delmilch的个人专页

第一次試呢間，之前1晚訂定位，去到都差啲冇位要等。裝修都幾骨子同光猛，檯與檯之間有足夠位置，起碼唔會櫈貼櫈。可能近中秋，入口附近有個打卡位，係個大大嘅吹氣月球同兩隻發光嘅兔仔裝飾。睇咗之前食評，叫咗以下幾個點心4款點心都好好食😋蘿蔔絲酥熱辣辣，底下係朱古力餅嚟（味道就一般，當裝飾算）。鮑魚撻皮夠脆，餡有冬菇香。燒賣比大部份酒樓好食，大粒得嚟豬肉唔會騷，蝦亦彈牙，其中兩隻有松露醬喺面。紫薯粟米包造型可愛，裡面係紫薯餡，甜而不膩。服務方面上菜都算快，侍應人數足夠而有禮貌。如果12點半前嚟應該唔使等，之後就比較難講。比較煩嘅係要等𨋢上去，所以顯得冇咁就腳。Overall可以再戰～～…查看更多

自從發掘到呢間喺大角嘴嘅餐廳原來喺荃灣廣場附近有分店後，每星期都食一次，想快啲食哂menu裡面嘅嘢之前食過紅燒同麻辣牛肉麵、大腸麵線、起司肉鬆蛋餅，同埋起司薯餅蛋餅。今次就試咗香香酥炸雞排便當、滷肉飯（大）、同埋encore起司肉鬆蛋餅，再加柳丁綠茶（甜度30%、冰塊100%）。除咗散叫，都可以叫餐首先嚟係我點嘅滷肉飯（大）。望落都幾對板，但食落就覺得一般。飯係好食嘅，但由肉到蛋到醃菜都好淡口，比較適合清淡人士。香香酥炸雞排便當，雞排大大塊，好脆，夠熱亦juicy，不過雞排似乎冇乜醃過，食落冇味，係靠脆漿嘅調味。如果你好追求台灣味嘅可能會覺得可惜。飯喺雞排下面，要夾開雞排先食到飯，有啲狼狽。配菜反而味道唔錯～呢個係男友要求encore嘅item，有溶咗嘅芝士嘅濕度令肉鬆冇咁卡喉，係唔錯嘅配搭嚟。點埋醬油膏超好食😋呢杯又係男友encore item，柳丁同綠茶proportion好好，兩樣嘅味都飲到，好清新解渴～～服務方面，人手都足夠。一入去見我孭一袋拎一袋，已經即刻俾個籃我擺嘢。留意返餐廳只收現金～～…查看更多

譚仔雖然開到成行成市，但咁多年嚟冇食過超過5次，因為麻麻地食酸辣。見男友lunch成日都食，好奇想知有咩咁特別，就陪佢食一次試吓。由於佢食lunch比較早，所以去到都仲有位。咁啱呢間舖向海，有4個單人位可以食住米線睇靚景，咁就二話不說坐嗰邊。長期喺內陸生活嘅小妹見到水簡直不得了，食碗米線都心情好過人～～我真係初心者到連點叫都唔識，譚仔姐姐好好教我點叫。最後叫咗麻辣10小辣雞肉米線，男友就as usual叫咗麻辣3小辣韮菜米線。另外叫咗大土匪雞翼同大蒜泥白肉，再加2杯凍檸茶。米線份量都唔細，女仔都絕對夠食有餘。雞肉唔油亦唔鞋，想食肉又唔太油膩呢個唔錯。唔食得辣嘅我食10小其實差不多，有偷飲到男友啲湯，一啖都可以，但食哂成碗就會有啲辛苦。米線比我想像中好食，有啲彈牙唔會淋pat pat。男友話譚仔啲韮菜幾高質，唔會有渣，亦唔會overcook，係好食嘅。土匪雞翼望落有啲黑，但食落唔乾。蒜泥白肉個汁好好味，連埋蒜泥一齊食超正😋 凍檸茶就正常發揮Overall原來譚仔都幾好食，到我寫呢篇食評期間已經食咗5次以上～～…查看更多

