potatobomber的个人专页

同屋企人嚟食晚餐，鍾意呢度坐得舒服又冇限時，推薦以下菜式：1. 杏汁白肺湯👍🏼👍🏼👍🏼👍🏼👍🏼好多豬肺好足料，有杏仁嘅香滑但完全冇苦澀味，好好飲！2. 滷水拼盤👍🏼👍🏼👍🏼👍🏼👍🏼好怕啲滷水得個鹹字，但呢度嘅滷水香得唔會死鹹，好啱我口味🤩好鍾意墊底嘅豆腐，好嫩滑！其他打冷店好多時都忽略咗豆腐呢樣嘢，用一啲偏硬實又冇豆香嘅豆腐，大打折扣。3. 香煎馬友👍🏼👍🏼👍🏼👍🏼馬友煎得香脆但又唔會乾柴，再淋咗啲甜豉油汁，好滋味！4. 蠔餅👍🏼👍🏼👍🏼👍🏼呢度嘅蠔餅唔係成塊隊落油鑊炸到脆卜卜但食起上嚟油淋淋嗰種，真係煎出嚟，個人更喜歡呢種做法。…查看更多

收到呢間小店嘅傳單，佢只做外賣冇堂食，見幾啱食，價錢又平，所以試吓。叫咗呢幾樣嘢：藥膳花雕雞湯麵⭐️⭐️⭐️⭐️⭐️個湯好好味！除咗雞肉之外，有紅棗、杞子、圓肉，好足料！食哂先醒起冇影到相。肉鬆粢飯⭐️⭐️⭐️⭐️⭐️飯蒸得夠軟又夠熱，雖然簡單只有肉鬆，已經好好味！手拍青瓜⭐️⭐️⭐️⭐️味道唔錯但我覺得辣咗少少🤏🏼酸辣湯同雞肉串我就唔推薦了，因為佢講到明係外面買返嚟加熱嘅，所以真係普普通通。其實我覺得唔使搞太多花款，專心做好最撚手嘅菜式、保持水準就已經夠喇。反而蔬菜冇乜選擇，或者可以加吓灼菜、涼拌菠菜之類？見全間舖得佢一人主理，要响咁窄窄嘅地方整咁多樣嘢，已經好犀利喇！外賣盒全部都企企理理，睇得出係用心經營的，希望佢長做長有，等我食外賣都多個好選擇啦！…查看更多

一直覺得附近欠一間車仔麵。記得之前自由道有一間，雖然好食，但係亦好貴，最後執咗。而家終於有間好食、價錢又親民㗎喇！佢舖仔細細，主要做外賣，但亦有幾個堂食座位，方便你叫啲可以即時食嘅小食。除咗一般嘅車仔餸之外，佢仲有啲期間限定嘅特色炸物、小食、糖水。今次試咗最基本嘅三餸麵：蘿蔔腍甜又入味，韭菜好靚冇渣，咖喱魚蛋大粒彈牙，三個餸都有水準。湯底我揀咗沙嗲，配滷水汁，好味！見佢仲有期間限定嘅龍蝦湯底，好特別，下次有機會試吓先！…查看更多

餐牌、風格感覺大陸格局，不過如果係好食嘅，我其實冇乜所謂。老公想叫個牛腩麵，點知佢話牛腩賣哂，得番崩沙腩（但要加$10）。吓？！當日係星期六中午12點幾，你嘅招牌菜係牛腩，有乜理由咁快賣哂呀？？感覺佢係想老屈客人俾多十蚊。於是唔要牛腩，改要豬雜麵。豬雜係指豬內臟：豬膶、豬腸、豬肺、豬肚。但呢度嘅豬雜非常神奇，係豬肉片+豬紅+豬肚+豬膶。用肉片充數當豬雜真係第一次見，都算，個豬膶係滲哂血完全唔熟！！🤮油菜叫咗西蘭花，侍應問我哋要腩汁定蠔油，我哋要腩汁，點知嚟到兩樣都唔係，味道係溝咗水嘅豉油囉⋯最後我嘅菜肉雲吞麵算係正常，雲吞食得出餡料新鮮，不過湯底淡而無味。一句到尾，冇下次喇👋🏼…查看更多

