lamsiufai的个人专页

今晚有幸能品嚐近排因為飯戲攻心2大熱的「仙鶴神針」。仙鶴神針是老香港的菜式，因為做法繁複，現在已很少人會做，識得做又做得好的老師傅已越來越少。首先要除去頂鴿的胸骨，再將4両發好的翅釀入鴿身中，拉油再紅燒，鴿肉煮到淋身，魚翅吸收了鴿肉的精華，每一啖都很感動。聽說「金華玉樹雞」是舊時飲宴的菜式，但現在已很少看得到 。師傅說一定要用新鮮雞。先將雞去骨切件，再梅花間竹加入金華火腿及冬菇片，放入蒸爐再加芡汁。鮮雞味加上火腿的鹹香，回味無窮 。「砂鍋龍躉面頰肉」好像很刁鑽，用砂鍋上菜熱辣辣，上菜時仙（熱）氣十足，原來龍躉面除了滑，還有很豐富的骨膠原，非常惹味 。「冰鎮鮑魚」每隻都有手掌般大，炆得很淋很入味，仲有淡淡的酒香，清清地食得很舒服 。每味菜式都很好食，大滿足😌…查看更多

一般親子餐廳消費都要過百，但whizbo 只要叫一個餐（最平幾十蚊）就可以玩到夠！ 一入門口就有個超大波波池，仲有簡單繩網、煮飯仔、車車、粒粒沙池……配合埋柔和colour tone, 打咭都一樣下正😎雖然阿仔唔係BB, 但係都玩得好開心 😅。食物方面質數完全對得住價錢。意粉唔係一pat pat而係有𡁻口的，白汁煮得啱啱好唔會太杰或太稀，每條意粉都掛到白汁。 如果有更多選擇會更好 。略嫌飲品只有包裝枝裝選擇，如果有特成飲品成件事就prefect. 總括來說，幾十蚊有得食有得玩係抵嘅！…查看更多

越來越多甜品舖，但又很多做唔住。開甜品舖的門檻低，但要做得住食物質素是很重要的。這間甜品舖主要是燉椰皇，確實是我這些C9杯茶。椰皇的選擇很多，可以加不同的配料，有凍有熱，要消化明白成本menu都要5分鐘。第一次食就試吓最基本的椰皇燉蛋白。上枱時間比預期中快。蛋白很夠熱，現時天氣食真係好溫暖。蛋白很滑、很清甜、很椰子（我知椰子唔係形容詞....）。食得出是用心製作的。總括來說，是很好食的，絕對推介。…查看更多

作為一個平又食貴又食的C9, 當然唔會放過位於住宅區毫不起眼的小店。今次就試吓這間老公推介的越南小店。我們到達時已8點多，很多東西都賣完，幸好還有金邊粉。我們點了一個2人餐，有2碗麵及2個小食。越南菜當然要試生牛肉金邊粉，湯都算清且味夠，牛肉份量亦不少，金邊粉很滑。小食選了越式春卷及蒜蓉牛油雞翼，春卷包得厚實、很香口。估不到雞翼有6大隻！！！雞翼很入味，而且比想像中沒那麼油。2人餐包飲品都是約$170，非常抵食！…查看更多

Queen’s Kitchen的私房泰菜終於都public 咗，以後想食正宗泰菜就不需要預先book, 可以隨時walk-in 了。皇后廚房位於尖沙咀商業大廈頂樓，裝修骨子清雅。今次帶了阿女，所以就點了少少不辣的菜式。首先有牛肉湯麵，牛肉湯看似很清，但牛味十足，而且牛肉炆得很淋很入味，阿女食了一大碗。附上的自家制辣醬只有一個字形容 — 勁。好。食。再黎是小朋友最愛粟米餅，粟米餅炸得很香脆，又被阿女KO 了。女女吃飽就到大人吃了。泰菜當然不能少冬蔭公。在香港吃到的冬蔭公不是太辣就太酸，又或者香茅等香料切到太碎，吃到成口都是渣。但我敢說皇后廚房的冬蔭公是暫時為止在香港吃到最好的冬蔭公！冬蔭公用火爐上，吃的時候仲熱辣辣的，他們仲細心到將蝦腸挑走！燒豬頸肉超淋，配上辣汁非常醒胃。生菜包的生菜每片都揀過，很爽口。原來廚房會將生菜浸冰水，怪不得每片都爽口，每片大小相約。甜品是最具代表性的芒果糯米飯，微暖的糯米吃落很有幸福感，配上微甜的椰漿+超甜水晶芒為這餐寫上完美句號。Queen’s Kitchen真是超級推薦，除了好食之外，仲感受到廚師處處為客人著想的細心。…查看更多

