greedyfatty的个人专页

人生第一次食醬油蟹。因為係第一次食，所以真係無比較，亦都唔識分好唔好食。不過就呢隻而言，我就覺得都算入味，同埋隻蟹有好多膏😋。除左醬油蟹，我地仲嗌左海鮮蔥餅、人蔘雞湯、鐵板韓式烤牛肉、炒年糕。老老實實，除左個海鮮蔥餅係好食之外，其餘都好一般。人蔘雞湯無人蔘味、烤牛肉乾爭爭、炒年糕就配菜多過年糕⋯⋯我相信，只要肯揾，一定會揾到另一間好食既醬油蟹餐廳。所以，可以唔洗試呢間！…查看更多

一直都好鐘意飲手工啤，今日就同朋友試下呢間既台灣手工啤酒。手工啤種類好多，為左方便客人揀到岩味既啤酒，餐牌第一頁就按住唔同口味列出唔同啤酒，非常體貼。我比較鐘意重麥味，所以揀左17號既「愛講話的風紀股長」。食物就以佐酒小食為主，我地嗌左：二人拼盤、火腿拼盤、素PIZZA、單骨雞翼、麻辣鴨腎，質素唔錯。就係咁，飲住酒，食住野，輕輕鬆鬆過左晚，想揾地方消遣既朋友不妨試下呢間👍🏻…查看更多

又食我最愛既日本野啦：）今次試旺角呢間長阪燒，成間餐廳裝修到好靚，充滿日本風，好有FEEL。店員介紹我地飲舖頭既招牌梅酒，味道甜甜地，好醇好香。唔知係咪我空肚飲酒，飲左半杯就覺得WINGWING地，不過飲番幾啖熱茶就無事。😛野食方面就相當出色，生蠔魚生好肥美好新鮮，海膽入口即溶，壽司既飯同魚比例好好，味道正常。除左生野，仲叫左啲燒物同串燒，但比起啲魚生，佢地就遜色啲，不過都值得一試。…查看更多

身邊好多朋友都覺得無肉落肚會唔夠飽，但其實呢個只係一個錯覺，或者可以講係一個心癮。其實只要揀岩食物，再花少少心思，食素一樣飽肚又滿足。今日就去左口碑極好既素年食晚餐，以下係四人份量：主食：-  The Athletic Club Porridge Bowl $88-  生酮薑黃椰菜花扒 $138-  不可能芫茜芝士漢堡 (芫茜轉左羽衣甘藍)  配 蕃薯條 $138 -  麻辣芫茜不可能芝士漢堡 (芫茜轉左羽衣甘藍)  配 蕃薯條 $138小食：- 椒鹽椰菜花粒 $58甜品：- 焦糖脆脆檸檬撻 $58雖然無肉落肚，但食完食真係覺得飽，唔會有食完等於無食既感覺。呢間餐廳既成功，係因為每樣食物都色香味俱全，佢能夠將一啲簡單既食材MIX AND MATCH變成一款新菜式，又驚喜又好食，賣相又吸睛﹐抵佢得到咁多人既好評。…查看更多

作為一個壽司迷，而家無得去日本，唯有喺香港搵啲高質日本餐廳過下口癮。其中一間我最愛既餐廳就係雅蘭中心既美登利！佢食材新鮮，選擇又多，我地三個女仔嗌左：1. 極上吞拿魚盛合 $2652. 三文魚盛合 $1453. 蟹肉蟹膏沙律 一份/$984. 燒魚鮫 $785. 一堆散叫既手握壽司🍣當中極上吞拿魚盛合係我既最愛❤️大拖中拖好肥美，入口即溶，油脂分布平均，次次都食到LAMLAM脷😛各位思鄉既朋友一定要試下啦：）…查看更多

舊師生聚會，去左呢間黃店💛我地叫左兩個DINNER SET，每個SET都有是日餐湯 (＋$18可以轉龍蝦濃湯)、沙律、主食、飲品，非常豐富。主食我地就嗌左：- 香煎比目魚 $168- 香煎美國安格斯肉眼扒 $198比目魚好大塊好厚肉，魚肉好JUICY，皮脆內軟，食落口一啲都唔乾。至於肉眼扒，一上檯果刻聞到勁香，表面煎到少少燶，肉質鮮嫩，好出色。不得不提既就係啲配菜，有焗蕃茄、烤南瓜、烤茄子、烤脆肉瓜、薯蓉，份量算多，好味又夠飽。食完正餐，當然唔少得甜品啦！我地嗌左鐵板布朗尼配蜜糖雪糕，暖暖既BROWNIE配上雪糕，係冰火兩重天既感覺。開頭會驚太甜，但其實味道好夾，口感超正！去開佐敦，不妨試下呢間樓上黃色CAFE：）…查看更多

星期日，唔洗趕頭趕命趕番工，梗係嘆個靚早餐！平時去其他餐廳食早餐，多數都會叫蛋牛治﹐因為平時喺屋企唔會自己整，而今次亦都唔例外。呢份蔥花咸牛肉炒蛋治一上檯，我俾佢嚇左一嚇，無諗過中間個餡係咁厚，蔥花味勁香，成份三文治勁飽肚，唔係出面薄切切食完唔飽果啲。呢間餐廳位置有少少隔涉，我估佢做街坊生意多，住將軍澳既朋友不妨黎試下！…查看更多

