monique 66的個人專頁

平時見排長龍，今日見到得幾個人 就食吓啦，但都等咗半個鐘，仲要隻腳俾蚊咬咗十幾粒蚊爛！本身想試吓雞白湯嘅，第一次食問店員有咩推介，店員話如果鍾意濃味啲就揀濃醬油清雞湯，咁我聽吓佢講啦，點知個湯底勁多油，都唔敢飲埋啲湯，同埋個面好硬，問吓店員佢先講佢哋面底預設係偏硬，咁唔係應該同客人講聲先咩，我鍾意偏淋嘅，我唔記得咗自己有冇講，但都冇諗到硬到咁，只係個叉燒幾好食，總括嚟講，$118都要室外曬住餵蚊等半個鐘，唔值！…查看更多

拼盤圖片明明有荷葉包雞，因為見個包雞係推介，點知嚟到完全冇包雞、個春卷仲要係素又冇味，問店員先講話餐牌有細細隻字寫左款式會轉，但如果QR code落單係冇顯示呢啲字，覺得呢個拼盤真係好伏，串燒雞同埋嗰個唔知咩肉餅都勁鹹，完全唔值呢個價！嗰個咖喱蟹肉蒜蓉包都OK泰式炒通菜菜都係鹹到死我覺得佢整到啲餸咁鹹就似博人客嗌多幾杯飲品，酒水最賺錢呀嘛兩個人就咁食左以上三樣嘢同兩杯普通飲品，就已經八百幾蚊，仲要好失望，真係冇下次！…查看更多

明明嗌麻辣但係送到嚟打開見到有酸菜都覺得奇怪，點知一試真係又酸又甜，一啲麻辣味都冇！ 個孜然雞翼淨係面頭加少少孜然粉就當係，醃都冇醃過冇味的，真係好冇誠意囉，冇下次…查看更多

之前試過呢間晚餐都好食，今次下午茶都無令人失望，真心讚！一上枱已聞到迷你漢堡嘅香味，啖啖肉冇筋冇渣、包皮有烘底搽牛油，雖然細細隻但一D都唔馬虎！扒芝士火腿治用左黑松露味道好驚喜！柚子蛋糕味道好清新又唔太甜！openrice 仲有七折，優惠價$218，值得推介！…查看更多

唔好食豬頸肉 唔好食豬頸肉 唔好食豬頸肉！重要嘅野要講三次！事原係因為朋友想食船麵就叫左個二人餐，見到個餐有馬拉盞通菜同豬頸肉，諗住都穩陣啦，果下都突然諗起對呢間嘅豬頸肉好似有D印象，到食第一啖就知咩事啦，我又中招啦！因太耐冇食 唔記得左呢間豬頸肉唔好食，所以我今次一定要寫食評提醒番自己下次幫襯時唔好再錯！佢D豬頸肉係冇味，好似冇醃咁，又冇香味又冇甜味又冇燒汁味，完全唔知食緊咩，只靠點個汁先食得落，仲有D燶，求其搵一間街市檔口嘅燒豬頸肉都好食過佢！馬拉盞通菜就值得讚嘅，菜幼嫩唔老，馬拉盞好味甜品就千層糕都幾好不過疫情黎講，環境夠闊落，又間哂板，係坐得安心又舒服嘅。同埋假期可以book位，唔洗等枱，又有泊車優惠。…查看更多

平安夜黎開觀塘， 即刻諗起要再黎呢間有質素保證嘅西餐， 聖誕餐 welcome drink好清新好飲， 湯夠濃又唔會咸， 頭盤有真材實料蟹餅、 火雞同帶子， 主菜慢煮西冷扒同三文魚連黑松露薯蓉都好出色， 已經覺得飽但都唔捨得放棄d薯蓉！ 到杯士多啤梨奶昔好有驚喜， 飲落唔太甜仲有果肉， 到甜品係炸香蕉同奶凍我已經食唔哂了， 好滿足的一餐！ 我唔係打手， 亦冇股份， 但真心覺得值得寫食評支持一下， 希望下次山長水遠黎到觀塘仲食到啦！…查看更多

