ivanamen的个人专页

為咗呢碗崩沙腩伊，特登喺舖頭開門前早1小時嚟，估唔到可以排到第一位😆 值唔值得？我覺得絕對值得。可以話係我食過最好味嘅崩沙腩之一！兩塊牛筋膜包裹著嫩滑濃味的牛肉，咬下去時，筋膜的彈性與肉質的鮮美交織出多重滋味，加上湯頭濃郁，搭配彈牙的伊麵，每一口都是無與倫比的享受。而且崩沙腩每日僅限三至五碗，坐我對面嘅師兄排第五都食唔到，唯有眼甘甘睇住我食，所以大家想食崩沙腩就要早啲嚟排隊喇。我係睇咗老闆嘅故事先至嚟食，本來想搵老闆影張相，但係夥計話佢太忙，唯有等下次。…查看更多

初嘗嘉多娜新開甜品店，個開心果雪糕好得，味道濃郁，唔會死甜，質感厚實，仲跟埋脆餅。個人覺得如果可以有埋其他Toppings選擇，例如Mochi就更正！而且份量亦都偏少。大食嘅可能要叫兩杯。整體而言，呢個開心果雪糕都可以係話我食過嘅三甲之內，另外兩間就係大埔嘅皇甘粟同埋觀塘嘅Ganto。除咗雪糕之外，現場見到啲蛋糕同切餅都好吸引而且唔算貴，下次一定要試埋，首選一定係開心果巴斯克蛋糕！不過呢個店舖位置真係有啲隔涉，喺旺角行過嚟都要10幾分鐘。…查看更多

疫情下希望食啲好嘢，特登約了另一半嚟銅鑼灣据扒。搜尋OpenRice下搵到呢一間名列前茅的扒房。我們滿心帶着期待，點知食完之後完全失望！牛扒是炭燒的，但炭味掩蓋肉味，好多筋，叫咗五成熟但出來嘅感覺都有點overcooked。另一半叫咗吞拿魚扒，點知更加伏，點講好呢？呢份吞拿魚肉熟咗之後嘅味道就好似食緊豬扒，完全冇咗魚嘅鮮味同囗感。唯一值得讚的係帶子沙律，但價錢都唔平！環境方面，佢啲枱都set到好迫，同隔離枱嘅距離唔夠一米。疫情下呢個setting真係唔太理想。總括來講，性價比好低，不值得專登去食！…查看更多

年初二和家人去了三德食齋菜。由於是吃午餐，先嘗了幾道點心，包括燒賣、腸粉和飽，質素普通。太太選了一道我喜歡吃的菜--蟲草花蛋白素翅。蛋白非常嫩滑，能夠媲美上海菜館吃到的賽螃蟹，加上素火腿和素翅與及蟲草花，味道配合得天衣無縫，而且口感豐富、賣相好看，值得推薦！三色椒磨菇魚豆腐本身選呢個餸係因為覺得比較健康，點知上枱嘅時候就發現比較油膩。荷葉飯就是把米飯放在迷你的蒸籠裡，以荷葉包裹，讓米飯充份吸收荷葉的香味，加上芋頭粒和素肉，所以一點也不油膩，感覺十分健康，不過整體而言，口味偏向清淡，唔夠香。乾燒伊麵小朋友最鍾意食伊麵，而呢度都煑得算OK。整體而言質素只屬普通，不過以午餐價錢來説就偏貴，四人埋單要500元。…查看更多

