小妹最為食的个人专页

今日同朋友去到左葵涌廣場「掃街」，向來都知葵涌廣場好多隱生小店，點知真係比我搵到呢間「不toast不快」，佢嘅位置係三樓top世界美食區，都好容易搵到，咁啱又可以懲罰下黃店🤩💛今日平日嚟佢地都幾多客下，都好多人嚟食，睇到佢地咁多客就知道有幾好食🤤.咁我叫左個煙鴨胸芝士流心蛋吐司，咁佢係即叫即整，所以都要等下15分鐘，呢段時間都可以試下其他小店先😆.啱啱拎到上手個吐司仲熱辣辣，要快啲趁熱食先好食😋，個吐司好足料，入面都有三件煙鴨胸，外面個層都烘焙到微微脆，同埋突顯到佢好香牛油味❤️入面個蛋好滑，整得啱啱好。另外食到底有少少芝士拉絲同椰菜，所以整體食落去都唔會覺得好膩😆下次有機會再落葵廣會再黎食，一個吐司已經夠曬食~…查看更多

大家一提起葵涌廣場第一時間就會諗到係「掃街」，咁我今日搵到一間隱生小店，佢嘅位置可能好少比人留意到，咁見佢又係黃店所以就幫襯下💛佢嘅味道真係令我好驚喜，呢間我飲完第一次之後，我誇張啲講句呢間我覺得係葵廣最好飲嘅一間飲品店🤩.我就叫左兩杯飲品。芝士巧濃朱古力$34，價錢同出面奶茶店差唔多，但呢杯我覺得值得呢個價，上面奶蓋仲有少少朱古力粉，芝士味都好濃郁，咸度啱啱好， 好少有啲小店整到個奶蓋咁好飲🤤，另外朱古力味都好濃，甜度啱啱好，呢杯真心推介👍🏻.泡沫鮮奶茶$22+$6寒天晶球，呢款我嗌左少甜，甜度啱啱好，奶味重，一飲就知道唔係用奶粉沖出黎嘅，呢款奶茶我覺得都幾特別，令人回味無窮🤤，推介推介👍🏻…查看更多

咁啱今日係長沙灣做完野又到lunch time了，梗係要搵個地方吃下野🤤咁我一眼就睇中左呢間餐廳， 一方面係想支持黃店，另一方面睇中個價錢都比其他西式餐廳便宜，咁唔知食物質素如何呢😋.咁我就叫左個卡邦尼意粉$68，另外加多$15有一杯士多啤梨冰沙。個卡邦尼意粉醬汁濃郁又好Creamy，意粉好掛汁，入面啲野菌分量超級多，估唔到咁嘅價個意粉都有咁多野菌。另外個士多啤梨冰沙大杯到就黎要溢出黎咁，個味道又唔會好似人工甜咁，係真係用士多啤梨粒整出黎😋另外叫左個黑松露薯條，啱啱炸起好香脆❤️黑松露醬好正，食到停唔到口🤤.餐廳嘅地址相近地鐵站，所以好方便😆，另外餐廳仲播住啲音樂，成個環境感覺好舒適。食物質素可以講係物超所值，又平又正😋…查看更多

而家開始多左同朋友夜晚食飯聚會，我地個個都好耐無見，我地就約左去食台灣菜~皮蛋豆腐涼拌皮蛋豆腐岩哂而家熱辣辣嘅天氣食，開胃又消暑，豆腐有好濃郁嘅豆味，加埋皮蛋，味道豐富又好味! 擔擔麵配香炸雞扒雞扒係即叫即炸，擔擔麵有香濃嘅花生味，食慾大增~ 入口仲有微微香辣味，而麵質好滑好順口。配上香炸雞扒真係一絕，我就鍾意啲雞扒浸上擔擔麵湯底，惹味十足，所以話擔擔麵係必食架~左宗棠雞食落會有少少辣，加埋鹹鹹甜甜，味道層次非常豐富，呢道菜送飯一流!!! 雞球香炸後再上醬汁，雞球KEEP住肉質嫩滑，極多肉汁。珍珠奶茶同凍豆漿我就叫左杯熱珍珠奶茶，好滑好香茶味，珍珠軟淋淋，好煙韌，味道唔會好甜，好易入口好順滑。食到好飽好滿足，每款都好好食，下次再帶朋友黎食先~…查看更多

