KongerGuy港男的个人专页

喫茶ちょうぼ (銅鑼灣)好食度： 😋😋😋/5性價比： 😌😌/5回頭率： 🚶🏾🚶🏻/5價錢：HKD 138.6呢度喺世貿入面嘅一間日式西餐廳，環境幾靚，算係幾打咭able而且價錢唔貴。今次試嘅係壽喜燒牛肉蛋包飯，然後單點可以加HKD28可以升級變餐，套餐會多咗拌菜同飲品，而飲品係可以任選餐牌所有飲料，這次就揀咗焙茶麻糬沙冰啦。首先個拌菜其實就只係一小碟沙律，味道其實還可以嘅，但份量真係超少。然後個蛋包飯係上台後再係食客面前𠝹開，如果有興趣嘅人係可以拍片嘅。切開後，入面嘅蛋睇落都係幾滑嘅，不過整體味道一般啦，蛋蓋飯嘅選擇會有更好嘅餐廳。最後就係杯焙茶麻糬沙冰啦，首先個樣子就唔多討好，同埋都幾細杯，但味道係正常嘅，都飲到個焙茶味道。成餐總體而言都只係一般，老實講咭打一次就夠，回頭率應該不高了。———-//////————地址：銅鑼灣告士打道280號世貿中心4樓8號舖電話：26081833～～～～～～～～～…查看更多

燒肉LIKE (屯門)好食度： 😋😋😋/5性價比： 😌😌😌😌/5回頭率： 🚶🏼🚶🏾🚶🏻/5價錢：HKD48係探完港女之後，港男嚟到V City諗住醫下肚。行嚟行去，最後都決定嚟食燒肉like ，平得嚟又有少少儀式感咁。咁話晒都係一人燒肉，咁面壁食就係基本㗎啦，不過都真係好方便嘅，而且最平HKD48就可以食到燒肉，真係幾抵嘅，難怪越來越多一人燒肉店嘅開幕。老實講港男就唔係第一次食燒肉like嘅，不過佢嘅水准真係都幾浮動下，一時又正常，一時又可以好差，好彩今次算係正常嗰次。HKD48 100g嘅牛五花，六片牛肉，連埋飯、沙律菜同麵豉湯，份量上算係咁啦。牛望落都正常，可以接受啦。個麵豉湯就好淡好似水咁，但睇價錢份上，都可以接受。個沙律菜就好鹹，原本以為黑色汁應該係黑醋之類吧，但感覺好似加咗豉油咁，有啲鹹。不過整體嚟講，呢個價錢，食到餐可以維生嘅食物就已經好好了🫡———-//////————地址：屯門屯門鄉事會路83號V City1樓L1-9號舖電話：26820867～～～～～～～～～#堂食 #kongerguy #kongercouple #搵食 #情侶 #港侶 #couple #foodie #food #美食 #燒肉 #燒肉like #屯門 #牛五花 …查看更多

周記點心 (流心點心) (天后)話說其實港男都幾喜歡食點心，呢間點心店經過幾次都未試過，咁啱今次tea time行過又未食晏，見佢下午茶時段做緊免加一，咁就一於試吓先。首先現場環境係坐得幾舒服嘅，座位間完全唔會話太逼。呢度就無收茶錢嘅，所以要飲茶就要自己另外嗌啦。咁港男就叫咗幾款點心再加流心西多。蝦餃話明一口真係偏細粒，但蝦係彈牙嘅，好味。鴛鴦燒賣一半係正常普通款嘅燒賣，另一半係有黑松露係上面取代蟹子嘅燒賣，個蝦同樣彈牙，而有黑松露嘅就梗係香口好多啦。金錢肚惹味，正。流心西多奶皇流心，脆、熱、流心美味。總體嚟講，雖然唔算平，但味道係幾好嘅，咁啱行過又想食點心係可以嘅。好食度： 😋😋😋😋/5性價比： 😌😌😌/5回頭率： 🚶🏼🚶🏾🚶🏻/5價錢：HKD148———-//////————地址：天后琉璃街13號南景樓地舖電話：28329968～～～～～～～～～#堂食 #kongerguy #kongercouple #搵食 #情侶 #港侶 #couple #foodie #food #美食 #天后 #天后美食 #流心點心 #流心西多士 #點心 …查看更多