平成二十二放題提供八張食物點餐紙，款式唔算好多，但我認為最緊要係食物質素。先嘗的是小吃，芝麻涼拌蕃茄，剛好可以在餐前洗擦味蕾。納豆青瓜感覺新鮮，味道配搭得宜，十分開胃。串燒方面，我選了三款包括蝦、手羽先（雞翼）與及羊架，三樣都燒得好香，火喉掌握得恰到好處，又唔會濃，盡顯大廚了得的廚藝。然後是品嚐店方每個月為客人送上的「見面禮」，四位以上送即蒸海鮮，包括車厘蜆、大元貝、龍躉片和鮑魚。全部都好新鮮、爽口彈牙，特別讚的是龍躉片。真係未食放題已經好impressed。食完啲熱野暖胃，就放心飽嘗魚生了。日式放題的主角一定是刺身，有十多款選擇，貴價的巨蝦刺身是平成的招牌，蝦身爽甜彈牙，並以冰鎮方法保持溫度；另一推介是帶子，肉厚鮮甜，食完想再吃；其他刺身包括北寄貝、吞拿魚、鱆紅魚、翡翠螺等，都是有質素的。而叫我們最喜出望外的，是店方特別送上的一板海膽刺身 ，十分鮮甜，完全無腥味，配上紫菜和少少壽司飯，真的是絕配。問師傅先知海膽來自韓國，值得推介！試完刺身就到壽司，選了一盤共五款壽司，包括灼燒三文魚、鰻魚、赤背、生牛肉與及蟹柳，壽司飯搓得剛好，醋味適中，灼燒三文魚燒出魚油香，鰻魚好味，赤背爽口，生牛肉就麻麻地，不過以放題壽司來說，我就認為好ok! 下一round輪到炸物，我試咗大蝦、秋葵、蟹柳和芝士波，總括嚟講都炸得唔錯，食落唔算油膩，值得一提是秋葵，食落香脆又惹味，而且秋葵本身好健康，食完少啲罪惡感。最後試埋兩個熟食包括沖繩涼瓜炒蛋與及牛肉拉麵，前者都幾好食，如果加入少少豬肉片會更加有沖繩風味，反而個牛肉拉麵就唔係好得，牛肉好勒，拉麵又冇乜味道。最最後當然是甜品，自認甜品專家的我對甜品就一定要求，呢度提供嘅兩款甜品包括左木糠布甸與及蛋布丁，坦白講兩款都唔合格，不過好在有幾款雪條任君選擇。至於飲品方面都有七八款選擇，都是各款汽水果汁之類，沒有什麼特別。總括而言，平成放題的確是CP值高，食物質素有保證，對於追求一次過食好多日本野嘅人來講，呢度真係好抵食！讚位：值得一提的是每張枱都寫咗一句標語叫人珍惜食物，切勿浪費，否則每件刺身收＄30，我認為呢個提示都幾好，避免啲人叫完又唔食。彈位：店舖環境偏向昏暗，而且地板鋪左一啲黑色嘅膠墊作用係防滑，不過就令人感覺好似去咗街市咁，可能會令一啲追求浪漫氣氛嘅人卻步，可以考慮改善一下！…查看更多

大埔三多炸髀出名係人都知，但因為路途遠所以一直未有機會嘗試。有晚去觀塘食蛇羹嘅時候竟然見到有三多分店開咗係宜安街，毫不考慮之下就入去試試。環境分店雖小，但坐得尚算舒服，座位與座位之間不會太迫。而且可能因為冇乜人知所以都唔使等位。等候時間炸雞髀即叫即製，需時約10分鐘。如果人多可能要等15分鐘，而且奉勸各位唔好即刻食，因為太熱氣，要有心理準備。賣相：大過一般人嘅手掌，吉列炸皮色澤金黃，上枱時熱氣騰騰，非常震撼。口感：雞皮鬆化酥脆，咬落都算脆口，但坦白講實在太油膩。建議自備吸油紙，否則會食到成口都係油。炸粉漿有別於K字頭的大型炸雞連鎖店，感覺新鮮，不過好唔好食就見仁見智。火候控制ok，雞肉口感嫩滑。味道：食落有微微的雪藏味，而且略嫌淡口；灑上辣粉後，相當刺激，奉勸大家唔好落太多。反而意粉就有少少驚喜，都幾好味，特別啲意粉醬有少少甜，令人非常開胃。價錢：我叫嘅係炸雞脾意粉跟檸檬水，共銀$50，坦白講都唔算平。值唔值就見仁見智啦。…查看更多

