kawainarico83的个人专页

有朋自遠方來，日本朋友想試食點心，又不想到傳統酒樓，所以在網上找到這間精緻點心店。點心選擇也算多，特別款也不少。因為六點多到，所以人也不算多，坐得也很鬆動。糯米雞份量很大，尚算多汁，味道香濃，冬天最適合吃糯米雞，吃完全身都暖呼呼的。呢個叫反斗糕，即係馬拉糕，黎到熱辣辣，好正，又不會太甜，不過兩個人食，一人兩個就有點太多的感覺。蝦腸反而沒甚麼特別。海皇芝士千絲卷，很香脆，裏面的蝦也很大很彈牙，非常推介。…查看更多

這間小店位於大窩口附近，門面不是很顯眼，店舖也不算大，這種小店就是有它的獨有風味。漁翁當然最出名就是魚，有各種各樣的魚米線和飯，亦有各款魚湯的菜式。朋友是魚怪，當然要一一試試。首先叫了招牌魚湯米線，有各款的魚，更有一碗獨立的三文魚鮫，兩個都超濃魚味，但不腥，令人連湯都不放過，一滴不留地ＫＯ了整碗米線。我就點了豬軟骨魚湯米線，魚湯一樣甜，但多了一份豬肉的香，豬軟骨又非常入味，很正！蜆蚧鯪魚球也是必推介的，炸得很香脆，一吃就不能停口。最後加一碟魚湯娃娃菜，魚湯令菜更香甜。下次可以再支持一下這家小店。…查看更多

一直想試養心殿，但價格有點貴，知道這次有5折活動，第一時間約了朋友來，半價真的很抵，但要730前埋單，真的有點趕。一坐下就急不及待要選鍋底，所有都想試，最後我們選了雙拼，是養生鍋加酸菜白肉，一來到已經香氣撲鼻。個鍋見到都流口水，他們教一開始要先喝碗湯，嚐嚐湯頭的鮮味。酸菜白肉鍋會附加一碟酸菜白肉，讓湯底變淡味的時候加，很窩心。這個響鈴要推介，即叫即炸，上枱時還是熱的，可以先試試原味，非常鬆脆，放進鍋裏又是另一種美味。千層凍豆腐最適合吸湯汁。豬和牛都很美味，特別是豬，很軟滑。墨魚滑得彈牙這個麻辣牛肉餃意外地好味，辣度剛好，很惹味這三款鮮蔬也很鮮甜，山藥和秋葵在其他火鍋店比較少見。LIKE FACEBOOK送飲品一杯，我們選了菊花圓肉茶，冰太多，很淡味。飲飽食醉後還送一個檸檬沙冰，可以消滯，非常完美。半價後一人都不用二百元，非常超值…查看更多

難得去上環工作，朋友介紹一定要試這問雞功房，因為這問是長龍店，所以我們提早12點就到達，已經有人在等位，我們是第二枱，再遲一點已經排到後樓梯了。等了10分鐘左右，就有位。朋友介紹這裡的豉油雞比海南雞好吃，所以一心要吃豉油雞飯。想不到12點已賣剩一份豉油雞脾食，我們當然要搶食。光是外表已經滿分，充油光澤，還香氣撲鼻，吃落更齒頰流香。雞肉很滑，而雞皮很脆很入味，連不吃雞皮的我都一塊不留。因為只有一份豉油雞，所以朋友選擇了蟹肉泡飯。不要以為這裡以雞為主打，其他菜式就不用心，蟹肉泡飯的質素亦令人驚嘆！有超多蟹肉，蟹湯超級香濃加上泡飯，真的不得了，朋友吃不停，份量十足，男士吃完都覺得飽飽，大滿足。一定會再來試其他菜式。…查看更多

今次諗住跟住IG到搵食，去到呢間位於長沙灣嘅餐廳，星期日中午唔駛等位，真係開心!呢間餐廳選擇都好多，有SET又要以散叫我地一人一個午餐SET再加左兩個小食，一個係IG勁推的黑松露大啡菇，另一個係小食拼盤。午餐包左個湯，好香濃，一Ｄ都唔馬虎。午餐份量真係唔可以睇小，我呢個天使麵大碟到好似二人份咁，但係唔好以為大份就粗製濫造，佢好香OLIVE OIL味，黑蒜醬都好重手，所以成個天使麵都好香濃。另外叫左個魚柳，個汁好好味，份量都係十足十，但係個魚柳有Ｄ老，差Ｄ。好期待呢個黑松露大啡菇，好香好多汁，食到呢個超滿足。再埋個炸炸炸拼盤，真係飽都暈低。試左呢度杯LONG BLACK，好香，下次要試下其他咖啡先得。二百幾蚊食到捧住個肚，真係超抵。…查看更多

