ch626123的个人专页

是日嚟到上水大名鼎鼎嘅鳳鳴居搵食，佢果醉雞實在好出名，因為食平日午餐，一行四人唔洗等好耐就入得。睇完餐牌，諗都唔諗即點左醉香雞米線，小食揀咗黃金魚皮同辣豉油爽脆鵝腸。先講小食辣豉油爽脆鵝腸，啲鵝腸白烚，唔會烚過籠，夠爽脆，但因為鵝腸本身冇咩味，果辣豉油唔多夠味，搞到有啲鵝腸食落冇咩味。果黃金魚皮夠哂邪惡惹味，件件魚皮都夠哂脆同香口，啲黃金掛哂每個位，塊塊都有，好好味。去到主角醉香雞湯麵，我揀左米線，一嚟即試啖湯先，有啲失望冇諗嘅濃同埋酒味濃多少少會再正啲。啲雞件朋友有提過因為會同啲湯一齊煲，所以食落會鞋口啲，果然真係鞋口啲，唔夠滑。其實唔係好差，但可能期望高左，所以食落冇預期好，先會失望左。…查看更多

是日一行4人嚟到銅鑼灣搵食，一早經openrice book位，去到唔洗等即有位入，因為今次目的要幫其中一位朋友慶祝生日，預先打電話去餐廳問關於生日嘅安排，店員超好俾咗啲選擇我哋，雖然冇得寫壽星果名落甜品到，但可以揀普通生日牌加10蚊或者LED生日牌加15蚊，咁差5蚊當然揀左LED生日牌啦，再嚟店員問加唔加多20蚊要埋果煙花蠟燭，諗諗吓都係35蚊姐，所以索性全部要哂🤣 基於先果35蚊，真心本身嗰期望值都幾低吓😂 店員安排左我哋去窗口位，睇到夜景。佢整體好和風，果menu都好有質感，幾靚。睇完一輪menu，最終揀咗主食咖哩牛肋肉蛋包飯、小食炸七味雞軟骨、甜品就兩個一個士多啤梨刨冰同埋極·盛夏布甸船，飲品就係果味梳打。我要咗蘋果梳打，但實在太普通，冇咩好講。小食方面，果炸七味雞軟骨，炸得好好，夠哂脆，七味粉剛好，唔咸。主食咖哩牛肋肉蛋白飯，一開始係未切蛋嘅，店員會等你影完相先切，同出邊蛋白飯一樣，都係流心蛋，蛋好creamy，入邊嘅飯炒過好惹味，咖哩牛肋肉，燉得好冧，基本上唔洗咬，非常滿意。份量都幾大，唔大食可以考慮兩個女仔share。朋友嘅主食喫茶全日早餐，係和式All day breakfast。蛋就係蛋包飯上面嘅蛋，份量都幾大，朋友話味道不錯。甜品方面先講士多啤梨刨冰，其實果刨冰係冇問題嘅，問題出係啲士多啤梨到，好酸，所以真係好難好好食。去到是晚重點嘅生日甜品，揀咗極·盛夏布甸船，一嚟就真心驚艷咗，果35蚊加得抵啦！果LED生日牌本身已經好搶戲，再嚟店員幫忙點着果煙花蠟燭真心好大驚喜，連隔離枱都擰轉頭望，如果想帶俾壽司一個難忘嘅生日，可以考慮吓帶佢嚟呢度，當然唔尷尬就好。咁果甜品本身係好食嘅，上層焦糖布甸唔太甜，焦糖好香，下層果Lotus餅布甸好驚喜，因為我本身幾中意Lotus餅果味，唔太甜又層次好豐富。整體嚟講，非常滿意，食物質素好，店員服務好，生日安排好，下次再有朋友生日都會想嚟呢度。…查看更多

