一茶匙的個人專頁

食過番尋味！上星期試完，今個星期六又想再黎幫襯兩餸酸辣粉。午市$42兩餸真係好抵食！今次叫左雞翼&鴨血。雞翼好有驚喜，係蒜香炸雞翼，新鮮炸起、勁香勁好味！完全唔係炸定攤到油笠笠嗰啲！好有誠意！鴨血亦係新鮮好味、幾滑口。湯底夠酸，好開胃！非常岩我口味！湯底有肉碎、芫荽、芹菜、酸豆角，間中會咬到好香好麻嘅花椒粒，刺激非常！碗底仲有唔少津白菜，薯粉煙韌彈牙！好值得幫襯！…查看更多

喺東京食過丸龜覺得幾好食，見香港都有得食就去食下。食完之後超失望，同日本食到既完全無得比。可能太好生意，啲 STAFF 做到燥燥地。我叫左個蕃茄烏冬，碗野少少熱 ONLY。我未食過湯麵係暖暖地，唔係熱辣辣。另外叫左個炸物，係魚黎既，油到 high high ！食完個胃都唔太舒服。日本食到既係唔油膩既....點解香港呢邊可以煮到咁大差別？ 咁樣要40幾蚊，我都係自己喺屋企煮烏冬落麵鼓湯好過。如果唔係喺日本食過，其實你會覺得佢OK。但因為我試過所以覺得落差好大，唔係好接受到。…查看更多

喺FB見OPEN RICE推介，覺得價錢好公道，似好正好好味。好想試！有一日約左朋友去元朗，終於俾我試到！就喺元朗廣場巴士總站果頭。去到排長龍，但都好快就到我地。入到去感覺非常好，裝修靚又有特色。最緊要係個冬菇花膠撈麵，同OPEN RICE介紹既一樣，唔會貨不對版！真係好足料，花膠都幾多，食到有啲滯。宜家香港出街食飯閒閒地都四五十蚊，一個花膠麵竟然先$48。有咩理由唔試？食完個麵，真係心郁郁想買返包花菇。平平地，百零蚊。…查看更多

兩個人想打邊爐，喺openrice揀左好耐唔知揀邊間火鍋店好。任食火鍋太趕時間，唔岩一邊食一邊慢慢傾計，其他火鍋店又坐得唔舒服。最後見到呢間滾喜啲坐位幾舒服，全部卡位，又好似幾乾淨企理，就決定試下。經openrice訂枱有7折，開頭都擔心係唔係伏，做7折唔知係咪好難食所以做特價。去到火鍋店，因為有訂枱留左個角落既卡位俾我地兩個。揀左莞茜皮蛋湯底...個湯底等左好耐，個鍋都未到，啲野食已經到左。聽店員講個湯底係即整所以比較耐。黎到飲左碗湯底，真係新鮮清甜啵，好足料，有豆腐，有馬蹄，當然仲有主角莞茜同皮蛋啦。感覺上好清甜無味精。啲火鍋料都幾好，幾新鮮。最唔新鮮係啲生菜有黃邊同埋腍左唔太脆身。除左生菜，仲叫左個蚌肉，什菇，竹笙，牛柏葉，同埋豚肉。樣樣都新鮮，分量都足。叫左扎竹蔗茅根，好似好足料唔會太甜。但個壺入面啲料唔知會唔會重用。店員都幾好人，幾nice! 請佢地幫手催下單都會跟。仲有個廁所都幾乾淨！加分！成餐都幾滿意！唯獨係上菜時間慢，但打邊爐都係慢慢食，所以可以接受！2個人埋單$366。下次會再幫襯！…查看更多

成個地鐵站都係賣啲凍冰冰既包，美心啲包凍冰冰得黎仲要勁貴！終於開左呢間買蒸包既舖頭，叉燒包、菜肉包係我最常買既。都足料，叉燒包調味不錯，唔會過咸，食到有肉粒；菜肉包既菜同肉比例都唔錯。最緊要係熱辣辣同新鮮！價錢都唔貴7蚊、7個半。食蒸包感覺上都健康啲，成為左個我既早餐必選物！女仔一個就夠食，男仔可能要食兩個先名飽。另外啲店員都手腳快，趕返工嘟八達通唔駛幾秒就拎得。希望將來啲蒸包款式有更多選擇，最好就賣埋燒賣魚蛋啦。…查看更多

食上癮啦！一星期食左兩三次。外賣自取返屋企慢慢嘆！每次都係食多酸麻辣薯粉小辣，真係好惹味！最近仲做緊全單9折，都幾抵食！豬潤保持到一貫水準，豬紅第一次食都幾驚喜，質地好好又無怪味，好食過附近打冷果間。薯粉好食過第一次幫襯試果隻扁身水晶粉。外賣個碗都幾實淨，返到屋企唔會熱到變左形。堂食叫過雞翼$36/5隻，跟泰式甜辣醬無乜特別。唔係特別好食，但又唔會難食，正正常常，肉質都幾嫩。下次可以試下啲小窩米線！…查看更多

附近新開左間米線店，鐘意食川菜既我當然要試下！起初都怕會中伏，但碗豬潤重慶酸辣粉黎到又似模似樣啵！幾大碗！開頭以為個酸辣粉係圓身果隻，黎到發現原來係扁身，第一次試呢款薯粉。豬潤方面，新鮮無異味，仲有少少酒香，應係落左少少酒辟腥！花生比起平時食果啲大粒，好香好脆！小店似係一家人營運，feel 到佢地好有 heart，好想搞好間舖。環境都好乾淨舒服。希望將來生意好左都唔會變質啦！下次多啲人食再試佢地啲小食 😆…查看更多