饗樂町 (油麻地)好食度： 😋😋/5性價比： 😌😌😌/5回頭率： 🚶🏻/5價錢：HKD64話說港男剛好嚟到旺角，需要食個快飯再join朋友。咁呢間饗樂町就經過時見過好幾次都未食過，咁見佢平平地就試一次啦。啲食物個價錢係旺角嚟講真係好抵，尤其是重係正大街添，雖然堂食有加一，但仍然超平，所以就直接試刺身丼，睇吓伏唔伏。咁港男就揀咗炙熱邊鰭海鮮丼，因為見到有比目魚，點知知嚟到變咗三文魚，原來餐牌底有句話「菜式依季節變化，以門市現場供應為主」，相當保險嘅說法啊吓🤷🏻‍♂️咁成個刺身丼就有埋麵豌湯同海帶做前菜嘅。個麵豉湯偏淡但聞落有少少魚味。而啲海帶睇落勁似啲湯渣，不過都叫有另外調味嘅。至於主菜刺身丼呢，個飯量就不少，但係呢隻碗太大，搞到成個賣相睇落好似無咩食咁款，當然加返多啲刺身係好啲添，至少都畀返比目魚我啊🤷🏻‍♂️刺身丼啲刺身以價值嚟講可以接受啦，不過啲飯就有陣強烈怪味，偏酸得嚟似有浸菠蘿味咁，十分奇怪🤔同埋呢度幾有趣嘅係自助得嚟又好唔自助，首先餐廳係收加一嘅，但如果要水呢，係需要自己出去自助區斟嘅。但入座又一定要有人帶你坐低先，因為待應要畀一張佢親手寫好枱號嘅落單紙畀你，然後填完再交返畀佢🤔總括嚟講，有啲嘢試過一次就夠，亦明白到點解成日行過間嘢入面都能夠搵到位🫡———-//////————地址：油麻地彌敦道554號寶聲大廈地舖電話：37047951～～～～～～～～～#堂食 #kongerguy #kongercouple #搵食 #情侶 #港侶 #couple #foodie #food #美食 #油麻地 #饗樂町 #刺身丼 …查看更多

町町丼丼 (九龍灣)好食度： 😋😋😋/5性價比： 😌😌😌/5回頭率： 🚶🏻🚶🏼/5價錢：HKD57，照燒雞扒配胡麻醬烏冬港男剛好喺九龍灣企業廣場發現咗間新餐廳，就決定一於試試啦。印象中呢個位置都經常轉手咁，今次就開咗間日式料理，選擇都幾多，又有牛肉丼飯、手撕雞、沙律、蕎麥麵、咖哩、蛋蓋飯等等，驟眼見都幾多人會叫壽喜燒牛肉鍋，不過佢就唔係真係有火爐燒住咁，只係將所有食物放晒入個外賣兜入面咁上，無錯，雖然有堂食，但呢度啲食物都係會用外賣兜上嘅，最近都見到有唔少餐廳咁做，應該係為咗慳個洗碗人手。咁港男就叫咗個照燒雞扒配胡麻醬烏冬，係好似啲米線咁分咗上下隔嘅外賣碗咁上嘅。個燒雞扒係okay嘅，個烏冬就好似未夠時間雪返凍少少，係溫熱嘅。當快餐嚟講係可以接受嘅程度，不過唔會特別想試第二次。———-//////————地址：九龍灣常悅道9號企業廣場1期1樓5A-5C號舖～～～～～～～～～#堂食 #kongerguy #kongercouple #搵食 #情侶 #港侶 #couple #foodie #food #美食 #九龍灣 #町町丼丼 #照燒雞扒烏冬 #企業廣場一期 …查看更多

