煮食男's Profile

非常驚訝，呢度竟然係米芝蓮一星！先講服務，侍應表現出嚟好似係幾殷勤咁，但講出嚟嘅每一句「多謝哂」同「唔使客氣」，完全感受唔到嗰份誠意，反而好強烈感受到只係好生硬毫無情感咁回應客人，完全係貌合神離！原來米芝蓮覺得呢啲咁嘅服務都OK 㗎？講到食物，味道尚算唔錯，個別菜式都算精緻，但有啲就眼高手低，特別係嗰個白汁脆皮遼參！廣東菜嚟講，個炸皮要夠靚，唔使講都一定要炸兩次，第二次係大火翻炸逼返啲油出嚟，呢啲咁基本嘅技巧，真係唔使再多講啦！但睇吓條脆皮遼參！！嗰層炸皮朔滿晒油，根本啲油都冇逼到出嚟，只能夠話個廚師嘅功力真係好唔掂掂囉！另外，就係件琵琶豆腐，上碟嘅時候望落去洩哂氣咁，究竟係本身嘅用料令佢下榻無法漲起，定係廚房煮起擺得太耐先至上菜，的確係一個疑問！最後，就係個招牌炒飯，呢個招牌炒飯叫得招牌兩個字應該係好有信心之作，可惜飯粒太濕太軟，能夠唔係炒埋一舊，都算有返咁上下功力，但口感食落真係比一碟靚嘅炒飯濕得滯⋯⋯個燉湯同蒸龍躉腩，算幫佢加番少少分啦，燉湯各方面都合格，而條龍躉質素相當唔錯，可惜蒸嘅火候稍為有少少過熟，但都可以接受。整體嚟講，食完呢餐真係完全感受唔到佢係米芝蓮一星嘅工價，所以食完呢餐之後，印象只記得上面幾道出品比較差嘅菜式，其餘嘅菜式，都冇乜想返轉頭再食嘅衝動。…Read More

官塘友招牌寫住係清湯腩，但入面亦有推介雲吞麵，而且餐牌排位置頂，所以⋯⋯試伏。雲吞係全蝦，每粒雲吞有隻半蝦，蝦爽，但食唔出鮮味，因為調味好重手，蓋過晒所有食物本來嘅味道，而且調味有點怪，鹹得來偏甜，總之一個字：味道偏甜怪怪地！湯底預設自動波加腩汁，又係得一個字：鹹！味精湯，食完即刻頸渴⋯⋯ 讚嘅係，粗麵爽滑，多滑少爽，冇乜鹼水味，ok幾好。雖然冇韮黃，但啲蔥又幾香喎！總括來講，唔算太伏，但收呢個價錢，我諗唔到回頭嘅理由⋯⋯…Read More

聽聞呢間位於街市嘅拉麵小店有一段時間，但因為懶所以冇特登去搵食，早幾日終於的起心肝去尋寶。中午時間，小店處理非常多嘅外賣，亦有好多學生哥同街坊幫襯，所以耐心等候師傅煮麵。麵餅估計應該係由中央工場製作，見師傅只係將麵餅放入唔算大滾嘅熱水淥麵，並冇用什麼計時器量度淥麵時間。然後切叉燒、切糖心蛋放喺面上面，再放湯，再放上蔥花，最後加兩塊紫菜，碗麵就上枱。從賣相嚟睇，各樣材料排得好靚，一絲不苟。第一件事，飲啖湯先， 從佢舖頭嘅logo可以知道佢係用魚干熬製湯頭，但飲一啖即刻知道咩料，味道算鮮甜嘅，但都幾重味精！跟住食啖麵，唔錯喎，軟硬適中，有少許煙韌咬勁，好啱個人口味！糖心蛋冇乜特別，並唔係用醬油醃製嘅味付玉子，只係普通嘅溏心蛋，但火候控制得好好，溏心好靚！到慢煮叉燒，果然做到慢煮嘅效果，一啲都唔鞋口，好軟熟，咬落有淡淡嘅鹹香肉香！筍嘅味道正正常常，唔會有腥味，而蔥花勝在唔係用青蔥，否則就大煞風景啦！$40一碗拉麵嘅價錢，真係冇乜嘢太苛求嘅地方，但佢仍然一絲不苟做出$40應有嘅水準，除咗個湯底味精比較強烈之外，實在係值得大讚cp好高！而且，感覺就好似喺日本街邊食拉麵車仔檔嘅風味！…Read More

