Step468的个人专页

有位食家朋友帶過我黎後，我就被呢間小店深深吸引左，每次同朋友係葵芳唔想掃街，就會推薦佢地黎呢間！雖然店鋪小小，但成條街只有呢間餐廳門口人流不斷，我基本上每次去都要排隊（大約3-4張台），你就知幾受歡迎！佢最出名係魚鮫，超大超滑超鮮，但要預先打電話去預留定，我呢日7點幾去到已經冇晒，所以冇影到相。但其他食物都係有誠意之作，絕不馬虎。首先係胡椒系列，胡椒豬肚個湯底係重點，胡椒味百分百十足，加埋酸菜，個味唔怕寡或得個辣字，冬天食完暖笠笠，每位朋友試過都大讚！三寶有豬肚，腸同豬腰。之後係皇牌「醉鮮麵」魚湯，醉鮮麵其實係比較煙un的米粉，好幼細但唔怕斷，容易吸收到湯汁之餘，十分有咬口，唔會食完都冇野落肚咁！哈哈，每次去都必叫！湯底可以揀魚湯或者豬骨湯，兩款非常唔同，豬骨湯較濃味，魚湯係屬於鮮甜同淡味，兩種都係誠意之作，但我個人推薦魚湯，因為豬骨湯好多地方都有，但鮮甜魚湯呢間真係不錯！配埋容易吸收湯汁的醉鮮麵，相輔相成！麵同送會分開上，冇魚鮫所以轉食牛筋腩同豬軟骨，牛筋腩不愧係皇牌，啖啖肥美，豬軟骨稍為軟淋淋左少少，一夾就散，牛筋腩更勝一籌。每次我都會叫檸檬薏米水，今日去到熱飲已經賣完，可能係入冬啦⋯哈哈！總括，小店出細貨，街坊價食到高水準食物，胡椒豬肚湯更係必食湯底！…查看更多

Simply life已經食過好多次，今次我試左新野！覺得實在太出乎我嘅意料，決定上黎講一講！平時黎都係食西餐，意粉，扒，burger，今日突然見到餐牌最底原來有個海鮮冬蔭公糙米飯，心思思想試下新野嘅我就叫左呢個加沙律加杯冰茶！朋友叫左卡邦尼自製意粉同湯飯前麵包先上，配牛油，擺盤靚靚，味道還可以，但唔鍾意食硬包嘅朋友可能會唔太岩口味冰茶先上，係西袖茶，酸酸甜甜，但西袖味差少少，不過不失之後上沙律，擺相還需進步⋯⋯但菜新鮮，而且有足夠的千島醬！good good 但如果有蕃茄會更好！再黎就係主菜！海鮮冬蔭公糙米飯！！！食前我用青檸搾左汁落去，本來佢都有好多調味料，加小小青檸汁令到個飯更加refreshing糙米飯看上去是不是有點似意大利飯呢？無錯啦，我覺得佢是把意大利飯和冬蔭公mix的菜式，但糙米飯不像risotto的飯粒那麼硬，所以非常易入口。它有輕微辣，淡淡地將冬蔭公味道帶出，你可以看到顏色亦不是橙色的冬蔭公色，而是淡黃色，可見是經過精心調製的醬汁！海鮮則有青口，蜆，魷魚同大蝦，大蝦多肉，青口都很大隻，唯獨魷魚煎得有點過頭再看看朋友嘅卡邦尼意粉，好creamy咁！總括而言就係有新驚喜，好多人黎simply life會食「西」餐，但下次可以試下呢個海鮮冬蔭公糙米飯！…查看更多

今日和朋友相約較晏，一睇鐘已經係下午茶時間，就入左丼丼屋食個晏午餐，下午茶餐種類唔算多，但基本的刺身，牛，鰻魚，雞肉都有一款，最吸引我嘅當然係滑蛋雞肉丼，而朋友叫左個牛肉丼，另加左芝麻雞翼，滑蛋雞肉丼賣相極好，蛋唔老，雞肉明顯有烤過嘅味道，令我回想起上年係名古屋時食過嘅滑蛋雞肉丼，如果以為滑蛋雞肉飯嘅雞肉唔需要味道，真係大錯特錯，烤過嘅雞肉令丼飯倍添色彩！配答滑蛋，真係食指大動。芝麻雞翼即叫即炸，黎到熱辣辣，咬落皮脆，芝麻又香，非常惹味，下午茶黎仲唔洗等位，讚！…查看更多