深水埗一向都係中下價食肆天堂，最近又流行台式輕食，今次就試吓呢間評價唔錯的餐廳。裝修是行復古台灣風的，格局都是快食快走路線，就係唔會畀你坐得好舒服的。餐牌都是大路台式菜式，選擇種類就一般般啦，但總會揀到個啱食的。老公揀了個麵線，口感不錯，不會太杰，但略咸。台式腸十分抵食，廿幾蚊有4條，仲抵過街邊買。我就要咗個雞扒肉燥撈麵，雞扒超大塊，而且唔係坊間打到薄一薄的，咬落有口感，唔鞋，味道都夠。以為肉燥只有少少，點知原來响個底到，麵身都可以。加埋辣味菜甫撈來食，正！蜂蜜烏龍少甜，茶身都滑身，有蜂蜜之餘仲可以保留到烏龍味，唔錯！…查看更多

說yoho mall是元朗的地標一點都不為過，雖然都是倒模式商場，但勝在地方大及什麼都有。很多年前流行咖啡的時候，有個茶癡朋友已經說為什麼茶不可以像咖啡般沖出來，估不到多年後有人（不是我朋友啦）實踐出來。小小的舖頭放了很多支像大炮的茶葉管，茶葉經磨碎便變成粉末，再即時經熱水快速高壓沖泡，茶葉粉末被空氣氧化的機會少，所以很新鮮。茶葉的種類都不少，可以跟自己口味加入蜜糖、橙汁、檸檬汁、奶、珍珠等等。不喜歡太甜又可以少甜。不知道是不是沖泡方法的關係，茶是非常滑身的，而且又不失茶味。絕對是推介！ 唯一缺點是...要....等.....…查看更多

喜歡越菜，說白點是喜歡越式酸魚露。香茅豬扒沾上越式酸魚露再配白飯，香咸甜酸完美地配搭著，真是一流。老公對小店特別關注，又不知從哪裡知道這間越式菜館。餐廳菜式不多，都是一些大路食物。午餐我們就點了最簡單的香茅豬肉飯及豬扒蛋餅飯。老公的豬扒飯很香，而且很淋很入味，蛋餅結實得黎又唔會太硬。豬扒亦很大塊，基本上是肉多過飯。雖然香茅不是貴價食材，大多數餐廳只會落少少的香茅，但這間真是真材實料的。香茅豬肉飯一上枱就聞到勁香的香茅味，豬肉份量多，豬肉很入味。可能是太好餸飯，不知不覺已經食曬成碟飯。餐廳有自制的芒果榚、馬豆榚、椰汁榚等。但太飽試唔到，下次要試吓。…查看更多

今年的白松露比往年貴了很多，但係少少地食一餐都要的。今年揀咗米芝連有星星嘅餐廳試一試。餐廳有自己餅房，所以 pastry 一直都是很出色的。餐前包是自制的，有4款，上枱仍是和暖的，幸福感爆燈。個人特別鍾情牛油軟包，如果唔係要留肚，絶對可以 encore。前菜共有2道，賣相精緻。說得上是白松露宴當然唔少得主角。我們選了配煎蛋餅，希望以最簡單的菜式帶出白松露獨特的香。白松露是按重量收費的，由待應哥哥於食物上枱後即塲刨。但蛋餅加入了橙皮，所以橙味蓋過了白松露的香，實在是一敗筆。這道雲吞配上亞支竹汁，雲吞是可以的，但沒有驚喜。反而配菜mushrooms 比雲吞更好食，很淋很入味。另一道主菜 - 傳說中母雞胸，唔知點解要sell係母雞，食落唔覺有乜特別。但母雞胸是滑的。但配上的菠菜汁是澀的......很怪。滿心期待的甜品是有點失望的，不是不好吃，但與期望的有落差。單尾甜品有3款，好似跟一年前來的沒什麼分別。總括來說，廚房的基本功是很紮實的，foam, mousse 等都做到很滑。但可能摘星後太過進取，菜式汁醬的配搭有點怪怪的。希望下次再來會見到菜式有進步啦。米芝連星星餐廳的服務當然是令人滿意的，我地帶咗幾支酒，侍酒師知道應該怎樣處理不同的酒。飲酒最開心的就係可以同人交流交流。…查看更多

眾所皆知，車品品最出名的就是「等」。等入座後又等上菜，食個麵閒閒地等粒幾兩粒鐘。今晚同老公去完 wine tasting 都九點幾，去到車品品都差唔多十點，唔駛等位咁就食啦。已經成年無黎，估唔到牛腩已經唔再做，車仔麵的選擇亦少了。因為已經夜深，所以唔敢叫太多嘢食得咁飽。無牛腩之餘牛丸又賣曬，車仔麵只叫了2餸，無乜特別，湯底亦能力保不失。但重中之重係辣菜莆，爽口得黎又夠辣。豬手是出色的。炆得極之淋，又入味，一碟3件分量都夠食。絕對係補充骨膠原的好選擇。碗仔翅很足料，稀杰程度都可以，但豬肉就比較鞋。車仔麵黎講價錢一啲都唔平，但感覺真材實料又無味精。如果要排隊等的話，就真係唔會黎。…查看更多