時間關係，又想食鋸扒西餐，行過見到午餐餐牌，價錢好似幾實惠喎，求其坐低試吓。有兩個餐牌，一個係普通嘅lunch set，另一個係半自助午餐。入座時快眼睇咗自助頭盤吧枱上面嘅食物質素⋯⋯哦，唔使客氣啦，費事浪費自己quota。其實普通lunch set嘅餐牌，上面都算幾豐富，有餐湯、沙律、主菜、甜品、飲品，都只係呢個價錢，算係咁啦，今時今日，茶餐廳食個鐵板餐，加杯凍飲，視乎你食乜都要一舊水左右啦！唔想食咁多澱粉質落肚，又唔想食牛，見到有雞豬拼，啱晒！不過發現佢中英文譯名有少少出入，中文就講到塊豬柳好似英國來貨咁，英文就冇寫清楚，但係另外嗰個半自助餐嘅餐牌，英國豬柳係寫明English的🤣🤣🤣，貴$40⋯⋯但算吧啦，呢個價錢⋯⋯好啦，先來嗰餐湯，質素係慘不忍睹。用漿糊嚟形容真係非常貼切，好明顯係用麵糊加雞湯推開嘅所謂忌廉湯，至於裏面有冇落忌廉，小弟真係食唔出。至於味道，我只係食到雞精加砂糖嘅甜味，即係扮出嚟嘅鮮甜🤣🤣🤣。沙律都冇乜驚喜，普普通通。就係啲沙律菜上面放兩半車厘茄，加啲雜菇，再加幾粒所謂香草燒雞，就係咁樣。沙律菜冰凍都係好事嚟，因為咁樣先顯示到係新鮮，但估唔到啲雜菇同埋香草燒雞都係好凍，好似喺雪櫃啱啱攞出嚟一樣。OK嘅，小弟小弟食開日本嘢都係凍嘅，所以OK冇問題🤣🤣🤣 (後尾臨走再望一望自助頭盤吧枱上啲嘢食，原來都係嗰啲沙律菜，嗰啲雜菇⋯⋯)主菜一上枱，賣相一啲都唔吸引。個汁好深色好dry，一啲色澤光彩都冇⋯⋯所以係冇期望嘅情況下，我第一刀就鋸落塊豬柳上面，都有啲實淨喎⋯⋯放落口一咬，反而有少少驚喜，原來嗰種硬淨，咬起嚟係有啲爽彈，的確係一嚿幾有咬口嘅豬柳，而且底味都足夠，只不過配嗰個偽肉汁，就有d多咗。食到去嚿豬柳邊，仲有多少少驚喜，就係條好爽口彈牙嘅肥膏，都正喎！食完嚿豬柳都真係有少少飽，所以對半邊嘅燒雞都係冇乜期望。所以為咗自己嘅味蕾着想，食咗隻雞脾先⋯⋯又OK喎，咬落裏面肉質鬆軟，仍然有肉汁，合格有餘！咁食到去雞胸，總會差少少，但可以接受。如果以一個食肉獸來講，呢碟雞豬拼嘅份量都算幾滿足！甜品係一件普通嘅小蛋糕，叫做過下口癮喺隻碟上面竟然用糖漿畫圖案，雖然眼高手低，但充滿誠意👏🏼👏🏼👏🏼 。凍檸水檸檬嘅份量都幾充足！順帶一提，而家有啲西餐廳水杯已經轉用膠杯，洗得兩洗，卒到花晒，好似磨砂咁。但呢度仍然用玻璃杯，都算有誠意，可惜隻玻璃杯質素真係麻麻，好花，所以唔靚。結論，好飽。…Read More