老公想食日式午餐，見呢間餐牌好多選擇，有好似車仔麵咁樣自選唔同魚生嘅丼飯、有好多唔同併法嘅套餐，例如壽司拼天婦羅、拼串燒、拼烏冬等等，又有滑蛋丼、咖哩飯嗰類。我叫咗個串燒餐，個餐有5件壽司、三串串燒、一碗迷你烏冬、一個茶碗蒸蛋，好豐富！串燒燒得尤其出色！壽司嘅魚生好大片，但醋飯就特登搓到細細粒，我好鍾意呢個「少飯」比例😂。其中一件壽司係甜蝦，好粗好肥美，仲細心地搣走咗蝦尾殼，讚！最好味嗰件係左口魚裙邊，火炙過，油脂超級甘香🤤侍應都好醒目，好快收拾走用完嘅碗碟。會再嚟！…查看更多

同老公响門口望見餐牌啲嘢幾啱食，就入咗去。食完之後睇番openrice，發現竟然都幾多負評，有啲令人費解喎。我哋叫咗兩個主菜：燒海鮮拼盤 — 除咗個龍蝦嘅新鮮度爭少少之外，其他海鮮嘅肉質都實淨彈牙。燒完海鮮加上香草煮嘅肉汁，俾墊响海鮮底下嘅沙律菜吸收哂，相當美味！烤雞 — 平時好少叫烤雞，因為好多時都會食倒一陣雪味、急凍得太耐啲肉好霉，又或者煮到啲胸肉嚡哂。見佢係「廚師推介」，即管試吓。好味喎！完全冇頭先講到嘅問題，熟得剛剛好，調味得宜，充滿肉汁，令人驚喜！最後叫咗個tiramisu，好軟滑、酒味好香濃（醒起佢係意大利餐廳，呢個甜品點都有番咁上下水準嘅），如果可以雪得再凍少少就完美喇～下次會想試吓佢哋嘅意粉！…查看更多

叫咗個下午茶，窩夫配自製雪糕、熱latte。窩夫賣相好靚，但食落有點失望。一咬落去係脆的，但入面鬆pout pout好唔充實，好似落唔夠蛋漿咁。唔通佢係特登落少啲蛋漿想營造一個鬆脆效果⋯？奈何蛋漿冇蛋香，好淡。個忌廉亦失望，打得幾靚但唔香唔甜，冇味道，係奶嘅問題。生果係新鮮的，個雪糕未算滑但亦食得出點點伯爵茶味。Latte的咖啡味唔算好香，但咖啡師沖得好好手勢，温度得宜，奶泡好棉密拉花又靚，仲好大杯，補番少少窩夫嘅失分啦！…查看更多

先評燒賣，我覺得佢嘅質感係介乎酒樓燒賣同魚肉燒賣之間。豬肉味濃，一啖一粒好滿足。我叫咗少辣，如果配正常辣應該更惹味。然後有咖喱五寶，我選咗沙嗲汁。個汁好香濃，五寶出咗少少水但都冇話溝到好淡。魷魚唔夠入味、蘿蔔唔多夠腍甜。其餘牛栢葉、豬皮、白魚蛋都係好味嘅。白魚蛋係自家製，彈牙得自然唔會太假太味精。最後碗仔翅，我鍾意個味道同濃稠度剛剛好，配料又切得夠幼細！有時太多配料、打芡太杰都會大打折扣。幾多人幫襯，兩個職員做到踢哂腳。佢知我等咗好耐，講咗聲唔好意思，加分👍🏼…查看更多

食過呢度嘅早餐，麻麻哋，好記得個雞扒炸到又乾硬又冇味，但估唔到晚餐水準差天共地！茄子炆倉魚超級大碟，由於係是日晚餐嘅其中一款，連埋白飯例湯都係$74，份量足夠兩個人食。魚新鮮、茄子好好味，唔會好油或者過鹹。例湯係青紅蘿蔔，味精重手咗少少，不過係跟餐送嘅就算，放棄不可惜。單叫咗個蜜椒薯仔牛柳粒，又係超級大碟，結果食唔哂要打包。佢用即磨黑椒，寧舍惹味。不過有少少過甜，同埋太少汁有啲乾，但整體味道都唔錯。會再嚟！…查看更多

