susanachacha的个人专页

lunch食左豬扒包餐 配蟹籽沙律+$4有罐可樂Total$42豬扒包好香，個蛋同洋蔥炒得非常之靚，好似炸咁！對一般女仔黎講好夠食，但食量大少少就會覺得個包太細。外賣嚟講，要徒手揸住個包食唔係咁方便，可能要好似漢堡包快餐店咁有張紙包住半個包會好啲。沙律未拌勻，但係個醬好杰，個碗仔又只係啱啱好放滿咗啲菜，令食用時有啲困難。解決方法係食完個包之後，用佢個兜嚟拌沙律。但係沙律應該係前菜嚟㗎嘛？啲菜（青瓜絲同蘿蔔絲）係好新鮮，好食嘅。整體嚟講都唔錯嘅，會再試吓其他食物。…查看更多

首先，我會覺得呢間餐廳係食風味嘅，唔係食個大廚用幾出色嘅烹調方法，而係食啲材料有幾新鮮/Organic，同埋食物嘅配搭設計。其次，亦要知道餐廳係做緊鄉村風味嘅裝修，我當晚係好好天去幾有feel，但如果打風落雨就未必咁舒適。唔好Expect會係高級餐廳咁，至少係乾淨舒服，睇得出佈置有心機同精美嘅。再者，亦係我覺得刺激嘅事情——冇餐牌選擇，第一次食嘅我完全係玩驚喜。仲要我平時食得好簡單普通，好少試新嘢，所以對我黎講每道菜式都有我未食過嘅嘢⋯⋯我亦會好驚啲味道好奇怪，但因為尊重成件事，細食嘅我都竟然做到全部都清碟！食物份量唔多，大胃人嘅可能食唔飽，但女仔一般都會覺得飽。建議揀飲擇食嘅人千祈唔好去試，會浪費左廚師嘅心機，但講真，我覺得全部都食得落肚嘅，冇啲好奇怪嘅味道。非常之利尿嘅飲品，飲左一小杯已經要去兩次廁所。甜甜地，不過聞落有浸青味，我唔算好鐘意，只係飲咗一杯。前菜除咗乳酪之外，上面冇一樣嘢係我食過嘅⋯⋯我算係鼓起勇氣咁食。甘筍係醃過，有酸酸鹹鹹嘅味道幾特別，亦係脆卜卜。牛奶果第一次食。米紙組合分開食會怪怪地，但一啖放哂入口係好食嘅！菜湯係西洋菜湯咁嘅味，但係口感似飲緊西湯。生豆苗第一次食，青青地，要將佢同個湯溝埋先可以減少啲青味。麵包正常。成餐飯我最鍾意係呢個沙律，個汁係熱情果加唔記得咗，咩總之酸酸甜甜好好食！啲菜好新鮮，水果有幾樣我平時都唔會食嘅，但已經唔記得咩名，絕對唔係普通蘋果沙律嗰啲，而係似你去效野集咗唔同嘅水果返嚟做沙律嘅感覺，乜都有少少咁。主菜，薯仔好好食，切片後經過班主唔覺得好有薯仔嘅澱粉味，而係調味後舒服嘅味道。牛油果就咁食我會好驚，但係佢調味之後好食咗好多！除咗青椒入面有朱古力呢個組合令我覺得⋯⋯之外，其他都好好食，本身個青椒都好食，我諗係因為個朱古力太苦。。整體嚟講冇一樣調味我會覺得好鹹。餐飯俾我嘅感覺就係慢慢上菜，慢慢品嚐每一樣材料嘅味道，廚師精心嘅調味。。建議大家唔好摸黑行路入去（雖然今次我哋來回都係行路，因為有黎過幾次嘅人帶路），最好係坐的士去的士走。有車嘅話，一班朋友過嚟與世隔絕咁吹吓水都幾開心，店員都好熱情有禮貌笑容滿面，令人感覺舒服，同埋佢哋都好樂意服務客人咁。。推薦比食素或者唔係食素嘅人。…查看更多

手切牛肉拉腸：牛肉夠淋，份量適中。招牌第一拉腸：味道濃，但係同想像中嘅味道唔同，唔係唔好食，不過唔係好啱我口味。名爐鴨絲拉腸：最鍾意呢個，本身鍾意食鴨，隻鴨都幾香。整體嚟講佢嘅腸粉嘅口感，我覺得似粉果皮多過腸粉皮，佢係有煙靭嘅感覺，而且都幾厚，係幾特別幾好食嘅。甜豉油好食，唔夠可以叫佢再俾。蘿蔔糕：冇乜料，但都幾好食，好淋，唔會有硬粉感，有咬到白蘿蔔蘿但不多。豆漿：正常好飲嘅豆漿，甜度適中。糭：普通嘅綠豆鹹蛋肉糭，咁普遍嘅口感同味道嘅比較下，個價錢係有少少貴嘅。可口可樂：玻璃樽裝懷舊。 我嘅話，唔會再食第二次，雖然特別，但唔係抵食，亦未至於上癮。…查看更多