韓日屋位置尚算方便，油麻地地鉄站過來約5分鐘就到兆萬。餐廳環境正如店名般fusion，令人分到唔係食緊放題定韓燒。雖然我見唔到餐枱有抽風機，但感覺這𥚃的通風系統做得幾好，唔會煙霧瀰漫，離開嘅時候亦都唔會覺得啲衫褲充滿油煙味，值得一讚！首先當然要試呢度嘅魚生刺身，刺身船外形很別緻，賣相不錯！刺身質素也尚算不錯，尤其喜歡馬刀貝，十分爽口，甘蝦亦十分鮮甜，幾款魚生都很新鮮。壽司方面就比較遜色，問題是出在D壽司飯方面，一舊舊太實了。跟著想飲湯，見有人參雞湯就一於試下，飲完覺得比想像中的美味，不會苦澀，而且有少少雞肉食。天婦羅方面，以蝦比較出色，其他如蕃薯則略硬，所以之後再encore了一次純蝦天婦羅。這𥚃比較有特色的招牌菜應該算是牛肋骨，絕對不怕會燒不熟，因為一早已切好成薄片，整齊地包住一整塊肋骨上碟，只需展開便能舖在燒爐上慢慢烤熟。牛肉味香濃、口感也十分好！另一推介之選是雞肉和雞翼，肉質十分軟滑，燒得微焦後香味四溢，加上各款醃料後肉味更香濃。食完主食已經好飽，但見出面又有甜品同飲品，我選了幾款，最後捧著一個大肚子離開。整體而言，無論係裝修環境、食物質素、價格同服務都唔錯！…查看更多

尖沙咀的食店多不勝數，日本料理更成行成市，要在云云店中突圍而出真的不容易。焱丸水產主打較高檔的路線，採用新鮮的食材與及地道的日本料理感覺吸引食客。但不論是什麼樣的葫蘆，要留住每位人的胃口，最重要的還是食物本身的烹調手法與品質層次的高低，而這次在焱丸水產吃到的絕對是可以做到這點。焱丸的裝修設計風格，處處流露日本小店的風味，木板牆身更印有不同漁港的名字，天花上掛上魚網、浮波、水泡、燈籠及漁旗等裝飾物，令人仿如置身於日本的浜燒店一樣。店子不太大，大概可以容納30人左右，很有家的感覺。而首先吸引我眼睛的是店內的魚缸，放滿了各種各樣的海產，聽店員說這些都是每日空運新鮮從世界各地運到的，到港後再直接放入餐廳內的魚缸飼養，實行做到朝捕晚嘗，真係夠晒新鮮！餐廳每日供應約20款海鮮，多數以貝殼類為主，包括帆立貝、生蠔、榮螺、白蛤、鮑魚、海膽、松葉蟹及毛蟹等，有時更會搜羅到特別的日本水產。事不宜遲，開始介紹食物：三文魚牛油果油酢漬三文魚同埋牛油果都係我嘅至愛，兩樣野加埋一齊都冇理由唔好食，再加上日式嘅醬油撈埋一齊，雖然份量好多，但成碟好快就比我K.O.左。作為第一道菜，真的非常開胃！牛油炒野菜一疊非常平凡嘅雜菜，放喺用心的師傅上，都可以變得非常出色。呢一道牛油炒椰菜就係例子，每一條菜同埋菇都沾上了濃郁的牛油香味，令你吃不停口。雜錦天婦羅天婦羅亦屬水準之作，蝦、南瓜、菇都炸得好好，粉唔太厚、表面鬆趣，裡面仍然食到啲食物是新鮮的，而且軟硬度適中，好味道！菠蘿味汽酒食完一輪野，有D口渴，於是叫左野飲。友人試左店員推介的清酒，是店主在京都特別找尋的酒廠為餐廳特別釀製精米度70%的酒，友人試過後讚不絕口。不過我揸車所以唔敢飲酒，所以只能試下我比較喜歡的菠蘿味汽酒，味道比較淡，但都算解渴。蟹味噌甲羅燒終於輪到主角出場，就係「浜燒」。店員以小型燒烤爐來燒海鮮，約十多分鐘就食得，一路燒一路聞到香噴噴。作為蟹癡的我，當然不能錯過蟹味噌甲羅燒，蟹蓋內放了松葉蟹膏及蟹肉，中間再放上生鵪鶉蛋。WAITRESS好細心咁幫我地燒，個蟹蓋入面都係放滿蟹膏,，過程中需要將蟹膏、蟹肉及鵪鶉蛋攪勻，至收乾水後便可以直接用小湯匙舀來吃，熱辣辣的蟹肉蟹膏拌以鵪鶉蛋漿的甘香幼滑，每口都係香噴噴，好味程度非筆墨所形容，友人怕膽固醇高所以大部份都係由我享用，好滿足呀！除咗呢樣之外，亦都試咗幾款海鮮貝殼類，包括活鮑魚、活帆立貝、生蠔同埋白蜆，唔係誇張，真係隻隻都超級大隻、超級新鮮同超級好味，而且爽甜彈牙，令人食過返尋味！其中最特別嘅係鮑魚，特別在當我看到盤上那團慢慢蠕動的生物，確實令我眼界大開，但亦有點不忍心，但入口後才明白新鮮無加工的鮑魚是如斯風味。日式牛肉鍋烏冬老實講食完咁多嘢之後，都有啲後悔一早叫左呢個牛肉鍋烏冬。因為實在好飽，所以雖然都幾好味但係最後都食唔晒。後感這次吃完焱丸水產，令我明白他們對食材的品質及處理的確十分重視，相信這一點每一位顧客都會體會得到。那份嚴僅、堅持以及對客人的尊重，令我好像做左一晚日本人一樣，也滿心期待着下一次的再臨。…查看更多

