mildchan的个人专页

上個禮拜行過一間新開嘅食肆,見佢地方寬敞光猛,所以就扚起心肝去試吓! 呢間叫做”Space 閒聊”起初聽聞係做素菜嘅,不過睇落個menu又唔係喎,素同葷菜都有供應,而且似乎都有幾多選擇!全店連廚房有4,5個服務員,俾個menu我睇話落單要行出counter同埋要預先俾錢,而餐具都要自己去拎! 因為長洲似乎冇乜地方有burrito(墨西哥卷🫔)食,所以就決定試吓佢先!食物即叫即做,所以都要等咗約15分鐘. 個雞卷上到枱又幾對板喎,就係啲沙律同薯條都唔錯! 雞卷熱辣辣,雞肉tender and juicy, 好多cheese而且味道好好😋 $58包熱飲而凍飲加$3係合理,杯凍檸茶差啲滿到瀉! 我對呢個$61嘅午餐係滿意嘅👍🏼見到其他食客叫嘅意粉同湯,都係熱辣辣而且好香. 下次可以試吓!地方坐得幾舒服,雖然係半自助形式,但係服務員服務態度良好,咁似乎以後又會有多一個食晏嘅選擇! 因為佢哋供應早餐,所以唔做晚市收6:00pm, 逢星期二休息!…查看更多

早兩日聽朋友講起話長洲海傍嘅Pink Pig轉咗手,咪行出去試吓囉!Pink Pig其實好耐之前我都幫襯過一次, 位於海傍道轉角嘅舖位,附近食肆都幾多㗎! 舖位𥚃面基本上得幾個吧位,大部分嘅坐位都喺外面,唔多人行過嘅時候都坐得幾舒服.因為老闆娘係泰國人,所以當然要試吓佢嘅招牌泰式牛肉湯河,再加個青木瓜沙律,我老公就要個厚切煙肉漢堡.兩個人食就只可以試住咁多先!雖然佢嘅客人唔係太多,但因為係即叫即做,所以都要等咗大約15分鐘先至上個青木瓜沙律. Presentation係唔錯而且好有泰國風味,好食😋 再嚟個牛肉湯粉,湯味濃(雖然以我嘅口味就略為淡咗少少),不過係好味而且牛肉都好多,上面件蘿蔔淋到係入口就溶化嘅! 睇嚟好似唔係好大碗,不過食落都好多喎!而老公嘅漢堡就好juicy,不過就真係似乎細咗少少囉!呢度嘅價錢喺長洲都算中上,有酒精嘅飲品要$78,其他飲品就大約$40-50左右,而且要加10%服務費! 喺長洲連加一要差不多$100食碗泰式牛河, $100一個細細個嘅 burger,就算幾好食都係覺得not value for money! 我哋兩公婆叫咗3款食品冇飲嘢都要$270,抵唔抵食就見仁見智. 不過佢嘅 location好,所以到我哋臨走嘅時間都真係有好多人入嚟打卡食嘢嘅! …查看更多

有日行過[頹飯]嘅時候見佢仲有位,就一於行入去食,起碼坐得舒服而且有冷氣添😉見佢menu有個[香茅豬扒蔥油撈麵]$56,另一個[蔥油香茅豬扒煎雙蛋飯]$58(兩個都包冷熱飲品),問吓個飯仲可以改撈麵嘅,咁以我C9咁精打細算嘅精神,既然只不過係多兩蚊,但係多兩隻煎蛋,咁就當然要後者啦😝老闆娘阿婷拎到個麵上嚟嘅時候,仲問我要唔要辣椒油,因為記得我鍾意食辣喎! 呢啲雖然係微不足道嘅gesture,但真係令人感到窩心呀!今日個香茅豬扒比起上次老公買返嚟嘅外賣好食得多,而且以我平時唔多食撈麵嘅人都覺得啲麵好爽口同好味😋 不過份量好大(其實我已經叫佢扣底)我慢慢食咗半個鐘都冇辦法KO晒佢😅好好嘅服務態度加埋唔錯嘅食物質素(份量亦都足夠),雖然暫時都唔算得太多人幫襯(因為佢位置喺後街,而且唔係而家長洲新興嘅打咭舖頭),但今日見佢都客如輪轉😅 希望口啤可以幫到佢,能夠一路做落去就好啦!…查看更多