是日嚟到灣仔搵食，經朋友介紹去左一間好復古風嘅台灣菜到食。因為避開左飯市，約莫6點左右到，啲人未收工，所以去到即有位入，食食吓就越嚟越多人。佢門口係唐樓入口，行過未必好覺眼，我都差啲行過籠😂行動不便者要留意番，因為佢係唐樓嚟，所以要行兩層上去，冇電梯。行到樓梯間會有標示，標示寫嘅嘢仲非常幽默。因為係唐樓入邊，所以外邊行上嚟都會覺得少少殘舊，行兩層上到餐廳門口。入到去就會覺得好復古，保留咗好多舊物。為左一野試哂所有嘢，我點咗一set晚餐，揀嚟揀去選擇咗十。先講講前菜，包含養生牛蒡、百香青木瓜同橙汁冬瓜。佢嘅橙汁冬瓜同出邊唔同，佢係薄片狀，出邊食過條狀，好清爽，岩夏天食，好醒胃。而養生牛蒡係咸菜果類，酸酸鹹鹹，但我覺得擺喺兩個甜酸嘅涼菜中間有啲怪，可能因為我麻麻地又鹹又甜。而百香青木瓜，佢係將青木瓜切絲，再去撈百香果醬，相對最甜係呢個，我覺得呢個最特別，出邊都少見。然後講下碗湯，青木瓜燉排骨，飲得出係老火湯嚟，唔係味精溝水，因為我本身唔係好食豬，一飲就有豬騷味，所以我飲得出係濃濃豬骨煲出嚟，撇除我唔食豬呢樣嘢，碗湯係好飲嘅。當然因為老火湯嘅緣故，面頭一定油啲，女仔撇下先飲。再嚟講講主菜，台式醉雞，食落真心有啲失望，因我作為主菜以為有好大驚喜，點知佢應該用左好多花雕酒去醃，所以太搶味同苦，再嚟雞件唔夠滑，有啲嚡口，當然好失敗又未至於，但出邊食過好食過佢嘅。反而食配菜鹹蛋白玉苦瓜，我就俾佢驚喜到，啲鹹蛋炒到起哂沙，控制得好好，同埋苦瓜一啲都唔苦，係甘味，呢個配菜好食過主菜。而主食因為我唔多食豬肉，揀左雞肉飯，覺得佢有蔥油香既，但都係果句啲雞嚡口加埋成個飯係好乾身，如果濕啲會好啲。最後去到杯飲品，揀左蘋果綠茶，係有真蘋果嘅，不過不失。整體嚟講，無論服務、餐廳環境同食物都係不過不失，可能成日去台灣嘅關係，所以覺得以台灣菜嚟講冇咩驚喜位，如果中意復古風可以嚟試吓嘅。…查看更多

好耐冇寫過食評，因為呢間實在太正，要好好寫一下，是日一行三人黎到呢間餐廳午餐，因為幫朋友慶生日，提早book位，仲揀左戶外帳幕位，如果要坐帳幕位真係要提早book好，佢好full，佢帳幕位設最低消費要最少500蚊。因為去到未開門，但已經唔少人排隊等入，所以即使book左位，都要預早啲啲到拎位。因為係觀塘工商廈內，佢門口都平平無奇，但一入到去會有種別有洞天既感覺，成個人眼前一亮，一入到去會有千秋櫈打卡位。係千秋位附近只有三四張枱左右，算係室內位，行出去就係室外位，出邊會有大量吊燈既室外位，仲有藤椅等等既打卡位，幾靚！講左甘耐終於講到我是日要坐既帳幕位，帳幕位只有幾個，所以提多次想坐一定要提早book，同埋室外嘅關係，預左會偏熱啲，但好有glamping feel，仲要係觀塘綠洲既感覺，正！雖然坐室外，但唔洗擔心店員唔多理，因為店員間唔中都會行出嚟，而且用qr code自助落單，幾方便！講完環境，當然最重要都係食物啦！是日點左蟹籽蟹棒雜菜沙律、小食拼盤、烤法式牛扒100z跟薯菜、野飲點左粉碎性骨折、同埋幫朋友慶生日點少得蛋糕點左阿華田奶蓋瀑布蛋糕，仲可以加錢係蛋糕上寫字。先講沙律先，菜都幾新鮮冇苦味，蟹籽同蟹棒分量正常，冇過少情況出現，最中意有藜麥係上邊，層次會更豐富，唔錯！再黎小食拼盤同我杯飲品粉碎性骨折，先講野飲，接骨木花味略微唔夠，同埋室外關係雪糕溶得快啲，不過因為薄荷青檸，整體幾解渴。而小食拼盤，洋蔥圈略嫌粉漿過厚同洋蔥分離，魚餅同炸雞都幾好味，薯條唔錯係粗薯，最欣賞有唔同醬夾到唔同野食。甘是日主菜係烤法式牛扒100z跟薯菜，要左5成熟，烤得恰到好處，冇過熟情況，啲伴碟蔬菜烤到岩岩好，仲好多水分，薯條同樣係粗薯夠脆，最欣賞有烤蒜，將啲蒜唧出嚟果下好治癒，而且好香加左唔少食物嘅香氣！唔點黑椒汁都好夠味！幾滿意果main！甘去到慶生環節，店員好細心，蛋糕上前會幫我地換碟同餐具，而且隻碟仲好靚添，果阿華田奶蓋瀑布蛋糕好濃阿華田味，蛋糕層次分明，又唔會好甜，岩哂我呢啲好忌食太甜既人。整體黎講，呢到環境真係好靚，好清新嘅感覺，係觀塘甘密集式既環境入邊有一個喘息空間，帳幕位真係要試下，最低消費既限度都係可接受範圍內，不過要留意黎緊夏天好熱，如果坐室外要睇下自己受唔受到熱😂 店員都係親切有禮，服務唔錯，食物質素都中上，值得一試！…查看更多