夜晚經過葵芳廣場，見有客家菜，朋友話不如試吓，其實自己都幾鍾意客家菜嘅味道。晚上嘅餐牌主打都係套餐，真係豐儉由人，視乎你想點配搭，總會揀到鍾意嘅組合。兩個人想平平哋，最好就係食孖寶：一條細沙巴躉＋一個餸。格價完畢之後，朋友發現配搭當中食客家鹽焗雞係最抵食，因為鹽焗雞散叫嘅價錢比其他配搭貴，所以孖寶套餐裏面配搭鹽焗雞，然後散叫客家釀豆腐，啱晒數，抵食！講返食物嘅質素，條沙巴龍躉好新鮮，蒸嘅時間啱啱好，剛剛離骨，豉油調味唔錯，適中唔太鹹，整體上對條魚好滿意，但沙巴躉就預咗啲肉唔會太有魚味，因為始終係養魚。好耐未有機會食過呢種真正明火焗過嘅鹹雞，對上一次食應該係喺大澳嘅東方小祇園，呢種煮法嘅客家鹽焗雞唔係淨係包紙放喺鹽堆裏面焗，即係東江大飯店或者醉瓊樓嗰種，而係真正用明火焗過所以特別有鹹香味！但對雞肉就冇期望，因為明知佢係冰鮮雞，肉質唔算嫩滑，但可以接受。最後係客家釀豆腐，呢味餸見到係枱枱都叫，所以跟隊；但原來係用鐵板上，有啲失望，因為正宗嘅好多時係用砂鍋上。味道方面正常。但印象記得細個有食過另一個版本係用油豆腐做，比較喜歡油豆腐版本。但而家酒樓上菜一定考慮賣相，用嫩滑豆腐一定美觀啲。…Read More

一直以來呢度最出名就係湯底，第二就係佢哋話自己嘅用料都好好。以前食過海龍皇湯麵、佛跳牆湯麵，都係呢度嘅手本名菜之一。今次諗住食真啲個高湯嘅味道，就要左風乾火腿湯麵，其實係一疊52個月嘅風乾火腿再加一碗高湯湯麵，裏面都有少少其他嘅配料包括竹笙、銀牙、金華火腿絲、蔥粒等等。52個月嘅風乾火腿係令人有啲失望，當然唔可能期望佢由一隻完整嘅豬髀切出嚟，好明顯係預先切好晒嘅預先包裝風乾火腿。味道方面，好鹹！非常非常鹹！鹹到好難慢慢咀嚼去食出火腿本身嘅肉味，因為你咀嚼幾啖之後，嗰啲鹹味已經充滿晒喺個口腔，已經遮掩晒其他所有嘅味道，我甚至乎覺得係鹹到一個地步after taste有啲微苦。所以，喺呢個用餐嘅經歷上，完全唔享受到呢52個月風乾火腿應有嘅鹹香嘅味道⋯⋯而且肉質好死實，咬落有筋要吐返出嚟。至於碗麵，啲少量嘅配料正正常常冇乜問題，竹笙索湯ok好味，竹笙、銀牙芽本身爽口，夾着啲麵一齊食啱晒！但問題啲湯都係好鹹，當然你可以話佢好濃味，但我喺其他嘅食店曾經飲過一啲高湯，可以做到濃而不死鹹。但可以讚賞佢嘅係，我飲完唔會覺得太過份地口渴，即係佢冇額外添加味精，都係用金華火腿熬製出嚟嘅高湯。至於麵方面，佢係用扁陽春麵，好明顯目的就係想掛湯。但好可惜中式湯往往都係比較稀，唔似日本嘅豬骨醬油湯底、麵豉湯底、咖喱湯底較杰身，所以中式湯好難掛麵。因為今晚嘅湯底係純膏湯，就出現呢個問題，所以每一啖麵入口，我只感覺到麵還麵，湯還湯，係貌合神離嘅。今晚嘅52個月風乾火腿加埋佢今濃鹹嘅高湯，相信身體攝取咗非常大量嘅鈉，係一餐高納晚餐，之後都係少吃為妙，以免血壓飆升。…Read More