[英姐泰式海南雞]. 呢間店經過好多次,應該都開咗有一段日子,不過我就未試過! 今有日行過,見到都有幾多人,而且都似乎係長洲街坊,應該都唔錯嘅,眼見仍然有一兩個空位,咪一於坐低試吓囉!因為唔係特別想食飯,所以要咗個[奇味海蜇雞冷麵]. 老闆娘話今日啲麵賣晒,正想改食炒年糕嘅時候,佢竟然話可以幫我改用蕎麥麵,咁就當然最好不過啦!個麵拎到上枱,對板,有幾多餸喎! 再試吓,啲雞已經去骨,真係啖啖肉而且好滑亦有雞味. 海蜇頭個人覺得比較硬咗少少,有好多青瓜絲,爽口,而個蕎麥麵淥得剛好,有咬口,用咗芝麻醬嚟撈,好味😋我同老闆娘講話佢啲雞好食,佢仲特別俾埋配海南雞嘅汁醬我試吓. 佢用咗黑油嚟配搭,幾正宗呀👍🏼 我話下次要嚟試吓佢個雞油飯,佢仲話可以俾啲我試吓添! 不過因為我已經太飽,所以都係留返下次先啦!奶茶都唔錯, $60呢一餐都係抵食,而且以後搵食又可以多一個選擇呢!…查看更多

最近去咗佐敦渡船街,文英樓下面嘅一間韓國餐廳[星星pho cha]食飯. 呢間舖位好細,但客人唔少. 好似係韓國人開嘅,但係請嘅伙記都似南亞睿人士居多.我個朋友一心想去食醬油蟹,咁當然要叫啦! 另外見佢都有醬油蝦,反正未試過,又不妨一試吖! 因為有3個人唔食生嘢,咁當然要叫啲大家都啱食嘅嘢, 於是乎就叫咗韓式豬手,泡菜煎餅,韓國炒粉絲,芝士炸雞同辣炒八爪魚飯. 再加上兩隻醬油蟹同六隻醬油蝦(跟紫菜飯),六人前!兩隻蟹用個大碟擺上枱,味道唔錯不過啲蟹好細隻而且啲肉比較削身,要差不多兩百蚊一隻就唔算抵食. 醬油蝦就好大隻而且蝦肉尚算爽口,不過以我食慣重口味嘅人都覺得好咸,真係大打折扣! 個炒粉絲用嘅應該唔係韓國粉絲,因為好幼身,冇韓國粉絲嘅口感,不過味道唔錯. 豬手味道偏淡不過不失,冇乜驚喜.反而辣炒八爪魚飯好食,而最平凡嘅芝士炸雞同泡菜煎餅竟然係全晚最精彩嘅兩個菜! 下次可以去試吓第二啲菜式!…查看更多

[巴依]位於西環水街,唔算太難搵,由上而下比較近,而由第三街上去就要行啲斜路同樓梯. 餐廳唔算大間,我哋26人都佔據咗大部分嘅座位,亦都要分開3張長枱嚟坐. 有啲食物要預訂,其他都可以即時落單. 訂位分兩個時段,六點或者七點半,咁我哋因為有人放工比較晏,所以訂咗七點半. 又可能因為我哋人多,所以訂位嘅同時要俾兩千蚊訂金,都算巴閉!今日預先訂咗四隻烤羊腿,烤羊串,羊肉薄皮包子,其他各人想食啲乜嘢就再叫! 7:45先至嚟個烤羊腿,之後等咗差不多半個鐘都未有第二個菜,但未夠8:15就話last order係8:30! 結果喺唔知食埋啲包同羊串夠唔夠飽嘅情況下,我哋張六人枱就加咗個手抓羊肉,酸辣土豆絲同埋羊雜湯. 另外隔離枱叫咗個大盤雞食唔晒,又拎咗過嚟俾我哋試吓!烤羊腿賣相唔錯嘅,不過可惜只係和暖,唔夠羊肉味而且唔入味,要靠啲有咸味嘅孜然粉嚟提鮮! 可惜! 烤羊串算係幾大串,可惜烤得過熟,羊肉粒死死實實,真係唔慌唔夠chewy😅羊肉包子反而有驚喜,最有羊味,而且包子餡料用咗小粒粒羊肉而唔係絞碎羊肉,所以口感唔錯,幾好味😋手抓羊話好有名,不過希望越大失望越高,真係好一般嘅貨色! 羊雜湯勝在夠熱辣辣味道亦都可以,似乎係羊味最濃郁嘅一個餸.土豆絲,如果唔係睇餐牌都唔知道佢係有酸辣味道😅 反而係嗰個大盤雞味道都真係唔錯嘅,不過因為已經好飽所以只係試咗一嚿雞,一件薯仔同一小片闊麵.食物質素同味道我都真係唔明點解會係米芝蓮推介🧐 個人覺得名過於實,服務態度一般,而且仲要加收每人$5嘅茶芥費添! 26人張單要大約八千五,平均每人$350! 一大班人去開心食係可以嘅,不過我應該都唔會再去幫襯囉!…查看更多