ahken0的個人專頁

久聞呢間餐廳幾好食，咁啱今日路過就試一試佢啦。個蒜蓉包熱辣辣兼卜卜脆，十分開胃。青口新鮮得嚟又唔算太細隻，個汁亦好正。呢個pizza認真抵讚——厚薄適中、芝士嘅份量洽到好處，絕對值得推介。呢間餐廳由環境到食物質素都係一流嘅水準，唯一嘅唔好處就係有少少隔涉（西貢及馬鞍山居民除外），不過少食多滋味啦。…查看更多

仲記得一兩年前第一次嚟嘅時候食咗個令人感覺好幸福嘅魚湯拉麵之後，每次想食拉麵都會第一時間想起呢間餐廳。今次難得同幾位老闆路過，決定再次嚟重拾幸福嘅感覺。我哋到達嘅時候正好係放食晏時間，不過好彩尚算嚟早一步，因為冇幾耐之後就出現咗一大群中學生（by the way呢度平均都三四十蚊個餐，可見而家啲中學生真係好有錢＝_＝）。老闆一號點嘅北海道蟹棒烏冬先上。我借咗一啖嚟食，只覺已經好耐冇食過咁彈牙嘅烏冬，相比之下市面上好多標榜“手打烏冬”嘅餐廳簡直係唔入流。我嘅拉麵就要等得耐啲（大概15分鐘），不過都好值得，因為又係一流嘅食物——湯底濃得嚟唔算太過味精、麵質彈牙到冇朋友、餃子脆卜卜、配菜（如糖心蛋及蟹棒）亦製作得一絲不苟。呢啲咁出色嘅餐廳實在不可多得，我一定會再嚟。…查看更多

今次十月之星嘅生日宴選擇嚟呢間私房菜搞，事緣母親大人之前嚟過覺得幾得，今次我哋就一於嚟試一試佢。可能因為佢最近先搬嚟嘅關係，去到樓下竟然喺水牌上揾唔到餐廳嘅名字，好在有看更喺度可以問到幾樓。上到去一開門就見到一個好簡潔嘅招牌“５Ｒ”掛喺牆度，按鈴之後就入到呢間好有住家feel嘅餐廳。裏面有三數張枱，佈置簡單得嚟畀人好舒服嘅感覺。仲記得好耐之前食過另一間所謂私房菜，上到去十幾圍枱好似茶餐廳咁，同呢度真係冇得比。今晚只係得我哋一枱（即係包場），入席後老闆娘過嚟同大家打咗個招呼，然後就介紹今晚嘅menu。點咗菜冇幾耐就開始有頭盤食。先上嘅係麵包。每人有兩片：一片係普通麵包，另一片係墨魚汁麵包。麵包上伴有番茄同芝士，口感一流。跟住嘅係法國青口——個忌廉汁十分好味，青口亦好新鮮；只係size唔算太大所以有少少唔夠喉嘅感覺。然後就係沙律——有別於一般西餐沙律嘅係佢加入咗菠蘿同煎芝士，畀人好新鮮嘅感覺（當然亦係好好味）。Main dish 之一係劍魚。我借咗一口嚟試覺得幾好味；老闆一號就覺得鹹咗少少。Main dish 之二係燒春鷄。我試咗隻脾，簡直驚為天人——外脆內嫩，有少少後悔冇揀呢個。好在我揀嘅黑豚肉亦都係上乘之作——香口得嚟肉質鮮嫩，冇得彈。最後當然唔少得甜品——冰凍嘅雪糕配以暖暖嘅酒煮車厘子，令人有一種好感動嘅感覺。最後仲有一個特別訂製（不過要另加三百蚊）嘅朱古力蛋糕，碟邊寫上Happy Birthday，為呢餐生日飯畫上完美嘅句號。…查看更多

