旭旭之父的个人专页

約左老同學飯聚，今次選擇左係尖沙咀厚福街食，因為放工大家出來尖沙咀都方便。食日本野既可以傾計又適合飲下酒，就去左呢間令和酒場。全場日本酒半價，非常吸引。五花腩片，d腩肉好鬆軟，皮又滑，做頭盤唔錯。燒粟米，d粟米好甜，雖然日式唔加牛油，但又有另一種風味。日式串燒，有雞翼、雞肉同雞腎，本身有少少鹽，夠晒味，再加d檸檬汁，又醒胃又好食同老同學一邊飲啤酒傾住計、一邊食串燒，人生樂事。焗蠔好鮮甜，而且仲有好多蠔汁，唔會太乾，好味。石燒澳洲和牛，睇住個伙記係你面前即刻燒，夠晒新鮮同熱，可以加海鹽/燒汁食，重點係唔好熟晒，七成左右剛剛好，太生d油未溶化、牛味就唔出，太熟又會無汁，依家啱啱好夠肉汁、有牛味，又夠晒淋，推介。當然唔少得啤酒啦，有三得利生啤🍻🍺正！！炸雞估唔到外脆內滑，仲好juice,再加埋個芥末醬，有少少甜甜地，送酒一流。最後呢個係天婦羅蝦，d蝦好爽，個粉又脆，正！總結成餐飯非常愉快，d食物送酒一流，串燒、天婦羅、炸雞、石燒牛肉，樣樣都好好食，下次一定再來試下火鍋同魚生。…查看更多

星期五收工後同屋企人係將軍澳搵食，見翡翠唔洗排隊就去試下，因為已經好幾年無食過。由於正逢食蟹季節，坐落即時叫左個蟹粉小籠包試下，跟著再加鱔糊炒拉都、鎮江肴肉、甜酸魚同鍋貼。個蟹粉小籠包食落比平時的豬肉多了一陣蟹肉香味，而且有蟹油，會比較膩，但非常好吃，不過唔好食太多，驚膽固醇高。鱔糊麵都炒得出色，夠乾身，唔會太多汁，食完唔會成碗油。甜酸魚就好滑，酸酸地幾醒胃。鍋貼煎得好鬆脆，如果入面多d肉汁就更好。鎮江肴肉就一般啦，因為係冷盤，天氣熱食先會食。總結成餐都唔錯，而且價錢合理，同埋唔洗等位。…查看更多

星期日晚上同屋企人去圓方搵食，貪佢容易泊車，而且免費泊車時數夠多可以等餐廳及慢慢食。由於好耐無食過燒肉，所以就去左呢間燒肉火蔵試下，好在雖然係暑假加上星期日，但等左半個鐘就有位。首先當然就叫左個未來牛盛盒，雞腿肉同石鍋拌飯。個雞腿肉非常滑，咬落仲有肉汁，而且唔算貴，石鍋飯有d泡菜同牛肉粒，要黎餸燒肉一齊食，都唔錯。而個重點就係主角未來牛，西冷位置非常好食，又有油香，另外牛柳位置就切左一條條粗條，咬落好淋，點少少鹽就剛剛好，其他未來牛位置都ok，但唔夠呢兩個位置好食。食晒以上各碟之後就再叫左個豬腩肉，另一款石鍋飯同細d既未來牛盛合，豬腩肉得好少，雖然燒完肥肥地好爽幾好食，但唔太抵食，而呢個細既盛合雖然種類同之前重覆左，但3個人得1個盛盒1個飯明顯唔夠食。總結成餐飯，最好食係未來牛西冷、牛柳同雞腿肉，大約食左$1600左右，不過有張8折優惠劵，折成大約$1300到，唔算好抵食，但食物有質素，餐廳又唔會成大陣味，同埋有成7小時免費泊車，值得再來。…查看更多

近來天氣轉涼，中午食晏想食啲熱騰騰既野，去左將軍澳站附近搵食，決定就去試下豚王既拉麵。入到去Menu選擇唔多，有豚王、翠王、黑王同另外兩個，共5種選擇，但選擇左湯底之後就好多選擇，包括麵既粗幼、軟硬、配菜、叉燒、有沒有蔥等等。我叫左黑王，同事要翠王，聽個伙記講黑王有墨魚汁，翠王有芝士，另外我叫左半熟玉子、餃子，同事就叫左替玉（即係加麵）。湯底好濃，好好味，食既時候仲可以加即磨芝麻。我們的叉燒點了肩肉，唔肥、好淋。餃子皮好脆，點餃子汁，酸酸地好醒胃。半熟玉子非常好吃，有蛋香，而且中間流心。總結，麵、湯、餸都好食，但午餐來說比較貴。…查看更多

