為食豬老婆的个人专页

早餐時間到了這間裝修過後還沒有光顧過的茶餐廳，餐廳的環境的確比以前高雅了，所有桌椅也是新造的！這店標榜健康飲食，奉行少油少鹽，在茶餐廳比較少見，是日早餐： 沙嗲牛肉麪：沙嗲的味道很香很濃，就算與湯拌勻味道依然濃郁！牛肉味道還隱約可尋，不算太靱，麪煮得比想像中要彈牙，是區內試過最好的！:) 午餐肉炒蛋配牛油方包：薄薄半圓午餐肉煎得不算香口，只是過一過火便算完成！炒蛋由煎蛋改成，可是炒蛋炒得過火，沒有一點蛋汁，硬硬的像片塑膠！:( 熱鴛鴦：茶味咖啡味配合尚算不俗，味道亦不錯！早餐時段通常都會有兩個侍應，老板負責收銀，有時還得幫忙送餐。論服務態度，只有老板十分有禮，店員則木無表情，如同機器運作，臨走時永遠會說多謝的只有老板一人，仍需改善！…查看更多

這外賣店子以平價壽司刺身招徠，店裏是自助式的，客人可以在凍櫃裏隨意選擇自己所好，有點像百佳的夾壽司檔！今日走過便買了一板三文魚刺身回家享用，二十五元一客共有七片，抵吃與否就見仁見智了！三文魚的賣相嚇人地鮮艷，橙橙的顏色實在有點假，店員替我包裝好後還放上一包小冰塊，感覺還是頗週到的！:)三文魚的食味淡了一點，滑是很滑了，奈何魚味欠奉，吃在口裏只是一片肉而已，想作三文魚解饞之用也十分勉強！始終是味覺先行，就算再便宜也無補於事！附上的青芥辣十分嗆鼻，但鼓油卻一點也不鹹，雖然不是這家店的出品，選用也難辭其咎！:(要吃好一點的三文魚，還是要多付出一點吧！…查看更多

好一陣子沒吃麥當勞的早餐了，今天早上經過就去買了一個：:) 薯餅：雖然早上吃炸的東西有點過份，不過這薯餅仍是頗美味的，因為剛剛炸起夠熱而且夠脆身，薯餅本身無甚麼食味，只有天然淡淡的味道，只要加上少許幼鹽，味道便會提昇！ 煙肉蛋漢堡：這個是我最喜歡的麥當勞包款，奈何只有早餐時段才會供應！包是美式 的 muffin，外層有很多粉而且頗較硬，內裏的質感比較軟熟，組織呈一個洞一個洞的，包烘過之後有點脆口，內褢夾著的是一片圓圓的太陽蛋和同形狀煙肉，再加上芝士一片。蛋的確是美國雞蛋，大隻但略欠蛋味，這也是美國蛋的特性吧！煙肉最好之處是沒有一點肥，比常見的煙肉少了脆口感覺，但心理上覺得健康些；芝士味很濃，半融狀態結合各種餡料的味道最佳，一定要趁熱食，否則涼了一來不好吃，二來會黏著包裝紙，麥當勞有芝士的包款都有這個缺憾！ 咖啡：麥當勞的咖啡是進少了，味道比之前的好，不知是否換了其他牌子的咖啡豆？荃灣街市街這分店我較少光顧，她只有二樓有座位，地下一層只用作售賣食物，要坐著吃一定要上二樓，拿著食物，尢其是汽水就很不方便！店內的裝修都是整整齊齊，一貫大集團的風格，招呼就一般，店員真是沒有什麼笑容，當然跟電視廣告那美女跟你說 good morning 的感覺差別很大！…查看更多