想同個朋友坐低慢慢傾吓計食啲嘢，所以諗住揀間Cafe & Bar可以食啲簡約西餐，又可以有酒飲⋯⋯一個Pizza，一碟pasta，再加個小食，差不多了吧⋯⋯點知個Pizza同碟pasta充滿「驚喜」，真心覺得好尷尬，好彩個小食正常返啲，但其實都係出事！瑪嘉烈薄餅 (Margarita Pizza)因為諗住Pizza想食清清地，所以就叫個Margarita啦，點知嚟咗件上面咁嘅嘢，我哋以為佢送錯咗，話唔係我哋㗎，我哋冇叫到蕃茄pizza呀，點知佢話呢個就係Margarita⋯⋯我哋呆咗半秒：「哦，咁你放低啦。」(一臉無奈) 究竟個廚師係咪多手鋪咗啲新鮮蕃茄喺面呢？佢知唔知鋪咗啲新鮮蕃茄上去焗出嚟係會出水㗎呢？佢又知唔知Margarita 只會放芝士同蕃茄醬，可以話係一種最簡單嘅Pizza呢？依家畫蛇添足咪多⋯⋯咗囉！呢啲佢以為係港式西餐加多塊蕃茄落去伴碟嗰d咩！？加上朋友一直都係意大利公司做嘢，佢真係真心接受唔到咁樣嘅Pizza，如果改用蕃茄乾，還好一點，可以接受，可惜而家咁樣⋯⋯再者，個pizza餅底其實都幾硬，食落去似食餅乾多過係Pizza，好明顯就係嗰啲低質嘅預製乾爭爭餅乾Pizza底⋯⋯經典水牛芝士忌廉火腿大通粉 (Classical Mozzarella Cream Ham Macaroni)呢碟pasta仲經典，堅係同佢個名一樣超「經典」！望落去啲火腿係咪似曾相識呢？就係朝頭早去茶餐廳，食早餐A火腿通粉嗰隻火腿啦！你堂堂一間西餐廳，就唔好咁孤寒啦，我真係以為你喺茶餐廳整緊火腿通粉呀！我真心未喺一間貌似西餐廳嘅地方食過呢啲用早餐火腿煮嘅pasta囉！呢個經驗真係完全令人「驚」訝！意式番茄肉丸配多士 (Italian Meat Balls in Tomato Sauce with Toast)OK ！呢個意式肉丸OK嘅，肉丸嘅質地都有啲似喺嗰間北歐傢俬公司冷凍食品部買嘅肉丸，個番茄醬都非常美味，但最敗筆嘅地方就係佢啲「多士」，與其話佢係多士，你係見唔到佢有toast過嘅痕跡，你去茶餐廳嗌件多士，你都會見到有少少金黃色吖，佢係完全冇，只係似將舊麵包切成一片片擺喺度風乾完一輪之後就拎上來⋯⋯咬落去好散，散哂⋯⋯諗咗一陣，就似係我哋去食港式豉油西餐嗰啲高級茶餐廳嘅所謂餐前多士一樣。呢間野唔可以話佢唔好食，啲味道係OK嘅，但啲用料真係太低手囉⋯⋯如果下次想飲嘢傾偈，我諗都係嗌番啲什麼小食拼盤炸炸炸炸炸炸嗰啲冇咁無奈⋯⋯…Read More

唔知幾時開始將 三才 擺咗喺自己個魚蛋粉list裏面，今日經過去食返碗，第一啖嘅魚片有微微嘅腥味，覺得胡椒粉可能唔夠，跟住第二啖食魚蛋⋯⋯ummmm 好努力咁慢慢咀嚼但始終食唔到魚鮮味，非常淡口，只能說調味適中，沒有嘗試用濃烈嘅調味來掩蓋不足之處，但質地較實唔彈牙，實在係失望嘅⋯⋯到炸魚皮，偏厚偏硬，唔鬆化⋯⋯食到一半有啲想放棄。其實一路食，一路見到有幾多街坊來買生料，雲吞水餃菠菜餃牛丸樣樣都有人買，但點解偏偏我食碗魚蛋魚片好似咁令人失望⋯⋯…Read More

