shopaholic.beauty的個人專頁

自從炮台山橋底間雲吞麵鋪唔再有一啲大粒大大啖原隻蝦嘅雲吞賣之後，好難先比我揾番間有咁鮮爽甜大件夾抵食嘅雲吞，重有勁好味嘅栢葉蜆芥鯪魚球鮮牛河奶茶.....好可惜，佢做到今個月二十七號就拜拜，個老細又好似無心戀戰咁，唉，唯有吃佢一碗雲吞河，一杯奶茶，一個栢葉外賣($55)同一打鮮蝦雲吞($38)益下我屋企人。栢葉無漂白比較有益，爽得嚟唔似漂白個啲咁人工化，加理啲薑葱鼓油，超正，有時佢會無貨或者賣晒，我今次真好彩。雲吞唔駛我講啦，大大粒蝦多豬肉爽唔鹹鮮甜好味。其實牛肉麵牛筋牛腩都好好味架，一個人食唔到咁多咋。重有啲伙記阿姐都好親切友善，極唔捨得。老細唔做，可唔可以話比我知個雲吞師傅會去邊間做呀？…查看更多

阿媽話鱷魚恤大廈開咗幾間新茶樓想試下，見放假又去試下囉。上星期試過間百樂門，海蜇燻蹄好似都ok，但啲點心就又貴又麻麻地，啲侍應又唔so你，無第二次囉。今次又上openrice睇睇，有人介紹彩福，就上去試一試。啲侍應哥哥姐姐好專業親切，招呼周到又唔過份熱情，好過百樂門啲人，係百樂門我以為我係伙記。蜜汁叉燒飯舊叉燒又香又稔甜，唔太肥唔嚡，上佳之作。但碗飯偏爛pat pat，爭啲。雪山叉燒包香軟好味，不過我叫個碟應該唔係啱啱焗好個批，唔係應該重正。但成$7.7一件，好似唔太值。胡椒鹹菜豬肚唔夠胡椒香，賣相靚但唔係熱辣辣囉！可能就咁butt上煲就算。懷舊豬脚薑比較差，啲豬腳超肥，一啲都唔似係醋到煲過咁，似霎熟放入薑醋浸下染色就算咁，呢尾點心算幾差。醬香牛蹄筋煙靭，味道一般，醬汁唔夠惹味。彩福蝦餃皇餡料鮮甜蝦爽，但個皮偏粉擂擂，唔煙靭，敗筆之作。擂沙湯丸煙靭香口，如花生碎有少許花生粒有趙頭更好。潮州蒸粉果個皮反而晶瑩通透煙靱，餡料較多雪菜，幾好味。四個人食了$266我覺得偏貴，工廠區嘅朋友想話多啲歎下茶都唔係咁化算。…查看更多

海鮮一向都係我屋企嘅主菜。今餐唔駛阿媽煮，可以多食幾樣，呵呵。好衰唔衰叫師傅走味精，可能嚇親佢就落多咗盬，頗咸，但海鮮是鮮味的。不過，客人多還客人多，聖子皇同小白菜都有沙，美味嘅聖子皇啲沙又大又多，吃不下，省哂。所揀嘅海鮮都算大碼，啖啖肉，正。清炒小白菜很爽甜也很正。這裏的炒飯啲飯一粒粒很有口感很好吃，中國人啖飯要靚很重要的。有紅豆沙送，中和番啲咸味。…查看更多

家庭日想去鴨利洲逛逛，係openrice找到這個餐廳先吃個早餐，一行五人，去到已經爆棚，有個香港仔街坊讓咗張枱比我地，唔係人人肯放棄自己咁鬆動嘅位而去搭人枱讓位比人，未食已經好sweet。奶茶好飲，咖啡則一般。多士香口，通粉算彈牙，沙爹牛肉有肉味爽口，唔似有啲茶餐廳醃到林bad bad。最正係個菠蘿包，個面係脆架，未食過脆中之脆嘅菠蘿包面，勁！泊車係隔離屋邨停車場去食，無free parking都值得嘅。…查看更多

用咁多錢賣廣告叫人everyday去食嘢嘅茶餐廳，好心就係食品上做好啲啦！下午茶餐成三十幾蚊一個已經唔係人人可以everyday食，唔夠十款嘅下午茶餐中兩款無河粉所以無得賣，燒味只算中上，不特別好味，嘩啲米粉先唔掂，用埋個啲比n年前孔雀米粉重嚡重硬嘅米粉，好多餐廳酒樓都唔用啦，玩懷舊咩！之前試過一次，都係好難食，以為而家大賣廣告，會改善架啦！點知都係咁，唉！…查看更多