是日一行4人黎到，因為講左好耐想食呢間加上佢夜晚收8，所以突登搵左日星期六下晝去食，輪侯時間都幾長，等左成45分鐘以上，仲要佢只安排D二人位入，完全冇理過4人枱甘，等待既過程已經好麻麻，但諗住既然突登黎食又好多人推呢間野，點都等到試到先心息，點知入去食先惡夢既開始，完全唔明點解D人會推介呢間野，外觀話好靚又唔係，野食服務又差，真心冇下次!!!甘我自己就點左Spicy Salmon Bolognese，朋友們就點左Black Truffle Homemade Pasta、Cold Brew Coffee、Jomo All Day Breakfast、Berries Crumble Bar With Ice Cream同FOMO。先講自己食果個Spicy Salmon Bolognese先，真係完全睇唔出甘難食，果pat白色野應該係酸忌廉之類，其實果麵同果汁係冇問題既，出事位係salmon，首先我以為係一片片或者一整塊，點知佢係三文魚碎，明明都整到甘碎仲撈埋甘多汁醬，佢居然仲可以甘腥臭，真係完全估佢唔到。先講D唔伏我地一致認為算正常既野啦，Black Truffle Homemade Pasta同Cold Brew Coffee都係正常野，我試左黑松露意粉味道都幾正常，但黑松露唔太夠，自己平時買D黑松露醬都香過佢，呢個價黎講，仲要等甘耐，真係好唔抵。開始講D伏既，Jomo All Day Breakfast其實All Day Breakfast都幾難好伏，佢D野都唔係唔新鮮，但真係冇咩特別，而且果番薯係新彊燒烤味，明明番薯呢D冇必要搞太多，係甘意焗/烚下已經好甜好好食，冇啦啦加甘多調味，又蓋過D甜味，真係好浪費。然後果Berries Crumble Bar With Ice Cream，就係energy bar加雪糕甘，又係唔知食黎做咩。最最最最伏就係呢個FOMO，佢咖啡加左CBD蜜糖甘，因為佢一開始有上錯過餐，所以呢杯野一上我地全部都以為又上錯左餐，佢外表勁似檸茶甘，甘就問一問店員咩黎啦，點知有個女店員係勁串走埋黎拎住我地落單既野係到話你地落左架，其實態度可以好少少囉，甘既野好難聯想到係咖啡囉。然後杯野飲落超伏，又苦又酸仲有D膠臭味，真係伏到不得了!!!總括黎講，呢到真心唔推介，亦都唔明點解甘多人推介，都唔明點解甘多人去食，食物種類唔多，冇咩好揀，揀得落手既都唔好食，因為我地都算揀哂main、野飲同甜品都一致負皮，服務又差由安排位到落單再到埋單，都係奇怪野多，埋單佢係卡機壞壞地，搞左勁耐都未埋到單，即係由頭到尾都係差，唔會再幫襯!!!!…查看更多

自從有次入長洲第一次食完後，後尾幾乎入長洲都會留肚食呢間甜品店，真心次次都保持水準，店舖係採取先付後上既方式，客人去到搵左位，去收銀俾左錢等一陣野食就送到，當日為左慶祝老豆入去長洲過夜，平日夜晚所以去到完全唔洗等一野有位坐，仲要間鋪得我地一枱客，因為早過老豆入去，所以膽粗粗試下問下會唔會生日有咩特別野安排同洗唔洗收費啦，居然佢地真係有生日安排仲要唔洗額外收費，店員人超好提我到時落單講返聲係邊個甜品係俾生日果位就可以啦。一行三人就一人叫左一個甜品，我同細佬就叫左D24榴槤雙圓椰皇燉奶，老豆就點左芒果椰汁雙圓椰皇燉奶，先講下我同細佬果個先，好老實講唔係第一次食，食開我幾乎次次去親都點呢個，佢呢到D榴槤真心勁正呀，咩季節食都係水準依然，如果榴槤控縑唔夠喉仲可以加10蚊加多一球榴槤，我有朋友會食其他糖水再加一球榴槤甘，另外d芋圓係好好味唔會太甜軟硬適中，燉奶好滑又滿滿椰香，正!而重點當然係老豆果芒果椰汁雙圓椰皇燉奶，一上我地超級驚喜!!!! 首先，店員將餐廳播緊既歌轉左生日歌，然後拎左一個插住蠟燭既甜品出黎，可能會好好奇蠟燭可以插係邊，原來店員送多左份芋圓俾老豆，係份芋圓到插上蠟燭，然後椰皇上邊就插左生日快樂牌，其實我甘當突問，真心完全冇諗過果生日驚喜大到甘，老豆都完全唔知情所以果驚喜仲大，真係好多謝店員們既安排，係甘突然既要求下仲做到甘完美，真心好感謝佢地既用心!!! 甜品又好食，服務又甘好，不枉我次次入長洲都一定入去幫襯，下次都一定會再去!!!總括黎講，我應該都幫襯過5-6次，但從來都未寫過食評，都係因為今次甘大個奇遇先突登寫下紀錄低，同埋真係好想對果日果位店員好好講一聲多謝，但都帶左頭盔先，因為去果日係平日夜晚仲要甘岩果陣得我地一枱客，所以人好多既時候唔知係咪都同樣做到甘樣既生日安排，同埋最好都打去問下係咪安排到先，我諗返都覺得自己太過即興同埋假如對方拒絕都合理，因為都試過人好多去到，等位都要D時間，所以如果遇唔到都體諒一下。…查看更多