今日7:00pm嚟到，佢哋好似就快收工，所以擺喺焗爐裏面嘅生煎包，相信已經係煎好有一段時間。咬開之後，完全冇汁！肉餡嘅調味係唔錯，包底都算煎得香脆，包身都算鬆軟，但就完全冇爆汁，係完全冇爆汁，絕對係完全冇爆汁！因為好重要，所以必須重複三次！見到網上不斷推介，唔同嘅KOL又出嚟吹捧，結果原來係完全冇爆汁！！！冇呀，包裏面一啲汁都冇呀！諗住入嚟元朗掃街擺佢喺尾門，結果中大伏！好彩，我都醒，淨係叫咗一隻包嚟試吓先，真係冇下次！…Read More

老友出嚟傾吓計，唔係小炒、打邊爐、雞煲，就係串燒。依家出街食餐飯都要限時限刻散水，所以一坐低大家即刻啤咗先，然後手指指點晒所有想食嘅嘢，爭取時間！啤酒呢樣嘢無他嘅，唔同人有唔同口味，但近排佢咁紅，梗係跟隊飲佢支持吓啦！但係，點都要夠凍先好飲！一放落枱，摸上手，冰凍嘅，掂哂！串燒嘅味道，一般都係落嗰幾種香料，呢度嘅味道唔算太複雜，未去到「土匪」嘅水平，但都已經算夠惹味亦入味。叫咗燒羊肉、牛舌、豬心、雞腎、雞尖，每樣基本上都處理得唔錯，最起碼唔會有雪味。咁並唔係話佢啲香料夠勁嵌過咗啲雪味，而係當你一路咀嚼嚿肉嘅時候，你除咗食到香料香味之外，仲有肉味本身而無雪味。肉質方面，豬心同雞腎夠爽口彈牙，牛舌夠軟熟，各樣都唔會有內臟嘅膻味；雞翼尖燒得夠乾身，羊肉肉質飽滿有咬口，但味道略嫌太平淡，欠缺咗羊肉應有嘅羶味，而且香料方面唔太食到孜然香，所以少咗份新疆羊肉串嘅風味。小菜反而有啲驚喜！大家叫咗薑蔥田雞煲、椒鹽豬扒，兩樣都非常夠鑊氣！椒鹽豬扒唔單止淨係得豆瓣醬回鑊，仲加咗大量嘅炸蒜粒，夾埋一齊食完全係另一個層次，只係略嫌覺得豬扒本身炸得未夠乾身就回鑊，所以有少許肥膩感。本身就好鍾意食田雞，田雞煲係喜出望外，除咗鑊氣夠，薑蔥份量亦非常足夠，薑片輕輕炸過更加突出薑片嘅香味，田雞嘅份量亦算充足，唯一覺得田雞嘅醃料太深色(唔通落老抽，但又有啲奇怪喎)，如果可以淡色一啲(但當然要保持味道)，成個餸會更加靚。另外，口痕又再叫咗燒雞泡魚乾，係平時食開嘅味道，冇乜特別。至於台灣腸就同預期有啲出入，記得台灣腸係有啲偏似臘腸，但呢隻就唔係，所以有少少失望，但味道的確係食開台灣腸嘅味道，只係口感咬落冇咁有臘腸feel。最後意猶未盡，嗌多碟青瓜同木耳，賣相好靚，由芫荽、蒜粒、辣椒粒、鎮江醋、到紅油，睇起嚟充滿層次感，但可惜青瓜唔拍開，所以唔太能夠朔汁入味，有啲失望， 但本身食材都係新鮮，爽口清甜。但兩個餸嘅味道都係略嫌陳醋太少，欠缺一份能醒胃嘅酸味。加埋晒啲啤酒，埋單每人＄250有找，價錢相對食物質素來講，性價比算幾好！至於環境，係傳統小店，地方狹窄，但都OK啦，裝潢係啲北方老店都可以話有啲打卡影相位，特別一提，佢店內嘅燈光又幾特別，現場又好影相出嚟又好其實都幾有味道。始終串燒店都係油煙多，所以感覺都係有啲啲黐立立，但都係果句，幾個大男人出嚟吹水，有凍啤有冷氣，好過熱辣辣坐街邊啦！…Read More

