LKHK的个人专页

曾幾何時聰嫂係銅鑼灣最高知名度又最多人幫襯嘅甜品店，䇄立十幾年，然後因為種種原因執笠，到今日又重回銅鑼灣，去返差唔多嘅位置開舖，味道都係不變，芒果雙皮奶好香甜，芒果絕對唔酸，同雙皮奶味道好夾，龍眼冰好清新，特別適合夏天清清地，賣相非常華麗，份量黎講兩樣野都算足料，食完都唔會話好似冇食過咁。落單係scan qr code再即時俾埋錢先，人流都ok唔洗等得太耐，不過整體價錢就同舊時一樣偏向進取，如果有緣經過食返一次都係唔錯。…查看更多

金玉其外，敗絮其中，虛有其表，絕對係呢間低質餐廳既唯一形容詞。食飯環境在於我只佔30%，味道先係最重要，話之你整到幾有feel，搵晒啲懷舊玩意做擺設，如果只旨在打卡俾人睇俾人like，的確係會好buy，但要我俾70幾80蚊食偽台菜，個湯頭完全唔係紅燒，係清湯，d牛肉係港式牛坑腩處理手法，一點台灣風味也沒有，加上又唔軟腍，而且冇啦啦加埋d酸菜同紅蘿蔔入去(雖然我唔抗拒食呢2樣食物），九唔搭八，10分有2分俾佢已經算俾面，難食過see，掛羊頭賣狗肉既頭號餐廳，唔好俾正評欺騙，永久blacklist…查看更多

中環區本身唔會特別過嚟，一般都係工作先會經過，今日有活動喺附近，諗唔到食咩就食呢間。裝修係西餐廳格調，但其實係canteen，西式canteen，餐牌都唔算貴，中環黎講叫抵，當然對比旺角深水埗嗰啲就無得比。款式望個名都感覺正路，唔會點伏，見到有個沙嗲安格斯西冷牛肉飯，就order左。呢度餐具同碗碟都係即棄，雖然係咁但依然有清潔姐姐執枱。濃郁沙嗲醬鋪滿晒成碟飯，最岩我重口味，食飯最驚係唔夠汁撈呀！沙嗲係東南亞味道，有花生粒，好香而牛肉本身以為一大塊扒，原來係切開一舊舊，牛肉味濃，有咬口(都有啲筋)，至少值回票價，唔會俾茶記牛肉片算數~下次喺中環食飯嫌周圍太貴，可以過去大會堂呢個canteen速戰速決，不過lunch hour有定心理準備好多人，未必搵到位坐。…查看更多

由於地理位置問題，非常唔就腳，應該只有附近生活既人先會知呢間分店，但雖如此，小店往往先更加有閒情逸致令出品變得盡善盡美。今日好想食漢堡，本身唔係生活喺廣播道一帶，但附近實在冇想食既地道西式漢堡，上網發現呢間舖頭就試一試。叫左最主打既夏威夷漢堡，果然有風味，塊菠蘿既鮮甜可以中和4塊煙肉既咸味，而煙肉既味道又同牛肉同芝士好夾，好突出，加埋燒烤汁好惹味，再配羽衣甘藍口感比一般廉價生菜好得多，總括講係對得住個價錢，性價比係好的。至於薯餅無評價，都係普通薯餅咁。希望可以多啲人會發掘到，街邊太多漢堡店同西餐廳收緊一樣接近$100水位但質素根本好一般，同行應該好好向呢間舖頭學習，有麝自然香，靠口碑賺返黎既錢先會長久。…查看更多

標榜和牛吃到飽，但根本無可能吃和牛吃到飽，點解呢？因為用電話落完啲單會消失一半，但又只限牛肉係咁，俾到最貴個餐食和牛點知等極唔出，就係迫你食cheap野例如丸、麵、熟食、炸物食到夠飽，同waiter提出落親單要牛都消失咁滯，佢會答你「我只見到你落過一次喎」，但又好笑落其他cheap野樣樣齊，個系統唔通會識分牛肉嘅單先hang機落唔到？仲要我部電話都見晒落單記錄清清楚楚，廚房玩緊咩野一目了然啦。整體肉類質素差，就係出面自助區選擇都唔係多，食所謂和牛擺到捐緊錢無償養活呢個不知所謂偽台灣集團，記得你地所見到嘅，都係佢地用錢買返黎，因為佢地咁樣賺錢法都好疊水啦。假的真不了。…查看更多

近5年最Hit食材除咗芝士、芋頭之類，仲有開心果，而且開心果比起其他邪惡食物更為健康有益。呢間西餅舖聽係聽過，但一直冇機會食，終於今次推出開心果系列，全部蛋糕既開心果都落得勁重手，味道同口感都非常濃厚，絕對岩晒鍾意開心果既人！creamy既開心果忌廉醬，配合潔白色純粹既cream，望落去以為好厚身好實心，但其實軟林林又輕盈，唔肥膩，唔似一般街邊奶油或whipped cream，食多幾件都冇壓力。海綿蛋糕唔會乾，好soft，夾埋開心果醬一齊食剛好平衡。我敢肯定呢間西餅舖既開心果系列必然爆紅。…查看更多