放左工之後就同同事去左公司附近食埋晚飯先番屋企，我地想試下呢間拉麵店，都好多人食，有哂信心保證咁~鯖魚湯香菇野菜海蝦拉麵拉麵有三大隻海蝦，味道好濃郁，肉質好彈牙同鮮甜，拉麵係香菇野菜湯底，入口清甜，同一般傳統拉麵湯底不同，但都係好好味，如果食慣左傳統拉麵豬骨湯底，想清新一下，都可以一試呢款拉麵，我就覺得好好味~Ramen Cubism 特級白湯好大碗，仲有好多豚肉片，份量絕對夠哂足料，男仔食都會覺得飽~湯底用左大量豬骨熬製，入口就感覺到味道好濃郁又唔會好油膩，拉麵好彈牙，掛湯能力幾好，啖啖麵都充滿住豚骨味香炸雞軟骨餃子餃子即叫即炸，點上沙律醬，好開胃又中和番炸物嘅油膩感，餃子入面包住左肉碎外仲有一粒粒嘅雞軟骨，口感好豐富，又令味道多左一份鮮香，我同朋友都好鍾意食~放工過黎坐低食餐飯減下壓都幾好~…查看更多

經人介紹先發現原來利舞臺上面有一間咁靚嘅酒樓，樓底非常高，裝潢好華麗，以紫色為主。見到裝潢咁華麗，以為食物價錢會好貴啦，但係又唔係喎，價錢好合理，午市點心仲有好多選擇。食咗一碟網腸腸粉，口感好得意，係脆卜卜架，腸粉入面包住煙煙韌韌嘅野，同時又有炸到脆卜卜嘅脆片，加埋一齊食口感好豐富，但由於佢本身無咩味，所以要點豉油食。另外仲有最愛食嘅蝦餃，入面原來有黑松露！未食已經聞到好香啦，咬開發現入面啲蝦仲好大粒，餡料好豐富，成粒蝦餃係好實淨架。…查看更多

用得嚟做店名嘅小籠包果然有質素，一夾起係，皮係薄到可以見到入面有好多湯同餡。個皮好薄好滑，最重要係有湯阿！湯簡直係小籠包嘅靈魂，有湯汁絕對係昇華咗，我覺得好食過鼎xx，價錢仲相宜好多。另外令我驚喜嘅就係清燉獅子頭，以往食嘅獅子頭都會好乾好難入口，但係呢度嘅獅子頭除咗有上湯可以一齊食之外，肉質非常滑嫩，完全無食緊一粒大魚蛋好求其嘅感覺。入面仲有竹笙，連湯同獅子頭三樣一齊食，非常豐富，上湯都好出色，帶出獅子頭嘅鮮味。就咁睇店舖位置好似好遠，但係店出面有電車站，喺銅鑼灣行完街搭電車過嚟，一落車就到好方便。…查看更多

入座後店員會介紹唔同餐，又會推介好味醬汁同問我地需唔需要幫手燒（因為我地揀左海鮮餐）店內壞境都唔錯，可能係馬鞍山商場，店鋪又比較偏僻，食客都唔算好多，依家疫情都算食得安心。（店內亦要求客人出去拎配菜甜品要戴口罩）我地兩個人叫左一個海鮮餐，夠曬食！海鮮就不過不失，肉類就好好味😋😋自助bar嘅蔬菜、丸類、小食選擇都幾多！飲品方面有幾款汽水、茶。甜品都好多，仲有得食雪糕tim！值得再去👍🏻👍🏻…查看更多

銅鑼灣真係好多手搖飲品店阿，但係以我飲過咁多芋頭鮮奶嚟講，珍煮丹真係最好飲！佢地嘅芋頭鮮奶係用黑糖調味，唔會另外落白糖嗰啲，即刻感覺好天然先啦，入面奶同芋頭嘅比例啱啱好。有啲唔好飲嘅係會勁多芋頭！飲都飲唔到！但係！珍煮丹呢杯絕對唔會！飲嘅時候係會覺得仲飲緊一杯野，唔係淨係食一杯芋頭。d芋頭大小啱啱好，一啖飲落好多芋頭好好咬阿，好香阿！真係好鐘意飲！除咗奶類之外，我覺得有時熱熱地飲杯佢地嘅花茶，清清淡淡都唔錯阿，好解渴，個人都即時無咁熱。…查看更多

雖然喜相逢係好古色古香嘅裝修，但係原來裏面中西菜都有得食，好有趣。今次試咗好多人推介嘅湯餃，感覺不錯。試咗2款湯餃，2款都係好多餡料，皮都夠薄而且滑，食得出係自已搓嘅皮。唔小心叫咗個辣嘅湯底，不過出乎意料之外係我接受到嘅辣，本來以為川菜嘅辣係會辣到飛天。個湯底除咗辣之外仲有啲酸味，飲落有少少麻，係唔食得辣嘅人都接受到。即使係麻辣湯底，都唔會油膩，好好飲。另外推仲水晶皮蛋，好滑好彈牙，同其他店嗰啲尖椒皮蛋完全唔一樣，呢個好食非常多，又不失麻辣香。…查看更多