為何深夜總是餓？又係一個陪老公夜食晚飯的日子，估唔到屋邨都搵到一間裝修企理又光光猛猛的粉麵舖。食物是一般的大路粉麵嘢，但就相當有heart。雲吞睇得出是自家製的，的的骰骰的，而且用料絕不姑寒，大大隻的蝦包在大細剛好的雲吞皮中，一啖一隻雲吞食得很過癮。炸醬撈麵的炸醬很入味，但最吸引的是彈牙爽口的麵。而且份量都不少。上湯不覺味精，感覺真材實料。老公的豬雜撈很新鮮，豬潤是爽口的。員工非常有禮貌親切，絕對係深夜裡的一股暖流。…查看更多

又係等老公收工而要夜食飯的一餐，等得太耐悶悶地就想食啲爆炸嘢。食韓燒當然要去尖咀啦，但行黎行去都無乜心水，亂打亂撞就去咗呢間韓燒。餐廳唔响大街，如果唔係有個阿姐企出黎拉客，我諗我地一定唔知有呢間嘢。餐廳係典型韓燒格局，但抽風唔錯，食完都唔會成身味。待應EE有部分係阿豬媽，老闆娘又係韓國人，膚淺嘅我即時覺得pro咗。嘢食都係大路韓國菜式。韓食小食有好多款，放到成枱都係，kimchi 係自家制的，很入味....正！ 燒肉我地叫咗牛肋骨同豬腩，另外加咗kimchi soup 同生菜盤。但最impress我地嘅係有好傳統的有味菜（唔好問我呢碟嘢正式名稱係乜嘢，我地都係問佢有無夾埋肉一齊食的有味菜）、麵豉醬同埋醃洋蔥。牛肋骨很tender，很少筋，傳統的韓式食法是將肉夾在生菜、芝麻葉、醃洋蔥、有味菜同麵豉醬卷埋一齊食，一個字：超級正！阿豬媽很親切的，周不時會過黎睇吓我地燒成點，又或者睇唔過眼幫我地燒。至於kimchi soup 就比較淡，下次可以唔叫。…查看更多

尖咀海運開擴大咗，多咗好多食肆，大部分坐擁360度維港靚景。本來想食pizza, 但阿女要食烏冬，所以就去咗「天穴」。之前都食過又一城同一集團的「穴」，不過不失，但「天穴」就是貴版。侍應話天穴的用料是較高級的，咁就試吓龍與鳯。環境是靚的，對住無遮無蔽的維港景食飯的確是心曠神怡的。午餐選擇很多，刺身壽司及各式丼飯都有。要了三小碗給小朋友，分別有牛肉飯、天婦羅飯及湯烏冬，都很適合小朋友口味。要知道帶小朋友食飯，最重要兩位大帝啱食。老公要了最貴的天婦羅定食，都算是抵食的，有海膽、蝦、蝦餅、蟹等等。味道都ok, 但蝦餅炸得不夠香脆。我要了刺身飯，刺身多過飯，很抵食，有海膽、魚子蝦子、海鰻、蛋、三文魚等，午餐來說都算新鮮。至於服務都是滿意的，一名男captain 仲帶我地出outdoor area畀小朋友行吓，仲話book位可以直接搵佢添。…查看更多

天氣轉涼，又係食煲仔飯季節。由於好多餐廳都唔用炭爐的關係，宜家要搵間好食嘅煲仔飯好難。今日就試吓呢間超級up dup專食煲仔飯的餐廳。這間餐廳清一色都係啲木口木面、講多2句都嫌你煩嘅阿姐，所以係完全無服務可言。咁黎得呢度食都預咗，但求阿姐唔好小我地。煲仔飯都係大路的配搭，價錢由$50起，視乎要幾多個餸啦。我要咗梅菜滑雞，老公要咗潤腸排骨。等咗唔駛10分鐘個飯就黎啦。唔知係咪好多人食霸王餐，好搞笑地係個飯一上枱就收錢。一開蓋係好陣焦香的，我唔鍾意咁多飯焦所以只焗咗一陣。梅菜滑雞只得很少梅菜，雞反而較足料。好明顯個飯唔係由生米煲成的，而係蒸好後再落煲仔煲。飯明顯唔夠乾身，飯焦唔脆，雞略咸。可取的係唔貴，雞滑。幾十蚊都不能期望太高，沒期望就無失望。但就應該無下次。…查看更多

陪老公做完嘢已經成11點，雖然未食晚餐，但夜麻麻都不能食得太飽太爆炸。而且又難得過海，老公就帶咗我黎灣仔食佢之前OT的日子的宵夜首選。老公推介必食牛腩，所以我就點咗魚旦牛腩米，魚旦聲稱是自家制的，但就不夠爽口，口感有點糊糊的。主角牛腩就肥瘦得宜，咬落是鬆化的，一點乜不韌，而且十分入味。老公要咗個坑腩牛雜麵，但我無食過就無謂品評啦。另外點了一碟油菜及炸魚皮，正常。2個人食咗2百幾蚊，食粉麵黎講都算貴，但起碼是好食的。…查看更多