今日黎到泰屋，朋友一早點左菜，我去到淨係食，哈哈，環境寬敞，可能係星期一晚，人唔係好多，服務好好，食完都唔會趕我地走，上菜第一時間覺得原來唔係好大份，朋友話開頭仲擔心叫太多，細份勝在可以咩都試，滿足咩都想食嘅心理！生菜包係一個「是日驚喜」，個肉調味得非常好，好夠味，而且應該加左檸檬汁，有少少酸味，配埋生菜，真係好好食，五粒星推介，冬蔭公湯大蝦夠大隻，叫左個印度油酥餅，用黎配綠咖哩食，個酥餅有好重奶油味，個人唔太鍾意重奶油味，所以食左小小就冇食，而炸蝦餅同炸春卷夠足料！總結環境唔錯，生菜包非常好食，但份量偏小。…查看更多

夜晚10點先得閒食飯，同朋友一齊好想食泰餐！就黎左塔石附近間曼谷，雖然細細間但唔可以睇小！隨時會好食到嚇你一跳，我地叫左最泰式嘅通菜、蝦冬蔭公湯、燒豬頸肉、醃生蝦、生菜包、醃粉絲，樣樣都係泰餐必叫，除左燒豬頸肉有d「un」同埋個汁唔甜又唔咸，冇咩味之外，其他都好出色，特別係醃生蝦，夠晒大碟！冬蔭公湯酸甜辣味岩岩好，蝦又夠晒大，要留意係佢地d辣唔係好辣，岩晒普羅大眾，如果想食辣d，可能要同侍應講聲啦。…查看更多

想係中環搵間平平地嘅麻辣火鍋，呢間可能最岩你！一早訂左位，可能因為太full，餐廳都打黎double confirm係咪會到，入到去古色古香，坐嘅位置寬敞，不過抽氣同冷氣唔夠猛，好大味同埋有d焗，叫左秘製麻辣鍋同豆腐白湯底，問左鴨紅同豆腐可以任加，不過鴨紅麻麻，唔夠實，好似豬紅⋯所以我地都冇添，野飲有好多款，我地叫左杞子龍眼菊花蜜同柑桔檸檬蜜，柑桔較濃味而且酸酸甜甜，菊花蜜較清甜，打邊爐個人鍾意配柑桔蜜最後埋單每人都係300蚊左右，叫左咁多野，又係中環，仲唔係平價打邊爐之選？…查看更多

想食壽司，但又想要唔貴，唔貴得黎又想要多選擇，唔想食黎食去戈幾款，又想坐低舒舒服服食？我會去元氣，一早只需要用佢個APP拎定飛，之後行下商場，差唔多到就去食，坐低又自動點餐，食物選擇極多，又有期間限定嘅特色壽司，又有火炙定卷物定熱食，連甜品都有，重點係食物唔馬虎，我叫左我最愛嘅炙燒三文魚、炙燒蝦壽司、炙燒味道一流，而芝士鰻魚卷仲有鰻魚醬汁跟，如果唔食鰻魚醬可以唔加，軟芝士好好食，雖然層次少左d，但有3件又幾抵，蟹柳壽司超大蟹柳，但唯獨壽司舊飯好容易散，夾戈陣好考筷子功力，最後食完同朋友坐低傾下計，飲下綠茶，埋單唔洗80蚊，個人覺得抵食過外賣平價壽司！…查看更多

食過麥記好多次，住在采頤的朋友都話係鎮園之寶，每次去開戈頭都會想食，招牌菜當然係口水雞！！口水雞食過好多間，但麥記個汁真係好好食，夠香，而且辣度適中，唔算太辣，d雞夠嫩夠滑，雞皮正，回味無窮，諗起都留口水，配油飯一流，唔食辣嘅朋友可以揀海南雞飯，另外唔少得係米粉，佢隻米粉係曲曲地戈隻米粉，同平時直身戈隻唔同，有好多味揀，番茄同酸辣係我最愛，但配菜唔算太多，就係普通的牛丸、芝士腸、菜、豬紅等等，同朋友一齊叫兩碗米粉，加個口水雞就食到lam lam脷，可惜地方好細，得4-5張台，午餐時候要等，晚餐好快就賣晒。…查看更多