嚟到呢個杳無人煙嘅地方，想食熱食都真係冇乜選擇，唔幫襯佢個飯堂就只能夠捱杯麵喇。喺呢個大前提之下我哋當然乖乖哋放低幾十蚊喺度食晚餐啦。原先以為要搭枱，不過原來每個入營嘅單位都有自己嘅枱，食物份量就按人數分配，咁嘅安排都唔錯喎。去到自己張枱坐底，見到啲餸都係最typical 嘅飯堂食物——蒸水蛋、咖哩魚蛋、雞同埋菜。由於冇任何期望嘅關係，所以雖然見到個賣相唔係好得，但我都冇乜失望嘅感覺。之不過食咗第一啖餸之後就覺得距離我已經低無可低嘅expectation 都仲係有少少落差，皆因所有餸都係凍嘅——直情係有冰凍嘅感覺。究其原因，都係冷氣太勁加上啲餸太早上枱再加埋冇蓋冚住。須知道我幫襯佢嘅原因就係想晚餐有啲熱嘢食，咁你畀啲凍嘅餸我，點解我唔番房食熱辣辣嘅杯麵？不過話說回來，就食物嘅味道嚟講其實都唔算差，畢竟全部都係低難度菜式，咁都唔掂嘅話真係要畀兩個喊口佢。最後講吓每個camp site 飯堂嘅鎮店之寶——紫菜湯。又係另一個失望，小弟真係從來冇飲過咁淡嘅紫菜湯。雖然食物質素強差人意，但我哋都清咗枱，因為佢嘅份量實在少得可憐，加上又冇其他餐廳選擇，為免半夜三點餓醒就唯有乖乖地食晒佢 -_-…查看更多

伊呂波實在係一間好特別嘅餐廳——每次食完之後都心思思想再去；於是今次又揾咗個機會相約友人嚟到滿足吓啲心癮。簡單介紹呢度嘅裝修——好有去咗日本嘅感覺，難怪咁多日本人嚟揾佢哋家嘅滋味啦。坐底之後二話不說就點咗個牛肉拼盆，果然冇令我哋失望——拼盆上無論係邊一個牛嘅部位都係咁有肉味同口感。最神奇嘅係顧客自己燒都可以咁consistently 好味，可見佢哋嘅用料同腌料都係冇得頂。由於佢真係好好食嘅關係，我哋最終要encore 多一碟！另外我哋仲點咗個之前未試過嘅池魚刺身——同其他食物一樣都係一流水準，肉質鮮美；只可惜份量唔多，好似好快就食完咁，有少少失落……臨尾我哋仲一人要咗一個雪糕球，為呢一餐畫上完美嘅句號。…查看更多

已經係第三次嚟馬泰食嘢喇，仲記得頭兩次嚟都係同同事食晏慶祝生日，所以喺度食晚餐今次都係第一次。呢度餐牌上嘅選擇十分之多而且圖文並茂，基本上睇緊都已經開始流口水。以下係我哋點咗嘅菜：冬蔭功湯——食得泰國菜就梗係要試吓個冬蔭功湯啦，呢度個湯絕對稱得上足料，兩隻大蝦嘅質感亦係一流；辣度嚟講個人認為恰到好處，不過唔食得太辣嘅朋友可能頂唔順。小食拼盆——好typical 嘅小食：魚餅、蝦餅、豬頸肉、無骨鳳爪同串燒。基本上每一樣嘅味道都十分之好，唔算太重口味。菠蘿鴨胸炒飯——作為一個有heart 嘅菠蘿炒飯，當然要用個真嘅菠蘿裝住啦。味道方面十分唔錯，用上鴨胸代替一般嘅雞粒為呢道本嚟好普通嘅菜帶嚟少少新鮮感；而最正嘅地方係個菠蘿容器裡面嘅肉可以刮出嚟加落啲飯度，真係好玩又好食。黃咖哩魚柳——咖哩唔辣但夠香；不過魚柳嘅味精重手咗啲。油鬆餅——送咖哩一流。魚湯貴妃苗——幾好味，魚湯裡面真係擺咗大大條魚柳喺度㗎。整體嚟講係一間水準相當穩定嘅餐廳（相較我幾年前幫襯時一啲都冇下降到），值得推介。…查看更多

咁難得嚟到赤柱仲要係lunch time，試吓赤柱大街上嗰啲好有歐陸feel 嘅餐廳。由於花多眼亂同埋已經好肚餓嘅關係，餐廳門口個姐姐無須大費唇舌就已經成功咁sell 到我哋行入去喇。又由於當日天氣都有少少熱嘅關係，我哋一班壞鬼後生放棄咗比較好feel 嘅門口位而選擇咗室內嘅冷氣位。經過一輪選擇困難症嘅煎熬之後，終於點咗以下嘅食物：呢個都可算係全場最抵食嘅餐——大大條熱狗腸加埋脆卜卜嘅薯條都只係５０幾蚊，以呢度嘅環境簡直係抵食過唔少茶餐廳。好一個半生熟嘅肉眼扒——有一陣炭燒嘅香味，伴碟嘅薯條亦係脆卜卜；只可惜個扒上嘅時候已經有少少凍咗。呢個炸魚薯條絕對係值得推介——點菜嘅時候其實已經本住”爆瘡就爆瘡啦“嘅心理準備，但勢估唔到食落口嘅時候一啲都唔覺油膩，仲有皮薄餡靚嘅感覺㖭！呢條肉腸雖然製作需時，不過絕對值得等待——熱辣辣、好好食。整體嚟講呢間餐廳令人十分滿意；唯一美中不足嘅係有一兩隻烏蠅keep 住騷擾我哋，不過可以理解嘅係間餐廳冇門分隔室內外嘅範圍，所以啲烏蠅要入嚟都真係吹佢哋唔漲。…查看更多