呢間餐廳係小妹第二次幫襯，嚟得第二次當然有啲原因嘅～我同上次一樣，叫咗藥膳麻油雞米線（$57）。男友就叫咗未叫過嘅香辣藥膳牛肉湯米線（中辣）（$72）。另加兩杯凍檸茶（每杯加$8）。其中一個有返頭嘅原因，就係上菜夠快，3分鐘內就有得食，男友唔使趕頭趕命就倒碗麵落肚再衝返公司。藥膳麻油雞米線一上檯就好香麻油味。份量唔少，女仔未必食得哂，我俾咗2件雞同1/3米線男友都夠哂飽。雞好滑，有3件係髀位，其他位置都唔算多骨，而家仲幾滑😋食米線最怕唔煮得過淋，呢度嘅米線滑得嚟又有啲煙韌，不知不覺就清哂。至於個湯可以放心飲，我兩次飲完都冇口渴，唔錯。男友叫嘅香辣藥膳牛肉湯麵線（中辣）一上檯就搶飲頭啖湯😜中辣嘅辣度係X仔嘅10小辣咁上下，唔食得辣嘅我都絕對handle到，鍾意食辣嘅朋友可以直接叫大辣～呢個麵嘅牛肉係牛肋肉嚟嘅，有成4-5大嚿。食咗一嚿，我覺得可以再淋啲，但都入味嘅。蘿蔔冇試唔知點，但男友冇特別講乜就應該冇大問題。至於檸茶就中規中矩，大大杯好抵飲～環境就唔錯，我地都高大，坐卡位一邊都完全唔迫，係冷氣大咗啲，不過我地都好怕熱所以冇問題。服務都唔錯，一入門口有問清楚係食米線定火鍋。上菜另外俾多個碗仔用嚟裝骨，整體服務都到位。如果想食個相對經濟嘅quick lunch，呢度絕對係好選擇～～…查看更多

噚晚同舊同事食甜品，男友詐型話未同過我食，於是今日趁早食完飯就搵下路德圍附近有咩甜品店，方便食完搭車返屋企。喺開飯睇過menu覺得都啱食就去試吓。淋住雨去到門口見有位，嘟完安心就自己搵位坐。menu已經喺檯上面。我叫咗芒樂多，menu上面介紹係益力多味沙冰，再加芒果肉、珍珠、椰果同椰子條。益力多沙冰好濃益力多味，酸酸甜甜好解膩。初頭以為得幾粒芒果肉，原來都唔算少，而且都幾甜嘅～珍珠咬落都有微微嘅黑糖味，亦幾煙韌，唔會俾沙冰凍到硬哂變咗口感。椰果就冇乜特別，不過個人鍾意一粒粒嘅椰果，食落口感好啲。旁邊幾塊應該係menu所講嘅椰子條？？？其實係有芒果味嘅蒟蒻類物體，個人就麻麻喇。男友叫咗芒果紫米小丸子。食咗兩啖，紫米足料，唔會太甜，如果有sweet tooth嘅可能會嫌佢淡啲。小丸子就冇乜味，我覺得如果有多啲甜味會好啲，唔係就好似食緊嚿粉團咁。清潔方面，我好怕甜品店清潔得唔乾淨，小方糖嘅檯櫈同地下都乾淨唔會痴lub lub，呢樣唔錯。價錢、味道、清潔整體都唔錯，但店員唔知係太熱定心情唔好，基本上都係冇表情同唔出聲嘅。…查看更多

食完晚飯見時候尚早，就搵個地方續攤～友人想食凍甜品，見附近有間幾有趣就去試下。入座前侍應提醒揀好就出去counter俾錢，但坐低後發現檯上有QR code落單兼俾錢，呢方面非常方便。Scan QR code後發現裡面嘅menu比實體menu多選擇，所以大家可以斟酌下。我揀咗龍眼爽冰（$55），另加$5要extra椰果。食物5分鐘左右就到。如果鍾意龍眼嘅食家們，呢個甜品絕對唔會令你失望～因為真係非常有龍眼嘅香甜，而家食落仲會有龍眼果肉。喺炎炎夏日食個龍眼冰真係透心涼～～下次要試埋呂宋芒爽冰先，應該都好食～…查看更多