Sushi Men x Oyster Men (筲箕灣)好食度： 😋😋😋😋/5性價比： 😌😌😌😌/5回頭率： 🚶🏽🚶🏿🚶🏼🚶🏾🚶🏻/5價錢：HKD636，自選32件壽司加3款共18件卷物估唔到原來係東大街最最最入面嘅位置有一間咁嘅壽司加生蠔店嘅存在。呢間店細細間，堂食嘅位置唔多，而且外賣自取重有優惠添，所以港男梗係嚟個外賣自取試試先啦。不過可能人手唔多，建議先落單再取可能會方便啲，唔洗等咁耐。今次港男淨係試咗有外賣優惠嘅壽司同卷物，可以任意選擇同配搭，所以只要想的話，應該可以全選海膽，最抵食之選啊。但港男同朋友們就真係每樣都點啲，試吓味咁。話說啲壽司同卷物都比預期中好味，咪以為唔係咩旺區就無好嘢食，雖然間店嘅位置真係好唔旺，但質素又真係幾唔錯。首先所有魚生都好新鮮，海膽入口即融唔臭唔苦，三文魚同帶子都好厚身。最有趣係北寄見唔係對半𠝹開咁畀一片，而係成隻完整兩片咁上，都真係好充料。老實講，筲箕灣以壽司嚟講真係質素完勝咁濟，係回頭率極高嘅餐廳。———-//////————地址：筲箕灣筲箕灣東大街2號麗東海景豪苑1座地下2號舖電話：23880022 / 67641228 Whatsapp ～～～～～～～～～#外賣 #kongerguy #kongercouple #搵食 #情侶 #港侶 #couple #foodie #food #美食 #foodiehk #筲箕灣 #筲箕灣美食 #筲箕灣東大街 #shaukeiwan #shaukeiwanfood #shaukeiwanmainstreeteast #壽司 #海膽 #三文魚子 …查看更多

御滿屋日本料理 (旺角)好食度： 😋😋😋/5性價比： 😌😌😌/5回頭率： 🚶🏿🚶🏻/5價錢：HKD317港男都真係好耐無食過放題了，雖然胃口唔大，不過一個價錢任點任叫又真係一種爽嘅感覺嚟嘅。但其實港男對旺角一帶嘅放題係有相當戒心，因為要伏起上嚟真係勁伏。好在呢間話晒係連鎖店，有返少少質素保證嘅。由於港男選擇咗嘅係最平嘅放題級別，所以其實刺身同壽司嘅選擇都唔太多，咁基本嘅刺身，三文魚、帶子、北寄貝、八爪魚都有嘅，屬於正常水準。壽司方面有港男最愛嘅炙燒左口魚就搞得掂，而手卷就有海膽食，不過質素就唔好太大期望啦。咁其他重有啲熟食啊、天婦羅啊、串燒可以選擇。而比較有驚喜到港男嘅係個碗仔翅幾好食喎，唔會太多粉又唔會太過稀咁，唔錯。最後每個人都可以揀一客Movenpick嘅雪糕，不過啲雪糕嘅存放狀態就麻麻咁啦🤷🏻‍♂️總體嚟講質素一般，未知貴價一啲嘅放題選擇會否好啲多啲，但若這個最平的計劃就試過就算了。———-//////————地址：旺角彌敦道655號胡社生行1樓電話：36223338/36223336～～～～～～～～～#堂食 #kongerguy #kongercouple #搵食 #情侶 #港侶 #couple #foodie #food #美食 #放題 #壽司 #旺角美食 #旺角 #御滿屋日本料理 …查看更多