今晚諗住同屋企人遊車河，由九龍特登揸車過對面海西灣河食野，朋友話鯉景灣so ho east嗰邊D食店太貴，而我地又想食壽司，於是上openrice睇下，最後選了這間小店。小店只提供兩張四人枱及一張bar枱，我哋去到嘅時候其中一張四人枱已有人，另外一枱就只有一位客人，我們表示想先入座，但女店長卻無動於衷，叫我們在外邊等。但外邊實在有點悶熱，於是我們堅持先入座。可能就係咁，老闆娘就全程黑面。我們落單的時候，她也不理睬，結果後來入座的人反而先有食物送上，實在令人氣憤。食物方面，店名既然是壽司屋，我們當然是想試下這裡壽司的質素。我們選了帆立貝、北寄貝、蟹籽、玉子、三文魚、蟹柳和青瓜卷。刺身ok，但問題係係啲飯嗰度，實在太實太硬了，影響晒成個感覺；我們另外亦叫左火炙三文魚，問題也是一樣。小插曲是我朋友想叫一客牛油果卷，老闆娘只是背對著我們說了一聲「冇」就走開，十分冷漠。五分鐘之後，有一對似乎是熟客的進來，老闆娘腳卻熱情招待。這種人前人後不一致的待客態度，實在令人不爽。最後我們再叫了一客我喜愛的鰻魚飯。鰻魚份量足，但太多汁令D飯好咸；鰻魚本身夠香，但口感一般，僅僅合格。整體來說，食物質素普通，壽司飯是敗筆所在。但更重要的問題，是老闆娘的待客之道，希望小店好好改善，否則只會被人淘汰。…查看更多

Casa Fina一直是我心目中認為可以在重要日子約朋友的其中一個不二之選，原因很簡單，因為這裏格調優雅、環境輕鬆，而且交通便利、食物出色，我相信在香港這幾個因素加埋價錢一定很貴，這裏卻是例外。由於小弟一向不太好生蠔，生蠔拼盤就留給朋友獨家享用。我只嚐了翡翠螺和日本牡丹蝦。先吃充滿光澤的日本牡丹蝦，味道異常甜美，肉質鮮嫩，我認為新鮮程度可以媲美頂級的日本料理。而翡翠螺肉質彈牙，亦值得推介！之後，店員向我們推介了一款很有泰式風味的大蜆湯，以白酒和金不換烹調、加上微辣而又不過火的調味，十分開胃鮮味。大蜆原來是新西蘭的tuatua clam托托蜆，真是用料上乘。接著是酥炸羊架，個人認比較乾身，但羊味尚算濃郁。反而令我意外地十分滿意的菜式，竟然是我平常比較少吃的焗釀酥皮，鬆脆的酥皮釀入蕃茄及蒜蓉大蝦，餅底充滿牛油香，令人食完想再食多一客，好味！另一特式菜，是法國鴨胸野菌意粉，有陣陣松露香味，味道十分豐富，分量亦足以令你飽足。最後是我最喜愛的甜品之一Tiramisu，雖然店員說心太軟才是這裡的大熱甜品，但我還是堅持自己所愛，不作他選。一試之下發現味道口感都不及預期，可能係我期望太高吧！…查看更多