葵芳又有新店開張，想不到是汕頭澄海老四，此店在九龍城頗有名氣，售賣的都是傳統潮州食品！此分店面積不大，主力仍是售賣滷水鵝及其他滷水食物，此區原本已有兩間食店售賣滷水食物，不過汕頭澄海老四一開張，便搶去了不少生意，午飯和買菜時段更是人頭湧湧，風頭一時無兩！店內掛滿了滷水鵝，一旁還有架小食車售賣即叫即製韮菜豬紅豬腸，除了滷水食物外，此店也有售賣各式潮州糕點及小食，好像肉粿、芋絲粿、芋茸粿、紅桃粿、韮菜粿、椰菜粿、潮州粉果、客家茶粿和糯米釀大腸等，其中最多人買的除了滷水鵝外就是韮菜豬紅豬腸，我也買了一碗來試試！買時店員會在你面前即淥韮菜，加上豬紅、豬腸，乾蒜粒，最後亦會問你要不要糊椒粉，招呼不錯！韮菜豬紅豬腸是放在湯裏的，湯底味道鮮甜，帶有濃濃肉味；韮菜頗新鮮，顏色青綠，味道清甜無渣；豬紅質感彈牙滑溜，味道濃郁；豬腸有肥腸和瘦腸，肥腸的膏很香，入口即融；瘦腸就稔滑味美；炸蒜因為遇湯變稔，不過仍可增加香味，這個小食味道實在美味！看來下午茶又多了一個不錯的選擇！…查看更多

豆豆麵包西餅這店子在葵芳要算是最老的麵包店了，出品水準一向穩定，區內口碑極佳！最近就趁著十週年紀念裝修休業一排，重新開幕時還請了醒獅隊助興，十分熱鬧！ 我亦趁此機會再嘗嘗她的出品，看看是否比之前進步： 千島蟹柳薄餅：此店的麵包一向美味，包的質感十分軟熟，而且麥味香濃！這個包的餡料頗多，千島醬味道酸酸甜甜很醒胃，蟹柳焗過之後味道不錯，還有很多香甜的粟米粒，令包的味道更豐富，食味更好，新店果然有進步！ 阿華田幼麥包：這個是改良了的麥包，是近年才有的包款，也是我頗喜愛的，在別的店子暫時還未見過！幼麥包本身食味單調，但加上了阿華田口味令其變得更香更美味，包的質感十分軟綿，內裏纖維細密，味覺上和嗅覺上也令人滿意！新店的裝修比之前光猛，全店用上橙色的色調令人眼前一亮，包櫃也裝上了燈光，令麵包賣相更加吸引，除了麵包之外，也有傳統中式餅食，生日蛋糕和各式小型蛋糕售賣；店員招呼殷勤有禮，難怪在區內能迄立多年！:)…查看更多

呢間珍珠皇喺葵芳都好耐嘞，名都改過，所以我估佢又轉咗手，以前真係一間台式餐廳嚟，不過好幾年前已經轉賣燒味同兩餸飯，門口有燒臘檔做外賣，側邊有架好大嘅餐車，分成一格格，入面係各式各樣嘅餸菜，做外賣之餘，亦供應比店入面嘅食客！兩餸飯呢種食法我真係從來未食過，因為要食勻全個葵芳，所以都嚟試吓！我以為佢啲兩餸飯嘅餸係剔紙仔嘅，原來係叫你自己出去架餐車度點，我都係點指兵兵咁叫，其實啲餸確實嘅名叫乜嘢我真係唔知： 咖喱雞：咖喱雞嘅味道已經係港式嘅咖喱，有少少辣，不過又帶微微甜味，有啲古怪；啲雞全部都係雞中翼開二，搞到有啲碎骨，而且炆得太過稔嘞，一夾就已經離骨，味道就真係一般！咖喱入面仲有啲薯仔，食味竟然好過咖喱雞，因為炆得啱啱好未稔晒，好彩薯仔多雞翼少！ 豬扒：呢個豬扒嘅汁有啲似中式牛柳或者京都骨嗰種汁，味道酸酸甜甜咁，豬扒就好過咖喱雞好多嘞，至少啲肉鬆軟有肉味之餘，仍然有啲質感，而且味道都幾惹味，唔錯！ 凍鴛鴦：呢度啲兩餸飯外賣係唔包嘢飲嘅，堂食就當快餐有嘢飲，不過比多十蚊！我食飯一定要飲嘢所以都冇乜所謂，叫咗杯凍鴛鴦，杯凍鴛鴦都幾大杯，不過味道都係一般，冇乜驚喜！珍珠皇嘅裝修有啲台式餐廳風味，可能係接手之後費事再整，有幾張卡位，其他嘅都係台式餐廳嗰種細細嘅方枱，有啲仲泊埋一齊，方便人多嘅食客，有啲家庭式嘅感覺！佢的而且確都有賣台式飲品嘅，不過可能個樣唔係擺到明做呢樣嘢，所以食完一個午餐都冇見到有人叫過！招呼就一般不過不失啦！…查看更多