樂園魚旦專家 (九龍灣)好食度： 😋😋😋/5性價比： 😌😌😌/5回頭率： 🚶🏿🚶🏽🚶🏻/5價錢：HKD43，雲吞麵加配炸雲吞可憐嘅九龍灣無咩平平粉麵食，淘大花園呢間樂園魚旦已經係比較平嘅一間嚟。姐係有時港男唔想食太多，想食吓粉麵都會過到嚟呢度食嘅。咁一碗「細蓉」就卅三，可以加錢要嘢飲或許小食，咁港男就加埋個炸雲吞添，呢度雲吞都幾好食，入面隻蝦係好味，唔會係霉霉爛爛咁。雖然個湯底同麵都係普通，湯有啲淡口咁，不過呢個價錢，係咁上下㗎啦。———-//////————地址：九龍灣牛頭角道77號淘大商場1期地下G12-15號舖電話：23639628～～～～～～～～～#堂食 #kongerguy #kongercouple #搵食 #情侶 #港侶 #couple #foodie #food #美食 #九龍灣美食 #九龍灣 #雲吞 #雲吞麵 #炸雲吞 …查看更多

日和号壽司料理 (九龍灣)好食度： 😋😋😋😋/5性價比： 😌😌😌/5回頭率： 🚶🏻🚶🏿🚶🏽/5價錢：HKD586 話說有日見到呢間日和話做緊半價，咁就諗住去試試。入到去其實唔係太多客，不過無計啦，地點問題，megabox真係好難話會好旺場嘅。咁坐低睇吓個半價menu ，都無話因為半價就得好少選擇，基本上想食嘅都壽司種類都有。咁就決定係個半價menu上，無論刺身、壽司定小食都嗌一啲啦，咁刺身方面就要咗三文魚腩、八爪魚、帶子、北寄貝。而個三文魚腩夠肥，食落好有滿足感。其他刺身都係合格以上，新鮮嘅就無死錯人嘅。另外壽司都嗌咗幾多下，叫咗海膽軍艦、三文魚籽軍艦、香葱吞拿魚腩碎軍艦、火炙左口魚邊壽司、火炙三文魚腩壽司、帆立貝壽司、火炙柚子胡椒帆立貝壽司、胡麻醬火炙帆立貝壽司、鰻魚壽司、七味火炙鱈場蟹棒壽司、油甘魚壽司同劍魚腩壽司。真係無因為半價而淨係做啲平價貨出嚟，而係海膽、三文魚子呢啲都做到半價，半價咗之後其實係抵食嘅，而且都無話將貨就會，多數壽司都係新鮮好味，唯獨係個火炙柚子胡椒帆立貝好似唔夠新鮮，柚子胡椒都冚唔住陣味，但好奇地，其餘兩款口味嘅帆立貝係新鮮無事㗎喎，而原味係最能食得出佢新鮮嘅。其實個海膽都好新鮮，完全唔腥。另外三文魚子都唔係醃到超鹹嘅嗰啲嚟。再加上個火炙左口魚邊，燒過嘅魚身，令到啲油脂出晒嚟，重要咬落係爽口，唔係薄到一燒就就融晒咁濟。至於呢度嘅小食就只得一款，就係八爪魚小丸子，老實講就普通，粒小丸子係脆口嘅，但入面粒八爪魚就真係勁少勁細粒，無咩咬口，反而啲漿就灌到滿滿咁，有改善空間囉。另外重叫咗啲嘢嚟飲吓，分別係凍柚子玫瑰花蜜同芒果梳打。應該係飲時無攪渾，杯凍柚子玫瑰花蜜開頭飲落勁清，㺯底時就好甜，所以要攪好啲再飲會好啲。而杯芒果梳打就好好飲，飲落去係有種爽嘅感覺。呢度啲職員都好勤力咁收碟，而且都有聽到佢哋同其他枱嘅人解釋吓半價嘅詳情同埋點用QR code落單咁。整體個體驗都唔錯。———-//////————地址：九龍灣宏照道38號Megabox 10樓5號舖電話：23590025～～～～～～～～～#堂食 #kongerguy #kongercouple #搵食 #情侶 #港侶 #couple #foodie #food #美食 #megabox #日和號壽司料理 #壽司 #刺身…查看更多