上次同阿爸食過，今次帶晒兩老再來食過，今次叫左蕃茄鍋配牛肉并盤，有肥牛、滑牛同手切牛。另外仲叫左鵝腸、蝦滑并墨魚滑、豬腩片、脆肉鯇同啤酒。今次試晒3款牛肉，最好食都係手切牛肉，而滑牛同肥牛都幾好食，不過蕃茄鍋味道就比雞煲底淡啲，邊爐始終雞煲會野味啲。蕃茄湯底有蕃茄、栗米同薯仔，都幾豐富，可以當蔬菜食。而今次鵝腸又係必食，今次食左2碟，蝦滑同墨魚滑保持水準，好食。…查看更多

今早過海工作，未工作先吃早餐，近近地就目的地樓下食，$41既早餐，有咖啡、茄汁豆、炒蛋、蕃茄、香腸同牛角包。牛角包熱熱地幾好食，炒蛋都幾滑，蕃茄、香腸同茄汁豆就一般啦，雖然$41唔算平，但配搭上比平時快餐店唔同，間中食下幾好。…查看更多

午間同同事食晏，得2個人，近近地來左這間台式食，menu入面有好多選擇，肉燥飯、牛肉麵、米粉、多士、打邊爐都有。我叫左牛肉麵，同事就叫左肉燥飯配牛腩。牛肉麵湯幾好味，但食完好口乾，應該係味精湯，牛腩有𡁻勁，唔錯。但同事話由於個飯無湯，牛腩比較乾，而肉燥都ok啦。價錢方便幾合理，唔貴，而且唔洗加錢有台飲，不過味道一般。…查看更多

回大埔探兩老，一家人落街晚飯，6點就去食，去左太興，大埔太興出左名，好快就咩都賣晒，果然名不虛傳，6點已經賣晒燒腩、分蹄，所以我們叫2個小菜加半隻雞。隻雞做特價，好抵食，雖然味道一般，但價錢好抵。另外叫左個魚塊豆腐煲，魚塊ok，但好少。還有一個洋蔥豬排之類，不是我叫的，而且我唔想食，所以我無食到，唔知咩味，但阿爸一個人自己食晒成碟，相信味道唔差。全餐晚飯最好味食豬肺湯，豬肺好淋，湯夠熱，好好味，但其他餸就一般啦。吃飽離開時，見到門外已排了約15人左右，真是利害。…查看更多

早兩晚約左個舊同學食飯，兩個麻甩佬、男人的浪漫，去左新蒲崗食中式晚餐。一入去個伙記已經推介食避風塘炒蟹，我們都叫左一個唔辣既試下，另外亦叫左避風塘炒蜆、大漠牛肉粒同豬大腸配墨魚，兩個人四個餸，應該相當夠飽。當然啤酒、汽水少不了。首先來的是避風塘炒蜆，雖然有少少辣，但蜆肉仍然好鮮甜，好肥美，蜆入面仲有汁，唔會覺得乾，作為前菜，送酒一流。再來是打冷檔的豬大腸配墨魚，豬大腸通得夠乾淨，腸壁夠厚肉，滷水夠入味，正。墨魚夠爽夠脆，點埋潮州辣油，好食。再來是大漠牛肉粒，牛肉好淋，唔會乾爭爭，而且仲有腰果同豆角，加埋辣椒，非常野味。最後係重點既炒蟹，外面非常野味，但蟹殻入面仍然好鮮甜而且好多蟹汁，而且隻肉蟹好多肉，蟹身、蟹鉗、連蟹腳都食埋，超正。總結而言，非常出色的香港風味，三五知己吹水好去處。…查看更多

