foodiebucketlist的个人专页

夜晚經開太子又好耐冇食中式野，想食嗰間餃子店太多人，於是openrice再搵下有咩好食，見尼間籠太子咁多推介就去試吓。門面其實都唔少人，至少坐滿先，以為冇伏？咁就太天真啦…😀等左一張枱入得去，環境衛生就一般，叫野食都正正常常，等野食先最漫長… 印象中食左一碟腸粉後，等半個鐘先有下一碟，可能咁樣坐滿食客？🤔再者，其實已經好餓，照計食咩都好味，流沙包唔流沙都算， 不過燒賣唔熟真係幫唔落，個程度係放左舊生既肉入口，食落口咬落口感好怪，以為係蝦定冬菇，但咬真啲又唔似，於是一lur出嚟就嚇親，再望真啲，其實啲皮都未蒸熟哂架… 你要慢功出細貨要時間蒸冇問題等你，但係俾左時間你野食都唔熟就… 中伏啦🙂冇幾耐，玻璃肚既我肚痛…希望間店有心做就真心改善下。👋🏿加返慎入以下係燒賣圖，唔完整的。。。。。。。。。。。。。。。。。。。。。…查看更多

朋友推介既cafe環境：有大玻璃透光，柔和光線幾舒服，廁所係隔離既巷仔，衛生程度中上👍。用餐時間：雖然只有70分鐘，不過上菜速度快，整體食得唔算趕，用正常速度食岩岩好🤣。食物：首先食多士先既，賣相滿分，三文魚同菜量都十分充足，要彈既係就算有忌廉芝士同蛋汁都係好乾，真係好乾… 。之後食意粉，又係打卡able，不過可能野食一次過上碟，放涼左啦，食完多士再食意粉，一放入口就覺得好油好漏，杰撻撻張住哂，愈食愈滯😔。最後既甜品有驚喜！布甸唔會死甜，配埋expresso = 完美🥰 非專業咖啡評價：expresso微帶酸，開胃啲既感覺(?) 食下食下就唔小心食哂。飲品黎講係失望既，身為一個唔飲咖啡既人，去親cafe只會飲latte，表面深綠色以為好濃？其實飲落無咩茶味，奶味都唔太出。另一杯係Americano，朋友表示似溝多左水，退步之作👎🏻。結論：想食甜品就gogogo!…查看更多

之前係屯門食過一次唔錯，今日再次幫襯當日冇提供手工麵，所而揀左藕餅烏冬。另外，下午茶餐冇湯送，想飲湯既話記得叫飯類set la~手剁香煎蓮藕餅配湯烏冬 $44煎藕餅比我想像中大件，以下午茶黎講都將多😂 食落好香口，每啖都有蓮藕，冇落味精又要保持味道，感覺落多左油同調味，不過整體食完都冇口渴，下次餓啲再試湯😆…查看更多

行經寶湖花園一帶想快快趣食少少野，暢和又排長龍冇機會排到😩。出番大街見有間新小食店，餐牌價錢合理，又係小店，就試一試hahaha😆😆😆賣既野食好似cafe咁，比較輕盈嘅，仲有drink menu，有好多咖啡選擇，同場都有幾個似熟客仔黎買咖啡，不過我就冇飲開☕️，comment唔到lu🥴。煙三文魚配忌廉芝士牛油果，包有四款揀，分別係：牛角包、烘三文治、風車包、意大利包，我就揀左比較軟熟既意大利包。麵包烘熱過👍🏻 餡料唔算好多，唔好expect好似cafe 啲open sandwich 咁多，不過味道好食既既，牛油果都新鮮👍🏻。總結：食物唔錯👍🏻 缺點得一兩位位坐，趕時間又想拎走食都可以考慮下😛…查看更多