因為想食泰國菜，所以去食泰國菜。黎到青花門口，已經俾佢裡面既花花草草吸引左，絕對係港女打卡一流既好地方。我地三個女仔嗌左個$498既二人餐，包括：-  頭盤：沙律 ＋ 大蝦冬蔭公(小)-  主菜：荔枝‧龍眼‧牛肉‧紅咖喱 ＋ 燒菠蘿蟹肉炒飯-  伴菜：油酥手抓薄餅 (呢個超級好食) ＋ 泰式肥豆兒醬炒通菜-  飲品：玫瑰蘋果茶 (加$20) + 菠蘿熱情果茶 (加$20)呢個二人SET非常豐富，份量亦好多，最後食唔哂，打包大半個紅咖喱番屋企。青花做既唔係傳統泰國菜，佢係新派既泰國菜，鐘意試新野既朋友不妨一試。…查看更多

天氣熱，唔想行咁遠，於是近近地喺公司附近食。唔係第一次食Ovo Cafe，但每次食都覺得好好食，無一次係令人失望。今次揀左$98既Bento Set，裡面有：沙律、麻醬蕃茄、酥炸杏鮑菇、紫菜藜麥飯、啫喱，送一杯蜜糖綠茶，成個set好豐富，賣相好好，喺灣仔番工既朋友不妨試下！…查看更多

身邊總有一個女仔朋友希望有個星球蛋糕同佢過生日呀，但是但一間網店買，閒閒地都要四五百蚊，價錢一啲都唔平。今日約左朋友喺葵芳慶生，無意間搵到葵廣呢間Rainbow Cakery，佢既星球蛋糕價錢非常親民，味道選擇多，一百蚊都唔洗，性價比極高。咁岩有兩粒五月之星，一人一個星球蛋糕，佢地收到好開心：）…查看更多

我覺得一碗米線好唔好食，關鍵就係佢個湯底，貴緣小鍋米線個湯底就做得好出色。我叫左雞絲紫菜墨丸豬紅米線中小辣，一黎到已經聞到好香既麻辣味，湯底濃而不膩。雞絲、紫菜索哂啲麻辣汁，豬紅又好入味，整體水平不比連鎖米線舖差。經過紅磡既米線發燒友可以去試下!…查看更多

行過尖沙咀，成日都見到呢間野排哂長龍。今次見條隊唔係太長，於是就打算試下佢，最後都排左成十五分鐘。舖面好細，但睇得出店員想用盡店舖既每一吋空間，於是人同人之間，基本上係背貼背咁坐，稍為拎多少少野入去都無位放，建議千祈唔好shopping完先去食。食物質素就不過不失，丸子芋圓夠哂煙韌，湯底亦唔會太甜。唔趕時間又咁岩經過既不妨試試佢。…查看更多

兩個禮拜前就已經book定檯試呢間餐廳。老實講，價錢絕對係偏貴。我地三個人，叫左一枝白酒、兩碟意粉、一條魚、一份牛、一打生蠔，埋單都要三千幾。但係，呢度既裝修、食物、服務質素確係高人一等。我地睇左餐牌好耐唔知叫咩食好，服務員會主動行埋黎好細心咁介紹佢地餐廳既signature，又會好仔細咁講下每款酒既味道，等我地可以飲到隻岩口味既白酒。至於食物，唔洗多講，每個菜都好有驚喜。佢既pasta麵團係師傅喺廚房搓既，口感有啲啲煙韌，食得出同喺超級市場買既意粉好唔同。呢間唔會係一間成日去既餐廳，但要慶祝特別日子時，佢會係我既one of the choices!…查看更多

呢間位於九龍城既Cafe，一向以pancake聞名。但係，佢啲意粉絕對不比甜品遜色。呢個$108既套餐，包括主食 x1、任何熱飲 x1 、迷你原味pancake x2，性價比極高。雖然主食既選擇唔多 (三款意粉)，但食得出係心機之作。Pancake就唔洗多講，口感鬆軟，仲有濃濃既蛋香。食完呢個餐，心思思想嗌多份水果pancake同朋友share，可惜真係太飽，唔係太食得落，下次要叫多幾個朋友黎share:)!…查看更多

對上一次食已經係兩年前。最近同朋友講起好想食北京填鴨，大家都即刻諗起老掌櫃。佢既北京填鴨真係好厚肉，好juicy，鴨皮充滿油香 ，加埋煙煙韌韌既餑餑皮、爽口既青瓜大蔥一齊食，口感真係一流，真係食到停唔到。除左北京填鴨，仲想同大家介紹下水煮魚，鐘意食辣既朋友真係要試下。桂花魚上面舖滿左辣椒🌶️，真係夠哂辣。魚肉好爽口，底下仲有滿滿既芽菜、薯粉，佢地索哂啲辣汁，真係愈食愈過癮，愈食愈興奮🔥。…查看更多