今次嚟到近期大熱嘅水上人，餐廳位置極為方便，朗豪坊斜對面，交通方便到極點。門面裝修都好吸引，入到店中已感受到店主用心嘅設計，店裡面最吸引人係佢個大海鮮池，有好多靚海鮮任君選擇，與及一頂頂草帽，好有特色！我哋除咗叫套餐之外，亦都散叫左其他野，當然以海鮮為主。點餐後，店員已細心哋幫我哋安排食菜式嘅次序。花甲王、象牙蚌呢度嘅貝殼類食物都好新鮮，首先試嘅花甲王都幾好味，但美中不足係有少少沙，但呢個問題可能都好難完全避免，反而象牙蚌就完全冇沙，而且好多肉，味道好鮮甜同埋好彈牙，真係值得推介！黃金汁紐西蘭蟶子皇蟶子原條上夠大隻，蒸完後無縮水，而且好爽口，味道鮮美；黃金汁甜甜的，味道幾特別， 加上粉絲襯托，令人開胃。翡翠汁南非五頭鮑魚（散叫，$68/隻）見隔離枱食啲鮑魚好似好正，所以忍唔住加錢散叫左幾隻，黎到之後見到鮑魚都幾足份量，特別在佢地都係會配上一款特別的醬汁，顏色是綠色以為係Wasabi點知食落又唔係，不過我個人認為反而掩蓋了鮑魚本身的味道，好在D鮑魚嘅肉質完全唔韌，夠彈牙。怪味和豚肉係完全冇期望下試食這道菜，估唔到咁好味，豚肉切成薄片，肉質鮮嫩無比，肉味十分鮮甜，裡面包著類似甘旬同香草的東西，都好夾，而那個汁也太神奇了吧，與豚肉配合起來簡直天衣無縫無，就連家人食完之後都說了兩個字，好味！手打丸 手打丸感覺好正，我本身特別喜歡墨魚丸和牛丸。墨丸口感豐富，新鮮彈牙；牛丸加入榨菜打，令其多一份咬感，亦都提醒左味道嘅層次。龍蝦（散叫，$228/隻）我地叫左兩隻波士頓龍蝦，上枱時已經開邊了，但係估唔到竟然仲喺度郁，真係有少少唔忍心食。蒸熟之後嘅龍蝦好多肉，仲有黃色既係“糕”，好香濃， 而且肉都多， 可以大大塊切出黎，仲好彈牙，而且十分鮮甜，正！但價錢就比較貴，原來之前有做特價，真心覺得黎遲咗！蒸菜心，咁大個仔都係第一次見到就咁將啲菜心攞去蒸，原本以為淡而無味，點知又錯了，蒸菜反而真正帶出蔬菜的甜味，仍鮮嫩非常。日後自己係屋企煮飯都要試吓呢個方法。臘腸糯米飯 - 呢個糯米飯真係不可不吃，糯米煙煙韌韌，臘腸香到冇朋友，加埋一齊食，又飽肚又好味，簡直令人回味無窮。最後的是南瓜排骨粥 ，蒸完不同海鮮的精華，完全流晒落去個喎粥嗰度。我好奇怪咁問店員點解啲粥煲左咁耐都冇燶底，店員就話呢個係個爐嘅功能。我食咗一碗，都幾好味，但係因為食完糯米飯實在太飽了，所以最後唯有帶走。…查看更多