又係郊遊吃喝玩樂之旅，今次揀金壘。揀佢因為豬手羊鞍出名，又有唔多啱西餐嘅阿媽阿爸可以食泰菜。老實講，整體來講只屬一般，沒有不好吃的，李錦聯話齋都靠得住，不過當中也有可口的菜式。蒜茸包不太油膩香脆但唔乾身，有啲餐廳嘅蒜茸包一係肥到死，一係乾都死。羅宋湯忌廉湯泰式鳳爪泰式雜菜甜品朱古力蛋糕只屬一般。紅咖喱魚，咖喱唔太香，魚唔夠新鮮少少嚡有啲腥，飯(唔知係唔係泰國香米)唔夠靚。羊扒嫩滑唔羶有肉味，唔似有啲扒無聞無味淨得蒜汁味，算美味。炸豬手卜ト脆，上碟都唔見油漬，除咗真係咸豬手咸少少之外，好好味。最好食反而係炸蝦餅，無油滴滴香脆彈牙有蝦味不是粉擂擂一舊咁，九龍城有啲出名嘅泰菜館都無做得咁好。三四月份涼涼地坐露天花園食好舒服，個花園乾淨空間夠又無蚊，因為佢地好細心地點了蚊香哦！…查看更多

朋友極力推介，下午茶時間，食餃子鍋貼都好喎！一個套餐十隻韮菜鍋貼，一個酸辣湯二十六蚊，好過齋買鍋貼成兩蚊隻。外賣回家，鍋貼如我朋友所講，外賣回家都一樣咁好食，值得讚賞嘅。但個酸辣湯，材料其實都算足，有豆腐冬菇芽菜金菇紅蘿蔔荀絲等等，但味道就不敢恭維，辣只有胡椒粉的味，甜酸似似地羅宋湯，有多少不倫不類。下次我認為最好都係鍋貼加可樂正啲，嘻嘻。…查看更多

駕車郊遊到處食，向來就係我屋企人指定嘅家庭日活動，有得食有得玩，人生幾咁美好。鄉郊BB鴿$32，香甜卜卜脆，一人半隻，咁嘅下午茶超爽。時菜柱侯牛根腩$35，入味夠焾唔太濃太咸，有椰菜薦底，好家庭式感覺。冬菇豆卜通粉$17，都清甜可口，最緊要係啲通粉夠爽身最怕焾bat bat。熱奶茶菠蘿油煎雞尾包，有幾好食，其他食評講咗啦！…查看更多

每年大概呢個時候，總有一個特別原因要來這間餐廳，一嘗它的招牌餐--鵝肝牛柳餐，吃了三年了，質素及份量都始終如一，好似三年前用天使麵，而家用咗扁意粉。龍蝦濃湯夠熱夠濃，有一舊小龍蝦，湯味道ok的，可以改善的反而係佢加入去個粒唔知油焗定油炸的麵包粒，比較油膩比較硬，大煞風景。三文魚撻撻上的三文魚碎加蟹子都好味，出錯嘅地方又係舊麵包，係硬而唔係脆，師傅，救下啲多士包啦！加個白酒煮蜆做頭盤，熱熱地份量少少地，三十幾蚊，又ok喎。鵝肝牛柳扁意粉，味道ok好份量足，牛柳夠味，不過好似係醃過個隻，不過都恰到好處，都有牛肉味。鵝肝夠肥夠熟算厚身，我平時係吉之島買一塊咁嘅size都起碼$40，所以呢個餐抵食架喇！朱古力心太軟比起有啲餐廳算比較大舊啲，熱朱古力漿加凍雲呢那雪糕，有雙重口感啊！重有係朱古力漿唔會太甜，搶咗雪糕啲味。不過如果加一小塊薄荷葉做裝飾，就靚好多啦！加杯凍飲清下味蕾，超爽呀！有上網印嘅coupon八折，兩個人加埋一，$344蚊，重有現塲演唱情歌民歌，仲想點！還有那個Samson哥哥，盡力校個無線台比我追個劇集，雖然淨係睇得十五分鐘，都好開心喇！其他待應哥哥都好落力殷勤。好想佢地改善下水吧對出至toilet嘅裝修及清潔，紙碎垃圾多及地面較濕滑，收銀後面又有一箱箱貨，破壞餐廳個feel啦！…查看更多

見隔離間大家樂咁多人，啲下午茶餐又都嚟嚟去去都係個啲乾爭爭雞翼，熱狗义瀨咁，為咗杯奶茶，飛奔轉投一粥麵喇！唔知係唔係同集團，杯奶茶同大家樂一樣味，飲落去條腸即刻順晒。雲吞麵水準中上，麵質爽，雲吞有蝦算鮮味，唔太咸唔重味精。凍豆漿稀咗啲，濃啲會好啲。$18一個咁嘅下午茶餐，算超值喇！比起池記個碗麵，簡直唔係無得比，而係唔好再提起呀！至於我honey個熱狗就比大家樂差，比較乾比較硬。杯紅豆冰好一般。…查看更多