出面尖咀旺角食個甜品都好鬼貴，整得又hea又唔好食...呢間唔錯，坐得幾舒服、裝修都幾靚。叫左個banana crumble ，覺得都幾好味...甜品黎講價錢都OK。香蕉味濃、脆脆暖笠笠、雲尼拿雪糕又凍冰冰，三樣加埋...正呀！脆脆一定要撈埋雪糕食，淨食太DRY。…查看更多

餐廳由泰國人經營，價錢幾抵，味道可以。不算出色...最好味係蝦餅，大大件熱辣辣、好彈牙。生菜包、冬蔭公就尚可，香料好似落得唔夠...覺得唔太惹味。相比起我平時幫襯開上水某間泰國餐廳，差不多價位，呢間味道較遜色...…查看更多

間餐廳在屋企附近，時常經過但從未試過。今次第一次，一試難忘！店面細細，但都坐得舒服。5點鐘去幫襯得老闆娘一個，見佢做到踢曬腳。生意非常好~叫了淨酸辣粉及淨涼麵各$23、鑵裝可樂$7酸辣粉好好味，但略嫌唔夠酸。因為價錢平，配料例如花生亦比較少 。涼麵夏天食一流，愈食愈麻，愈食愈辣！好爽。如果有加埋青瓜絲就完美啦~啲麵都大件夾抵食！相比起那間「傷心酸辣粉」，呢間真係好抵食，支持香港小店！…查看更多

二人餐揀左1個酸辣粉、1個白飯。可以揀3個餸，分別揀左口水雞、乾撈牛肚、小黃瓜。口水雞無得頂，肉質夠滑而且新鮮。牛肚都唔錯，跟好多莞茜。點埋口水雞個汁食，真係無得頂！小黃瓜就一般，因為係用青瓜扮小黃瓜。所以比較有草腥味同厚身。套餐唔包野飲$118...兩個人可以食到咁多餸，真係覺得好豐富好滿足。…查看更多

開頭唔知有lift搭，行左幾層樓梯、行到身水身汗。上到去見好多客，仲心諗間野真係唔簡單...咁多客願意行樓梯上去食...=.=上到去自己搵位，自己研究點叫...見到枱面上果張水蛇春咁長既介紹真係有少少嚇襯。好用心咁睇左段介紹好耐，終於決定叫普通酸、小辣、米線煮耐啲 + 魚腐。諗住叫個staff幫我落單，點知叫左陣位職員都好似聽唔到咁，掂行掂過...個米線好岩我胃口，夠酸又唔太辣。食得好過癮!份量方面都夠食，但相比先譚仔就較少。魚腐都唔錯，彈牙又唔會浸到無味。  臨走先開心大發現有電梯...哈哈下次去尖沙咀一定會再上樓食! …查看更多

下午茶先點南瓜煎堆，炸到脹卜卜，見到都好 high！識食一定要襯熱食，咁先煙韌軟綿。凍左就好油好膩，完全係另一回事。所以中國人話飯要襯熱食真係好有道理！另外點左香茜牛肉腸同埋七件點心拼盤，total $27.8。最好味係碟腸粉好滑，其他點心都正正常常。個菜肉包就普通過普通...相信富臨既點心都係中央製作，再運到各分店加熱。全餐係煎堆最令人驚喜，另外點心上枱時都係熱辣辣既。算係咁啦！…查看更多

叫左個中辣雞煲，食到中段先開始覺得辣，但唔麻既。雞肉可以無限 refill，肉質都好鮮嫩、非常驚喜。試過去元朗食過另一間既雞煲，雞肉好柴。另外火鍋配料都好新鮮，都幾多選擇。木耳呀，珊瑚蚌唔常見既都有提供。鮮腐竹好滑好好味！另外雪糕係阿波羅，仲有我最鍾意食既香芋味。終於唔駛食雀巢雪糕咁行。個人覺得阿波羅比較好食！環境方面，因為樓底較矮所以會覺得個場好嘈。比較難傾計。有個男侍應好好人招呼得好好，又唔似其他食評咁講到服務好差。…查看更多

打邊爐一位$159，每人包杯特飲。我揀左百香果～火鍋叫左椰子湯底。湯底有驚喜！椰子味好清香，好天然、唔似香精味。完全估唔到椰子湯底同豬肉牛肉咁夾！台正燒既肉又唔係話特別好味，但係個質地就好正！好鬆化！又唔肥！切得好薄！完全唔會韌、又無渣。海鮮方面有蠔仔、蜆、蝦、蟹。除左蟹好似凍壞左有點兒霉霉地，其他都好新鮮、無沙、無腥味！我最鐘意既牛柏葉都好爽口同新鮮。另外點菜紙當然都有丸呀、餃呀、雞呀...唔一一介紹啦！自助吧方面，有好多野拎...川味涼菜（芽菜、青瓜、菠菜）芋絲、芋頭、海帶、南瓜、響鈴、山根、蕃薯粉、出前一丁、淮山、雀巢雪糕等等，仲有幾樣菜。我個人比較鐘意自助形式，因為自己鐘意拎幾多、拎咩都得。另外醬料方面好開心有麻辣醬拎！賣飛佛！唯一不足係飲品，佢係一扎氣水斟，唔係一罐一罐供應。 總括黎講性價比高！抵食呀！台正燒除左邊爐，仲有串燒食...好耐之前食過，都好正架!…查看更多