近年來興起樓上餐廳，Spark亦是新近進駐蘭桂芳的一份子。餐廳位於一幢名叫LKF29的商業大廈的4樓，地鐵站行過來大約十分鐘，都算方便。推門而進，環境較為昏暗，燈光的來源是靠酒吧和餐枱上的一盞玻璃杯燈；再加上外面的霓虹燈光，營造浪漫氣氛，很適合情侶來拍拖談情。剛好這晚在餐廳對面大廈天台就有一個著名的波鞋舉辦活動，見到有不少人都是穿着這品牌的波鞋上來拍照，都幾特別。餐廳的另一個角落擺放了Live Band 舞台，麻雀雖小但五臟俱全，侍應說將於稍後邀請不同樂隊來開show，相信氣氛會很熱鬧。現在香港與音樂結合的餐廳，已買少見少了。記得好多年前係尖沙咀都有一間，不過幾年之後就敵不過貴租而結業。Spark餐廳的酒吧放有不同類型的酒杯，排列成別緻的裝飾設計。部分牆身更採用鐵皮裝潢，甚有復古工業味道；另一邊的牆身，則塗畫了一隊老人樂隊，但我自問不是樂隊迷，所以不認識究竟是否真有此隊band？不過坦白說，昏暗燈光下看這幅畫作，感覺是有點詭異。說回食物方面，晚餐沒有set dinner提供，餐牌只有兩頁紙，一版是食物、一版是飲品。食品方面有小食、生蠔、前菜、沙律、三文治、pizza、意大利飯、主菜、意粉和甜品，款式不算多但也足夠。至於飲品選擇就相對地多，有cocktail、mocktail(冇酒精）、coffee、果汁和啤酒。最後我和友人選了signature drink，是一杯混合了楊桃的果汁，我認為味道也不錯，而且非常開胃。Appetizer方面，待應推介了一道芝士烤大磨菇（Roasted mushroom with cheese with Pumpkin Tofu）。這道餐前小吃非常好味，濃濃的芝士味與磨菇融為一體，口感豐富之餘又不會太「灟」，加上南瓜蓉豆腐，將一道普通不過的小吃提升至一種味覺上的享受，屬個人推介！主菜方面，我們選了六成熟的美國安格斯肉眼扒。上菜時肉眼扒已被切開了並搭成層架，賣相比一塊上的香會來得好看，不過就令我失去了「鋸扒」的快感。第一啖咬落去嘅口感同味道都是上乘的，塊塊都十分juicy，肉香濃郁。美中不足的，是牛扒在上枱前已經切開，因此未吃掉一半就已經開始冷卻了，影響了牛扒嘅口感。另一道主菜是龍蝦黑松露扇貝焗飯（Baked Risotto with Lobster. Truffle sauce. Scallop）三樣都是我喜歡的食物，將之全加在一起，效果又會如何？答案很快揭曉，上枱時香味四溢，賣相也其佳，是把煮好的龍蝦肉和意大利飯放於扇貝上，加上黑松露醬一齊焗。如果硬要挑剔的話，我只能說有點貴，三百幾蚊得三隻扇貝，不過貴精不貴多吧。最後本來諗住食埋甜品，不過朋友話太飽所以沒有叫。留待下次吧，順便來聽下呢度嘅live Band！…查看更多

位置與環境盛八尖沙咀店的位置尚算方便，地鉄站I Square出口過來約5分鐘就到。餐廳環境不錯，一磚一瓦都洋溢着日式格調，令人分到唔係食緊韓燒。雖然我見唔到餐枱有抽風機，但感覺這𥚃的通風系統做得幾好，唔會煙霧瀰漫，離開嘅時候亦都唔會覺得啲衫褲充滿油煙味，值得一讚！澳洲黑毛和牛惠顧燒肉放題每人送半碟澳洲黑毛和牛，燒香左嘅和牛味道香濃，而且肉汁甘甜，內質夠腍，令人想一食再食，可惜只有數片。如果每人加＄30仲可以升級做鹿兒島和牛，下次一定要試吓。肉類黎得燒肉店梗係要發揮我哋食肉獸嘅本色，我哋order左一口牛舌、牛肋骨肉、牛胸腹、豚腩肉、雞腿肉和手羽先（即係雞翼）。我好欣賞呢度嘅肉類可以分開唔同嘅調味料，例如岩鹽青檸、韓風、澆汁同埋鹽䓤，適合唔同口味嘅人士。我自己最鍾意嘅就係岩鹽青檸，酸酸甜甜好開胃。咁多種肉類裏邊我自己最鍾意嘅都係牛肋骨肉同埋牛胸腹，牛味濃郁，口感僅次於和牛；雞腿肉都唔錯，夠嫩滑，反而胡椒一口牛舌咬落去比較韌，味道亦都比較咸。前菜沙律、飯麵剛食了一輪烤肉，就轉食前菜沙律同學飯麵。我地點了冷烏冬、炒飯、蟹籽沙律豆腐、毛豆、番茄同青瓜。以上呢啲都係可以即刻食嘅，味道都唔錯，尤其係豆腐好滑好開胃。蔬菜類之後再叫左一啲蔬菜類（包括左翠玉瓜、粟米、大葱、大磨菇、南瓜等），但係需要煑熟的，開頭我唔知道就直接將個啲翠玉瓜放係爐上面燒，侍應見到就有禮貌咁樣埋黎提醒話可以成個錫紙兜放落烤爐整熱， 以免啲植物太乾身同埋掂到啲燒濃左嘅焦，我真係大鄉里，哈哈！不過比個貼士大家，可以放少少湯或者水落去個錫紙兜，等差不多煮熟之後再放左少少調味料，嗰啲蔬菜會更好味。炸物另外，我們也點了一些炸物，個人口味都還是愛食吉列蝦、薯餅、蕃薯及南瓜天婦羅。呢度啲炸漿都算ok，炸得好香脆，而我個人就比較推介吉列蝦同埋蕃薯天婦羅。最後，我地encore牛胸腹同牛肋骨肉，美味牛肉配合買日本Asahi啤酒，真係絕配!甜品飽餐一頓之後，估唔到呢度仲有雪糕提供，有兩隻口味，分別係雲呢拿同埋豆腐。愛好甜品嘅我，兩隻都試左，雖然覺得豆腐味比較特別，但始終覺得雲呢拿比較好味。感覺上比牛記好食，但唔知係乜嘢牌子呢？…查看更多

