有借有還's Profile

由疫情年代成間餐廳得兩台人食飯，可以由六點食坐到11點，到而家淨係限時食兩個鐘，由餐廳寂寂無名食到佢哋攞到米芝蓮推介，由唔使訂枱食到要用網上訂位服務先一位難求，由大圍一間分店食到有元朗開分店到元朗分店結業終於見到所有老臣子回歸大圍，見證老闆疫情底下對夥計嘅不離不棄，到今時今日夥計為老闆拼命去達到米芝蓮級數，真心感覺到佢哋嘅裝修強調獅子山下精神嘅堅持，我亦由一個唔食中菜，變到曾經一個禮拜到大圍小館食三晚中菜嘅轉變，一位難求下嘅三年，今晚終於book到位帶埋屋企人嚟食，冇乜投訴，菜式味道都好好，但始終懷念’排骨仔’、’尖椒剁魚頭’、’牛肉餅’，大家知道佢要用餐位網上訂枱係想衝擊一星，但係唔好忘記一班你未有名聲嘅時候都覺得你美味嘅街坊，再一次為你寫好食評，亦都希望你可以維持落去…Read More

公司飯局，一行人4大人4小朋友，一早經OpenRice訂位，再飯局前早三日到餐廳叫經理寫定餐牌，經理仲幫我waive咗開瓶費-芥末東北雲耳-金條蘿蔔-糖心皮蛋酸子薑-蓬萊素雞-龍袍烤豬髀-龍雞湯泡花膠 x 8-潤燒妙齡鴿-上湯冰菜-龍袍西施泡飯-沙巴老虎蝦 x 8-新疆棗皇糕因為疫情關係，我確實無嚟龍袍3年，夥計都唔同晒，但裝修依然富麗堂皇，不過食物就出事，首先一早寫定餐牌佢都可以話無金條蘿蔔、無冰菜、無泡飯，冰菜轉菜心，泡飯轉炒飯，最後個新疆棗皇榚仲要無上。全晚成個大廳仲要得4個夥計，見佢哋忙到一腳踏，我要追佢哋上菜都要等佢哋得閒先追到。3年無嚟，只可以講禁晚市，四人一枱等限聚措施真係玩死飲食業。…Read More

尖東開完會，因為而家有屯馬綫，搭幾個站就到宋王臺，所以突然想食泰國嘢，七點半先尖東出發，15分鐘已經到餐廳坐低咗，勁方便。今次去嘅餐廳叫泰王閣，响正金寶隔離，佢同金寶或者好多九龍城泰國菜館一樣，都係有兩個鋪位，睇嚟生意都唔錯。因為今次得兩個人，我哋只係點咗四樣餸，生蝦刺身、燒安格斯牛肉(青檸)、馬拉盞炒椰菜苗、泰東豬肉生菜包，同埋餐廳寫明用餐時間1小時15分，所以我哋只係點咗三支啤酒。生蝦刺身絕對有驚喜，如果會食生蝦嘅人一定要點。反而見到好多人推介嘅燒安格斯牛肉(青檸)，我個人就覺得普普通通，雖然菜名有(青檸)，但唔覺青檸味有幾突出，想食好味嘅泰式燒牛肉，我推介同區嘅泰禾美，但果邊環境就無呢邊咁企理。馬拉盞炒椰菜苗都可以，大路嘢。反而個生菜包要特別講一講，因為餐廳原來有分清邁同泰東兩種口味，我叫生菜包嘅時候，店員問我鹹辣定酸辣，我响冇睇餐牌嘅情況下，猶豫咗兩三秒揀咗酸辣，後尾睇返餐牌先知原來係泰東口味，第一啖食落怪怪地，但食食吓又覺得幾好味，值得推介。…Read More

西貢三大米芝蓮酒家，全記其中之一，上次寫過勝記，今次講吓全記。全記有自家海鮮檔，海鮮選擇多，餐廳位置就腳，有代客泊車，有室內位又有室外位，因為餐廳有兩邊，我個人比較喜歡正舖，牌坊嗰邊比較少去。全記無論係食套餐定海鮮加工，價錢定位相宜。早市仲有點心一盅兩件。我每次入西貢，就一定係去西貢街市或者碼頭艇仔買海鮮再到酒樓加工，今次揀咗條紅瓜子、賴尿蝦、花竹蝦、南非鮑魚、台山蠔同蟶子，全晚最驚喜一定係清蒸賴尿蝦，有人話賴尿蝦梗係椒鹽，我個人建議大家可以清蒸，鮮味一流。最後總結，全記係海鮮加工最平易近人而且有水準嘅西貢三大車呔人酒家。(套餐未食過，各位自行判斷)…Read More