將軍澳海濱新開以橙黑為主調既cafe，位置同地鐵站都有啲距離，但鋪頭幾靚，食物唔錯，staff仲好nice。啲menu幾特別，都係橙黑主調，好似excel表甘因為佢呢到係手工啤，有8款，但美中不足冇麥味重既酒，大部分都係帶花香味或果味，幾岩女仔飲，岩哂閨密聚，最正係佢會俾試左酒先再點，可能因為新開。最後我哋都點左7號，第二次去同第二班fds都係點7號。叫左個小食，炸雞加四川醬，超有驚喜，啲雞炸到岩岩好，好脆口又唔乾，仲有肉汁，唔點醬就甘食都會辣辣地，果醬真心正，岩哂中意食辣既人，佢幾辣下，而且係辣得比較耐果種，係食落唔辣，但後勁好勁果隻，所以唔食得辣既人要留意番。然之後到主菜點左個mixed seafood risotto，老實講呢個就冇咩特別啦，啲海鮮唔係好鮮但又未至於唔好食，果飯正常味，飯粒唔會過冧或過硬，岩亞洲人口味，不過不失冇太大驚喜。最後，一定要食佢果梳乎厘pancake，超好食，空氣感好足，食完冇咩負擔甘，果berries醬好好味唔會太甜，果cream都係唔會太甜，一個字：正！總括嚟講，呢到環境靚，氣氛好，岩哂一班人黎chill，一條龍由飲酒吹水到食埋甜品，一野搞掂哂！啲staff仲好nice，試酒同介紹酒都解釋詳盡，野食都會講解下，第二次去食試左過用黑啤煮既飯就係staff介紹，都好好食👍🏻…查看更多

是日黎到呢間米線舖食米線，未黎前已聽過佢勁似譚仔，所以先突登黎睇下有幾似。因為係平日下晝5點幾黎，完全錯開食飯時間，所以只有零食客人，一到即入唔洗等位。講真每個人都會有自己慣常既譚仔menu，基本上一坐低就落到單知自己想食咩，但今次我都突登睇過下餐牌，發現餐牌真係同譚仔一模一樣甘滯！甘我就叫左雞肉春卷麻辣小辣少米線再加果細土匪雞翼。先講雞翼先，嘩果味同譚仔一模一樣！重點啲雞翼大隻過譚仔添，外脆入面好juicy，食落好滿足，推介一下必點呢個先。再黎到主角米線，呢碗雞肉春卷麻辣小辣少米線，其實整體冇令我失望既，啲春卷幾足料比較似南記既招牌春卷，雞肉幾大件同滑，其他配菜芽菜、韮菜、腐皮等等齊哂，真心同譚仔8成似！唯獨美中不足果湯淡左啲，似譚仔果湯溝稀左甘，當然夠味既，但就係差左少少。整體黎講，呢間野食物水準都真心做到譚仔替代既，因為太似啦。服務方面都正常，就係普通譚仔遮遮甘，如果係譚仔fans都可以黎一試！…查看更多