電話落單外賣自取三個字都未拎得，吹左一陣西北風，但一切都係值得嘅！南瓜粟米粥：好香，南瓜量多，都有一啲大大舊嘅南瓜肉食，粟米量適中，米煮得夠”棉”，整體係好岩我口味，啖啖嘅比例都一樣。鮮牛腸：真係一片片牛肉，好林，我未食過有鮮牛唔un嘅，甚至已經對所有茶記嘅鮮牛失去信心，但佢竟然冇令我失望！腸粉好厚，個豉油好好食，係傳統酒樓嗰種甜豉油。炒麵：油份幾多食落唔會乾，如果冇咁咸會好啲，但炒得幾香，口感很好。蘿蔔糕：係我鐘意嘅口感！就算唔落豉油都夠甜，唔重粉感，啖啖蘿蔔，清甜。不過冇乜其他料，如果鐘意食多料嘅可能會失望，但對我嚟講係優點。生菜：有成個外賣盒嘅份量，啲菜青綠色好靚，唔落醬油都好鮮甜。…查看更多

嚟呢度每次都一定要食菠蘿油，脹卜卜嘅麵包，脆卜卜嘅菠蘿皮，凍冰冰嘅牛油(唔算好厚)。今晚連假晚市有啲手忙腳亂，影響上菜嘅速度:(（平時客唔多上得好快），但唔影響食物嘅質素！叫咗個非常之普通嘅常餐，叉燒意粉火腿奄列菠蘿油，再叫咗個焗雞扒飯。我好欣賞佢個湯底係青紅蘿蔔粟米湯，唔係味精湯，第一次食湯粉會飲晒成碗湯，一滴不留。意粉口感幾好，叉燒好瘦好硬，不過味道夠甜。焗飯等左廿分鐘先到，期間有staff主動行過嚟話幫我哋催下（我個湯意都就黎食完）。不過個飯一上枱，即刻有種「值得等你咁耐」嘅感覺！新鮮出籠香到隔離枱都聞到！面頭係滿滿芝士，熱辣辣嘅泡泡好似仲煮緊咁，啲芝士拉絲架！Staff平均年齡比較後生，服務同態度都幾好，冇「港式茶餐廳」嗰種壓迫感，甚至有笑容，同啲客講下笑添。…查看更多

奉勸大家如果午飯時間想準時拎餐嘅話唔好叫呢間。叫過幾次，係同事推介，大家都話呢間好食，但成日錯單。我好好彩，每次叫餐都冇出錯，亦真心覺得好食，夠飽。價錢唔算好抵食不過中環區算係咁啦，比較係其他外賣算平，而且食物都幾健康，唔會好油好咸。不過最不滿嘅係佢嘅取餐時間，即使已經預早比訂單，都不會在預計時間內得到餐點。去到門口排長龍就知咩事，聽到大家都係用唔同嘅app落單，但依然係企哂係門外等。我有經驗已經係比預期時間遲15分鐘到，最後係足足遲左24分鐘。如果份餐一早整好左放係到唔拎，又會凍哂。教我可以點係有限嘅lunchtime 食到熱辣辣嘅腸粉呢？…查看更多

好多年冇寫過食評今日突然之間寫返係因為真係有感而發！唔明點解8:30九點間餐廳其實唔算多客，得嗰幾台客，都可以做到手忙腳亂⋯⋯單又亂，拎住碟嘢食周圍問係邊個嘅😅(疫情啊大佬，個個唔戴口罩認你碟嘢都食咗10個客嘅口水啦)我地食完個海南雞飯，個船麵都未到！淨係喺度話整緊啦～整緊個湯⋯⋯🥲隔離枱有對情侶食晒成枱野個小食都仲未到於是取消咗張單，後面張枱有兩個飯未到一直催單，到左嗰樣都就快食完⋯⋯我哋都有少少想棄單。仲聽到店員喺度話啲外賣單要做左先⋯⋯咁即係坐係到嗰啲客反而冇咁重要？（做唔切又接咁多單）講番食物，價錢對食物質素黎講真係好抵！因為我哋叫嘅四樣都真係好飲好食，雖然等到燥左，都下到少少火。泰式凍檸茶：用青檸取代檸檬，個味好特別，有少少似酸梅湯味，幾好飲。海南雞飯：個飯底本身夠味(但未加汁之前會有少少dry)，雞好滑，切得好細條好易入口。泰式水門醬好香少少辣，唔食得辣嘅人應該都食到，岩我。船麵：個湯好濃，個金邊粉好有咬口，啲雞絲好林唔會乾爭爭，好足料！入面有好多唔知係乜嘢嘅料🤣🤣好新奇。大大個椰青：話唔甜唔收錢，都好難會唔洗比錢，清甜到呢⋯⋯啲肉仲好嫩滑。但唔開心嘅係明明見佢揸住個椰青，點知話要等師傅開咗等咗超過5～10分鐘⋯⋯唉！不過走嗰陣時成個口都係椰青味都幾滿足～…查看更多