呢間桂香話就話係台式，不過我唔知佢嘅台式係指啲乜嘢，佢門口有賣燒味、鹽焗雞同埋兩餸飯，入面亦有座位可供堂食，環境都係一般茶記格局，以卡位居多。今日經過，見到佢門口啱啱有鹽焗雞，每隻都只係四十蚊，就買咗一隻試吓，人太多，我就決定唔叫佢代斬，自己番屋企再斬！隻雞都唔算細但係亦唔肥，肉真係幾多，斬埋都有一大碟，夠成家人食！ 冰鮮就已經預咗，不過啲雞肉就出奇哋嫩滑，雞皮下仍然有啲雞啫喱，味道鹹鹹香香咁，都算唔錯嘞，最好味嘅部份梗係雞脾啦！雖然呢間店因為人多，所以招呼都係一般，不過最緊要係夠平夠好味！…查看更多

今日下晝去咗呢間舖頭細細嘅潮州滷買四寶飯做午餐，呢間舖頭喺葵芳都開咗唔少日子，不過我未幫襯過，今次係第一次。佢只係做外賣嘅，舖面可以見到一隻隻掛喺度嘅滷水鵝同其他滷水食物！招呼就一般啦，你話要乜，佢就去切，整完收錢，交流就係咁多嘞！不過外賣店好多時都係咁，冇乜所謂！四寶飯入面有一隻切開嘅滷水雞全翼 、四五嚿豬耳、一隻滷水蛋同埋一嚿滷水豆腐，成個飯面都鋪滿晒餸，睇落都幾抵食！佢啲滷水汁唔算太濃，味道都幾好，不過就好似好多油！我仲以為四寶是旦有一樣會係鵝件或者鴨件，就算鵝翼鴨翼都好丫，點知淨係得雞翼，有啲失望！:( 雞翼滷得幾入味，冰鮮雞就一定架啦，肉都幾嫩滑，不過味道實在冇乜驚喜；豬耳整得好稔好入味，不過真係好油好肥，而且面頭仲有啲硬毛，我食咗兩嚿已經覺得好膩！滷水蛋亦又唔係滷鴨蛋，都係雞蛋，不過隻蛋本身嘅質感幾好，蛋白又彈又滑，蛋黃甘香，再加埋滷水汁都真係幾好味！豆腐係成嚿切比我嘅，夠豆香亦算滑，味道都算唔錯！不過最慘不忍睹嘅係盒白飯，因為佢啲滷水汁同滷水食物真係太油太肥膩嘞，盒飯個底全部都係油，油浸飯喺冬天真係有啲難頂喎！:(要試都係買淨餸好嘞！…查看更多

下午茶時間，咁啱要出九龍，又有啲肚餓，就喺呢個港鐵站入面嘅惟一包舖買麵包簡簡單單又一餐！呢間包舖好似都收得幾早，五點左右就會全店九折，我買咗個香蔥火腿包！包嘅面頭有好多蔥粒同芝麻，味道都幾香，火粒腿亦夠多，最正係個包本身，有淡淡嘅麵粉香味，內裏嘅質感好細好密，幾正！呢間舖頭仲有賣曲奇餅同蛋糕西餅，店員幾好笑容，入去已經話比你聽有特價，下次可以再試！…查看更多