是日一行四人經openrice訂位，去到唔洗等直接入得，環境黎講都算乾淨衛生，座位都舒服既。其實單以環境評分佢唔係差，但就係服務啦，食物質素同味道啦，令我忍唔住俾負評。甘因為一行4人，自然就點左大份既老壇酸菜魚  （大份），另加配左午餐肉、金菇、米線、寬粉同藕片，小食點左手撕雞、刀拍前男友（青瓜）同埋老虎淑愛鬆化蛋。先講小食先，由我覺得不過不失既講到最差架啦，先講一個不過不失，三個小食入邊最唔錯既反而係皮蛋即係老虎淑愛鬆化蛋，啲皮蛋新鮮唔會有果種霉霉地既味道，啲蒜好香，好match果皮蛋，中間啲椒係好甜好脆呢個位有啲驚喜，但美中不足佢真係好油，如果係辣椒油/麻油都明點解要甘油，都明蒜要泡油先香，但佢呢啲真心就係油囉，唔麻唔辣唔香，多餘哂。另一個小食手撕雞，忘記叫佢走芫茜，但有冇芫茜都冇影響佢係我食過最差既手撕雞，索價$108但完全唔合理，啲雞勁咸超重味精味，雞鞋口唔爽滑，有啲青瓜墊底但啲青瓜絲冇mix埋落雞到，所以啲青瓜絲係冇咪既，其實mix左一齊果雞會冇甘咸又可以令果手撕雞層次豐富啲，唔明點解甘樣浪費左啲食材。衰啲講真係聚*樓呢啲屋邨檔既手撕雞都好食過佢，仲要平一半有多。而最差小食一定係刀拍青瓜，其實好奇怪，因為真心好難做到唔好食，咁簡單既一味菜，果青瓜一入口只有淡淡酸味，完全冇其他味，極度懷疑佢有冇醃過定只係係甘意拌過下醋就算，完全冇入味！真係甘簡單都做到甘，係難接受左既。最後，到主角老壇酸菜魚  （大份），加左午餐肉、金菇、寬粉、米線同藕片做配菜。黎到賣相都驚人，超大盤，但望真啲擺盤有啲恐怖，佢兩隻魚果魚頭勁猙獰，其實連魚頭上冇問題，但都要考慮返果魚頭狀態會唔會好影響賣相先。先講啲魚係滑既冇問題，但問題出左係果湯到，首先店員冇問辣度所以完全唔辣啦，其次酸菜魚既酸菜完全唔出，再黎超油，其實食得呢類菜都唔會怕油，因為夠麻夠辣夠酸你唔會覺油既，但佢全部都唔夠所以先會令人覺得好油！然之後啦講下啲配菜，金菇好似失蹤左甘，完全食唔到幾條；藕片係爽脆既但礙於湯底太油都有影響左件事；寬粉好煙韌如果牙唔好既人應該會有啲難處理，但我本人係中意呢款寬粉既；米線要讚，煮得恰到好處，最好食既配料；最後果午餐肉嚇死人，係大陸果種午餐肉黎，果味怪怪果種，唔明點解唔正常用返普通午餐肉就算，食左一塊就唔想再食！真係以賣點係酸菜魚既鋪頭黎講，佢都算差啦！整體來講，食物質素完全唔掂，可一不可再，全部野都油油油，食完嘴係油淋淋果種，另外一係冇味一係太咸，冇平衡架喎。服務方面，真係差到極點，前枱就係正常既冇咩野想同你講，叫你入就入啦果種；點菜果個都夠哂極品，我朋友問佢咩叫棒棒雞，佢話咪就係雞囉⋯⋯其實佢唔知係可以大不了講句佢都唔清楚就可以算數，甘答都幾odd下；再黎傳菜又係有問題，大大力放低呢啲都小事黎，唔睇清楚就隊落嚟都小事黎，咪最多見佢甘自己幫手移一移囉，最大問題果酸菜魚都幾大盤啦⋯⋯佢上菜前原來要拎走塊隔離板，但拎前唔出聲，嚇到我朋友之餘仲差啲一塊板撞埋我朋友到，其實講多一句件事會好好多囉，一陣整親人又話人地r着數啦/要求高啦/俾少少錢想點先，其實意外係絕對可以避免架！真係性價比極低，收費都唔平，同區食過其他酸菜魚都好佢勁多！…查看更多

因為黎半島staycation，果package包三餐，其中一餐就係落lobby食早餐set。其實我地揀左食9點半，但落到去都冇咩人，可以影到成個大環境，歐陸式設計好打卡呀！我都係食到一半先開始fill滿人。甘早餐set得兩款可以揀，一中一西，權衡果環境我都係揀左西式。我揀左鮮果冇揀果汁，包揀左牛角包，再揀左粟米片，朋友揀左麥皮，蛋揀左要太陽蛋，腸要左雞肉腸。野飲要左茶，佢會上埋一set茶具同奶甘，自製英式奶茶。先講果最先上既鮮果先，冇咩特別，應酸既酸，應甜既甜，唔會唔新鮮，不過不失。果牛角包幾酥脆，啲果醬有士多啤梨醬、杏脯醬、蜜糖同一款食完都唔記得咗既醬，啲醬真心冇咩特別，純粹試吓就好。食完鮮果後，等多陣終於上粟米片，真心冇咩特別，就係普通超市都會買到既粟米片再加奶甘。等左極耐，終於上個早餐，太陽蛋煎到岩岩好，雞肉腸果然好咸，伴菜不過不失。朋友果中式早餐，一野上哂唔洗等，又好食，唔會由唔餓等到餓。整體來講，食物方面不過不失，唔會令你好驚艷。西式都預左會等，但冇諗過等甘耐先上一樣野，真係純粹用嚟打卡，如果好眼瞓唔建議食西式，一野轟完果中式上去補眠好過。服務方面，本身預期左係好服務既，但居然都遇到唔禮貌既waiter，其實黎staycation都係遇到得呢個態度麻麻，其他staff都勁好禮貌同服務勁好，佢都唔係超唔禮貌，只係一對比下就放大哂，事源佢問我朋友要咖啡定茶，我朋友因為好眼瞓想遲啲先揀，就同佢講問第二個先，但果waitor係回左我朋友句野：甘一陣先再同我講啦！之後突然之間好大聲講唔該！成件事就好突兀同埋感受到佢唔禮貌，可能佢覺得甘簡單咖啡同茶我朋友都要等一下先揀，但其實客人理應都有權等下先，而且我發現呢個staff係漏講解左餐牌上既野，例如包果到佢叫我同朋友揀啦，只俾左三款我地揀，但餐牌上明明都顯示有6款，同埋因為限聚，我有兩個朋友坐左另一度，佢地係第二個serve，我朋友都食西式係揀左餐牌上都冇既chocolate muffin，佢話面頭佈滿朱古力碎入邊仲有朱古力軟心，雖然我麻麻朱古力，但聽落比起我果牛角包正好多。所以總結佢都未至於好冇禮貌，但冇對比冇傷害，佢啲同事好佢太多啦⋯⋯佢應該算係我成個行程唯一美中不足嘅點，但最後都想強調半島啲員工服務其實好好，呢個只係exceptional case。…查看更多