一直以來都未食過一幻，今日經過見唔多人排隊，就試一次 ... 但睇嚟近排仍然欠食運 ...其實喺門口已經聞到好香嘅蝦湯味，第一次食，叫返最基本嘅蝦湯拉麵。飲第一啖湯，蝦湯偏鹹，食到嘅蝦殼味道比聞起嚟嘅香味淡好多，心裏面已經一沉，唔通中伏？記得以前曾經喺別天神食過一次蝦湯拉麵，好似係期間限定，食第一啖真係好似味吉陽一咁嘩咗出嚟，果次就成為以後我食蝦湯拉麵嘅標準。而今次，唔可以話冇蝦味，但真係俾啲死鹹蓋過咗，給比下去 ...拉麵來講，麵身偏硬，仲帶有少少鹼水味。係我心目中，日本拉麵喺處理上，去鹼嘅能力遠比廣東生麵做得好，竟然喺日本拉麵店食到鹼水味真係唔掂。其實已經唔只係食落口先食到鹼水味，夾起啲麵已經輕輕聞到鹼水味 ... 所以，我最後放棄咗半碗麵，真係無謂嘥自己quota。叉燒方面，鞋口，我相信坊間有好多其他拉麵店做叉燒比呢度出色100倍！叉燒呢啲咁基本嘅嘢，都竟然做得咁差，似乎來貨嘅質素真係一個好大嘅疑問！溏心蛋方面，溏心流心嘅部份只佔蛋黃僅僅一半，火候處理未到家，絕對唔係好，只可以話合格。而醬油只係停留喺蛋白嘅表面，唔算太入味，所以食入口時，會覺得有有味嘅蛋白同冇味嘅蛋白撈埋一齊，感覺唔良好！為咗彌補呢個缺陷，浸落啲偏鹹嘅蝦湯裏面再食，反而令味道補救返一啲。餃子同樣令人失望，皮唔算話特別太厚，但一定唔係薄皮，而且偏韌，所以煎完乾乾地，韌嘅口感就更強，但係餡料就好鬆散，裏面嘅肉餡唔紮實，咬一啖感覺好似就係個口裏面散晒！最後嘅最後，配料唔係用日本蔥，改用中國蔥，令碗拉麵變得失色咗，但正正因為佢嘅湯頭鹽味太重，又好似襯返啲中國蔥，你話... ？唉～雖然價錢唔算講得上係貴，但真係物非所值。另外服務方面，都想加多一句，侍應姐姐擺碗麵落枱嘅時候，同好多雲吞麵鋪嘅阿叔一樣，噼啪，真係好豪邁！…Read More

見有人介紹話唔錯，Lunch特登搭幾蚊巴士上嚟試吓，叫咗碗牛雜河，講真都幾失望！🍲湯頭好單純嘅鹹味，冇乜鮮味！🍲金錢肚、草肚明顯炆得過火/太耐，直頭係入口即散，就算你冇牙都食得到！🍲牛腸、牛肺還可以，算有返啲彈性！🍲但牛膀又唔夠鬆！🍲其餘就係啲頭頭尾尾嘅邊位，好似搭俾你咁樣！特別係啲浮面嘅肥膏，令成碗野嘅賣相變得好難睇！🍲至於啲河粉，只要你食慢啲，索飽水一夾就斷開，差不多要用匙羹來食！結果，我食咗半碗就放棄。唯一值得一讚嘅，只係碟炸魚皮，香脆鬆化。…Read More