下午茶時段餐牌有唔少選擇，肚餓既情況下揀左沙爹牛肉煎蛋麵配熱奶茶🤤🤤🤤。另外仲有出前一丁配雞翼同豬扒，隨餐獨立附上麻油一包添～不過就熱氣啲啦😈😈。沙爹醬夠濃同杰身，配上流心煎蛋，正呢～ 牛肉分量都唔少既，太好味既關係，如果再大碗啲就好啦hahaha😎😎😎。朋友食開推介奶茶，係正宗港式奶茶味道，好飲！下次會encore尼個set 🤤🤤🤤。總結： 性價比高💰，食物質素好，上菜速度快，經開尼頭可以幫襯下，推介大家試吓～…查看更多

幾好味都冇下一次，何況食物環境都好一般。好唔好彩，上菜之前我借用佢哋嘅洗手間，搵廁所既路途中唔覺意望咗入去佢哋廚房，恐怖既事就出現啦……發現廚房入邊嘅員工冇一個戴口罩，講緊人數最少有六至七個人，見到之後當下冇哂食慾，懷疑眼睛，心諗到底呢個只係冰山一角？定係其實只係我後知後覺，普遍食肆都係咁嘅呢？其實開住廚房門，食客經過會見到，而且當時都係冬天，都咁樣煮野食，咁夏天呢？萬一其中一個有確診左，哈哈哈我地真係多謝你😊所以我好肯定：請我都唔會再食呢間黑心垃圾🤡🤡🤡…查看更多

好豐富既all day：最愛Eggs Benedict🤤 海量沙律菜😍 粟米用牛油炒香🙈 跟餐可以半價配特飲，花茶入面有果乾同淡淡花香，清清地～水牛城雞翼：唔記得走辣，係香口同入味既，唔食辣既人小心😂牛油果沙律：醋汁酸酸地好開胃，份量多，抵食～青醬意粉：帶子煎到岩岩好，意粉就偏焾身，個人比較中意有口感～可惜薯餅煙肉炸到過左火同埋等候食物時間都比較耐冇計時，約莫有20分鐘🤔總結女仔食一定夠飽hahaha…查看更多

之前經過幾次見到排長龍，今日冇人排隊又有啲餓就幫襯下啦～ 以前食過啲粉果，完全係過份吹奏既，不過好多人話燒賣先係尼度招牌小食，就俾多次機會佢🧐2蚊一粒其實唔平😥 見到師傅係廚房入面默默用心製作 就試吓吧熱辣辣，香魚肉味既，相信加埋辣油會更好味，但性價比低比起粉果的確係好食啲既…查看更多

平日係中環食晏想食cafe，放飯可以抖抖氣好重要😛尼度環境幾特別，可以坐係戶外望住色彩繽紛既花花草草食飯，有太陽傘唔會太曬，又唔會對正大街咁喧嘩👍🏻 不過缺點係有蚊，幸好已經入冬🥲尼度既餐牌將菜色卡路里列哂出黎，keep fit既話想計住自己要做番幾多運動就可以一目了然啦～😌 沙律比想像中細碟，火腿味好濃烈，下圖為唔小心食左1/3先影，並唔係上菜的樣子啊～😂意粉夠味得黎唔太滯，個人麻麻地太creamy既意粉，太大罪惡感🤭 帶子煎完保留到鮮甜同水份，入面有刺身口感，正想食多幾粒😋仲有叫咸蛋黃雞翼，忘記影相，比較普通，只係雞翼煎完再淋上咸蛋黃醬汁，冇咩特別印象，個人覺得cobber coffee 的雞翼大隻好多入味好多🤭 可以唔洗叫有機會想試下yoghurt bowl 🥣 😋…查看更多

車仔麵由細食到大，大個左耐唔耐都會食下，而尼間食過幾次都keep住水準，推介過俾朋友食都讚👍🏻重點係配料同湯底選擇多 對我黎講，有啲配料喺其他地方比較少見例如沙薑豬手、醬燒豬頸肉同鳳爪等等…全部都想試haha🤤我每次都嗌豬頸肉，彈牙爽口蘿蔔好甜好多汁，中和肉類既肥膩桔仔水好清涼，同辣味湯底係絕配👍🏻環境方面好有舊香港感覺，聽住80年代廣東歌，係幾有特色既😌🎵…查看更多