位置與環境火山燒的位置很方便，銅鑼灣地鉄站過來只須兩分鐘，然後在L square等𨋢上樓就到，佔地兩層。先說說環境，基本上與一般自助燒烤店的格局差不多，每枱都有一部抽油煙機，確保通風系統良好，不會煙霧瀰漫。裝修方面都頗有日本特色，全間鋪頭嘅牆身都會畫咗一啲日本嘅著名景點建築物，最令我驚喜嘅係個廁所，估唔到咁靚，係以櫻花下的京都做背景，視覺效果一流！本店亮點-火山石頭、櫻花汁朋友介紹來呢間燒烤店，因為佢係標榜用日本運送過嚟火山石頭來燒烤食物。店員話呢啲火山石頭可以加熱去到三百幾度，認真誇張！咁樣燒出嚟的食物，嗰種個香味係與別不同嘅。另外，店員同我地講其中一種汁係用櫻花瓣做出來的，的確巧特別！店長推介-櫻之貝本身我其實主打想食海鮮食少啲肉，所以店長推介左新推出嘅「櫻之貝」併盤（鮑魚、元貝、翡翠螺、胭脂蚌、沙白蜆），惠顧放題只需要每人加$48就可以食到，認真超值！我自己最鍾意嘅就係胭脂蚌同埋翡翠螺，肉質鮮嫩彈牙，鮮味無窮，值得推介！反而鮑魚同元貝燒完後肉質就比較乾實，但係都幾好味和口感豐富！主菜單個人推介：前菜（蒜油冷麵、枝豆）蒜油冷麵個汁非常開胃、枝豆屬健康之選，食完令自己冇咁強嘅罪疚感宮崎牛肉（牛肩肉及牛仔肉）牛肩肉同牛仔肉經過火山石加溫之後，啲牛味完全釋放出來，店員推介我哋加一啲海鹽/七味粉，令到味道更加全面，果然冇介紹錯，味道好夾！鹿兒島黑豚肉我本身唔係好鍾意食豬肉，不過朋友話呢度啲黑豚肉質素都唔錯，大家可以試吓。土佐雛雞（半隻）其實說穿了就是燒春雞，全晚得呢樣唔使自己燒，而係店員燒好再攞出黎嘅。雛雞嘅肉質真係好嫰滑，就算係雞胸部份都一啲唔會鞋口。比個貼士大家，兩至三個人食半隻，分量就啱啱好。燒生蠔（店員話係紐西蘭入口）我本身唔係咁鍾意食燒熟的生蠔，因為驚失去左蠔嘅鮮味，但係今次用火山石去笑完之後發覺蠔嘅味道依然保留到，而且都幾creamy。冬菇、茄子食左咁多肉都要食返啲蔬菜類植物中和下，冬菇同茄子都係我嘅飛佛，燒完之後都幾香，同埋唔會太過乾身。和牛串燒呢個係要自己加錢＄48一串，我叫咗兩串，都冇後悔叫到，因為牛味的確特別香濃，口感亦都甘香可口，即使是燒到全熟，也不會覺得硬和乾，而佢嘅厚切方法令到食落去嘅時候，有外脆內軟的口感，好味！整體來說，火山燒嘅放題都算物有所值，而且呢度嘅抽風系統做得好好，所以食完都唔會有成身油煙味。我見佢哋都有獨立大房間，如果有八至十個人相信可以入房坐tatami。這裡的確係色香味俱全、三五知己聚腳嘅好地方！…查看更多