呢間火鍋店真係值得推介非常之正。一坐低就有好多唔同嘅醬料畀你選擇， 個秘製醬汁酸酸味味咁， 好開胃。我哋選擇咗個鴛鴦鍋， 其中有一個係蜂巢豆腐白湯， 裏面嘅鴨血同埋豆腐可以無限refill， 個人超欣賞佢個豆腐， 吸曬成個湯同其他食物嘅精華。一開波就叫咗兩個唔同嘅牛肉， 一個係手切肥牛一個係安格斯， 一嚟就出曬煙咁， 兩款肉質都非常鮮嫩，仲好窩心咁教埋灼幾耐，包唔會攪錯。呢度嘅手打丸丸都好正，好鮮。最後唔可以唔提過響鈴， 唔同出面嗰啲， 應該係即叫即炸， 超級脆同香口，食到停唔到口。\最後仲有腐竹白果糖水冰送，超級滿足!…查看更多

難得去到紅磡當然要捐窿捐罅搵嘢食， 有人介紹呢一間民泰四七西班牙菜， 平日食飯時間都唔使等位， 室內裝潢精緻， 靜靜地好適合三五知己傾計聚舊。七點半前仲有happy hour時間， 飲品可以減10蚊，都幾抵。 我哋叫咗兩杯cocktail同一杯mocktail，我果杯Singapore Sling幾好飲，質素唔錯。店鋪食品選擇唔太多， 以Tapas為主， 我哋首先order咗個深海大墨魚， 墨魚mix埋沙律，加埋個汁酸酸地好好味， 好開胃。之後就order咗個黑毛豬奄列， 呢個真係好好味， 好香蛋味， 好軟熟， 係高水準之作。主食就叫咗個西班牙海鮮炒飯同埋慢烤春雞， 兩個都好普通通咁。 個海鮮炒飯隻蝦燶咗，搞到成碟飯都有燶味， 隻春雞就完全柴皮咁， 連快餐店嘅水準都不如。整體嚟講呢間店適合happy hour慢慢坐多啲。…查看更多

呢間係葵芳長期啱嘅人龍店， 難得有一日平日放工冇咩人排隊， 即刻衝咗去食。 等位嗰時已經畀點菜紙我哋寫， 入到去就即刻有得食， 非常善用時間。裏邊有好多唔同嘅醬料同調味料， 可以配搭唔同味道嘅拉麵，個人幾鍾意佢個柚子胡椒，幾香。我叫咗個黑蒜油拉麵， 但黑蒜油味唔太濃， 味道麻麻。朋友叫咗個招牌男盛拉麵， 呢個反而個湯底幾好味， 好濃郁嘅豬骨湯， 但係個炸雞放咗落啲湯度 ， 變到軟淋淋咁，唔好食囉 。我哋另外叫咗個炸雞同埋餃子， 兩個都係冇乜特別啦中規中矩咁樣。 下次如果唔使排隊都可以encore嘅，如果要排隊就咪搞啦…查看更多

住喺嗰邊嘅我， 終於等到一間似樣嘅cafe， 雖然舖仔細細，但係裝修得好舒服好別緻， 無論一個人hea定係一班人hea，都好啱。今次午飯時間去，叫左個lunch set, 豬扒意粉， 都係普通貨色， 但係都抵食夾大件。另外叫左個all day breakfast， 都算係唔錯。 嘢飲方便就叫咗杯梳打， 但係好鬼甜， 下次都係飲番咖啡穩陣啲。反而呢度啲甜品有少少驚喜，個cheesecake好濃芝士味，又唔會過甜，蘋果批一樣有水準。呢度嘅氣氛好輕鬆， 真係可以喺度hea一個下午…查看更多

outback不嬲都貴， 但係今次係永安買咗個團購， 平均一個人都係百幾蚊，真係勁抵! 原本以為佢會將貨就價， 點知個quality到仲係好好。團購裏面有固定餐， 有魚， 豬肋骨， 雞等， 如果加60蚊仲可以轉西冷牛。個餐一啲都唔馬虎，有湯同埋沙律做頭盤， 仲有呢度最出名嘅黑糖包， 呢個包真係度嘅名物。我哋最終選擇咗食雞同埋加錢食西冷牛， 個雞唔錯，個汁酸味味咁，好開胃，不過個炒飯就麻麻地。個西冷扒真係冇得輸， 好juicy，又大塊，個薯條都正，好脆，淨係碟牛扒已經值回票價，超級滿足。…查看更多