見呢間野裝修好地道，又多人排隊就試下食啦，兩個人叫左個馬拉盞通菜、豬頸肉同咖喱麵包蟹。通菜係最基本嫁啦 但竟然冇乜味又唔香，跟住豬頸肉賣相又唔靚又唔俾汁，問佢先俾番汁，又係冇乜味，食幾舊都唔想食，兩碟都唔好食食唔哂，食泰國野都係鐘意香口味濃啫...果下已經好後悔，早知食番平時食開x珊園果間啦，呢個兩基本餸一定冇得輸先！跟住個主角係咖喱麵包蟹，睇落好大隻蟹，個汁係幾好味嘅，但就好稀 稀到似湯咁，麵包沾咖喱汁好索汁係唔錯嘅，但食蟹蓋時有d苦苦地，當時都冇為意，蟹肉有d痴殼。事後返到屋企半夜就肚痾肚痛痛左成晚，我就諗番起唔知係咪隻蟹有問題，個殼苦係唔夠熟？總之呢間我就black list, 以後唔會黎。…查看更多

阿媽生日，見到甜品碟幾靚就帶阿媽黎食， 點知......第一道洋蔥湯同南瓜湯平平無奇、冇乜味， 阿媽都彈左幾句， 不過特別在有兜芝士碎加落去...餐牌選擇少， 想叫個青口做前菜但店員話冇， 話要一早訂喎， 咁就揀左香草牛油焗田螺啦， 但擺到埋咀都聞唔到香味,  阿媽又出聲話麻麻啦...主菜叫左澳洲乳羊、焗酥皮牛柳同鵝肝伴牛柳， 個羊冇羊味， 牛冇牛味， 得塊鵝肝叫好食D！ 阿媽已經黑哂口面， 話喺元朗咁嘅價錢俾D咁嘅質素， 仲限時食一個半鐘， 已經非常不滿...之後甜品叫左個焗蛋同杏仁酥都幾靚， 咁我事前已經講左阿媽生日， 想佢地畫個生日蛋糕， 咁店員望到我地想搵人影合照都冇主動開口話幫我地影， 要我直接叫佢佢先幫， 仲要影唔到個甜品碟畫嘅蛋糕， 我地自拍仲好過...好彩甜品味道都OK， 阿媽終於有讚啦！ 揀餐飲時， 店員話咖啡最正， 但我地驚瞓唔著所以冇試。總括黎講， 食物係得個賣相吸引， 只有甜品尚可， 環境又冇窗冇景冇情調， 同埋食個過程都幾急， 未食完就想收碟， 好似催客食快D咁， 因為八點半就已經有下一輪...…查看更多

為左俾大家知道佢地差劣嘅生意手法同態度, 我專登開個account順便發洩下! 太激氣啦! ------------------------------夜晚9點幾買蜜糖雞翼, 我俾完錢擰轉頭就咬落去, 嘩! 硬到好似石頭咁, 仲難過牛肉乾, 完全食唔到! 唔知係擺得太耐定係番煮番叮, 總之正常人都無可能食得落! 我就轉番身原隻俾佢睇, 然後好有禮貌同個阿姐講:"姐姐, 你d雞翼好硬, 我食唔到, 換過第二d得唔得?"佢竟然話係:"凍左啫"我話:"唔關凍唔凍事, 係d雞翼有問題, 硬到咬都咬唔到!"佢仲好意思講:"你咬過無得換啦!"嘩, 即刻火都黎 , 我唔咬過點知有問題呀? 我再講:"你賣剩成盤都唔要得唔賣得俾人啦, 叫人點食呀大佬!" 我咁好態度同你講番, 又唔係要退錢, 叫你換第二d啫, 就黎收舖都唔係賣呢d俾客人呀嘛! 其實你求其換第二樣俾我都得啦, 真係唔肯換嘅就態度好d講句唔好意思我都接受丫, 但宜家係死雞撐飯蓋唔肯認錯唔肯負責囉!! 呢刻已經唔係錢問題, 係佢地經營手法同態度都好有問題, 我好嬲咁掟番d雞翼喺枱上面, 同佢地講:"硬到咯咯聲嫁, 你食丫! 都唔知點做生意嫁! 不知所謂" 然後我就轉身離開!點知入面個男人仲大聲夾惡鬧番我問我:"你係咪搞事呀?!" 我再講:"你唔知點做生意嫁, 聽執笠啦!" 之後佢仲要再講多次:"你係咪搞事呀?!" 我再贈多佢一句聽執笠啦! 就繼續行無理佢!痴線嫁真係, 我一定唔會再幫襯, 為左啖氣仲要去消費者委員會投訴佢地, 太過分啦!! …查看更多