星期六返工，由於將軍澳午餐實在太難搵位，所以決定食外賣，行左去戲院附近間漢堡包到買。要左個最平既芝士漢堡加薯條工同汽水。雖然係最平嗰個，但個包都幾大個，加埋塊牛肉同薯條，夠晒飽，味道方面，佢啲醬汁幾多，個味好啲似千島醬，係欠缺左酸青瓜，美中不足，而薯條呢間好食，夠粗夠脆，比起好多餐廳更優勝，我買完行左約10分鐘先到公司，但薯條仍然咁好食，推介。…查看更多

又到左中午食飯時間，由於今日我同阿爸都請左假，所以去食下平日午餐，食平啲，因為好多餐廳假日會收起午餐，會貴左。是日選擇呢間，因為想食上海粗炒，入到去見午餐menu有回鍋肉粗炒，即時叫左個試下，另外我亦叫左個雲吞擔擔麵，因為係午餐，所以送左4隻小籠包。雲吞麵到先，擔擔麵少少辣，好香花生醬味，有啲好似櫻花蝦同菜圃，每人半碗剛好，食晒成碗就會膩，雲吞皮唔厚，入面仲有肉汁，幾好。之後就係回鍋肉粗炒，呢到粗炒一向出色，加埋回鍋肉更野味，不過今次啲椰菜生左啲，太硬，熟啲淋啲會好啲。最後就係小籠包，雖然皮比較厚，但肉汁幾多，跟餐送的算係咁。以每人$80，質素算幾好，抵食。…查看更多

星期日下午，阿媽同老婆係屋企睇住BB，又係時間四圍搵食，近近地落大埔中心食，由於周圍都排隊，結果阿爸話未食過呢間，要試下。入到去我們被安排坐中間大枱，枱中間有一條流水，幾特別。由於menu啲字太細，阿爸要帶眼鏡睇，我們叫左1份豬手加肉醬薯條，跟餐有飲品，叫左熱檸蜜。先來了一份薯條，肉醬好味，但薯條淋左啲。再來是豬手，燒豬手已經切開左，唔洗切，幾體貼又方便食，豬皮好脆，而啲肉仲有肉汁，入口嫩滑，好食，配菜有酸菜同薯塊，不過薯塊是淋淋地辣辣地，都幾野味。…查看更多

因為呢排放假返左大埔，所以早幾日帶阿爸去食韓燒任食，去左oppa到試下。選擇左個4款肉任食，包括五花腩、豬頸肉、美國牛小扒同無骨牛肋肉。一坐下來就每樣都叫啲試下，另外佢前菜都係任食，啲泡菜唔太辣剛剛好，芽菜又咁清爽，兩樣都好正。首先到既係豬腩肉同豬頸肉，豬頸肉好爽，又入味，包生菜再加韓式醬，爽上加爽。豬腩肉就要燒耐啲，本來見到咁肥有啲怕，但估唔到燒完剪開一舊舊，脆卜卜，由於燒晒啲油出來，所以一啲都唔油膩，係驚喜大發現，仲好食過中式燒肉。再來的是牛肉，送到已經覺得肥瘦適中好唔錯，燒熟夾埋生菜同泡菜更野味。另外我們亦叫左個牛肋骨湯同真露煮蜆，個牛肋骨湯好濃郁，啲牛肉好淋，啲蘿蔔仲吸晒啲湯汁，好解渴。而蜆湯就好鮮甜，完全無沙，仲有幾塊魚膏，夠爽口。由於每人只包1罐飲品，我們選擇左cream溝鮮奶同柚子茶，食韓燒配韓式飲品，一流。…查看更多

出開去舊墟大街市買餸，順便去食個下午茶，上左熟食中心2樓，去蘇記食個西多士，飲返杯凍奶茶。呢到啲西多特別香蛋味，第二度食唔返，雖然落煉奶，唔係糖膠，但都好好味。而奶茶就好香茶味，可能有啲人覺得唔夠滑，但我反而鍾意佢既茶味，始終奶同茶既比例各有所愛，我覺得呢到剛剛好。雖然$39貴過一般快餐店，但味道比快餐店好。…查看更多

早2日放假回家湊仔，中午偷閒，叫嫲嫲睇住阿B，我就落街買餸食碗粉，由於近翠屏街市，去左學利食。$35/碗魚蛋粉，夠大碗，湯夠味，食完唔口乾/口渴，魚蛋爽口彈牙又有魚味，是附近食魚蛋粉不二之選。…查看更多