立体派拉麵 (威靈頓街) (中環)好食度： 😋😋😋/5性價比： 😌😌😌/5回頭率： 🚶🏿🚶🏽🚶🏻/5價錢：HKD304，兩碗拉麵同章魚小丸子其實之前見到有滿滿打咭感嘅拉麵時，港男已經好想可以去食㗎啦。可惜限量嘅關係，今次係食唔到打咭拉麵嘅，不過無關係啦，都可以試吓嘅。溫馨提示，餐廳入口相當隱蔽，喺樓與樓之間有條巷仔，巷口有個路牌寫住閒人免進，但一落樓梯就會見到餐廳㗎啦。內裏座位數目比港男想像中多，除了中間類似吧枱嘅位，另外都有不少四人枱setting 㗎。港男同朋友分別叫咗特級白湯拉麵同特式辣味濃厚白湯拉麵，再加一份章魚小丸子。拉麵上到嚟時，港男有試咗一口朋友嘅辣味湯底，其實就真係得啲辣粉，唔會話好辣，湯底唔知點解有少少似咖哩味咁。至於港男本身就要特級白湯拉麵，聞落有陣淡淡嘅雞湯味，食落都食到少少嘅。而湯底加咗牛油，就會食到濃厚嘅感覺。而呢度唔止隻碗大，內裏份量都好足，加上即溶嘅叉燒，男士食都夠飽。至於章魚小丸子作為口痕想嗌多少少作小食嚟講係合格嘅。———-//////————地址：中環威靈頓街27-29號元益大廈地庫電話：23990811～～～～～～～～～#堂食 #kongerguy #kongercouple #搵食 #情侶 #港侶 #couple #foodie #food #美食 #中環 #中環美食 #central #centralfood #拉麵 #立体派拉麵 #八瓜魚小丸子 #特級白湯拉麵 #辣味濃厚白湯 #隱閉 …查看更多

No Milkshake No Life (白田街) (石硤尾)好食度： 😋😋😋😋/5性價比： 😌😌😌/5回頭率： 🚶🏻🚶🏿🚶🏼/5價錢：HKD79，石板街奶昔其實港男係好喜歡飲奶昔嘅，咁見到間餐廳以奶昔係主題囉喎，梗係要去整返一杯啦。由於港男就已經食飽飽，同埋等位嘅人都比較多，所以就只好外賣了。咁奶昔係有棉花糖、朱古力，而奶昔就似係朱古力味嘅。味道不錯，不過啲朱古力有啲重係一大整塊，同埋啲棉花糖好易塞飲管，只靠吸管，係街度真係搞唔掂，可能真係要搵日入去坐低慢慢飲再嘆埋burgers 啦。———-//////————地址：石硤尾白田街13號美葵樓地下G01號舖電話：98163818～～～～～～～～～#外賣 #kongerguy #kongercouple #搵食 #情侶 #港侶 #couple #foodie #food #美食 #nmnlhk #石硤尾 #石硤尾美食 #奶昔 #mikeshake #nomikeshakenolife #石板街 …查看更多