星期五晚9點冇乜人，極速上菜。豬潤米線：$56個湯好好飲，一邊食一邊飲湯完全覺得唔夠湯!!最重要佢唔咸，飲到底都唔覺得口喝。米線好彈牙，好滑。不過份量好似有啲少？我算細食，但都真係唔太夠食⋯⋯豬潤係招牌菜，碗入面大小共6塊，中薄一片，顏色淡淡幾靚，食落係爽口的，冇苦味，有豬潤香但唔算濃。我自己比較鐘意厚肉粉感香香的豬潤，同桌覺得好正好好食，仲讚到佢可以媲美鵝肝⋯⋯口水雞：（食落算中小辣？）我唔算好食得辣都食到，有麻味。我覺得最好係啲雞好少骨，啖啖肉，雞皮薄冇咩脂肪，不過肉質唔算滑。半隻雞都幾細，得幾舊就$78⋯⋯白飯仲要另加$10 好細一碗咋，口感有點硬。冰室feel但收茶位錢$2位 平過收加一嘅，有主動添茶以呢個價錢來講唔算好特別，如果鍾意飲湯都可以過嚟試吓。…查看更多

聽說是朋友的男朋友的朋友的女朋友和朋友夾份開的店⋯⋯簡單來說是一對年輕女孩的店朋友說來過幾次，喜歡這兒的環境安靜，我覺得佈置裝潢都不錯，適合打卡。有bar枱，有小圓枱，近外面有大落地玻璃 座位光線充足，裡面一點就暗些，有少許燈光點綴，浪漫些？Tea time沒什麼人，的確是安靜的，聊天不錯。 熱朱古力是朋友叫的，超級香！我點了一壺茶，茶壺容量不大，喝完可以再添熱水重泡。茶包很濃，茶很香，建議泡幾分鐘就要拿走茶包，不然茶會變苦（我就是忘了拿走茶包⋯⋯）最低消費每人一杯飲料，食物不計，消費不便宜，買的是環境和氣氛。…查看更多

本身唔諗住食嘢，但係經過呢條韓國街咁多餐廳，又有少少餓，就想搵間食個紫菜包飯。有幾間好細，裝修冇咁靚嘅店，但係間鋪太細唔敢入去，呢間舖大啲，人又多少少就入去坐。單點一個紫菜包飯$50，冇+1服務費，坐低就即刻有暖水飲（大部份韓國餐廳都係比凍水你），仲有兩碗配菜～泡菜唔算好辣，亦冇酸酸的味，爽口，好啱我食。芽菜鹹鹹地，好爽脆。紫菜包飯（牛肉味），份量合理，雖然唔係特別抵食，但性價比都算唔錯。每舊飯都切得好薄，易入口。味道都Ok，牛肉某一兩舊有少少un口，不大問題。仲有湯飲～不過我冇飲到。…查看更多

第二次嚟食，都係食日頭，但點解冇左我最想食嘅鰻魚炒飯嘅😭😭Lunch time 得set，朋友都推介拉麵，就試下啦。餐有沙律。我食柚子肉丸拉麵，湯好香好好飲！不過好似冇乜柚子味，連柚子肉都淨係得皮嘅苦味冇甜味⋯⋯比我之前食評另一間柚子拉麵淡。湯食食下會愈來愈咸，不過都係可接受範圍內。肉丸幾好味，食到肉嘅甜。朋友食雞腿拉麵，個湯好深色以為會好咸，但其實同我個碗差不多。另外小食的話，炸雞塊會好食過豬肉飯團。雞肉塊食落去唔算太油膩，飯團入面個飯冇味，不過外面的豬肉有燒汁，要平均分嚟一齊食先好味。杯茶都幾好飲，我壺幾特別。…查看更多