中午同同事去食，見到有午餐套餐，都幾多選擇，就試下，地方夠大，多位，唔洗排隊，侍應服務態度好好，唔會黑面，落完單又同我地對單，人手充足，個人非常鍾意佢唔洗加錢飲品都有檸檬薏米水，唔怕太甜又可以養生，不過建議叫凍嘅要少冰，檸檬薏米水入面仲有兩塊冬瓜，味道多左層次，同朋友叫左半隻海南雞同海鮮喇沙湯滲滲（即米粉+油面），海南雞作為招牌菜真係一般般，好彩冇淨係叫海南雞飯，相反海鮮喇沙幾好食，又夠足料，下次會再幫襯喇沙面。…查看更多

朋友係咖啡之人，諗住約個早餐聚，佢就介紹我黎呢間，我完全唔知寰宇天下樓下有間咁北歐風嘅cafe，入到去格調簡單，以白色同木為主，門口旁係調咖啡地方，台同椅都係木，朋友叫左個all day breakfast同咖啡，我就叫左個牛油果蟹肉toast，請教左店主咩茶好飲，跟著就拜託佢幫我叫杯清新嘅茶，牛油果蟹肉toast一上即刻吸引我地眼球，我地唔敢相信！！塊蛋可以咁大塊，炒得好靚，岩晒影相！蛋又滑又夠味，牛油果好新鮮，美中不足係食唔到有蟹肉，可能被牛油果同蛋嘅味道遮蓋左，個toast卜卜脆，正！朋友個all day breakfast我冇試到，但好大碟，而朋友係「愛啡之人」，相信杯咖啡不會太差，我杯茶一如所料，清新綠茶，有香味！埋單每人只係90-100蚊左右，食到好飽，又可以係咁舒服嘅環境傾左2個鐘計，對住得近嘅朋友黎講，絕對係食brunch之選！…查看更多

我同朋友想食韓式野，但又怕熱氣唔想食炸雞，所以呢間韓式烤雞店就岩晒我地！當日同朋友一去到即刻叫返平時成日食嘅蜜糖咖哩烤雞同雞蛋卷，上菜前有泡菜同酸羅白小食提供（我至愛酸羅白），食雞唔少得手套，佢都會提供埋比你，食完都唔洗驚隻手油，台面仲有個筒，記得係用黎放骨～烤雞黎到時超香，蜜糖咖哩簡直係絕配，而且無論雞搥定雞翼都唔怕烤到老，d肉汁仲係入面，另外韓式雞蛋卷不單止賣相靚（影相一流），材料仲好豐富，雞蛋好甜好好食，而且雞蛋又比平時食嘅飯團健康，岩晒注意身型的朋友！另外環境非常寬敞，係旺角好少有間餐廳坐得咁舒服，所以呢間先成為我同朋友經常黎嘅鋪頭…查看更多

同朋友講開好想食片皮鴨，上openrice見到呢間好食，就去左試，戈日放工後去到8點幾等左2張台後就入得，算快，但記得等位時或事先訂左片皮鴨先***，唔係入到去冇得食，叫左半隻片皮鴨諗住叫多2碟小菜，朋友話唔洗，話好大碟，會夠飽，我信住佢先啦，上菜黎到有片皮鴨，甜醬，青瓜，香蔥，同包片皮鴨塊餅皮，呢間的片皮鴨係連埋肉切，同傳統切到好薄齋鴨皮的鋪頭唔同，佢係厚切版，視乎個人喜好，我認為齋鴨皮會脆d，而連肉就會有兩重質感，飽d抵食d，塊餅皮厚度適中，唔怕厚，呢樣抵讚，最後2個人食完成碟片皮鴨，同朋友預計一樣，已經飽左，所以係大件抵食又好食嘅，中途見到格離台d野食都好似好好食咁，下次可以encore叫多兩個朋友再試過…查看更多

每次一有朋友黎，我都會帶佢地黎雅馨，朋友會問點解唔食葡國菜，我就會答三盞燈呢一帶的緬甸菜先係澳門人平常食開的美食，魚湯粉，椰汁雞面，我相信無澳門人不認同，而雅馨係咁多間入面最為出色，魚湯濃郁，炸餅卜卜脆，做左咁多年都絕冇馬虎，椰汁雞面超多雞，椰汁味超濃，上次帶美國朋友黎，佢都愛上！最後唔少得紫米豆漿，平時冇咩地方可以飲到，飲落就知冇偷工減料，建議黎到必試豆漿。雖然環境不寬敞，好多時要搭台，但每次去都仍然見到滿座，可謂香港甚少試到的食物，十分推薦…查看更多