是日約咗老闆一號食晏，揀咗呢間喺OpenRice都幾高分嘅泰國餐廳。當日由於係閒日lunch hour嘅關係，入去時餐廳內已經有一眾office ladies & gentlemen，而我哋之後嘅來客大多都要等位。Lunch set嘅選擇合理地多，上菜亦都算幾快。以下係我哋點咗嘅食物：個海鮮米線嘅湯底係好typical嘅冬蔭功——味道合格，料亦交足（例如魷魚鬚同磨菇）；辣度就幾大眾化（即係個人覺得可以再辣啲）。至於老闆一號個喇沙，佢話麻麻地；不過我試咗啖覺得冇乜問題，反而幾欣賞佢啲肥牛嘅質感。雖則我哋倆個都唔知正宗嘅喇沙應該係咩味，所以呢道菜好難畀分。整體嚟講係一間幾好嘅餐廳。價錢雖然唔算平，不過以呢區嚟講係合理，亦可算物有所值。…查看更多

是日同老闆1、2、3號準備去附近個室內遊樂場玩，點知原來要3點先開門；橫掂冇嘢做，就嚟呢間之前喺OpenRice見過都幾高評價嘅餐廳試一試佢。叫咗：可能睇完其他comment有好高期望嘅關係（又或者佢真係退步咗），今次嘅食物實在係唔合格——須知道一間小食店嘅碗仔翅就好似一個特首嘅誠信咁重要，呢part唔掂其他parts都唔駛睇。好彩只係路過一試，如果專登嚟嘅話肯定呻笨。…查看更多

約咗友人喺佢公司附近食tea，就交畀佢揸fit。最後佢揀咗呢間喺商場裡面嘅茶餐廳，我都冇乜所謂，只要唔好太難食就得喇。入到去先發覺佢原來唔係一般頹頹茶餐廳（其實人哋個名都冇話自己係茶餐廳，只係我個friend夾硬標籤咗佢），裝修方面都幾唔錯，first impression令人幾舒服。食物方面由於係tea嘅關係所以只係一人叫咗一個茶餐：雖然只係最簡單最typical嘅茶餐廳食物，但已足以證明廚房嘅水準，絕對係一間可以番兜嘅餐廳。…查看更多

呢間餐廳嘅前身（好似叫杏花X）曾經係我哋一家嘅指定上海菜食堂，皆因佢嘅酸辣湯好得。其實呢間賀小月開咗之後都嚟過一次，感覺都係一般；今次相隔N個月後再試之後，只覺己經徹底失去再幫襯嘅理由。（事先聲明，小弟對酸辣湯有十分高嘅要求，而今次嘅評分亦主要取決於酸辣湯嘅質素，故對酸辣湯冇興趣嘅朋友可能有另一番體會）晏晝一點幾入到嚟，除咗我哋就只有三四圍枱。坐低之後老闆一號如常揸fit，點嘅亦係啲typical嘅上海菜（醉豬手、酸辣湯、鍋貼、銀絲卷同高力豆沙）。最先上嘅係：然後就係萬眾期待嘅酸辣湯。然而第一口就覺得唔對路——太酸。我同老闆一號試過香港唔少上海舖嘅酸辣湯，所以第一口己經知道出事。不過更令人失望嘅係……正所謂有圖有真相，都係自己睇啦之後上嘅菜：雖然最後三道菜都唔錯，但由於佢哋相對難度比較低（因好多餐廳都整到咁嘅水準），所以對整體分數冇大幫助。服務方面算係唔錯，不過價錢就一啲都唔平，性價比頗低。…查看更多

是晚準備參加反國教集會，決定填飽個肚先。老闆二號話要食日本菜，於是就叫老闆一號搵餐廳。精挑細選之下搵到呢間未有食評嘅餐廳碰吓運氣。七點鐘入到去，除咗我哋之外就只有一位享用緊sashimi set嘅大叔。餐廳實在唔大，不過都幾“骨子”，加上播住日本歌，整體感覺良好。點咗以下菜式：全部食物都合格有餘 － 燒物夠香、壽司夠鮮。另外服務亦值得一讚，態度友善而且會主動加水。價錢以呢區嚟講似乎有啲貴，不過一分錢一分貨啦。…查看更多