最近天寒地凍，最好一定係去打個邊爐，三年疫情，食開好嘅火鍋店唔係執咗就係經營困難被逼質素下降。難得响銅鑼灣搵到間新嘅火鍋店，有機會即刻嚟試吓。餐廳地點金利文廣場，銅鑼灣C出口，就腳。餐廳叫街頭火鍋，但裝修環境企理，乾淨衛生。餐廳侍應招呼親切，會為你詳細介紹食物。是晚叫咗蕃茄薯仔併沙嗲湯底，蕃茄薯仔湯底好濃郁，但估都估唔到佢個沙嗲湯底好味到可以同九龍城某間火鍋店比較。打邊爐一般會注重牛肉，但呢間餐廳豬肉都可以俾到好多有質素嘅嘢你選擇，唔食牛但又鍾意打邊爐嘅朋友，呢度係一個好適合你嘅選擇。餐廳除咗牛同豬出色，竟然仲有新鮮雞腸同台山蠔，強烈建議大家一定要嚟試吓。…Read More

入西貢食海鮮，三大米芝蓮酒家勝記、全記、六福。環境最乾淨、招呼最周到一定係勝記，佢唯一缺點係餐牌以外海鮮選擇唔多，自家魚缸冇乜海鮮揀。入得西貢小弟一定會去買海鮮到酒家加工，唔會食酒家嘅套餐，最方便、最近嘅地方就係去西貢街市或者碼頭艇仔買海鮮。一來新鮮，二來食咩海鮮可以自己揀。勝記蒸魚嘅功夫一流，當日帶咗條三斤半白瓜子斑去，師傅蒸到條魚啱啱熟，完全冇令條魚浪費。休漁期過後油蝦當做，手掌咁大隻蝦亦都冇over cook，可以見到師傅功力。龍蝦、聖子、賴尿蝦呢啲基本嘢亦都難唔到師傅。蒜蓉炒白菜仔加咗雞油，一流。反而係個企鵝燒春雞名過於實，唔建議大家叫。之後有機會再同大家講吓全記同六福。…Read More

勁耐冇返過嚟鰂魚涌，今次同屋企人去開附近，同行有人想食意大利嘢，上openrice check到呢間戲餐廳。餐廳位於太古Oxford House，有自己專屬電梯，唔好去辦公室大樓搭𨋢。餐廳環境幾靚，一坐低餐廳侍應即刻好詳盡介紹餐牌食物，佢哋有一啲dinner set，但我哋最終都係散嗌，一來選擇可以多啲，二來我哋同行有兩位小朋友。全晚食物質素中上，絕對唔失禮，但係又偏偏講唔出有啲咩重點，成晚最驚喜係餐牌冇寫過酒水有任何happy hour，bye 1 get 1 free，但埋單先知經理幫我哋做咗買一送一，見到張單喜出望外。…Read More

新城市兩間燒肉店，一間韓式，一間日式，今次先講講韓式呢一間。餐廳環境裝修唔錯，一入門兩個熟成凍櫃，全餐廳以木色為主，餐碟碗筷、燒爐用金色，整體感覺唔錯。餐牌除咗for燒肉嘅牛肉、豬肉，仲有其他韓式熟食，連醬油蟹都有，酒就得真露、啤酒同一款house wine，冇其他選擇。其實淨睇餐牌，牛肉嘅部位、款式的確幾多選擇，幾吸引。當晚點左個二人set，加個醬油蟹，加支house wine。你睇得出牛肉質素其實幾好，但成間餐廳職員完全冇諗過幫你燒一陣，其實唔需要全程幫你燒㗎，間唔中幫吓手一陣都好呀。由得個客自己燒，再好嘅肉都只會成為浪費。我認我係渣，所以韓燒多數去’名家’。如果餐廳你係諗住走冇Service嘅韓燒，其實我建議不如你做放題，可能賺得仲多。埋單走嘅時候，八卦睇吓其他枱，老實講，眼見每枱個爐都係黑麻麻。冇比較冇傷害，下次再講下新城市另一間燒肉店。…Read More

有時家庭、朋友聚會，約咗一玩人入馬鞍山，晚餐想大家一齊食餐好啲嘅飯，之前一定係出返沙田區或者又一城。但呢一、兩年馬鞍山相繼開咗一啲有質素嘅餐廳，除咗之前we go mall開嘅粵菜-名都，最近响馬鞍山中心亦都開多咗間日本菜-山海。餐廳環境裝修以木為主，幾舒適，除咗基本刺身壽司之外，仲有其他串燒、熟食，而且清酒選擇幾多，價錢亦都合理。是晚叫咗壽司，手卷，池魚刺身，串燒，汁煮牛柳粒，全部合格，但最令人驚喜嘅係佢哋嘅蟹粥，煮到好綿，蟹味好出，極力推介。…Read More

