w4nkelhock的个人专页

星期日去大美督見到有一間台灣菜同茶飲店。餐廳好闊落，有戶外同室內位揀，一入去兩個侍應好熱情咁招呼，感覺已經好好。嘢食方面有好多選擇，全部都係正宗嘅台灣菜同茶飲。我叫咗一個三寶牛肉麵同埋一杯黑糖波霸鮮奶，牛肉麵有唔同嘅麵種可以揀，我最後揀咗手工麵。上菜嘅速度好快，同埋俾佢嘅份量驚喜到。碗麵好大碗，同埋唔係一般牛肉麵，而係有牛筋 牛肚 同埋牛鍵肉。湯底亦都唔係普通味精湯，係好重牛味，仲有啲藥材味同少少辣。好足料，食完係會好滿足同飽肚！嘢飲係超級大杯，好多珍珠，黑糖同鮮奶嘅比例啱啱好，唔會太甜。特別想讚下服務！侍應嘅服務非常好，好有禮貌。落單嘅時候有問必答，介紹咗唔同麵嘅分別。好深刻嘅係佢哋嘅主動熱情，上餐嘅時候搵唔到匙羹，我無問但係佢哋見到我搵緊，主動攞俾我，好加分！非常推薦去食，有種去咗台灣一轉嘅感覺！…查看更多