Jo Tong的个人专页

上枱賣相唔錯，雞翼炸得靚，皮雖有少硬，但可接受，而且有肉汁，只係唔明點解隻隻雞翼底都有個窿。喇沙湯無椰奶味，辣味偏重，整體味道係淡而稀，就算有豆卜索湯都唔好味。油麵煮耐左，偏稔。份量對女人嚟講偏多，食極都仲有，而且油麵本身煮得稔，所以愈食愈唔想食。奶茶茶味重過奶，入口唔滑。…查看更多

雖然過了好一段時間，但都係想寫返。原本諗住10月23號晚食的，因為外子壽辰，但餐廳實在太率性，話唔開就唔開⋯⋯但第二日我地仍然死心不熄⋯⋯堅持要食！我鍾意食帶子、辣三文魚、芥辣八爪魚，佢地的原隻有頭甜甘蝦都唔錯呀！刺身係唔錯的，但鰻魚壽司就普通點，唔知係咪因為外賣關係呢～佢地嘅價錢算係相宜，所以我地2個人食，3百蚊左右，已經夠食有頂肚。不過要提提佢地鋪內坐位唔多，其實真係得幾個，所以唔好諗住Walk-in去食，因為連訂枱都唔係話有就有。當然，有D應該堂食比較好食，我食過一次，但有時真係即興想食，我地都會先電話落單，預好時間去攞，回家慢慢食都好美味！…查看更多

最近個人真係比較懶⋯⋯唔係好想煮飯⋯⋯所以就真係唔煮飯⋯⋯是夜又叫外子買外賣⋯⋯ 其實我係一個頗懶的人，除非真係有野想食想試，否則我會太用腦力去諗的，原味家作係我的頭幾位之選。之前散買過幾次，覺得幾好食，而且個湯飲落去又幾舒服。個湯一定無屋企自己煲咁濃味，但飲得出唔係味精湯。今次食蟲草菌紅棗蒸雞飯，啲雞唔鞋，幾好食，但略嫌飯乾。至於份量，對一個女人黎講，都勉強夠嘅，但我比較大食，就爭少少啦～男人就可能未必夠～我個人最鍾意食梅子排骨炆南瓜飯，不過我地成日都係臨閂門先半個鐘先到，好多時都賣哂⋯⋯湯品就無乜特別喜好，但真係要揀的話，瑤柱猴頭菇無花果煲雞湯會濃味D。…查看更多

假日嘛～可以的話，就去曬曬太陽，郁下身體吧！今日中午陪外子跑步(我真係行㗎咋! 無跑呀!)，然後再去D2逛逛，覓食一下。去到D2One，行勻D食市，最後揀左「板上」。食Menu好似幾吸引咁，但食落麻麻。我點左燒豚五花珍珠飯，味道普通，個飯好似就咁淋個汁上去(快餐係咁，仲想想？)，個汁無乜特別，少少酸又少少甜咁，而且個飯有D爛，豚肉又硬。外子點了個黑豚漢堡配脆薯。個包唔似一般Buger店用的，似係超級市場買到的嘉頓漢堡包囉⋯⋯而且係唔Juicy的。唯一可以讚的，係個脆薯皇～不過其實脆薯係應該要整得好食的！其實都係可以入口嘅，不過我地點既2樣唔係美食囉～但環境算係闊落，若果想搵個地方坐低吹下水，都係可選擇的。…查看更多

外子一早外出工作，剛好辦完事後經過鴻運車仔麵，當然叫碗外賣啦！沙爹湯都好味！但之前食的咖喱汁更惹味！唔怕辣的，可以一試。貢丸片是必食！其次係豬扒！魚皮餃只是本人愛吃，但應該不是新鮮包或自製的，所以不算是必食。豆卜則攞黎索下汁食，都幾好食！之前外子點食過蘿蔔，都好入味的！聽聞豬紅也不錯的，但我唔食豬紅，所以無法評價。今次係第一次叫外賣食，個人認為堂食更好食！好似貢丸片，可能因為浸得耐，所以淋了點，而豬扒都係⋯⋯但堂食真係好食好多！另外，今次係點米粉，略嫌米粉太碎了⋯⋯但之前食過幼麵又覺得麻麻⋯⋯下次再試其他麵底吧～…查看更多

是晚，原本約左朋友出去晚膳的，但有人臨時有緊要事，所以要取消飯聚，所以就叫外子Fast Taste買外賣返黎食。其實Fast Taste我地已食過好幾次，食過深潛魚堡、橫行脆蟹堡、極上和牛堡，全部都唔錯。但講到最常食的，就係經典牛魔堡。今晚我同外子都係食經典牛魔堡＋薯格1份。牛堡Juicy美味，只是不及現場食，熱辣辣的美味，而薯格亦因為焗左一段時間，所以變淋身(但外子Like⋯)。雖然沒有特別的驚喜，但是保持水準之作。…查看更多

中午去完置富都會的彩福飲茶，跟住去左理工影相。為時幾個小時，真係攰到呢⋯⋯影完相，大家想食埋飯先走～一行7大1小，選點尖沙咀妹記。以前喺尖沙咀返工，有去食午飯，碟頭飯，無乜特別，不好也不差。年幾前也飯過晚市，嗰時覺得尚算可以。但唔知係咪因為爐火的問題，鑊氣好似唔夠。當晚叫左8個餸。以前好鍾意黃金蝦，不過當晚食，麻麻地，太濕。叫左炒聖子＆炒通菜。唔知廚師係咪炒完聖子後，無洗乾淨隻鑊，所以碟炒通菜勁多聖子殻碎⋯⋯差D戒到口⋯⋯其餘的餸是普普通通啦～…查看更多

有家人於理工畢業，相約到理工影相。事前先飲茶食飽。12點到達彩福，估唔到星期一都需要等位，而且當日唔知有訂枱定乜原因，無開細枱(2-3人)，所以侍應都話2個人要等好耐。而且接近Lunch Time，附近要多寫字樓人訂枱食飯。7個人，叫左十幾個點心，加一個三寶餐(1個湯飯、1個雞腳、1個濃湯浸菜遠)，埋單$700，算是合理價。因為屋企人食飯，所以無影到相。但魷魚鬚不錯，做得幾酥脆。…查看更多

    難得星期一外子放假，所以就出城覓食。原本諗住好好記錄，寫好食評，以作開首。誰知發生了動魄驚心的小事(是矛盾的～事是小，但嚇左一餐)，乜都忘記了⋯⋯    中午12點到逹餐廳，因為未到午膳時間，所以人並不多，直入。計埋我倆，2隻手數哂。    第1次到Fifty Fifty，環境不錯，位子算是寬敞，而且乾淨企理，侍應們都好友善。    點了2個Lunch Set，我覺得價錢算是合理，有選擇，即使係最平的餐，也不錯。餐湯是蘑菇湯，味道尚可，但不夠濃郁，而且唔夠熱，感覺差點。2個意粉的分量夠，味道其實是不錯的，但有少許乾，多少少汁或者加回唔少分。飲品是香芋Latte ＆咖啡，不過不失。    我地食到1點幾LunchTime，開始有上班族幫襯，所以我諗如果想去Hea，都要睇住時段喇～…查看更多