SamsonNg1700的个人专页

其實知道呢度係因為前輩約果度食飯，話有貓玩。上網睇評論又褒貶不一，搵日自己去食先試下。環境大把相大概知道會係點。地板真係比我想像中滑好多。馬步唔穩真係好易PK。不過都勉強頂得住。作為麻甩佬，我係幾滿意。最後一個星期內去左三次。第一次試食前輩介紹嘅燒肉切雞飯。本人甚少食燒肉，因為怕肥又好多時都好鹹同乾身。碟野一埋黎，哇！洗唔洗咁多肉呀！雙拼$44老細俾埋雞髀我咁好運？食燒肉，皮好似好多人講真係好脆吓，肉係非常juicy。呢舖大劑，真係停唔到口。雞同其它報告一樣，真係好滑。芽菜好啱我胃口，特登叫佢比多啲。個湯就...淡啲囉！不過我就唔介意。好似某黑心餐廳回應我嘅劣評話齋，唔好咁難招呼，唔係剩係可以去5星嘅餐廳咯。 可惜貓貓喱埋左，無緣。。。。第二次其實隔唔夠2日，今次同前輩黎，都唔知係佢好彩定我黑仔。今次見到店長喇！我地兩個都係愛貓之人，點都要過吓手癮架喇。佢都好鍾意同啲客打招呼。餐廳咁嘅環境真係麻甩佬去居多，但店長行過大家面上都會好自然咁流露出鐵漢柔情嘅笑容（其實個畫面都幾另類，留比大家聯想下）我因為真係擔心食燒肉停唔到口，結果點切雞飯。點知前輩知我怕肥但鍾意食，就自己叫個油雞飯再加個燒肉例牌引誘我。。。唉！咁就食多左半碟例牌。叫雙拼都冇食咁多肉.....老闆又係俾我地兩個雞髀，真係唔怕蝕咩？遺憾係今次燒肉唔脆。前輩臨走仲寸老闆一野話皮唔脆失敗添。第三次又係隔2日去。因為抵食夾大件。星期日又得閒。屋企附近$56燒味少三份一。我搭車來回都返黎。而且真係好食啲而且提供足夠蛋白質。不過今次冇咁好彩，得半隻雞髀加啲雞胸同雞翼。不過仲想點？三次去兩次半有雞髀賺晒啦！去開深水埗買埋野，真係必須回頭。…查看更多

今日無聊。睇完拉麵赤貓，心思思想食拉麵。紅磡呢頭嘅話，一係拉麵天王，一係就係呢間喇。記得有一排成日想食拉麵，呢兩間都係有去過。不過剩係豚記我有印象返啅好幾次。一時又唸唔起點解。今日去，回憶返晒黎。真係唔會點出事嘅舖頭。雖然我覺得貴（基本上香港所有拉麵我都係覺得貴，因為我同前輩呢啲cheap精去大阪食親唔會超過1000円），但係水準真係保持一貫。食拉麵我通常都係曲面，呢間唔記得點解我潛意識都係揀幼麵。我應該以前比較過係幼麵好食啲。簡單講，穩陣真係呢間。（P.S. 唸起點解唔去拉麵天王喇！主要係外面等夏天好難頂。豚記起碼係商場內有冷氣。不過多人嘅時候都要罰企半個鐘。）…查看更多

應該係我呢排冇食神定宜家啲商家無良⋯見附近開左間新茶餐廳唸著試吓啦。午餐$48係同區差唔多啦。安全起見點紅酒燴牛尾標準嘢應該都問題唔大喇掛！見佢掃碼落單有少份量唸著都係少飯啦！點知少佢就少餸喔！睇吓張相？三舊牛尾？唔係，嚴格黎講係兩舊半（實際大小比我張相細好多）！後來我睇清楚啲⋯飯係係下面果欄，得標準一個選項！可以話係我大意⋯但真係第一次體會到原來可以咁！人地少飯佢少餸！三舊仲咁細不如唔放牛尾齋汁吖？又唔見你汁少份量？算！再睇第二張杯紅豆冰⋯忌廉幾咁雄偉？我好似係點紅豆冰唔係忌廉紅豆冰喔⋯清左啲忌廉同冰⋯哇！厲害！得半杯。唔洗咁嘛？附近都係中學小學多⋯係咪唔好咁呃啲小朋友呢？…查看更多