一向都好少叫外賣 Pizza，因為送嚟嘅時間唔可以控制，往往影響咗食味，今晚因為啲細佬妹興致勃勃話叫 Pizza 番嚟一路食，一路開枱，我就捨命陪君子！妹妹一向好鐘意叫呢間外賣 Pizza，佢話好味過 Pizza Hut，我知道佢其實係以前嘅 Domino，未執之前都試過去朋友屋企開大食會叫過一次，已經唔記得好唔好食！ 我哋叫咗一個 $183 嘅 Combo 套餐，包一個大薄餅、一客意粉或焗飯、一客雞翼、四客沙律或餐湯或1.25公升百事可樂一支： 多寶大薄餅：原本想轉超級多寶，不過要加$15，轉超薄奇脆加$8，轉芝士軟心就要加$12，每轉一樣都要加錢，最後都係要番普通多寶。Pizza 嘅賣相唔錯，薄底幾特別，當然比唔上意大利薄餅嗰種好似餅乾脆卜卜嘅質感，但係又唔似 Pizza hut 嗰種又乾又熱氣；佢嘅餅底真係好薄，唔脆而且仲好軟，有啲似麵包，雖然唔夠脆，但係味道同水準的確唔錯！薄薄軟軟嘅餅底反而仲突出咗餡料嘅味道，多寶嘅餡料有青椒、洋蔥、薄片紅腸、磨菇同意大利腸；意大利腸味道最濃最搶，混合芝士同蕃茄醬，加埋薄薄嘅餅底，細細件唔覺膩，好快就食晒喇，雖然冇 Pizza hut 咁濃味，但係都幾正！ 煙鴨胸螺絲粉配巴黎牛油汁：賣相一般，螺絲粉焗得太稔嘞，冇晒彈牙感；巴黎牛油汁顏色有啲似咖哩汁，食落有啲甜甜哋又似燒汁，味道幾濃幾惹味，都幾特別嘅！鴨胸切得頗薄質感嫩滑，帶有淡淡煙燻味，食味唔錯！除咗鴨胸仲有好多青椒、洋蔥同磨菇，增加外觀之餘，亦令個意粉味道豐富啲！ BBQ雞翼：雞翼嘅邊沿有啲脆，雞翼夠大隻，肉嫩滑，亦醃得好夠味，面頭嘅醬味道香濃，OK！ 雜菜薯仔沙律：沙律除咗有薯仔，仲食到有紅蘿蔔，味道似一般跟餐沙律，唔算突出，不過送嚟嘅時候夠凍，即刻食味道都幾好！我哋打完電話半個鐘已經有得食，比想像中有效率！最欣賞呢間店嘅 Pizza 盒設計可以作環保碟用，幾有心思！總括嚟講，佢嘅 Pizza 料算幾足，價錢又平，的確係唔錯既選擇，只不過小食嘅款式可能就唔太多嘞！…查看更多

今日收工都成七點嘞，有啲肚餓，去到葵芳地鐵站見到呢間小食店都有幾多人買嘢食，仲有唔少人圍住個檔食緊，我就睇吓有啲乜嘢啱食！呢個小食店都幾大，賣嘅嘢款式真係好多，我由左邊掃到右邊，睇真啲佢賣嘅嘢食！佢嘅最左手邊係一大盤冰鎮嘅凍咖啡同埋凍奶茶，跟住係各式各樣嘅串串小食：有咖哩魚蛋、咖哩魷魚、牛柏葉，黑椒根丸、牛丸、香菇貢丸、墨魚丸、龍蝦丸、紅腸、廚師腸、雞腎、螺肉、麪筋…真係好多！再過啲係牛雜、豬腸粉、炒麪、燒賣、牛肉、酸齋同埋串燒，仲有煎釀三寶、炸多春魚、炸魷魚鬚、炸春卷、咖哩角、炸大腸；最右手邊嘅有炸蕃薯餅、炸芋頭餅同埋蘿蔔絲餅，連熱狗，三文治都有，三文治都十幾款，真係多到我眼都花埋，差唔多所有街頭小食佢都齊晒，真係厲害！最後我揀咗炸蘿蔔絲餅因為唔係成日見到！呢度嘅蘿蔔絲餅都幾大嚿，因為啱啱炸起，皮仍然係脆嘅，不過就比較粉多而且厚，入面嘅蘿蔔絲餡有好大朕五香粉味，除咗白蘿蔔絲仲有紅蘿蔔絲，食味同舊時食到嘅差唔多，幾好！白蘿蔔絲好軟，紅蘿蔔絲就有啲爽脆，配合得唔錯！雖然啲蘿蔔絲切得唔夠幼細，不過食嘅時候一絲絲扯出嚟，又幾好味喎！因為個餅都幾大個，所以食完都幾飽，不過我都知呢樣嘢係好肥嘅，久唔久食一次就冇所謂！呢間小食店入面都有四五個人做嘢，招呼就冇乜，因為個個都要快手，不過佢啲嘢真係幾多，成個舖面都擺滿食物，加埋啲香味又真係幾吸引嘅，下次再試吓其他嘢食先！:)…查看更多

今日趕時間，又嚟呢度食車仔麵，今次要咗豬手牛筋配油麪！油麪好多，煮得啱啱好彈牙，不過今次啲餸就差好多嘞，唔知係唔係貴啲嘅餸都係咁嘅呢？牛筋得三四嚿，每嚿一吋左右，味道唔錯，炆得好稔好入味，又爽又滑又彈牙；豬手差少少，成碗得三嚿，炆得唔夠稔之餘，皮仲有啲硬，而且骨多過肉冇乜嘢食，有啲失望，惟獨係湯底夠味，啲麪又真係幾好食又夠多先至覺得冇咁差！下次都係叫番啲大路啲嘅餸算嘞！…查看更多

