daggertail的个人专页

星期日帶埋細路2大2小去食晚飯。聽聞佢咕嚕肉好食。大概6點到，冇咩客，大概只有3枱。點咗個咕嚕肉，菜心，蝦餃同埋個沙薑雞。樓面得2個人。等咗接近40分鐘都未有野食要催。首先黎咗個蝦餃，應該蒸得太耐，d皮散晒。之後要再催野食。咕嚕肉係幾特別，似冰糖葫蘆，不過好油。梅菜菜心就冇特別，冇咩梅菜味，而且係塊荷葉上邊搵到幾塊蟹殼……..沙薑雞就算ok 啦，一般，唔算好多肉。最後啊姐話就話打個9折，不過之後發現冇，要走返去同佢講。 9折咗以上 大概$550。依餐飯比較令人失望。…查看更多

之前都聽過依間野既新聞。所以勇敢去一試。只可以話：果然名不虛傳。叫咗個楊州炒飯、蔥油叉燒飯加隻「半焗流心」蛋同常餐叉燒通。首先、楊州炒飯似西炒飯多啲。啲飯唔夠乾身。火腿多個叉燒。冇咩蛋。蔥油叉燒飯d蛋唔係流心既。蔥油啲蔥花太大粒。叉燒最唔掂，似燒烤叉燒多啲，醃咗太耐，完全唔似燒味叉燒。最估唔到係個叉燒通，竟然係最遲上。味道一般。只係可以話唯一好處就係平啲。不過行遠少少可以考慮間「紅X」，性價比高好多。…查看更多

見有媒體報導所以黎試下。店鋪唔算大，同一般麵店差不多。不過都算光猛乾淨。要排一陣隊先有位。先講野食，叫咗個四寶河，油菜同炸魚片。唯一算好味d係個炸魚片。不過d 魚蛋真係麻麻地，散得黎又冇魚味。四寶冇魚餃變左雲吞，相比隔離麥文記當然差一截。不過最不愉快都係因為個女侍應。其實原本叫做手撕雞泡飯，點知過咗成10分鐘先話原來冇。態度麻麻之餘，又漏單。明明幾分鐘前落左單，轉頭又話冇落過。結果一碗麵等左15分鐘。價錢唔算特別抵。可一不可再。唔覺得有咩原因值得排隊去食。…查看更多

見八瀧週年有買一送一，所以試吓。（即$1588 兩位）訂咗6點，5:50去到，佢地話師傅未ready，結果6:15先入得。坐bar枱，唔係太舒服，好頂腳。前菜好一般。唔算特別。唔夠凍。有份生蠔，唔錯既，唔算太甜個類。d 炸物就麻麻地。d 炸法唔係日本餐廳既炸法。好硬😣其中一份炸魚唔熟。有份甜蝦連瑕膏蝦油，好味😋有個吞拿魚海膽三文治，好味😋之後就係壽司。壽司算OK，d飯有d淋，會散。不過有拖羅、甜蝦。（雖然師傅一開始忘記左整甜蝦）可惜冇三文魚籽，冇海膽。有幾種鯛魚，池魚，bb銀鱈魚。而且可以無限叫，食到飽。最後甜品係芝士雪糕同哈密瓜哈。可惜哈密瓜唔夠熟，唔夠甜。買單$1588 + $311（加一）= 一位大概$952。總括而言，質素勉強值買一送一個價。如果要俾$1588既話，更好既有大把選擇。…查看更多

見多人話好，同一班同事去食。環境都算ok，可能因為疫情關係，坐得唔算太逼。先講好既地方：- 龍蝦最正、最好味。一定要一開始去就食！唔係就要排隊再等。- 第二正係甜品。d 蛋糕好好味。- 鴨肝都好食，不過每件都比較細件，一次過可能要2-3件先得。- 盅湯都唔錯。- 尤其係牛扒同羊架，即刻燒好好味。佢地都有乳豬，不過好一般。-大部分熟食都ok。令人失望既有：刺身。好麻麻，份量少又細件。壽司完全唔得，d飯錯曬，根本唔達一般壽司質素。冇生蠔就比較令人失望。因為臨近聖誕、特別貴，所以性價比比較低，令人失望。…查看更多

星期六晚上，可以因為一個人既關係，所以唔洗等。因為見佢有蠔同埋7折所以一試。大部分野食都唔算平。刺身同埋壽司都算貴。好可惜個蠔已經賣曬。叫咗一個叉燒拉麵，加州卷，玉子燒同埋蝦天婦羅，依d基本嘢食。- 叉燒拉麵真係得叉燒同拉麵，一般都會有d拌菜，但係佢冇。個湯底冇咩味道，麵都煮得好食，叉燒就比較細塊。- 加州卷真係唔得，裡面有青瓜絲，蛋同蟹柳，不過青瓜絲太多，其他比較少- 玉子燒都比較令人失望，menu影到好大份，實物好細.- 蝦天婦羅都係一般般，蝦size算中等唔算好爽口，炸得都算OK。一般野食都好一般，貴價嘢就真係要睇睇。埋單$266，7折咗再加1.…查看更多