喺荔枝角咁耐，聽過唔少餐廳大名，但就真係未必食過晒，呢間樂天對正條大馬路，基本上大大個招牌連對面巴士站都望得清清楚楚，無論朝早定晏晝都一定有長長人龍排隊。之前一早就望過menu睇中XO醬豬頸肉炒河，但入到黎見到是日午餐有咕嚕肉、白汁魚柳焗飯之類，睇字就吸引，但望望周圍，個咕嚕肉啲汁螢光到嚇死人，同頹飯無分別，我就諗呢度逢係例餐嘅嘢應該都唔會有心機整，所以最後考慮咗十幾分鐘，都係叫返XO醬豬頸肉炒河😅好彩冇信錯自己直覺，雖然河粉係好油，咁正常度度乾炒牛肉都係油架啦，但啲豬頸肉真係入晒XO醬濃味，真真正正咸香惹味，不停咀爵都仲食到濃味，唔會話咬幾啖已經冇晒味食擦膠咁。不過，我相信呢度唔會大部分野都合格，真係要小心衡量、推敲同睇食評先唔會中伏（因為簡單如沙嗲豬頸肉麵常餐，啲所謂沙嗲已經少到喊，同其他茶記完全無得比，但又貴過人地，咁可能基於作為配菜嘅炒蛋係來自日本掛）…查看更多

未食過夏威夷魚生飯，但喺instagram就經常見到，色彩繽紛咁感覺都應該幾吸引，所以機緣巧合之下就入去食。叫咗個蛋黃三文魚白飯，本身都好鍾意蛋黃醬同三文魚，望落賣相唔錯，但食落口先發覺又咸又甜好奇怪。菠蘿就甜，然後日式海帶就咸，咸我OK始終呢個算係正餐都應該偏向咸，但菠蘿真係太離奇，可能我真係見識太少，人哋個菜式從來都係咁，但我自己口味唔太慣。開始明白意大利人抗拒pizza落菠蘿，白飯都唔應該落菠蘿（唔洗講芒果糯米飯/馬拉椰漿飯，因為我都係接受唔到）..…查看更多

假日訂咗位夜晚嚟食，本身諗住傍晚6點幾都算早，大概唔會有幾多人，但原來咁早都爆場。眼見現場職員都算多，應該老闆一家都落埋場，但仍然做到踢晒腳，或者好多菜式都係即刻炒起即刻出爐，所以要啲時間。第一次嚟本身諗住係普通酒樓咁，冇話非常大期望，但食完發覺道道菜式都好惹味，真係好有鑊氣，新鮮熱辣上枱，呢啲絕對唔建議外賣呀，因為要堂食先食得出嗰種味道，外賣拎到返去個色香味應該減半。係連配菜、平時唔起眼既伴碟都好食。不過就太多油，連我平時重口味既人都覺得過多，可以落少啲油。整體唔錯，值得一試，得閒食下。…查看更多

大家唔好俾其他好評洗腦，我敢講呢間嘢真係好命在開喺地鐵站出口，否則以佢喺九龍城泰國菜之中大比數拋離到最尾嘅質素，根本好難立足得耐。生日正日出嚟九龍城，一心想食好少少泰國菜，請問除咗侍應可能係泰國人之外，仲有咩野係對得住「泰國」兩個字？！長途跋涉嚟食港式茶餐廳質素，唔止添呀，仲要係工廠大廈飯堂嗰種茶記質素呀！所謂「豬頸肉炒飯」係揚州炒飯咁，d飯又濕又淋，仲要成陣萬年油煙味；個菜同你喺茶記叫蒜茸菜心係無分別，但價位偏偏拍得住泰國餐廳，憑什麼？！凍蝦腥又霉，個芒果沙律僅有0.01%芒果蓉喺度，有冇違反條例？！仲有要成$120嘅炸物拼盤，完完全全似係凍貨舖買到再氣炸返出嚟，收$120？！只因為開喺地鐵站門口租金貴就當大家水魚？！侍應態度一般甚至有個男人惡劣到上菜嗰時粒聲唔出就咁棟喺度，暗示食客自己執好d餸菜空返個位出嚟俾佢上菜，唔好阻佢寶貴時間。唔知係咪上天安排要俾餐難忘生日飯我？真係好認真，九龍城甚至香港都有大把泰國菜，一樣價錢仲要正宗味道，除非你有太多錢冇地方用…查看更多