今日喺沙田行街買嘢，唔經唔覺就入咗嚟呢間舖頭，原本係睇手袋嘅，不過最後都係過咗去小食嗰邊，我哋就揀咗： 迷你醬油麪：麪嘅表面都幾深色，因為落咗味道，外型同質感其實好似福伊麪，只不過份量較細，呢款麪通常都係就咁食，有時我都會放落個杯度用熱水淥嚟食，天氣凍都幾正架！就咁食就好脆，一路睇電視一路食，都可以代替薯片嘅！無印良品最近仲改咗佢個包裝，原本一包五個，麪底有個膠托盤裝晒五個；而家就改成每個獨立包裝，有好有唔好，好嘅就係食嘅時候方便啲，而且食完一個唔怕其他嗰幾個疏氣，:) 唔好嘅就係唔夠環保囉！:( 迷你豆乳冬甩：呢個食落真係有好大朕豆漿味，不過佢話係冬甩，我就覺得佢嘅質感偏向蛋糕嘞，而且油份似乎多咗啲，試吓就算嘞！呢間店因為係日式連鎖店，環境同服務都有番咁上下，店員都好有禮貌，所以得閒嚟睇吓，逛吓，買吓都幾 free 嘅！…查看更多

椰汁大王開分店開得好密，就嚟每一區都有，成日都見到有條人龍排隊買，因為唔想排隊，所以佢開咁耐我都未飲過！今晚已經好夜，都過咗半夜十二點，呢間舖仔細細嘅椰汁大王竟然仲未收，得番一個客買緊，我就即刻又排隊買杯試吓嘞！店長好快手又好笑容，唔駛兩分鐘我就買到，杯椰汁顏色好純白，飲一啖，嘩！同細路仔時飲到嘅味道一模一樣，椰味濃郁，質感豐厚，入面隱約仲有絲絲椰絲，不過啲碎冰就唔夠碎嘞，有啲難咬，整體上都係好味嘅，我稔至緊要係呢樣啦！…查看更多

因為要還神，我哋一家人慣咗每年都要買一隻乳豬，今年啲原隻乳豬好貴，我哋喺唔同嘅區分格過晒啲價錢，都要四百八十至五百八十不等！我記得楊屋道街市啲嘢係荃灣區最平嘅，就過去睇吓入面有冇燒味舖，上咗一樓果然見到有一間，一問之下，呢間燒味舖嘅原隻乳豬只需三百五十，真係平好多，就訂咗一隻嘞！基本上係今日訂，第二日就有嘅，我落咗一百蚊做訂金，還神日再攞！之後我又問阿叔朝早開幾點，佢話六點幾，仲問我要唔要早啲，真係好週到喎！還神日朝早上到去，佢成個檔口都企滿晒人，因為佢啲燒味真係好平，好多街坊都嚟買啩！我比張單佢，佢雖然好唔得閒，但知道我趕時間，就叫個阿姐幫手整比我！啲乳豬燒好晒，掛喺檔口度，阿姐仲叫我慢慢揀添！ 我要咗隻比較瘦嘅，阿姐好殷勤咁幫我為隻豬插頂花，鋪紅玻璃紙，包乳豬醬，袋乳豬醬入面閒閒地都有十幾包，不過阿姐佢仲係咁問我夠唔夠，搞掂晒之後又好有禮貌講多謝，仲提我小心地下好滑，真係細心！:)還完神返到屋企，我哋就斬開隻乳豬一家人一齊食嘞！隻乳豬攤咗咁耐，一攞出嚟仲係好香，塊皮係芝麻皮，食落好香之餘，竟然仲好脆而且冇肥膏！呢隻乳豬唔會因為平只係得層皮食吓，啲肉都幾厚，亦好似阿姐講咁，一啲都唔肥，又嫩又滑，我揀咗嚿豬脾肉食，嘩！ 真係啖啖肉，味道鮮美兼肉質細密，冇得頂，乳豬醬都唔駛點呀！ 我哋成家人都未曾試過一餐差唔多食晒成隻還神豬嘅，次次都要食兩三日，今次真係第一次！下次買燒味，唔駛諗我都知道去邊啦！…查看更多