地獄飲茶地方。坐低咗咩都冇，menu、落單2D barcode 咩都冇。以為會有人攞黎，結果係冇。d 餐具勁污糟，好多污跡，要自己慢慢逐一清潔。大家要睇清楚，因為佢d杯碟係黑色既，污糟咗都唔會睇到。嘢食款式少，選擇唔多，佢menu d 圖片一d都唔吸引 🤣d 蝦餃、燒賣原來係逐件叫。黎既時候真係O嘴，價錢$12件但唔算好食。個鮮竹卷好硬，炸太耐、蒸太短時間。個蒸飯實際係個湯飯，個底勁濕，好難食。員工又唔夠，嘢食要成30分鐘先黎。總之，好難食。肯定唔會再去。…查看更多

香港人日常：晚餐外賣當中叫咗個梅菜扣肉例牌。收到既時候發覺個盒出奇地細，同埋多咗個飯。打去問返佢地，問清楚其實係唔係俾咗個一人餐我。佢地答覆就話，例牌都係比一人餐多幾塊肉，都係用個細盒裝。佢地話佢地冇俾錯到，係比多咗個飯姐。個例牌$84一人餐$50宜家我個盒得四塊肉。即係幾塊肉貴$30。一人餐可能得一塊肉。😒😒😒😒😒…查看更多

沙田新店，食神叉燒，對佢燒味實有期望。係得新城市廣場，價錢一定唔會平。一個starter $60，合理。但兩個又可以$75。所以叫左椒鹽魷魚同分海蜇。椒鹽魷魚份量好細，不過都幾好味。海蜇燻蹄有出奇地大份。主菜叫左佢出名既暗然銷魂飯同燒鵝飯。暗然銷魂飯都算ok，叉燒係好食既，可惜飯唔夠熱。有睇周星馳既，都以為暗然銷魂飯裏面有洋蔥，點知只不過係係一搬叉燒蛋飯。燒鵝飯就真係唔得。首先，d鵝係凍既。飯好少同埋一pat咁，賣相好差。跟飯個菜湯又比一般多油。我覺得最影響我印象既係個廚師。首先，講嘢好大聲。準備好碟飯又求其pat係盤到。我地後期更加發現，原來個叉燒飯係應該有汁既，但個廚師原來冇落到感覺上就好似用較貴價錢食一餐街邊大排檔。老實講，整得open kitchen 唔好個廚師注意下自己言行。都幾影響食客印象㗎其實。…查看更多

Bricklane 係沙田開張，其實都既期待。得閒食個早餐都正啊。點知去到，發現價錢都幾貴。相比之前間Oliver Supersandwich，Bricklane都貴一截。心想bricklane 都應該好食一截既。叫左個allday breakfast 同fish and chips。allday breakfast size 細，男士唔會飽，我老婆都係剛剛好夠。fish and chips係災難。唔脆，魚肉淋patpat，好難食。總結黎講，貴得黎難食。…查看更多

最難食既放題。星期五晚上7:30係旺角，兩個人唔洗等位，其實應該知道有問題。檯好細，唔夠位放野食。本來以為有爐端燒，點知冇人問過我地，我估係因為張檯太細。以下就係重點，食物。刺身：色澤暗啞，唯一細小既帶子尚可接受。壽司：飯唔熱亦唔凍，仲好散既。冇咩味道。炸物：炸雞翼唔熟，講完。鍋物：肥牛硬過我條命，壽喜燒食唔出有味道。中華沙律就係唯一達到要求既野食。另外可以接受既就係佢既罐裝飲品，都算有選擇。綜合以上：一個字「伏」。…查看更多

一開始見到佢有d格調，心想應該ok掛。用咗app攞飛，攞咗7號，叫到4號，心想就係門口等下啦。等咗一陣，門口都冇staff，冇人理我地。見到有張空枱，但就係冇staff理我地。終於有staff發現有人係門口（我地等咗都成10分鐘），佢竟然求其問一pair就帶咗佢地入去，而個pair只係剛剛到！我地真係有d怒，等咗咁耐，你竟然問都唔問就求其帶客。我地當然同佢投訴啦。佢就只係「哦哦哦」咁，求其hea咁。坐低咗，叫咗個意粉同飯。意粉ok，飯就唔好食，凍凍地既。本來想加飲品，不過兩分鐘都冇人理，佢地就係咁話等等、等等咁，之後就忘記咗你。不過埋單就出奇地快。咁既餐廳真係唔洗再去。…查看更多

好差既一餐lunch壽司d飯好「林」，散冇醋味，d魚唔凍，唔新鮮。串燒拼盤d串燒唔熱，6種裡面2串差不多，都係煙肉包d野（分別係包番茄同蘑菇）個炸雞餐算最好，夠熱。最差係杯熱奶茶係凍既.....旺角餐廳裡面，都可以算係最難食。…查看更多

同女朋友去睇阿仙奴對曼聯。7:45開波，7點到都沒有位子，因為有個生力睇波團。Waiters 好nice, 俾個ok o既位我地。每日4-8pm 係 happy hour。我要o左個Leffe Blonde, 好飲。我女友要左個Apple甚麼，cocktail來的，麻麻地，味道好藥水。><叫左Onion Rings, 正! 大件，新鮮!叫左雞翼，都不錯。最正就係個Melted Toffee Pudding!超好味道!值得再去!…查看更多