陳之友的个人专页

住在荃灣，久唔久就會到牛県大快朵頤，相比其他石燒牛店，牛県更著重不同部位牛扒嘅分別，而非一味sell和牛。亦因為牛県，小弟都學多咗有關牛肉嘅知識。早排亦有去再食牛県，果次叫嘅係是日special 300g 牛扒。先上沙律，新鮮蕃茄配上柚子醋，酸甜醒胃，亦為一陣嘅牛扒打好底。再來係西蘭花湯，老實說並不出色，湯並未能釋出西蘭花獨有香味，反而加上香草後增強咗其草青苦澀味道。平時嘅西湯並唔會出現依種情況，應該只係當晚失手。其後主角石燒牛登場，一上枱，牛扒油脂香撲鼻而來，食落牛肉味濃郁，而且亦不斷有散發油香。想更有咬口，可以順紋切；如想食腍身牛肉，逆紋切則更理想。我就較愛逆紋切。配上有飯素嘅珍珠米飯，十分匹配。講開又講，每次諗點樣切割牛扒，都算係我食石燒牛時個人嘅小樂趣。😂美中不足嘅係燒耐咗牛扒底部會過熟變硬。同時，牛扒太厚，以致離石板較遠嘅牛肉會有點過生，做成生熟不均嘅情況。不過我諗依個係石燒牛店嘅通病。配上石燒牛，白飯都可以整多兩碗！…查看更多

早排連續四日紅日，冇得去下旅行，一於去下郊外散心。一行人去咗東龍島，景色宜人，而且有種primitive嘅感覺，似去咗侏羅紀公園咁。但島上景點太多，一日其實行唔晒。東龍島嘅遊歷就唔多講啦。主要講下食咗乜。今次去咗兩間士多，其中一間係假日士多。假日士多位於營地附近，感覺好似古代嘅驛站😂因為由士多出發有三條路揀，分別會去唔同嘅地方。見當時冇乜人，我地決定坐低食個早餐同plan行程。老闆娘話連續幾日紅日，水餃已經賣晒😭於是我地叫咗其餘嘅餸，分別係餐蛋麵、餐肉紅腸麵同餐肉魚片麵。餐肉煎得好出色呀，係傳統有肉粒果隻餐肉，脆邊香口，唔係一早煎定放上去嘅。公仔麵彈牙，食耐咗都冇糊到，我地覺得同出前一丁有得揮（後來影士多其中一張相影到‘公仔麵 原味冬菜’，我地估應該係果隻麵底）！朋友比咗塊紅腸我試，同樣煎得香口，又估唔到幾夾個麵。東龍島上食嘅餐蛋麵令我諗起以前響蒲台島食嘅紫菜餐蛋麵，兩者同樣出色。莫非響島上食餐蛋麵特別有feel？😂飲品方面，我地叫咗綠豆冰同凍檸賓。比起紅豆冰，其實我更鍾意綠豆冰，綠豆有起沙，消暑解渴。凍檸賓係朋友叫嘅，所以我冇試到。三文治唔特別，普通冇烘底，所以唔多講。食完之後大家亦plan好行程，整理好架生就正式出發！P.S.: 原來只係朝早少人，新船到達加上露營人士陸續出返嚟，晏晝出返嚟時士多已經座無虛席。…查看更多

因為拎月餅，所以出咗旺角一轉。發現麵麵依間餐廳專做魚烏冬。香港近排出咗好多新奇烏冬，早排有白布烏冬，緐家又有魚烏冬，可以講烏冬都算香港人四大麵食之一。今次叫咗日式叉燒魚烏冬，試試後發現相當唔錯呀！魚烏冬非常彈牙，而且魚湯味濃，同荃灣某魚湯餐廳有得揮。肉就係日式叉燒，配上煎蛋絲同紫茶。凍檸茶亦都相當唔錯，用新鮮檸檬沖，唔似出面茶記咁得個死甜。美中不足嘅係，前菜同叉燒好普通，冇乜特別。如果配菜都做得好嘅話，咁就perfect。…查看更多