是日訂左位食飯，唔洗等直接入得。因為有時代廣場劵，所以豪食左，點左唔少野食。一行6人因為限聚關係被安排左4張枱，所以都自然地分左兩張單。甘今日就叫左唔少野食，但唔係每一樣都有影相。先講野飲先，我自己點左啤酒Brooklyn IPA，原來係果酒味，會有柑橘味，但唔會甜，所以岩哂黎餸小食。朋友點左杯普通蜜桃茶話冇咩味，而另一位朋友點左杯Blue sunset，靚係好靚好打卡feel，但完全唔好飲，成杯野都冇咩味，只靠菠蘿有啲酸味甘。之後講下果沙律，叫左蟹肉牛油果沙律，講真好好食，啲蟹肉牛油果料好足，成啖放落口好滿足，蟹肉又唔會太咸，味道岩岩好，但美中不足係份量太少，對於中意食沙律既我黎講係一個都食得哂既量黎，所以仲同人share埋會覺得完全唔夠喉，扣分位係份量少，如果唔係會俾4星佢🤣再黎講講小食，呢個黑松露醬薯條超好食，啲薯條粗幼適中，炸得夠脆，有啲煙肉碎一齊炸更加香口，唔會過咸味道岩岩好，最正當然夾埋果黑松露醬啦，絕配！然之後到串燒，我地叫左沙嗲雞同豬串燒，仲有可樂牛串燒，我只食左雞，還好，但點既沙嗲汁只有沙嗲香但冇咩味，點唔點都冇分別，果包幾鬆化。到果小食拼盤，食左牛串同蝦餅同雞翼都唔錯，但冇特別驚艷。主食方面點左3個，一個馬拉盞炒飯，一個黑松露意粉同一個鵝肝龍蝦肉西班牙火腿星洲炒米。先講冇影相既兩個，馬拉盞炒飯夠香但啲飯唔夠乾身同粒粒分明，但味道唔會太咸既。黑松露意粉係主食入邊最好食既，黑松露味勁香，意粉粗幼適中，啲汁濃稠度適中，唔會太水或太乾身，最中意全部意粉都掛到黑松露汁，正！而果鵝肝龍蝦肉西班牙火腿星洲炒米成件事真係錯哂，鵝肝粒有油億味，龍蝦肉我冇食我朋友食左話難食，而果西班牙火腿太咸完全同星洲米唔夾，最慘係果星洲米炒得唔均勻有啲地方太辣，有啲位太咸，其實與其加甘多topping，不如做好本分整好果星洲炒米算啦，甘樣too much左。食到呢個我更加肯定呢到西式野比亞洲野好食。最後，講埋pizza先，佢其實好食既，只係食左其他野太飽姐，佢啲芝士好夠，餅底係脆薄唔會太heavy，好食既。整體來講，食物質素唔錯，一間餐廳食到幾國菜，但西餐好食過亞洲菜。而服務方面，服務唔錯，但有部分員工只識英文，所以點餐時留意返。…查看更多