行過都見多人買外賣，入嚟坐低試一試。一睇餐牌，有啲係台式拌飯、牛肉麵，有啲日式咖喱，有啲港式撈公仔麵 ... 所以同意樓下啲師兄講，呢間只係偽台式貴價茶餐廳。如果當佢係台灣料理，第一件事當然要試吓牛肉麵，見佢啱啱大字標題新登場椒麻半筋半肉麵，就叫嚟試試！碗麵一上枱，已經覺得唔對路，我要半筋半肉麵喎，點解有啲肥牛喺度？港式餐廳用肥牛呢樣嘢，通常都係要對沖成本，即係表面上好似俾啲牛你，其實好大量係脂肪嚟，即係你去打邊爐餐牌裏面最平嗰啲所謂精選美國牛肉，就係呢啲咁嘅肥牛。一見到啲肥牛，即刻睇返個餐牌嗰幅標明只供參考嘅圖片，係冇肥牛個㗎喎！雖然講明圖片只供參考，唔能夠話你違反商品說明條例，但就大大影響咗食客嘅心情囉！而且，牛筋嘅份量好少，大概等於佢幅相上面一條牛筋設切成三嚿，而今次碗麵總數只得四小嚿，點解要將啲牛筋換咗做肥牛？太過分！至於半筋半肉嘅部份，有兩條，尚算附合圖片。半筋半肉嘅肉質來講都算炆得夠腍，但又係唔會一咬即散，保留咗一啲咬勁，質感來講算唔錯。至於嗰啲肥牛，肥膏多過牛，不予置評！湯頭係好清澈嘅紅燒湯底，初初飲有少少覺得淡口，基本上唔辣，而麻嘅感覺要喺after taste先走出嚟，整體上，冇咗個份紅燒湯底濃烈嘅刺激感，但如果想清清地，還可以。麵條唔錯，份量適中，質感軟滑但仍保持咬勁，但唔算太有麵粉香。…Read More

小弟係燒鵝髀控，食過唔少燒味舖嘅燒鵝髀瀨。嚟到呢間見叫陳皮燒鵝，試吓！見隻燒鵝髀一上枱，就有種非常奇怪嘅感覺：點解隻燒鵝髀好似比較細隻！咁又唔出奇嘅，切得細啲咪會細隻啲囉，但點解啲切口咁奇怪嘅，好似點拼都拼唔番啱塊皮個切口位？？？師傅把刀究竟出咗乜嘢問題呢？？定係隻燒鵝髀本身出咗問題呢？？講返味道，佢聲稱係陳皮燒鵝，但真係食唔出有陳皮味喎，係個汁太鹹？？定係陳皮只係噱頭落得好少？？但明明喺第二度食荔枝柴燒鵝就好香荔枝香，但呢度啲陳皮香去咗邊呀？講返個汁，平平無奇，完全毫無帶出鵝肉味道嘅作用⋯⋯收呢個價錢，絕對唔值！講返肉質，係唔錯嘅，脂肪唔多，肉質鬆彈有咬口。可惜，有上面存在嘅問題，令我對呢隻燒鵝髀都幾失望。以呢個價錢，可以喺好多其他燒味舖食到更好嘅質素，同埋有正正常常嘅刀工！最後，樓面啲阿姐粗聲粗氣粗手粗腳，其實都好正常，落完單飛張單過嚟，掟碟燒鵝髀同碗瀬粉落枱，真係神乎其技，睇表演咁睇！…Read More

打烊前一小時，終於唔使排隊就有機會一試。無論味道、鮮度、種類、選擇、做法、價位，都將其他迴轉壽司店比下去，性價比係高！可惜，迴轉帶上部份壽司嘅賣相好差，魚生跌晒落嚟，甩皮甩骨，而且有啲個蓋又冚得差，露咗啲壽司出嚟，亦有好多蓋有污漬，矇哂、黐住啲飛魚子、三文魚子，甚至魚生碎... 可能係師傅捏完壽司，冇抹手就𢲡起個蓋冚落去。同時地下亦有明顯污糟，至於店舖其他嘅擺設都係混混亂亂！... 係本地師傅唔爭氣，定係冇日本人員做QC？... 所以，絕對唔同意佢tablet上面不停loop住嘅「日本質素」(Quality of Japan)...…Read More