薑葱覇王雞個汁嘅味道係ok的，但真係唔應該翻叮！我寧願佢好似白切雞咁樣凍上淋個汁，起碼雞皮會爽口啲。雙節棍薄餅見係推介，即管試吓。係脆的，但太鹹喇！其實可以落少啲鹹魚茸。西芹炒帶子炒得太猛火，有啲焦焦哋賣相大打折扣。帶子好迷你，收$78得細細碟⋯唯一係個蜜汁薯仔排骨比較好少少。薯仔夠哂焾、排骨有脆骨又唔韌。餐飲真係唔得。華田淡茂茂，奶茶個茶底又濃得滯。其實呢度越嚟越多單位落成，照計不愁冇生意。但呢個水準，真係替佢擔心。…查看更多

每次來火炭，一定會嚟呢度食早餐。一入來，見倒啲員工唔同哂，估佢應該轉咗老闆，但好在美味依舊！所有食物仍然係即叫即做，熱辣辣。呢樣最得我歡心，因為我好怕食啲唔夠熱，或者放响個暖櫃但攤到凍哂嘅嘢。炒蛋嫩滑，多士又香又鬆脆，煙肉和火腿吃得出不是用下價貨。通粉配蘑菇粟米，好啱胃口，不過湯底略嫌鹹咗少少。呢個早餐份量超大，好飽好滿足：）佢廚房是開放式，看得出廚師即使忙到冇停手，都煮得好用心，讚！希望佢堂食可以唔用即棄餐具啦。食完之後掉咁多嘢，感覺好罪過。…查看更多

叫咗番茄雞翼麵、熱奶茶。番茄湯看上去很濃郁，但味道偏淡。麵其實吸收不到湯味，只係撈住杰杰哋嘅湯一齊食。不過都好，起碼知道冇味精。雞翼是鹵水味，但偏鹹和有點嚡，應該係雪藏時間太長，加上醃得太耐。鹵水配番茄味其實有點格格不入...奶茶是一間茶餐廳的靈魂，但個茶味麻麻哋，有點失望。單憑食物很難令人回頭，但舊式平民裝修還是會有一些捧場客。最重要係，如果一個人想响尖沙咀市中心坐低，用50幾蚊食個晚餐，去邊度揾？…查看更多

隨意路過，入嚟食早餐，叫咗個蘑菇鷄肉意大利軟包。包烘到熱辣辣，仲有番茄生菜做配料，唔怕乾爭爭，好味！最令我驚喜嘅係杯奶茶。滑溜順喉不澀口，濃淡得宜，好回味！後來睇翻呢度嘅食評，話店員無禮催客走。我個人睇法係，响呢個位置開食店，工商業區，只能做早午市。午飯時間得嗰一個鐘頭，老實講，時間寶貴，如果你稍為坐多幾分鐘，出面等緊枱嘅客好快就會不耐煩走人，老闆就會白白損失一枱客人。希望大家食飯時都互相體諒，今時今日，租金高企，生意難做，自覺地食完就即刻埋單，我相信店員都會有好啲嘅面口。…查看更多

如果只睇評分，的確會對呢間cafe有啲卻步，但誤打誤撞之下來到，見地方都企理冇異味，即管抱住一試心態。先講貓貓，隻隻都養到肥肥白白，雖然唔算好痴人，但都友善，會俾你摸。食物方面，榛子咖啡和蘑菇批都唔錯。價錢會比你普通食個tea貴，因為嚟得貓cafe，都預咗你坐番個幾鐘，就算只提供輕食，亦唔可能只收你幾廿蚊。加上呢度地方細，容納倒嘅客人唔多，收費稍高亦情有可原。最後講吓店員，佢先同我介紹啲貓貓嘅品種、名字同性格，傾吓養貓心得，後來仲俾咗啲乾糧我哋親手餵貓貓。唔敢講話替佢平反，但見有啲網友嘅批評頗為狠辣，多少有點戥佢不值。…查看更多

南瓜沙律影相就靚嘅，但味道令人失望，卡夫味，好行貨。Pancake啲水果得嗰幾粒，然後一大pat cream，收人90幾蚊太過份！仲要啲cream打過龍，一路食一路瀉成奶水咖啡普普通通，但唔平。呢區大把好選擇，唔使嚟呢度。…查看更多