朋友推介嚟呢度食飯，因為有落地大窗可以睇景，裝修都有格調，最重要係半fine dine，即係食物高級但係價錢又唔貴！叫咗個set dinner，首先令我驚喜嘅係餐湯，係南瓜湯！我嘅最愛！濃稠係啱啱好，唔會飲完飽到食唔到野。勁濃南瓜味！又滑又香又甜。然後慢煮豬腩肉伴西梅燒汁，慢煮過嘅肉的確好軟熟，加埋酸酸甜甜嘅西梅汁，食完唔會覺得油膩/濟，唔錯嘅配搭。另外叫咗個帶子rissoto，飯偏軟，不過都有rissoto應有嘅口感，除咗大大粒帶子，飯中仲有蟹肉碎！好抵食！最後嘅甜品比較特別嘅係蜜柑mousse cake，少少清新酸味作完結，唔會濟😀…查看更多

高質懷舊美食裝修好懷舊，但係令人坐得好舒服，座位空間好足夠，好適合打卡。令我最深刻嘅係燒味雙拼，我揀咗燒腩仔同燒鵝，燒腩仔係勁脆勁脆勁脆！又唔油膩，食到停唔到！另外試咗失傳懷舊椒鹽豬扒，的確同平時食嘅椒鹽豬扒唔同，因為佢唔係炸嘅，唔會好厚粉，係炒到脆卜卜，同時肉質仲好鮮嫩，一咬就分開，唔會咬極都食唔到。甜品同燉湯都好有水準，雪蓮子蟲草花燉竹絲雞湯，非常足料，夠火候，雞肉燉到好軟熟，飲得出係老火燉湯！好補阿！甜品試咗黑糖蜂蜜糕，煙煙unun，唔會太甜，同埋口感好特別。…查看更多

文藝茶飲俾佢嘅水墨風吸引咗，就同朋友買咗杯試下，除咗飲品仲有蛋糕可以堂食。好多款飲品都好特別，外型全部都係水墨畫風，好有氣勢同文藝味湧晒出嚟。麻糬芋泥鮮奶綠，雖然飲完好飽，但係覺得好抵！一杯有齊人氣嘅元素！唔會過甜或過淡，芋泥唔會「杰」到啜唔到上嚟，3樣加埋一齊原來係好夾！另外啲麻糬好好咬阿！好正！另外呢度嘅蛋糕原來係日本直送嘅！好新鮮！我食嘅係抹茶蒙布朗，上面係抹茶cream，而入面係好鬆軟嘅海綿蛋糕。其他蛋糕外型都好特別，值得一試！…查看更多

有feel！精緻居酒屋木戶其實空間唔算大，但係一入去覺得好精緻，座位都好舒服，有卡位同吧枱位，兩者都可以睇到日本師傅鐵板燒。呢度好多特色嘅食物，其中前菜同串燒最令我深刻。前菜我同朋友食咗2款，第一款係福岡水果蕃茄，係冰鎮生蕃茄，係非常甜同好多汁！無咗蕃茄難入口嗰陣青味，好似食緊水果咁！唔係蔬菜！另一款係木戶自家製蟹味增配鮮雜菜條，一上枱蟹味增嘅香氣撲鼻而來，因為入面有好多好多蟹膏！稍稍煮熱後用嚟點雜菜條食會好鮮味，雜菜條都好脆好新鮮。串燒類別最推介嘅係自家製雞肉丸配黃金蛋，啖啖結實嘅雞肉！最後仲有一個好特別嘅咖喱肉醬烤秋田飯團，外層脆卜卜，入面好煙un ！十分推介大家嚟木戶試各款特色日本美食。…查看更多

一早已經聽過重慶大廈咖哩既大名，所以今次過黎就諗住試下正宗既咖哩🤤睇左一輪就㨂左哩間7E咖哩王，入到去我同朋友就㨂左2個菜share食，我叫左個燒雞，朋友叫左個芝士薄餅同香料雞，另外再加多杯Mango lassi上菜都好快，我同朋友叫左一陣就已經上左個芝士薄餅同香料雞個薄餅本身幾有芝士味，但唔會好膩，加埋香料雞d醬汁，食落勁夾又惹味個香料雞d雞肉又嫩，真係好正至於個燒雞都好香口，食落又唔係熱到食唔到，又辣辣地咁，好開胃，我自己覺得連埋芝士薄餅咁連住食都好正！個芒果lassi飲落好夠芒果味但唔太甜，就算之後d冰溶左都唔會話好淡，有時食燒雞食到辣辣地，飲番啖解辣都真係唔錯總括黎講食物質素都好好，晚市黎食都唔算好貴，份量都唔會太大，2個女仔食岩岩好，性價比唔錯，我自己黎講一定會再黎食！…查看更多