我食緊嘅時候，我發覺原來佢冇俾墨丸我，我就問番個待應啦! (其實我只想confirm番個價錢冇錯)經佢地一輪搜索之後，原來我原本order個碗係俾錯咗個女人，我睇個女人時佢正在食緊我粒墨丸呀~~~個待應就走埋去，冇同個女人講任何說話，就喺佢張單度加番佢個價錢。個女人都冇出聲，心照啦太太~~~~~~~~~…查看更多

尋日又到中環找MC食lunch，原本想去食鵝腸麵，但係因為太多人，改去上次"休息"的那一橦building，唸住試下其他個d餐廳。去到9樓，我哋冇book檯，所以冇得食。最後決定再去"休息"一下......今次去到，佢哋比上一次多咗嘢食，就係台式肉燥飯喇.....咁我就叫咗個"休息秘製碎碎肉汁輕輕燒鮮帶子飯"，很長的一個名字....食物一上檯，wow....點解個size同張相差咁遠，心想呢次一定唔夠飽!個飯雖然細，但肉燥同個汁都好香，好好味。如果可以加多些少肉燥就會好d。兩片帶子個size一般，味道OK!MC就見我上次個"香炸芝士流心雞卷"咁正，就一於番炒，不過今次跟caesar salad。食物到，又wow....沙律少都唔緊要，主菜個幾件雞好細，而且唔可以再叫"流心"，因為d芝士唔再喺d雞入面，而係喺d汁度....本來我都想食少少，試下d味道如何，不過見佢得咁少，都係算啦~~~~~甜品選擇得番2款，就叫了一個"Ugly Chocolate"，今次佢個賣相冇咗上次咁ugly，味道就冇上一次咁甜。都OK!!下一次再幫襯的機會唔大，除非周圍都冇位啦…查看更多

星期六，安排左去西貢浪茄wild camp。星期五為安排食物忙個不停，在openrice內search到partymate，call咗問下料。佢地服務好好，email咗個order list俾我，又會幫我唸埋點保存d食物。因落柯打之前在Jusco買左部份嘢食，所以我咃同partymate只係order咗雞翼+金沙骨。星期六下午我地去partymate攞食物，舗位不大，望入去舗內廚房位置，好整齊及清潔。店員有禮地招呼。呢度賣d嘢一d都唔貴(雪凍咗嘅汽水都係$4)，最後我哋除了買咗雞翼+金沙骨之外，仲買咗牛油栗米。Partymate有6種味道的雞翼，如下：水牛辣雞翼 - 辣味夠，幾好! 酸乳酪雞翼 - 都幾特別! 芥末雞翼 - 幾好味，如果可以加多少少芥末，應該會更好! 蒜蓉黑椒雞翼 - 係咁多種雞翼中，最惹味的! 另外仲有派對伴侶雞翼同埋烤汁雞翼，不過我分唔出！整體來說，雞翼係好好食，價錢合理(＄２８有８隻)，同埋size都幾大隻！另外金沙骨，＄２８有７件，小小的一件，易食，夠味！ 另外仲幫佢地買咗。。。炭(跟炭精) - 炭的價錢和百佳的差不多，但質素非常好，好好燒！ 跟的炭精(其實係一盒pack得好好的火酒糕)亦很好用，店員很細心地為我們講解如何使用！燒烤叉 - 買了7支，但有2支用緊時甩了木柄！玉桂蜜糖 - 好香，好好味!下次我哋再去西貢區BBQ的話，一定會再幫partymate買嘢食，試埋佢其他d食物!!…查看更多

星期日下午，同13二人到了銅鑼灣的THINK hea下，經朋友介紹之下第一次光顧......去之前只知道這裡是一間有書任睇，咖啡任飲的一間樓上Cafe。上到去的第一個印象很好，環境比我想像的好得多，很簡潔，很舒服。有一排長長的書架，書的種類也不少...有小說、散文、投資、政治、文化、旅遊、攝影.....亦有一些雜誌等等。有一些座位於窗邊，可以從19樓望下銅鑼灣的街景。有一些坐bean bag的位，四個座位加一張小桌子，上面放了一套大富翁遊戲。(原來除了睇書之外，亦有其他娛樂!)亦有一部電腦放於一旁，讓客人上網。我們選了置於cafe中間位置的兩張大sofa......一人叫了一杯凍飲(榛子咖啡&愛爾蘭咖啡)，之後就各自各睇書......之後又一人叫了一杯熱飲(桂花茶&朱古力咖啡)，跟住又繼續睇書......這裡的收費雖是每人$50任飲，但飲品的質數亦不差。特別喜愛那一杯熱朱古力咖啡，朱古力味同咖啡味比例完美，正! In conclusion, there is a good place for you to drink and think!…查看更多