鬼混 (西環)好食度： 😋😋😋😋/5性價比： 😌😌😌😌/5回頭率： 🚶🏻🚶🏿🚶🏼🚶🏾🚶🏽/5價錢：@HKD390 話說港男相當黑仔，第一次想去試呢間餐廳時，無預約，點知一去到就遇上有人包場搞生日🤦🏻‍♂️而且近期這已經係港男第二次遇上同類嘅事添。因此呢次同朋友就打電話預約定先，咁就實無死啦。首先去到餐廳個環境真係好靚，係充滿住打咭位，好多特別嘅擺設。連去洗手間嘅門上面都特點，不過港男都真係好想知，係洗手間可以有咩miracle happens 呢？總而言之呢度真係可以有排影相㗎。然後港男一行四人被安排咗喺一長八人枱，同枱重有啲蘑菇擺設添，又係可以打咭嘅時候啦。咁影咗咁多相都係時候睇吓食乜啦，就咁睇都有好多幾得意嘅食物組合咁，真係樣樣都想試吓咁。咁最後港男就同朋友們叫咗椰椰咖哩粉薯條配牛油果醬、麻辣凍的蜆、雙色焗蠔、香煎鴨肝配封門牛柳、龍蝦沾麵同滷水香煎鵝肝芝士燉飯，然後港男就叫咗杯桂花金橘蘋果沙冰飲吓啦。其實餐廳提供嘅飲品都好特別，啲結合又係幾有趣咁，有機會或者下次可以試試其他呢。首先講吓杯嘢飲先，開頭第一啖飲落有啲青青哋嘅感覺，可能係陣蘋果味，之後再飲就覺得清清哋幾好飲。之後送上嘅椰椰咖哩粉薯條配牛油果醬，薯條係好似m記咁糝滿shake shake粉咁，係好夠味嘅，但美中不足係嗌咗牛油果醬，實在係太固態狀，比較難蘸到醬，同埋啲薯條全部都偏腍身，但港男就比較喜歡食脆嘅。而個麻辣凍的蜆都好味，雖然只係普通嘅麻辣味，但對會想食辣嘅人嚟講係惹味嘅，而其實佢唔係好辣，真係食個癮㗎咋，對追求地獄辣嘅人嚟講就唔好太大期望。再嚟就係滷水香煎鵝肝芝士燉飯，係幾特別嘅，滷水味好香，比港男嘅感覺係似食緊意式魯肉飯咁，而且係好味嘅，再加上個鵝肝都煎得很好，值得再食。雙色焗蠔上到嚟，終於知道係咩色同咩色啦，一個係平常嘅芝士焗，另一個係黑色嘅疑似豆豉焗，不過港就食咗最穩陣嘅芝士焗蠔，不過聽朋友回報黑色焗唔伏，但唔太特別，試一次就滿足。香煎鴨肝配封門牛柳都擺盤擺得幾好睇咁，好味，但無話太驚艷到港男。至於個龍蝦沾麵其實唔太沾麵，因為啲湯汁一早放埋一齊住到吸收晒，反而似係pasta咁，只係啲麵換咗做拉麵咁姐。味道係唔錯嘅，但沾麵個名欺騙咗港男嘅感情🤷🏻‍♂️食完正餐就梗係食甜品啦，由於三款都吸引到朋友們，而小朋友先做選擇㗎咋，所以要晒三款。首先出場嘅係打咭之選迷幻蘑菇，上菜前職員會等你ready好先揭蓋嘅，所以就係拍片嘅好時候啦。雖然打咭真係一流，但味道普通，菇柄嘅係幾好味嘅，但個菇蓋就一般，如淨食啲雪芭就太酸，如果連埋上啲硬硬嘅糖霜又太甜，不過港男就無試過菇蓋連菇柄一齊食，可能可以中和少少都唔定。然後個爆谷火山配雪糕又係一個打咭之選，但打完咭之後就真係好普通嘅爆谷，純粹係黏成一舊火山咁，味道無咩特別。而個鐵觀音芝士蛋糕都係好味嘅，但亦都係唔會有太大驚喜噉。總括而言，餐廳佈置一流，打咭位處處，食物水準同賣相都好好，不過甜品類可能要多啲花款，否則真係試過一次就夠。但係港男仍然相當推介呢間餐廳，係可以再試之選。———-//////————地址：西環南里8號地舖電話：59202838～～～～～～～～～#堂食 #kongerguy #kongercouple #搵食 #情侶 #港侶 #couple #foodie #food #美食 #鬼混 #viewonwon #viewonwonhk #viewonwon餐廳 #西環美食 #西環 #迷幻蘑菇🍄 #saiwan #saiwanfood …查看更多