真係覺得好離譜嘅餐廳⋯見到廣告想話試吓近江牛咁話啦！128近江牛套餐？相片裡左邊長啲果碟就係喇！薄到呢⋯我好懷疑有冇100g囉。同埋2/3都唔係近江牛⋯俾大家一個對比⋯右邊兩碟細嘅每碟50g….好明顯個近江套餐係唔夠秤喇！埋單加埋包$15細到以為係贈品嘅蘋果汁合共$263。仲要唔好食先火滾。我去牛極食個200g都係$140。有湯有飯有沙律都唔係呢個份量啦！我係日本食都冇咁離譜！係咪我要求高呢？不過我就一定唔會再幫襯呢啲黒い店咯！…查看更多

其實都一段時間喇！果次新年冇嘢做（拜年話怕感染.....）唯有行街搵食。都知喇！新年冇咩餐廳開。係附近間粥鋪，難食得黎又要加3嘅茶餐廳同狗狗粉有開。（以上都唔想食）。行到嚟呢間，石板燒牛扒喔！又試吓啦。舖頭好細吓。坐滿14人就會好逼架喇。疫情下都唔好唸住可以坐爆啦！一條友入到去都要坐bar檯。點咗個石板唔記得咩牛（一定唔係西冷！冇錢）咦！OK喔！係啲牛OK！但唔洗100蚊有啲意外。因為質素係唔只100蚊！跟咗個烏冬.....又係有啲驚喜，比想像中好。（你知通常跟餐啲嘢都麻麻哋，係咁咦嘅！）係大碗咗啲，我又玩低碳飲食，食咗兩啖唔敢食落去，唸起有啲浪費....塊石頭真係夠熱，（唔似旺角女人街某石板燒，唔夠熱唔係得我一個覺得，咁大個仔第一次聽到有食客要求加熱石頭）一個唔小心真係好易變10成熟，雖然份量唔算係好大，但真係覺得合理嘅性價比。可能純碎個人觀感，細餐廳感覺溫暖啲。好記得果次埋牆角有個兩人位坐咗個阿伯。唔記得佢食咩但佢應該係食完仲好滋油咁慢慢嘆。我食到一半佢走，老闆好體面咁話“唔坐多陣？”（當時間餐廳已經得吧檯位...)應該係街坊嚟嘅！跟住幾個入嚟買外賣，聽落都係街坊！佢同人吹水時話“開！新年開！街坊都要食架！”其實我唸街坊要食牛扒都好富貴吓喔！（當然佢有賣其他啦！但街坊係點牛扒咯！）有對中年夫婦唔係好知塊石板點用啲肉先唔會太生或太熟，老闆又真係咁有心機慢慢講解。重點係，間餐廳得一個員工（就係老闆！）所以雖然餐廳逼咗啲，啲凳又唔係坐得舒服，我都幾推薦朋友情侶可以考慮吓呢間嘢！…查看更多

因為好想食壽喜燒但又好似冇咩選擇，走入東涌順便睇下鞋。（二來好似得東涌疫情比較冇咁嚴重）先前幾個月前都黎過一次。果次點最平嘅90分鐘任食。今次想話食好少少要安格斯90分鐘啦！先黎三盒安格斯加一份都唔記得係咪豬喇。（最好全部牛啦）食完緊系繼續點牛啦！哇！跟著果三盒牛一望都知唔妥。差唔多全紅冇脂肪嘅牛。一定唔係安格斯啦！食落差好遠，鞋到呢.....好似茶餐廳啲牛肉飯啲牛咁。（冇落蘇打粉果種）心念你節省成本都唔好咁離譜吖！去尖沙咀求其一間放題都唔會係咁咯（雖然得燒肉同刷刷鍋）.....其實先前有朋友都勸我唔好為左食壽喜燒去呢度架喇。今次真係死心喇。一定唔會再去。…查看更多