位置與環境宮崎的位置很方便，旺角地鉄站過來只須兩分鐘，在山東街有入口落地庫就係。先說說環境，基本上與一般自助燒烤店的格局差不多，侍應安排了我們坐側邊的一條通道內，食到中段嘅時候感覺這裏的通風系統不是太好，整條通道也是煙霧瀰漫。自己的火候可自我調控，但坐旁的客戶大多也弄得很大火，不時被濃濃的煙包圍，希望餐廳留意和改善一下。餐廳內也有供應飲品的雪櫃，裏邊放左唔同嘅飲品，只需要上Facebook like佢地嘅專頁，就可以任君選擇。雖然唔係好多款飲品，不過都算OK嘅。食物種類分別有刺身/小食、壽司/卷物、和牛、地雞、炸物、海鮮/野菜、烏冬/麵/飯/其他刺身及壽司真係估唔到日式燒肉店都有刺身供應，雖然款式唔係太多，但基本嘅三文魚、甜蝦、北寄貝、八爪魚同墨魚等都有，賣相一般，不過味道都唔錯。壽司方面因為唔想太飽所以淨係叫咗三文魚同鰻魚壽司。總括嚟講，刺身同壽司啲味道都唔錯，始終呢度唔係一般嘅日式放題，有得食已經好開心。即送燒物二人同行即送三選一精選食品，有冰鎮大蝦頭、憤怒火牛仔和仙境純情豚。我們則選了「憤怒火牛仔」。燒香左嘅牛肉嘅味道香噴噴，而且肉汁甘甜，令人想一食再食，可惜只有幾片。另外枱面上亦已經放有八式燒肉，一共有四款口味豬和四款口味的雞。個人應為啲雞件嘅味道最出色，雞肉嫩滑而且味道鮮甜，可能真係好似佢所講嘅係走地雞！和牛我哋我帶咗牛舌、一口牛粒、薄牛肉及牛胸腹。每款都提供左一啲唔同嘅口味我哋多數都係揀燒汁或者黑椒味。薄牛肉實際是像一般肥牛，而且肥肉比例比較高，我們點了一次便沒再點。牛舌唔係我杯茶，我冇食，不過友人話唔錯。一口牛粒口感同味道都唔錯。但最令我驚喜嘅係牛胸腹，牛味濃郁而且內質夠腍，即使是燒到全熟，也不會覺得硬和乾，是個人推介！剛食了一陣烤肉，煙霧瀰漫，我地先熄了火，點一些沙律、小食、天婦羅等食物。豆腐沙律的豆腐都好滑夠冰凍，襯托胡麻醬可以更令豆腐更香味撲鼻。炸物我們只點了一些天婦羅，個人口味都還是愛食蝦、蠔、蕃薯及南瓜天婦羅，炸漿都算夠薄，炸得好香脆，味道都好香甜，一點都不覺油膩。炸蠔都是我們愛的小食之一，難得蠔肉都是好肥美甘香，真是不錯。順便一提，每次叫炸物都會奉送三塊雜菜餅，所以最好group埋一次過叫，如果唔係就會有好多塊雜菜餅了。燒菠蘿、粟米粟米不會乾身，我放左少少牛油，燒香後更添滑口。而菠蘿果香清甜，我們都追加了三次，好味又健康。食完菠蘿之後，我們再叫海鮮、香菇之類的食物，海鮮方面有海蝦，蝦肉烤完都好新鮮彈牙；多春魚好多魚春，烤起後非常香口，魚籽食落爽脆；半殼帆立貝，友人唔想食牛油，加了少少鹽，食落都幾好味，不過稍嫌細隻。另外，金菇，是用鋁盤盛裝，可自選調味料再燒。最後，我地encore牛胸腹來燒，因為細細塊而且好好味。店內也有牛記雪糕免費供應，不過最後因為太飽，我和友人也沒有享用。…查看更多