韓二妹 (銅鑼灣)好食度： 😋😋😋😋/5性價比： 😌😌😌😌/5回頭率： 🚶🏻🚶🏽🚶🏼🚶🏿/5價錢：HKD56，黑椒薯仔牛柳粒飯加紙包飲品港男因為係附近上堂，係放Lunch時發現呢間舖，而最先吸引港男嘅係外面牆上嘅畫。店內堂食位置不多，而且係由兩位店員負責打理全店。好彩港男去到時時間尚早，一嚟有位坐，二嚟唔洗等太耐就可以有嘢食。港男就揀咗個黑椒薯仔牛柳粒飯，然後加兩蚊要咗包檸檬茶飲嘅。噉個飯啲牛柳係即整嘅，然後上到嚟都好特別吓，因為啲飯壓成咗貓貓嘅形狀噉，幾有趣。啲餸嘅汁、肉、薯仔都好味，餸飯食一流。而其實港見到都好多訂單係叫紫菜包飯，或者下次再嚟嘅時候可以試吓。———-//////————地址：銅鑼灣禮頓道106-126號禮信大廈地下20-21號舖電話：91373635～～～～～～～～～#堂食 #kongerguy #kongercouple #搵食 #情侶 #港侶 #couple #foodie #food #美食 #銅鑼灣 #causewaybay #causewaybayfood #銅鑼灣美食 #貓 #韓二妹 #黑椒薯仔牛柳粒 …查看更多

曼谷車站 (牛頭角)好食度： 😋😋😋/5性價比： 😌😌😌😌😌/5回頭率： 🚶🏻🚶🏿🚶🏾🚶🏼/5價錢：HKD48，豬頸肉炒飯連熱飲原本港男諗住食粥嘅，點知一場嚟到先發現間粥店已經結業添🤷🏻‍♂️噉唯有係得寶商場搵吓有乜食啦。噉就見到呢間曼谷車站嘅價位都幾平噉，一於就試試佢啦。咁港男就揀咗啲安全之選，就係你啦，豬頸肉炒飯。噉個炒飯一上到嚟係熱辣辣嘅，感覺上應該係即叫即製噉，其實食物本身熱度夠就已經加分不少啦。而炒飯味道係可以嘅，豬頸肉就不過不失啦，雖然唔夠肥，但HKD48嚟講，所有嘢都好合理，重要包埋熱飲同可以堂食喎，係可以再幫襯之選。———-//////————地址：牛頭角牛頭角道3號得寶商場1樓218號舖電話：28912298～～～～～～～～～#堂食 #kongerguy #kongercouple #搵食 #情侶 #港侶 #couple #foodie #food #美食 #九龍灣 #九龍灣美食 #kowloonbay #kowloonbayfood #牛頭角 #牛頭角美食 #曼谷車站 #豬頸肉炒飯 …查看更多

大叻越南牛肉粉餐廳 (灣仔)好食度： 😋😋/5性價比： 😌😌/5回頭率： 🚶🏻/5價錢：HKD58，生牛肉湯檬午餐時刻經過灣仔但又無咩胃口，想食啲粉麵類啦，就見到呢間，所以港男就打算試試佢啦。噉呢度就係一個主食，想飲嘢就加錢先有啦，就熱飲加2、凍飲加5噉計啦。不過港男就無加到，因為諗住陣間飲其他嘢。主食方面港男就要咗一個生牛肉湯檬啦，上菜都好快嘅。不過落單就好慢，都比較難搵到人，但人手又唔會話係唔夠，但好多時塞哂喺出菜位度。咁個生牛肉湯檬就正常啦，無咩特別，不過啲肉有少少太過黏埋咁，要畀啲心機分返開先，咁先易啲浸熟啲。啲職員全用一啲我聽唔明嘅文溝通，唔知係咪真係越南嚟呢？🤔不幸地呢餐發生咗啲事，令港男邊食邊驚心。事緣搭枱嘅一位女士同職員話佢食到啲硬嘢，想問係骨定指甲喎，職員就快快手拎走咗，然後話呢啲嘢食嚟㗎嘛，點會有指甲呢。搞到港男真係要好小心咁食呢🤷🏻‍♂️———-//////————地址：灣仔蘭杜街8號地下電話：25276788～～～～～～～～～#堂食 #kongerguy #kongercouple #搵食 #情侶 #港侶 #couple #foodie #food #美食 #灣仔 #灣仔美食 #wanchai #wanchaifood #大叻越南牛肉粉餐廳 #大叻越南牛肉粉 #生牛肉河粉 #越南菜 #午餐 …查看更多