和女友慶祝周年記念，當然要找一間浪漫餐廳，故找了擁有無敵海景的Aqua。蒲進門，一整片維多利亞港映入眼簾。不誇張，整片落地玻璃把對岸的灣仔吸了進來，其震撼程度不下於乘山頂纜車時所看到的維港景色。 在近一小時的打卡參觀賞景後，待應正式上菜。Aqua擁有地利，佈置亦十分出色。可惜的是，雖然Aqua主打意日fusion菜，食物卻無甚驚喜。我們這次點的是Golden Ticket Dinner Set。Baton ebi, salmon and hamachi sashimi ＋ Spicy negitoro with cucumber roll先上的是刺身，包括牡丹蝦，三文魚，油甘魚和辣拖羅青瓜卷。刺身尚算鮮美，個人愛吃拖羅，所以對於拖羅卷毫無抵抗力，配上青瓜，亦多少減去刺身的肥膩感，可以說為這餐打開不錯的序幕。Italian antipasto platter + Burrata Sorrento style with selection cold cuts and roasted vegetables再來是意式火腿拼盤和烤茄子。當中個人十分喜愛Burrata芝士，芝士味淡，能很好的配合鹹香的火腿。然而，再為冷盤，火腿的份量過多，吃畢已有半飽的狀態。更大的問題是，之後的主菜分量太少，黯然失色。Zucchini flowers, mozzarella cheese and mini tomato with green chili yuzu stock天婦羅拼盤包括青瓜花、mozzerella cheese、青椒和車厘茄，無特別，我們甚至認為鮨千壽比它更好。另一方面，天婦羅和火腿拼盤同一時間上菜，但兩者無大關係，天婦羅放太久後亦有點變腍。Black squid ink risotto with octopus and salicornia + Homemade tagliolini with champagne and sage sauce, macadamia and caviar第一款主食是墨汁意大利飯配八瓜魚和手打意粉。意大利飯調味好，八瓜魚亦煮得彈牙而不韌。我對手打意粉十分期待，然而，雖吃得出是手打，卻不算彈牙。題外話，我在香港吃過的手打意粉有Pici和屏山的雄記，均十分出色。BBQ store-grilled beef tenderloin with sour soy sauce + Grilled tiger prawns with blood orange vinaigrette主菜是石燒牛肉和燒虎蝦。牛肉味道普通，跟外面吃的石燒牛差別不大。但普通的牛肉只有四塊則顯得既不矜貴，量也不足。虎蝦亦一樣，不算彈牙又只有一隻。主菜本為整個晚餐的高潮所在，這份主菜卻帶動不起我的情緒，有一刻我甚至想﹕「下？咁就完咗啦？」Signature aqua desset platter最後是甜品拼盤，當中Brownie很好，充滿朱古力，但跟之前的問題一樣，甜品份量太多，比主菜更似主菜。總括而言，這次Golden Ticket Set的食物無甚驚喜，食物配搭上，比起餐廳聲稱的意日Fusion，它更像意日大雜燴。最大問題是，食物份量分佈不均，前菜甜品太多，主菜太少。不過，望著維港的景色，任何食物都會加分。如果是為了打卡，我認為Aqua絕對值得一去，畢竟去餐廳用膳，為的不只少味道，還有整體的感受。我在Aqua整體的感受是良好的。…查看更多

「客室涼夏闊，遠山入庭來」～一進門就見到依句俳語。當然，香港租貴，所以室既不闊，亦無遠山入景。但正如好多久未回鄉嘅香港人一樣，入去Sukiyaki Mori Kyuu，望下日式裝潢，多少可以解解鄉愁。響香港，食壽喜燒嘅店唔多，我暫時食過3間壽喜燒店。第一間係Hana華小料理屋，第二間係日山，Sukiyaki Mori Kyuu，久聞大名，唔少人食過都讚好。今次終於有幸一試。Mori煮法似關西風。所謂關東風關西風，分別在於落調好嘅汁先定煎牛肉先。不過咩風都唔打緊，好食就得。叫咗一豬一牛。師傅自己都話：「其實豬肉點都唔夠牛肉好食，因為要全熟。」所以我都唔多講啦，大家鍾意可以一戰。牛肉嚟講，我食過嘅三間店Mori最花心機，一個set入面有4款部位，包括肉眼、西冷、肩膀兩款，共4大塊。連埋前菜飯甜品，其實好夠飽。我個人最鍾意西冷，油脂最合適，亦最稔。好多人都會講嘅和牛蛋飯，其實唔錯。不過前面啲肉太好食，相對而言佢放響set嘅尾聲，似係為咗填飽個肚。話說明治剛開始維新時，大力鼓吹人民食肉。但係深受佛教文化影響嘅日本人係好抗拒。聽聞啲日本人食壽喜燒果陣仲會響客廳同佛堂貼上「遮掩紙」掩人耳目。不過咁大陣味，邊遮到呀。Anyway，當時嘅日本人見到今日壽喜燒店開到嚟香港，仲要係中上環地段嘅中高級餐廳，唔知又有咩感受呢？…查看更多