將軍澳有唔少東南亞菜餐廳，普遍都勁貴八九十蚊，呢晚行咗勁耐都無野睇得啱，價錢都太離地，最後行到攰就求其買呢間成日經過既餐廳。雖然話海南雞飯最出名，但一向興趣唔大，就叫咗份馬來咖喱豬扒飯外賣。之前食過另一間分店個咖喱牛腩撈麵，覺得咖喱係做得幾惹味、只係份量細，所以本身冇乜期望，結果買到返黎，發現今次嗌飯個份量都唔錯，比想像中好；咖喱夠香濃，一貫水準；豬扒一開始食落仲以為係雞，整到個樣唔似豬扒，味道好一般，總結係得個咖喱值得表揚，價錢平返d會更理想。…查看更多

由於限聚令要求，只可以2位一齊食飯:(但咁難得黎到聖誕節，點都要約朋友短聚。搵到花墟有間cafe喺花店入面，價格又比同區其他cafe稍為相宜，就決定一試。本身expect假日會多人到爆，但好彩都搵到個位坐下。凍櫃既蛋糕得番唔多，不過就有我一早諗定想試既，就係basque burnt cheesecake！一個$48，size唔太大，味道黎講普普通通啦，單講味道就唔係完全值呢個價，但包埋成個環境，咁多裝飾同花草，relaxing之餘又無昆蟲嬲來嬲去（原本怕有），計埋其實過還得去。…查看更多

每次去日本同台灣都會食壽司郎，一早已經知道壽司郎連香港都有舖，但聽好多好多人講，壽司郎香港店開唔夠一年已經每況越下，人哋仲絕望到話索性留返d錢去外國食其他野好過，但都飛唔到仲講乜？所以冒住危險都唯有去試下啦。排隊等咁耐根本就有問題，食完更加後悔冇聽咁多位勸阻，真係浪費錢又浪費時間，嬲到我覺得點解唔將舊錢用去食某中價壽司連鎖店？其實拉返渾計，個性價比低過其他中價壽司店幾倍，壽司郎本身出名係平，但香港黎講又唔係特別平，而且質素又對唔住而家個價位，唔好期望會有咩鮮味喇！若然有人話好食，我相信係因為餓得太耐，恍然大悟原來要人等咁耐係有理由的好佩服自己唔服輸係要挑戰個種心態！…查看更多

因為要慶祝，所以去九龍城食泰國菜。既然九龍城咁多泰國餐廳，梗係要仔細研究。最後揀左呢間，除咗由真正泰國人主理，仲有唔少正評，開左咁多年實冇死。諗住實好多人，所以提早6點幾7點就入座，直入唔洗等，果然之後就有人龍。講明係慶祝，幾個人就瘋狂叫左6個菜式share，再加飲品龍眼冰同青檸水咁。真係不出所料，味道同質素比起香港人開的泰菜餐廳好超多，而份量更係out of expectation地多，好慷慨大方，食到勁飽。冬蔭公夠酸辣，喺menu寫住細份for 2至3人，老實講如果其他乜嘢都唔叫淨係飲湯，可能真係2至3人飲得晒，否則我覺得4至5人每人可以分到3碗，再食埋其他餸岩岩好。檸檬炒豬肉亦夠酸，鐘意酸野既人要試，有d似手拍青瓜個d酸汁。個咖哩有好香椰汁，不過如果「傑」多少少就更好，我個人喜好prefer濃稠咖哩，而家較為水。炸野新鮮上碟，熱度剛好又香脆。其實每樣野都好新鮮炒/煮/炸出黎，夠熱。講真如果要食泰國菜，真係過九龍城食有質素、夠正宗又大份既，好過喺自己區內食香港人/連鎖餐廳整的泰菜，貴得黎又唔合水準。…查看更多

間唔中都會出旺角做野，呢日就睇下有咩好食，見到有間做石板燒，可以俾客人自己由生牛肉燒到熟，其實呢d乜乜燒最主要賣點都係可以自由控制返食物既生熟程度，而舊肉就來來去去都係嗰d來貨，點都唔會俾到同其他餐廳與別不同既質素你食。因為疫情關係買外賣，但呢d標榜自己一腳踢既餐廳就真係千萬以後要避免食佢地既外賣，堂食可能係OK，但外賣好睇得出格硬配合時勢先搞。舊肉講到明幾多成熟都係唔會理，廚房自己鐘意點整就點整，甚至睇心情全熟上碟。我估本身都唔洗識煮（因為堂食係個客自己煮），所以所謂廚房只需要識切肉。面豉湯不值一提普通野，個沙律只係求其全碗生椰菜絲，最多搭半粒蕃茄仔當恩賜，唔好expect有其他野例如粟米，而舖頭入面本來就有自助Bar可以任拎醬汁，但原來外賣時會fix死份量，想多d都唔會俾，我諗佢地期望客人乾哽先會品嚐到牛既味道。再奉勸大家，千萬唔好食呢間外賣浪費錢，坊間大把燒肉店d外賣係一樣價錢但質素更好。…查看更多