身為餃子控嘅我， 知道呢一間餃子店喺網上面嘅評論非常之好， 所以專程同朋友嚟試下， 果然冇令我哋失望!有好多餃子嘅選擇， 令我哋有選擇困難， 最終就算咗兩款湯餃同一份煎餃。 湯頭就選擇左雲耳椰菜同韭菜， 個雲耳椰菜好清，又好爽甜，啖口野應該先食，另外韭菜豬肉係冇得輸嘅， 韭菜好香， 最緊要個湯都好好味， 完全唔係果啲味精hea湯。係咪叫咗個松茸煎餃， 呢個真係不得了， 好香好好味， 外面脆裏面仲有肉汁， 忍唔住，過左一個禮拜又再去食過。我哋加咗一個黃金皮蛋，比普通皮蛋香啲。現在最重點介紹呢度嘅醬料同小食。 呢度有無限嘅酸蘿蔔供應， 非常醒胃。 醬料都好多款， 我超級欣賞嗰個香辣醬， 有菜脯同豆豉喺裏邊， 非常惹味， 我忍唔住自己買咗一樽返屋企， 可以隨時回味。…查看更多

本人好鍾意食牛， 次次經過呢間嘢都想入去試一試 ， 聽講有好多牛嘅部位都有得食 ，今晚放工終於有機會去會一會呢間食牛專門店 。平日夜晚食飯時間都仲有位，價錢真係唔平，普通一個牛腩麵都50幾60蚊。我就叫咗個清湯腩米，再加碟通菜咁就七十幾蚊。 可能期望越大失望越大 ，講真真係冇乜特別， 啲牛又唔係特別好味， 啲牛腩都有啲韌， 真係幾失望， 個湯又唔係特別鮮甜，完全唔值呢個價囉， 相信好多二三十蚊嗰啲都好食過佢，真係試完一次冇下次。…查看更多

喺大坑附近食完飯，就搵間甜品舖下場。 行幾步就係小甜谷，所以決定喺呢度食甜品。因為天氣太熱，所以揀咗兩個冰， 一個菠蘿冰一個西瓜冰。 個冰裏面有好多冰粒， 都未打碎曬， 搞到淨係食冰咁。 味道方面，個西瓜冰做幾清甜， 菠蘿冰就有少少假， 好大浸罐頭菠蘿果種假甜味。朋友就叫咗個抹茶心太軟， 好香抹茶味，不過有少少澀， 加埋個紅豆同雪糕， 都算係唔錯。最後就係叫咗個酥皮芒果之類， 熱辣辣， 加埋個凍冰冰嘅抹茶雪糕， 簡直係絕配， 算係咁多款裏面最出色嘅一款。…查看更多

見到咁多好評， 特登由新界去到大坑， 諗住一定有驚喜， 點知期望越大失望越大，所有餸菜味道普通。我地叫左個柚子蝦沙律， 個人覺得甜咗少少， 不過用新鮮柚子做，都幾開胃。呢度最出名嘅係肉骨茶，所以一定要叫，不過可能我食唔慣，覺得麻麻地，好中意食肉骨茶嘅朋友都覺很普普通通。我地訂左個黑胡椒蟹，隻蟹好新鮮，但係味道就麻麻，冇咩黑胡椒味，得個咸字，好失望。另外叫左個麥皮蝦，呢個就ok，啲麥皮甜甜地，幾得意。最後就係炒秋葵，呢個正常啦。整體上都係正常囉，冇啲comment講得咁好囉。…查看更多

睇到食評呢間小店唔錯，身為拉麵控嘅我一定要去試下。星期六上環冇咩人，所以可以包場。呢度裝飾好有心思，啲壁畫好靚，等食嘅時候可以慢慢欣賞，一定唔會悶。星期六中午都有午餐set，有四個選擇，仲包一杯自家製飲品。呢杯飲品甜甜地，飲落好舒服。我叫左個黑蒜油炙燒豚肉拉麵，個造型好特別。食拉麵最重要係個湯，呢度個湯真係做得唔錯，好香濃，再加埋啲好濃嘅黑蒜油，係愛重口味的人的必然之選。唯一就係塊肉麻麻地，好肥，又乾，有待改進。下次要去試下烏冬先。…查看更多