KellyCheuk的个人专页

食曬先發現無影相...😅淨係第一碟上既鴨脾醬油意粉記得影！🦆鴨脾醬油炒意粉熟得黎係煙韌彈牙，唔知大廚張生點做到 🤔 。醬油好香，鹹甜適中，微辣好好食！！份量一啲都唔孤寒，啱曬同朋友share，貪食又獨食者自私食都好啱！個鴨腿表皮香口，鴨肉軟熟但同時食到肉纖維一絲絲。個人覺得真係好好好好好好食！😍😍呢碟嘢俾我買曬材料返屋企都未必整到。仲要上菜速度快到不可思議⋯⋯🙀但見到大廚好忙碌，其實都會知道佢係好想客人快快有嘢食所以咁快。之後就係🦀️忌廉蟹肉意大利飯。好香濃既忌廉同鮮甜既蟹肉，因為個鴨脾醬油炒意粉太邪惡，要飲啖水先可以食到個意大利飯。義大利飯粒粒漲bokbok，啖啖蟹肉，不過相對醬油意粉就無咁鹹，應該係想蟹肉做主角，一樣係好好食。仲有個血瑪麗大蝦意粉🦐，係辣番茄味，可以揀辣度，我地揀小辣啱啱好，好惹味。啲蝦好新鮮，彈牙鮮甜！意粉一樣唔會過熟，個味調得好好！幾樣嘢好似一般人都知係咩材料，但就係煮到個高cp值既味道。如果住得近西營盤，真係晚飯好去處。材料貨真價實，價錢合理，而且就係煮得好食過好多地方！（我都唔知點解）佢地都唔係用咩好fansy既材料，但小店而言菜式好多元化（要食曬張餐單好似仲要去多好多次）。一家三口營業一腳踢，一晚都係做一轉客人，食飯唔似連鎖店限時。好用心做食物，希望咁出色既小店可以多啲人認識 ：）個醬油意粉真係會令人好掛住。😔😔 點解我唔係住西營盤呢⋯⋯…查看更多

{食物滿分}屋企人喜歡海天的食物，廚房出品用心，好食眾所周知。{接線職員及支客職員垃圾}接線支客職員態度氣焰極大，無論你打去態度如何有禮貌，說話已經幾清晰，對方都會以極差態度及遊花園。試過打電話訂座，接線櫃檯職員態度極差，口音廣東話但講野好快，亦無耐性同你講原因。旺季提早成功訂座，訂座當日太早未有菜單，但及至預約前一日都未有，致電查詢，接線職員一樣態度差，亦以「你到時黎現場睇」敷衍，難道顧客對幾千蚊一圍飯局食物菜式都無任何知情權？見過佢地出面排長龍，都會留檯俾熟客。或者呢套好過時，不過呢間酒樓就仲好岩用。甘多年態度都甘差既職員到而家都做緊，經理究竟係包庇，定係客人縱容出甘既運作同服務態度，真不得而知。顧客角度，良好既預約方式及良好溝通係必須，否則不過是浪費廚房良好既出品。…查看更多

我唔敢講我係食家，但係我一個月起碼食兩次拉麵，一黎好食，二黎比起其他野飽，三黎比起其他野平。 所以我係喜歡食拉麵的。食過大坑 銅鑼灣 北角 中環等唔同地方十多間沾麵拉麵，未食過我稱得上難食既拉麵。皆因就算湯底唔係好精心熬制，有味精都起碼有特別味，麵都係幼身拉麵生麵。反而未試過元朗屋企附近的拉麵，夜了回家就搵間試一試。見到麵家山下評價幾好就試下。完全唔明好評何來。叫左一個叉燒拉麵醬油味，加蛋，75元，想享受一個人的拉麵，誰知中伏。第一，麵條只有一種選擇，就係似公仔麵的拉麵。粗身，唔知做乜有鹼水味，可能瀝水不足。同我食開軟身幼拉麵係兩回事。第二，湯底連公仔面都比唔上，毫無誠意。由於麵有鹼水味，成碗已經充斥住少少苦澀，懷疑水無瀝乾，也應該因此溝淡了湯。但本身個湯就非常普通。第三，蛋雖然流心，但係無心機整，因為完全無浸醬油，無味，好失望。叉燒薄身，OK香口，有幾片，係成碗麵比較好的部分。總刮黎講，我唔明點解有好評，開始懷疑係自己太重口味，還是我中意食的都不是拉麵。利益申報而言，本人喜歡吃金田家及豚王，亦喜歡別天神。銅鑼灣 廣島霸嗎拉麵，相對便宜的一家銅鑼灣拉麵 89元就有一碗，那麼我幫襯麵家山下這種質素都要75元，其實非常貴。這個味道，最多只可以收50元左右。極失望。…查看更多