為咗睇小熊貓同大熊貓，同久唔久都要探下啲海豚海獅，今個夏天就去ocean park 走一轉喇。雖然公園細細，都好開心嘅，最慘係食咗餐不知所謂嘅lunch，令我嘅郊遊快樂激減一半。朋友介紹的瑞士汁牛河熱辣辣味道其實只算ok。我呢啲廢事諗食乜，同一啲唔知餐牌噏乜嘅遊客一樣，都係叫個常餐套餐，諗住樣樣試下，點知惡夢開始。首先講明我唔算奄尖食客，睇過我啲食評嘅人都知。港式蛋撻，如果香港啲蛋撻係咁，就嚇死哂啲遊客囉，又凍又硬又唔算酥皮更唔係曲奇皮，中間個"屐"無蛋味嘅黄色凍糕，一小啖就同佢拜拜咗喇！個嗰迷你豬扒焗飯，又凍豬扒舊煎蛋同飯都又乾又硬，連啲汁都"瓊"埋。我細食，份量少我唔介意，想食一啲難啃嘅飯，就要嚟試下喇，香港好少有嘅。杯熱奶茶唔熱嘅，都算飲得落。叫咗杯特飲智者龜用奇異果香蕉整嘅奶者已經算係好嘢。唔該主題公園除咗花心機係啲遊樂設施之外，都花啲心思係飲食上面啦，入得嚟玩，都唔計較多一百幾十，比啲遊客知道我地啲香港美食係咁，死得啦！…查看更多

係food court 之中貪佢可以坐得舒服啲，就揀咗入去試下啲上海風味喇！紅油炒手小小辣夠熱皮夠滑肉質算鮮美。小籠包老實講唔可以話一吃難忘，但係啲皮夠薄同包包裏面充滿肉汁都唔穿，師傅手勢咁好抵讚嘅。叫咗一個午餐，鎮江骨夠味唔過咸過甜都好好食，係啲豬肉比較嚡啲，排骨要瘦係嚡啲架喇，有一兩舊係豬軟骨，好味。滋味咸肉菜飯恰到好處，啲飯唔太硬唔太軟，粒粒米原原整整，唔似有啲酒樓餐館用啲斷頭斷尾嘅爛米。嘆番杯杞子桂圓雪梨茶當糖水潤一潤真暢快。佢地啲嘢味道清淡，除咗本身濃味嘅食品之外，其實都幾好，唔駛話餐餐都味精雞粉味吖！最唔高興係佢地杯茶，成$6杯，加埋一成$6.6，雖然話茶味幾香又夠熱，但咁嘅食肆收人茶錢，對我都唔飲茶嘅人嚟講，就覺得唔抵囉。本來都笑架，午餐兩個人食咗$136，偏貴，就變咗ok喇！…查看更多

前個幾日係觀塘apm個間滿記食咗個芒果糯米糍，軟滑都幾好味，諗住食過番尋味，點知就超失望喇！個層皮又厚又硬，重要$19蚊3小粒。但係個餐牌相又無扼我喎，層皮厚過我塊皮！！觀塘食個幾粒可能係異品。我個fd食個嗰榴槤pancake正常啦！…查看更多

已經成十世都無幫襯過，以為開到咁多分店有改善架啦！但點知....唉！第一次係n年前幫襯銅鑼灣分店，啲雲吞又奀麵又少，我唔大食都覺得唔夠，一個正常人唔食兩碗邊得飽。況且啲雲吞又唔係大件夾抵食又唔係餡料特別鮮美，講又講到咁出名，我個陣時話過唔幫襯佢架喇！點知今次係德福，同個friend想tea下，見佢門口話下午茶雲吞麵加茶$24，見到佢杯奶茶相，就吸咗入去啦！杯奶茶ok啦，但啲麵成陣鹼水味，同我係灣仔食$10一碗啲雲吞麵一樣味架，好嘔心呀！話晒雲吞麵係香港美食，好心做好啲啦！德福最衰無乜呢類嘢食，搞到啲客無得揀。重有啲阿姐好串，黑口黑面有枱都叫人搭枱，唉！…查看更多

朋友介紹，又咁啱經過，就梗係要試下啦！魚香茄子煲例牌較多油，但熱辣辣惹味送飯確一流。美極煎海蝦味道鮮甜，但啲蝦有少少"壓"味，同師傅偷雞無挑乾淨啲腸，有啲沙。西蘭花炒花枝片，花枝片煙靱但欠鮮味，附送一碟美味蝦醬搭夠。反而個送嘅綠豆沙糖水清清地唔過甜過濃，清下啲咸味，幾好。食完番屋企有啲口喝，師傅下次可落少啲鹽都得。$238三餸有海鮮有三碗白飯，餸菜都夠大碟夠火候，都算抵食。重有啲阿叔阿姐侍應都好殷勤要讚下哦！…查看更多