餐廳裝潢很漂亮～用海洋、船做主題，都幾match青衣城。Tea time 食甜品set，一份食物 一杯飲料。朱古力栗子忌廉班戟栗子味cream很淡，但都食得出香，係甜味不多。班戟口感比較實，唔算特別有班戟香，個人比較鐘意鬆軟嘅pancake，這個算是不過不失。如果冇朱古力醬，應該就真係冇甜味⋯⋯鐵板布朗尼配雲尼拿雪糕個pan燒到熱哂，有一瓶熱奶比你倒落去，吱吱聲效果幾得意。這款布朗尼蛋糕是軟身的（以前吃過的都是硬的）都幾特別嘅～朱古力味夠濃，很甜，好吃，但食哂一舊會覺得太甜。旁邊兩條蕉別有用心，上面有片焦糖，是脆的！nice！蜜桃烏龍茶 & 玫瑰茉莉花茶兩壺茶都好香，不過飲落就沒什麼特別的味道～就是茶味跟茶味～玫瑰茉莉花個杯香啲，一路傾計一路飲住都幾舒服，同埋都幾大壺，飲完拿拿臨埋單去廁所⋯⋯…查看更多

9點黎到已經冇哂人，坐卡位，裝潢好靚好有心機，好有舊香港味道。唔好以為裝潢靚就一定好貴，我係望完對面街間茶記個餐牌先過黎，嗰間冇乜裝潢睇落都唔好坐但嘢食就貴過呢間5-10蚊。$18 好抵食，個飽脹卜卜，包面啲芝麻好香，蕃茄同菜絲都好新鮮（個人喜歡菜絲多過一大塊菜），腸仔塊皮脆，係個沙津醬冇咩特別但都唔差。五香肉丁湯意粉$33（食食下先記得影）去到9點其實已經乜粉都賣哂，冇選擇之下揀左意粉，估唔到又幾好食！意粉軟硬度口感非常好，成個湯都好香，仲有大大舊肉丁～小食叫左個雞翼薯條，雞翼脹卜卜，塊皮唔厚，炸得好香好脆，裏面的雞肉滑滑的～粗薯條都好香，條條都好靚仔，隔離嘅配菜沙律都唔馬虎，菜同蕃茄都好新鮮好靚，又多沙津汁，我清哂啲菜！人少少，上菜速度非常快，食到九點半左右已經冇晒其他客，我哋食完就走，俾錢嗰陣老闆就話我地唔洗食得咁急，坐多陣都得唔趕住收工好nice呀～推介…查看更多

突然想食炸雞同石鍋飯，Open rice一下就搵到呢間香港大學站嘅韓式料理餐廳～除非open rice或住附近，如果唔係都唔會行過呢到發現有間炸雞店⋯⋯亦唔知係咪因爲啲人節日出哂人山人海嘅地方趁熱鬧，呢間店7.30晚餐時間竟然得一枱客？食物選擇都正常，價錢唔貴唔平。我哋唔算好肚餓，亦唔想淨係食雞，所以冇叫大大份嘅韓式炸雞，叫咗個今晚最想食嘅石鍋飯同一個炸雞小食，呢兩個組合係最抵。本身冇諗住寫食評所以冇影未食嘅相，我覺得石鍋飯最緊要係有飯焦，其他配料嘅味道當然都好重要，而我覺得呢間係做到我嘅要求。我食過完全冇飯焦嘅石鍋飯，亦食過飯焦太多多過啲飯每一啖都係飯焦嘅石鍋飯，而呢個就比例啱啱好，呢個天氣食到最後都仲熱辣辣！配料嘅味道都唔錯，蘿蔔絲切到每一條都好幼，每樣配料嘅份量都好平均。炸雞呢個價錢我覺得做到唔錯嘅性價比。呢個蜜糖醬油唔算好濃味，我睇相估到佢冇乜醬所以叫咗一個$12嘅醬黎點就岩岩好，果皮整得幾好食唔會太干，雞肉都幾滑有肉汁。如果食貴少少全隻雞個啲款應該會多醬，但係至少就咁都好食過KFC好多好多。呢個係韓式甜醬，不辣。卡位隔離幅牆幾特別，應該係比客人喺上面畫畫。我估佢平日係做大學生生意，希望佢唔會因為太少客而做唔住，第日想近近地屋企附近搵韓國餐廳食都會返嚟，所以幫佢寫返個食評加油啊！Btw呢間淨係收現金。…查看更多

平時因為寫食評所以相機食先，今次完全冇諗過一碗$22嘅河粉都要寫食評，但食食吓覺得太好味所以要影相！首先我冇留意佢幾多錢一碗，純粹想搵個地方快快脆脆醫肚，直到我食到一半發現又真係幾好味嘅時候再望吓張單，$44？係一碗？兩碗？寫漏咗一個價錢？我自己叫咗普通嘅雲呑河粉，同行叫左碗豬肉丸河粉（我筷子夾住左粒豬肉丸）。其實係想讚佢嘅河粉做得好好，口感好讚，同埋呢個價錢真係好抵食。雖然佢嘅雲吞同湯底唔算好特別，不過豬肉丸都幾香幾好味，呢個河粉一個星期食幾次當午飯都冇問題。而且佢哋上菜上得好快，坐低冇5分鐘就已經食得。…查看更多