睇Youtube有人介紹尼度，見評價唔錯，於是就黎試試日本鐵板燒😆。 一入去就見bar枱同鐵板，睇住師傅煮鐵板燒應該幾正，可惜我地book唔到🙈。不過食物一樣咁吸引咁出色，每樣都份量岩岩好，就算兩個人分，都可以試到唔同款式，個人比較中意關東煮，芝士蛋奄列同牛舌。關東煮揀左蘿蔔同豆腐，兩樣都好入味，個湯唔會太鹹～蛋奄列建議趁熱食，我地掛住影相攤涼左🙈 芝士份量適中唔覺太漏，睇落好似好普通既菜式，好味在個調味同奄列既生熟程度，入面唔乾，下次去實會再嗌😋牛舌好juicy，彈牙唔un，極高質，又係必點大板燒配埋紫菜粉正👍🏻黑豚腩扒既伴菜有塊大薯餅好好食，至於肉就不過不失，可以試其他～。尼間係一定會再去既日本餐廳，侍應服務態度良好，就好似用廣東話溝通既日本人咁有禮貌😂 期間有日本人幫襯，見侍應都好專業用流利日文溝通，細節都做足，就坐時準備好熱毛巾喺枱上面，一餐飯就有日本既感覺，性價比超高，極推！💯 …查看更多

大圍有唔少cafe，尼間save低左一直想去，見網上分享大圍站行10分鐘左右，c出口經天橋向田心村方向行(有少少難搵，好彩有朋友帶路🙈) 分別叫左牛油果煙三文魚bagel，法式蛋卷，冰火蘋果批，每碟都有沙律伴菜，份量唔少🥗😋 Latte 甜度適中👍🏻如果想嘆一個下午，尼度都係個唔錯選擇，慢活一下~😇…查看更多

由於冇預約服務，建議早少少拎位，今次等左半個鐘左右入座。叫左辣番茄大蝦意粉，蟹肉蛋白多士，番茄肉丸，芝士焗大啡菇，蒜香蜜糖雞翼同埋甜品。。餸菜上碟速度快，賣相吸引，就算放左陣打個卡都夠熱，各樣野食都好岩口味，而且份量唔少，三個人多到食唔哂要拎走😂 多士既蟹肉好似坐山咁堆係蛋白上面，超滿足～ 雞翼同意粉已經係第二次食😆，其他小食就不過不失，疏乎厘可以揀叫起，記得趁熱食喔～。整體黎講，食物質素高，環境舒服，推介同朋友黎聚下傾計。…查看更多

第一次寫寫評，記錄一下不愉快體驗。上次經過門口見好多人等位，屋企人一心想試試尼間既中菜。就係一個星期六晚，我地諗住一試，大約7:30到門口唔見人龍，心諗唔洗等位正，不過亦冇侍應招呼，入面冷冷清清，於是就是但搵張枱坐低。本來想叫四人餐，不過款式有限揀唔岩，咁唯有散叫啦～ order左煎蛋肉醬意粉，京都排骨套餐，菜遠牛肉飯。見佢poster推介套餐加錢有碟菜心，就諗住加一碟送下其他餸咁啦，不過侍應話冇菜心，咁問有冇其他菜，佢都係話冇菜心，售罄咁話，咁就由佢啦。而之後上菜就奇怪啦，唔知係誤會定點，見到菜遠牛肉飯上面，有幾棵菜心係度，如是者我地再問另一人，佢都係咁講，再追問之下，佢解釋指「廚房同水吧淥菜係分開既，廚房有菜，水吧冇」下。。。有食材，但煮唔到，我少見世面，第一次聽尼個原因😀食物黎講，份量似下午茶，有啲懷疑雙眼，個意粉就係得咁多，醬就多啦，意粉？小朋友都唔夠食。再講10蚊一碗飯，外表已經唔平均，入面鬆軟，俾啲誠意好嘛？半碗就差唔多😀 第一次用家體驗令我明白冷清係有佢原因既，可能係我肚餓啦，下次食番樓下茶記算數，價錢合理又大碟，食得暢快。見到啲好評話做街坊生意，可能今時唔同往日啦，我只係覺得欺騙街坊感情，難怪唔洗等位啦。🌝🌝🌝…查看更多