soppig的個人專頁

最近兩次買一個糖水外賣，等待時間都接近半個鐘。上次係週末嘅晚上時間都勉強可以理解，今次只係平日去到嘅時候亦都冇乜人，都等咗20幾分鐘。仲要見到後過我哋張單四個甜品都已經出咗，我哋只係買一個甜品都未有，之後去問佢，佢係冇正面回答過，淨係同同事講嘢。忍唔住等多幾分鐘再問一次佢先至話等多2分鐘。即係買一個甜品要等接近半個鐘先至有，時間長到不能接受，甜品店唔係淨係組裝嘅咩？有乜要等半個鐘？仲要俾我見到後過我哋嗰張單四個甜品都已經出咗，都唔肯出我嗰個，真係嬲左。唔會再想光顧土瓜灣分店，體驗極差。…查看更多

一去到，店員叫我哋入去搵位坐住先，點知原來搵完位，要出返去舖頭出邊嗰部點餐機嗰度點餐比完錢再入返去舖頭等叫籌號。 咁點解唔直接比張QR code人哋用電話落單呢？呢樣野已經令人感覺好奇怪。等到叫籌號又要自己出去捧餐同拎餐具，總共叫咗脆皮牛腩，豬手同埋燒雞。牛腩同豬手都有啲乾，係個燒雞都還可以幾嫩滑。不過價錢都唔算平，$88半隻雞跟一份主食。嘢飲同湯都要額外加錢買，加咗$8要個羅宋湯。羅宋湯都幾大碗質素正常。不過$88都唔跟湯同嘢飲，服務又係得快餐店嘅質素，總而言之，試過就算。…查看更多

一行五人係星期日專登揸車入去食，等咗45分鐘左右，等等吓到點零鐘已經話冇晒海南雞。叫咗香葉肉碎飯，香葉肉碎炒河，豬頸肉飯同埋脆豬飯。香葉肉碎飯一般，唔太香。香葉肉碎炒河炒得好濕同埋唔惹味。燒豬頸肉亦都完全唔香又韌。又有豬臊味。最後脆豬飯等到我哋其他人全部食晒要問多次先至再上，係熱辣辣嘅，但係同普通燒腩仔冇乜分別。😓最後俾錢嘅時候侍應態度亦都係好差，講嘢冇尾音，因為我哋人多坐左兩張枱，就係咁質問我哋究竟係A定B張枱？但係其實A B兩張枱都係我哋，但最後想問佢拎返張單都要受佢氣。落單個時個侍應都係冇表情，嗰時覺得可能係忙得滯，但係連埋單嘅時候都係咁西，啲野又唔係好食，完全覺得負分。完全唔明點解要排隊，只係好正常一間泰國菜餐廳都做到嘅質素。店員態度仲要差，區外人不建議專登去食，最多係做下街坊生意就得。…查看更多

落單時明明係想要dirty, 講嘢勁細聲。落完單無主動覆單，比完錢亦無主動比單，係見客人係度等先問係咪要單。最後dirty變左完全唔關事既薑黃檸檬薑茶，客人問返，就話比左單你當覆左單。 係自己衰收到張單無再望多眼。但係呢個服務態度加食物質素，完全唔會再黎，不推。…查看更多

餃子細隻唔抵食，味道無特別。加錢叫既雞湯面煮唔熟，上枱時仍是一舊舊未煮開，湯同面既味道淡到似滾水。完全係搵笨，唔使指意再幫襯。三個人食左2百幾都完全唔飽，食到一肚氣。…查看更多

之前見到都一直想試呢間鋪，今次買了一個酸辣粉（小辣），酸辣粉本身有一些固定的配菜例如：酸豆角，肉碎，黃金豆之類，配料食落新鮮，無油益味。湯飲落幾濃味幾舒服，好重蒜味，唔會有好強烈既味精感。薯粉亦都幾好食，唔會咬唔斷。係附近經過既話都應該會再買黎食，普遍黎講唔錯😋…查看更多

同朋友一行四人訂左平日3點，只係得snack menu 幾種小食可以order。然後決左叫左個snack combo, 係包括左snack menu每種小食，但係我哋四個人，幾乎每樣小食都係三份，其實店員可以稍作提醒。另外有朋友叫左茶，由一坐低落單到食完野發覺都未黎先發覺真係漏咗單，亦都係用一隻威士忌玻璃杯裝住茶包咁上，本來expect 會有個茶壺比較presentable 啲。然後飲完一杯想加啲熱水亦都話無得refill，但係其實個杯真係略嫌細左少少。可能係因為平日tea time 得一兩枱客，態度比較hea少少唔憂做咁。另外係賣點之一既outdoor seat 亦唔知咩原因無得坐，店員亦都無解釋。整體感覺令人覺得service 欠奉，食物味道正常，如此服務同價錢，我會選擇其他地方。…查看更多

點解一個普通嘅叉燒湯意，啲叉燒可以乾到好似臘肉咁，又乾又柴又咬唔開。就算當佢一個普通清湯意粉咁樣亦都好難食。牛乳炒滑蛋又變咗一個幾乎全熟既奄列，其實知唔知咩叫做炒滑蛋？其實個廚整唔到可以出少樣野，而唔係比啲咁嘅嘢人哋食。真係好想問吓啲店員，你哋覺得啲叉燒無問題咩，不過我放棄左，因為無論如何都唔會再去。最後連係肚餓既情況下都冇辦法食晒一個早餐，完全係一個bad morning，忍唔住打出黎警惕大家千祈唔好食呢間嘢嘅叉燒。好恐怖。…查看更多

訂了5點半的時間，整間鋪都是空位卻要安排我們坐最邊角又向著風口的位子。明明訂了三份餐應該有三杯飲品，向店員詢問想要多一杯餐飲時，店員只是加熱水到本來的餐飲中，要再次表明才送上新的餐飲。另外明明用餐時間90分鐘，店內亦只有數枱客人，卻好像很趕時間，用餐完馬上清理桌子，弄得客人不敢坐太久，只坐了45分鐘，把咖啡趕忙喝完走人。總括而言食物不錯，但服務不像一間cafe ，本想悠閒的享受用餐卻有種茶餐廳食完馬上被趕的感覺，建議可以稍作改善。…查看更多

因為朋友知我中意食辣而推薦的重慶味道,我急不及待去試。買了廿蚊生雲吞(加一蚊要中辣既配料)同涼面(中辣)拎番屋企自己煮,雲吞不是太大粒,剛剛好一口一個,外皮爽滑,餡雖少,但很香。我本身算食得辣,所以中辣的湯底對我來講不夠辣。不過佢個湯底似乎係強調"麻"多過"辣",唔係會令你辣到口內灼熱的類型,而是成個湯好香既香料味,食完會痺口。食完會痺口呢點令我幾驚喜,起碼多個"麻"既層次,而唔係一味加辣油得個辣字總括來講,呢個價錢咁既食物,很有水準:)另外,八蚊涼面十分大碗,底部亦墊了一芽菜,吃起來也比較爽口,多層次一些。當我把配料和面徹底撈勻,整個面就散發誘人香氣,一放入口的清爽的酸味,然後吃到醬料中的花生碎,芝麻粒,令整個口腔盈香。八蚊一個涼面可以咁大碗又咁好味,實在非常有良心。即使中辣也不會很辣,中意食辣既朋友去食可以直接囂張少少叫大辣。樸實有水準的小店,我下次還要跟朋友一齊去吃。…查看更多