呢間餐廳要我等咗一個鐘多d先有位入席，問我有冇期待我一定有，沙田要食日本嘢最近一定係九巴車廠果邊某餐廳(唔想果邊人多，不作介紹)，但今日去開新城市廣場買嘢，想醫完肚快啲返屋企，所以就地解決。餐牌食物選擇幾多，唯獨清酒選擇較少，我揀咗餐牌唯一一支720ml，價錢中規中矩(清酒最抵一定係尖沙咀元氣一杯)，刺身、壽司新鮮，味道唔差，環境、服務中上，以呢個價錢其實ok，但要等個幾鐘，又好似唔值。我一把年紀無條件等位，但大家有時間，尤其年青人(等位嘅時候全部都係後生仔)，帶朋友仔食飯慶祝，其實唔錯。但如果响沙田趕時間，建議都係去返壽司九州市場。…Read More

二月中第一次响朋友介紹下嚟呢間餐廳，小弟好少食中菜館，結果响呢個武肺疫情下，之後嘅四星期內去咗8次。呢間餐館入門口前要量體溫，用搓手液，响呢個時勢底下未食都已經加分，本來要$100開瓶費，但經理仲幫我地wave左，服務態度又加分。個人極力推介佢地嘅鵝腸，食得岀係新鮮貨，其他叉燒同雞都十分岀色，雞係連雞肝、雞腎一齊上碟，一睇就知又係新鮮貨。雖然響呢個疫情底下好多食肆都做唔住，但呢間餐廳好似冇乜大影響，問過經理如果係之前正常時候嚟，冇book位係一定要等位，希望所有有水準嘅食肆都可以捱過呢一關。…Read More

一向對韓燒感覺麻麻，記憶中都係自己要落手落腳燒啲嘢食，但往往唔係好識控制，跟住燒到個燒烤網黑晒，而且通常係唔會有人幫你換，之後每燒下一件食物都整到黑蚊蚊。但呢間餐廳可以做到全晚有專人幫你燒，你可以完全坐響度等食，所以每次想食韓國菜都會想到名家。餐牌有好多唔同選擇嘅set，我通常兩個人嚟，所以偏向揀set，可以試多啲嘢。佢哋個美國牛肋骨一定要試，韓式醃料完全入晒條牛肋骨裏面，一食就知心機嘢，而且每款set都有包呢味菜，叫set就唔洗麻煩。…Read More

响馬鞍山唯一真正做火鍋嘅餐廳，養生殿的確係唯一一間，身為馬鞍山居民應該要覺得慶幸先係，但老實講食過兩次之後真係覺得麻麻地。無論係牛肉、豬肉、雞肉、海鮮(其實冇乜海鮮揀)，以至蔬菜，食物材料質素平平無奇，你有心搵其實行超市都買到，去citx supxx應該靚過佢。麻辣湯底食唔到麻，淨係食到鹹，另一湯底美人鍋就更加奇怪，完全係想用味道去掩蓋食材質素嘅不足，兩個湯底令我諗起食茶餐廳食快餐，比勁多紅或白汁配雞扒、牛扒、豬扒或斑塊，俾啲汁同塊雪藏扒你食一樣。要食台式火鍋都係去台灣食好啲，香港都係食返粵式或者港式火鍋比較好…Read More

知道南亭開到嚟尖沙咀，梗係要搵日黎試一試，是晚公司開完會，一行四人18:30就到what in，可能因為早嘅關係，全間餐廳得我哋一台，南亭清酒價格一向覺得比較貴，最common嘅久保田千歲冇記錯都要賣到$450，所以一般嚟南亭我都係飲啤酒為主。食物方面尖沙咀分店依然出色，雞類串燒一向係佢哋賣點，雖然有啲部位唔係人人都會接受，但佢哋嘅雞尾、雞頸我會推介大家試一試，雞皮蝦大葉卷當晚冇貨，呢個都建議大家一定要食。最後講講如果大家揸車嚟泊車唔係太方便，始終棉登徑食市太多。…Read More

同生意夥伴有啲嘢傾，平時通常去開尖沙咀某間餐廳酒吧飲杯野一邊傾，但今次避免撞到其他行家，我同佢又都係住喺新界東，所以partner提議去石門。呢間酒店嘅晚餐buffet之前同屋企人有試過，感覺麻麻，所以本身都冇帶住期望嚟，都係諗住飲杯嘢，傾返公事。但坐低見到個Menu $398一打生蠔連兩杯酒，覺得幾抵所以叫咗一set試吓。生蠔雖然好細隻，但$398呢個價錢，仲要包兩杯酒，都唔敢有太多要求。之後一邊傾公事一邊飲，叫多咗個pizza、一碟燒豬肋骨同叫多咗支酒。食物味道不過不失，但餐廳環境一流，有室內仲有露天坐位，景觀唔錯，幾個朋友飲杯嘢吹下水，呢間餐廳係一個唔錯嘅選擇。…Read More