是有訂左位唔洗等直接入得，因為甘啱有時代廣場劵，所以都唔介意食得豪啲，叫左好多野食。先講講環境先，暗暗地座位寬敞舒適。因為四人限聚關係，我地6人被分配左兩張枱。野食方面我地冷盤叫左三文魚他他沙律、特上壽司拼盤、帶子卷同辛味吞拿魚卷。熱食一人一個主食，我自己點左天婦羅炸蝦配冷烏冬，朋友們點左一個鰻魚石鍋飯同牛肉湯烏冬，另外仲點左啲串燒，我自己揀左燒雞翼同雞軟骨，朋友就揀左免治雞肉同雞肉大蔥。先講冷盤兩個卷先，帶子卷都新鮮，冇啲唔靚帶子既霉味，唔錯。而果辛味吞拿魚卷就有啲失望啦，唔辣但果辣醬味好濃，係韓式辣醬味黎，所以蓋過哂吞拿魚既味道，唔係難食，但果辣醬有啲冇誠意。而果三文魚他他沙律，啲菜都算新鮮，但朋友都食到某啲菜有苦味，果三文魚好唔錯，厚切得黎側邊有輕輕燒過，呢啲細節位幾有心思，三文魚同菜既比例係一比一，個人黎講因為中意食沙律所以如果多返啲菜會好啲，但如果對主打魚生既人黎講佢就好抵食啦！整體好食，但要扣分係果沙律上得較遲，食左唔少熱食先黎，節序有啲亂左。黎得食日本野點少得壽司，是日重點當然就係呢個特上壽司拼盤啦！唔係每款我都有食，我食左吞拿魚卷，覺得呢個好食過之前既辛味吞拿魚卷，海膽冇臭味，但未至於係靚海膽，魚方面我覺得群邊同油甘魚唔錯。朋友都話食落整體都係好食，食材新鮮既，冇一舊係伏。甘串燒方面，我食左雞翼同雞軟骨，雞翼會冇咩味，要自己加啲七味粉，但佢燒得岩岩好，仲有肉汁流出黎，雞軟骨冇咩特別。朋友食免治雞肉有加一粒生蛋醬油俾佢，佢話食落有雞軟骨粒係入邊，口感有層次。到熱食，我食果個天婦羅炸蝦配冷烏冬，要讚既係冷烏冬做到夠凍又唔會一餅野，醬汁岩味唔太咸，有時出邊會食到好咸醬果烏冬又一忽暖既，佢完全唔會，但美中不足係炸蝦連烏冬上，所以其中一邊接觸到果烏冬搞到果皮冧左，建議可以另上唔會搞到果天婦羅冧左影響食感。朋友果鰻魚石鍋飯，我試左少少鰻魚，唔係霉既，唔錯。整體黎講，食物質素唔錯，食材都新鮮，但我食既我都搵唔到特別出色都令我留下深刻印象既。服務方面，佢地服務真係好好，不斷幫你加茶，又好快幫你收走食完既碟，仲會提醒客人鍋邊熱呢啲，唔止一個店員，而係接觸到既店員個個態度都甘好，抵讚。…查看更多

是日一行二人黎到打卡，都係為左食佢果tea set而黎，雖然係星期六下晝，但人流一啲都唔多，要拎籌但其實係直入甘滯，拎籌純粹用黎俾你按順序入揀位坐，入到去可惜冇哂窗口位同埋果打卡鐘位，但其他位都任坐仲有選擇，本來店員俾我地坐一排茶罐既2人位，但又問我地會唔會兩個人想坐4人位，因為我地shopping 完都唔少野，唔坐4人都可以用中間張大枱放野，最終我地揀左坐近招牌既4人位。真係冇咩人，啲位任揀，可以揀果好位打卡，我地食食下見到有人調位去窗口位添。揀左呢張角落既4人位，可以同招牌打卡，建議黎到不妨用返同品牌既野打卡，是日我就戴左同品牌頸鏈同袋黎打卡。啲餐具同內在環境都好靚，真係打卡用🤣餐牌上我地都係直接揀Premium Tea Set，店員有講解到包兩杯野飲，就係上面呢兩個飲品menu任揀。為左貫徹打卡用，揀左一熱一凍野飲。熱既飲品揀左玫瑰拿鐵，玫瑰咪淡淡地 ，杯飲品味道正常冇咩特別，所以都係純粹衝住呢個logo黎打卡，熱飲我見咖啡都有呢個logo。凍飲叫左碟豆花系列，因為一睇就知會靚，我揀左荔枝碟豆梳打，果然顏色好靚，飲品味道正常，荔枝味都重，但底有啲甜，最好搞勻啲先飲。講完飲品，係時候講是日主角Premium Tea Set。佢同出邊啲tea一樣都係分3層，最低層鬆餅同酥皮，中間一層鹹點，最頂層甜點。先講最低層，鬆餅配左一樽果醬同cream俾你搽，鬆餅都夠鬆化，唔錯既。酥皮果兩舊分別係蝦/帶子做topping，酥皮入邊有啲松露醬整體有啲油膩，topping黎講蝦有啲求其就係烚蝦甘，反而帶子會有誠意啲，煎香左兩邊加上面頭有松露，但連埋果酥皮都係太多松露同埋膩。中間層鹹點有蟹子沙律撻，鵪鶉蛋紫薯撻同埋鵝肝麵包。鵝肝麵包加左啲醋醬唔會太膩，餓肝都唔會有腥味，唔錯。鵪鶉蛋紫薯撻就麻麻啦，鵪鶉蛋同果撻係兩件事唔夾，而且兩樣野都冇咩味，唯一讚既係果撻果薯係夠creamy。最好食係蟹子沙律撻，啲蟹子同沙律好夾，而且果口感幾好，食落有層次。最後果層甜點層，一黎係有乾冰會噴煙，把握時間打卡，最靚就係上果一刻，果兩個噴煙既係食用色素，我見到隔離枱有人飲，但我望見就怕怕。馬卡龍上面有印左品牌logo，但真係好甜完全唔好食。朱古力慕絲上邊都有品牌logo既造型朱古力一黑一白，但果造型朱古力一望到就知甜完全冇食到用黎打卡就好，反而果朱古力慕絲食落唔錯一啲都唔甜，口感細滑。最好食係啲焦糖爆谷(笑)。總結成層甜品層都係打卡用，完全冇咩好食。整體成個set係視覺效果大於食用效果，都係果句黎得都係想打卡姐，都冇特別望會好好味。最後上左兩個雪糕，一個水蜜桃味，一個焦糖味，水蜜桃好食好多。整體黎講，成件事就係打卡用，野就冇話特別好食既。服務方面係唔錯既，又會俾你揀位，又會解釋餐牌。…查看更多

是日經openrice訂位黎左呢間想去好耐既打卡cafe，一開始都有啲難搵，因為附近既建築同環境都唔似會有一間呢類餐廳既存在。去到可能因為平日加上最近疫症人都唔多，本來book左位話個半鐘交枱，但最後都食左兩個幾鐘都冇人趕，因為keep住都有唔少吉枱。上網睇相睇落好大甘，但原來餐廳一啲都唔大，枱得10張內，仲要唔少係只供2人或兩至3人枱，6人枱得一張。餐廳啲擺設同設計唔錯，好多綠色野，令人望落好舒服。碟都幾精緻，符合打卡原則。啲裝飾品都好靚。睇完餐牌，同朋友一人叫左一個意粉同一杯野飲，仲叫左一個小食拼盤share。朋友點左青醬帶子意粉(綠)，牛油果忌廉蟹肉扁意粉(淺綠)，蜜桃冰茶同特濃朱古力。因為冇試過就唔評價啦。先講果小食拼盤(小)，有腸、雞翼、芝士條、芝士球、炸蕃薯同薯條，有茄汁同松露醬搭配。所有都不過不失，正常炸物甘，最好食係炸蕃薯，真係好甜又唔會太乾，炸得岩岩好。杯桂花蘋果蜜我好中意，桂花味勁香，蘋果味岩岩好，飲落好清，可以去除到食物帶黎既油膩感。至於果明太子蟹肉扁意粉(粉紅)，外觀唔錯，味道我就比較失望啦。啲蟹籽蟹肉勁多，疊到勁高就睇得出份量勁足，扁意粉都有足料既明太子醬，起初食落都ok，咸淡都適中，食落都啖啖蟹肉同蟹籽，雖然佢好足料，但越食越乾同好膩，而且太有份量啦，啲扁意粉完全變左一陀野甘，唔止我呢個係甘，朋友們既扁意粉都出現同樣既情況，個個都食淨一大半，其實唔難食，但實在太膩啦，建議唔大食既可以兩至三個人share一個。如果果粉多返啲汁或者索性整到乾啲，又或者多返啲菜蔬中和下，成件事應該會好啲。整體黎講，環境係一流架，服務都好好，但食物就ok啦，唔難食，但未去到好好食既程度，果然係打卡用cafe。…查看更多

是日一行3人一早經WhatsApp 訂左位，所以去到完全唔洗等直接入得，入去前要探熱同場用搓手液搓手，入邊全部位都有擋板。雖然疫情期間，但都好多人黎食，幾乎爆滿。我地揀左B餐，所以包三款海鮮龍蝦、帶子同鮑魚，仲有蝦，粥底揀左泡菜，至於貝類同其他野都任點任拎任食，野飲要每位加12蚊先任飲，酒精類就每位加38蚊，我地加左12蚊任飲。呢到服務好好，會續步續步教你食海鮮塔，仲會提你用沙漏計時，食完一層唔洗叫已經過黎幫你清走果塔等你食下一層。食海鮮會好多殼之類既垃圾，佢有垃圾桶俾你放，但店員都成日幫手清走，好乾淨衛生。啲海鮮好鮮味，完全唔會覺得唔新鮮，雖然每人得一份，但其實都食得好飽，而且貝類任拎，所以完全唔會唔夠食。雖然呢到主打食海鮮，但其實其他任點既野食都超好食，質素比我想像中高，點左唔少炸物、串燒、天婦羅、烤肉等等，全部都好好味，印象最深係烤韓式牛扒好入味又烤得岩岩好，唔會老。黑松露炸雞同埋炸紫心薯餅都好好食。食到最後，店員上埋甜品原個椰子皇，呢個甜品比想像中高質，上面鋪左個焦糖布丁，下面係墊左椰皇肉同椰汁，唔算勁甜，啖啖椰肉。整體黎講，食物高質，服務優質，主打海鮮但其實其他食物都好唔錯，下次都會想再黎。…查看更多